Jiwheyẹwhe dọna Adam dọmọ: “To azán he gbè hiẹ dù sọn [atin lọ] mẹ te, na jide tọn, hiẹ na kú.” (Jenẹsisi 2:17) Eyin Adam ko yin didá nado poyọnho bo wá kú wẹ, gbedide enẹ ma na ko tindo zẹẹmẹ depope. Adam yọnẹn dọ eyin emi ma dù atin-sinsẹ́n lọ, emi ma na kú.

Adam po Evi po ma do hudo atin-sinsẹ́n lọ tọn nado nọgbẹ̀, na atin-sinsẹ́n susu devo lẹ to jipa lọ mẹ. (Jenẹsisi 2:9) Eyin asu po asi po tintan lọ ma dù atin-sinsẹ́n lọ, yé na ko gbọnmọ dali setonuna Mẹhe na yé ogbẹ̀. Enẹ nasọ dohia dọ yé yọnẹn dọ Jiwheyẹwhe kẹdẹ wẹ tindo aṣẹ nado deanana yé.

Nado yọ́n nuhewutu Adam po Evi po do kú, mí dona gbadopọnna hodọdopọ de he wá aimẹ bo gando mílọsu go. Satani Lẹgba yí odàn de zan bo dolalo ylankan de. Biblu dọmọ: “Odàn wẹ yin kanlin he bí hugan to gbekanlin danji tọn he Jehovah Jiwheyẹwhe ko basi lẹpo mẹ. Enẹwutu, e dọna yọnnu lọ dọmọ: ‘Be nugbo wẹ dọ Jiwheyẹwhe ko dọ dọ mì ma dona dù sọn depope to atin jipa lọ tọn lẹ mẹ ya?’”—Jenẹsisi 3:1.

Evi gblọnna ẹn dọmọ: “Mí sọgan dù sọn sinsẹ́n atin jipa lọ tọn lẹ mẹ. Ṣigba, Jiwheyẹwhe ko dọ gando sinsẹ́n atin he tin to jipa lọ ṣẹnṣẹn tọn go dọ: ‘Mì ma dona dù sọn e mẹ paali, mì ma dona doalọ e go; e ma yinmọ, mì na kú.’” Enẹgodo, odàn lọ dọna Evi dọmọ: “Na jide tọn, mì ma na kú gba. Na Jiwheyẹwhe yọnẹn dọ gbeegbe mì dù sọn e mẹ te, nukun mìtọn nasọ hùn bọ mìwlẹ na taidi Jiwheyẹwhe bo na nọ yọ́n dagbe po oylan po.” Po hogbe enẹlẹ po, Satani to didọ dọ lalonọ wẹ Jehovah bo to nudagbe de ze whlá do mẹjitọ mítọn tintan lẹ.—Jenẹsisi 3:2-5.

Evi yí enẹ sè bo jẹ atin lọ pọ́n ji tlintlin. E mọdọ e yọ́npọ́n, bo yọ́n na dùdù! Enẹwutu, e gbẹ̀n sinsẹ́n etọn bo jẹ dùdù ji. Biblu yidogọ dọmọ: “Enẹgodo, e sọ na asu etọn to whenue e tin po e po podọ ewọ lọsu dù ga.”—Jenẹsisi 3:6.

Lehe e na ko vẹna Jiwheyẹwhe sọ dọ ovi yiwanna etọn lẹ desọn ojlo mẹ bo vẹtolina ẹn! Etẹwẹ e wà? Jehovah dọna Adam dọmọ: “Hiẹ na . . . gọ̀ do aigba mẹ, na e mẹ wẹ hiẹ yin didesọn. Na kọ́gudu wẹ hiẹ podọ kọ́gudu mẹ wẹ hiẹ nasọ gọ̀ do.” (Jenẹsisi 3:17-19) Taidi kọdetọn de, “ojlẹ he Adam nọgbẹ̀ na lẹpo yin owhe 930, bọ e sọ kú.” (Jenẹsisi 5:5) Adam ma yì olọn mẹ kavi ofi mọnkọtọn de gba. Adam ma ko tin to fidepope whẹpo Jehovah do dá ẹ sọn kọ́gudu mẹ. Enẹwutu, whenue e kú, e lẹzun onú tata taidi kọ́gudu he mẹ e yin didá sọn. E lẹzun matintọ. E blawu!

Na Adam po Evi po vẹtoli sọn ojlo mẹ wutu, yé masọ yin mẹpipe ba bo hẹn todido nado nọgbẹ̀ kakadoi bu. Agbasa yetọn diọ; yé lẹzun mapenọ podọ ylandonọ. Amọ́, e ma yin yewlẹ kẹdẹ wẹ ylando tonumase tọn yetọn bẹpla gba. Yé jo ogú ylando tọn na ovi yetọn lẹ. Lomunu lẹ 5:12 dọmọ: “Ylando gbọn mẹdopo gblamẹ biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè, na yemẹpo wẹ ko waylando wutu.”

Biblu basi zẹẹmẹ ylando po okú po tọn taidi “nukunmẹṣinyọnnu he yin ṣinṣinyọn na gbẹtọ lẹpo lọ . . . gọna avọ̀ linlọ̀n he yin titẹ́ do akọta lẹpo ji.” (Isaia 25:7) Nukunmẹṣinyọnnu enẹ ṣinyọ́n gbẹtọvi lẹ taidi zinvlu titli de. Na nugbo tọn, “mẹlẹpo to kúkú to Adam mẹ.” (1 Kọlintinu lẹ 15:22) Kanbiọ he fọndote todin wẹ dehe Paulu kanse dọmọ: “Mẹnu wẹ na whlẹn mi sọn agbasa he to okú ehe hẹnwa to yẹn mẹ lọ si?” Be mẹde gán penugo ya?—Lomunu lẹ 7:24.