HOSỌ OPLỌN TỌN 2
OHÀN 132 Mí Ko Lẹzun Agbasalan Dopo
Asu lẹ Emi, Mì Nọ Gbògbéna Asi Mìtọn
“Mì asu lẹ emi, . . . mì nọ wleyẹyina yé.”—1 PITA 3:7.
NUHE E BẸHẸN
Lehe asu de gán nọ gbògbéna asi etọn to ohó po walọ po mẹ do.
1. Etẹwẹ yin dopo to whẹwhinwhẹ́n he wutu Jehovah do basi tito alọwle tọn lẹ mẹ?
JEHOVAH wẹ “Jiwheyẹwhe ayajẹnọ lọ,” podọ e jlo dọ mílọsu ni do ayajẹ ga. (1 Tim. 1:11) E ko na mí nususu lẹ nado gọalọna mí, na mí nido duvivi ogbẹ̀ tọn. (Jak. 1:17) Dopo to nunina enẹlẹ mẹ wẹ alọwle. To whenue sunnu po yọnnu po de wlealọ, yé nọ dopà nado yiwanna yede, na sisi yede bosọ wlebòna ode awetọ. Eyin yé hẹn haṣinṣan pẹkipẹki de go, yé gán tindo ayajẹ nujọnu tọn.—Howh. 5:18.
2. Etẹwẹ yin ninọmẹ alọwle susu tọn to egbehe?
2 E blawu dọ to aihọn egbehe tọn mẹ, asu po asi po susu wẹ nọ wọn opà he yé do to alọwle-zán yetọn gbè lẹ. Taidi kọdetọn de, yé ma nọ do ayajẹ. To agọe, Pipli He Nọ Penukundo Agbasalilo Go Lẹdo Aihọn Pé na linlin dọ, asu susu lẹ wẹ nọ wà danú do asi yetọn, nọ dọ danú na yé kavi hẹn awugblena yé to numọtolanmẹ-liho. Asu he nọ wàmọ de gán nọ yinuwa hẹ asi etọn po sisi po to nukun mẹdevo lẹ tọn mẹ, amọ́ bo nọ wá yinuwa hẹ ẹ to aliho agọ̀ mẹ to whégbè. Humọ, alọwle susu wẹ nọ do nuhahun, eyin asu de nọ pọ́n yẹdide fẹnnuwiwa tọn.
3. Etẹlẹ wẹ gán yidogọna nuyiwa danuwadomẹgo tọn asu de tọn?
3 Etẹwẹ gán zọ́n bọ asu delẹ nọ yinuwa hẹ asi yetọn to aliho agọ̀ mẹ? Yé gán ko yin pinplọn whẹ́n gbọn otọ́ he nọ wà danú domẹgo de dali, ehe zọ́n bọ yé nọ lẹndọ e sọgbe nado yinuwa domọ. Mẹdevo lẹ nọ joawuna nuyiwadomẹji aṣa lẹdo yetọn tọn, ehe nọ nọgodona linlẹn agọ̀ lọ dọ “sunnu jọ sunnu de” dona nọ yí huhlọn do dohia asi ẹ dọ emilẹ wẹ yin ogán etọn. Sunnu devo lẹ ma yin pinplọn nado nọ dava numọtolanmẹ yetọn lẹ, ehe bẹ homẹgble yetọn hẹn. Sunnu delẹ ko wleawuna pọndohlan agọ̀ gando yọnnu lẹ po zanhẹmẹ po go, na yé nọ pọ́n yẹdide fẹnnuwiwa tọn wutu. Humọ, linlin lẹ dohia dọ azọ̀n bẹplamẹ COVID-19 tọn ko zọ́n bọ nuhahun ehelẹ sinyẹn deji. Na nugbo tọn, depope to whẹwhinwhẹ́n ehelẹ mẹ ma suwhẹna danuwadomẹgo asu de tọn.
4. Etẹwẹ asu Klistiani lẹ dona to aṣeji sọta, podọ etẹwutu?
4 Asu Klistiani lẹ dona to aṣeji ma nado wleawuna pọndohlan agọ̀ gando yọnnu lẹ go. a Etẹwutu? Whẹwhinwhẹ́n dopo wẹ yindọ nuhe mẹde nọ lẹn wẹ nọ saba tọ́n to walọ etọn lẹ mẹ. Apọsteli Paulu na avase Klistiani yiamisisadode lẹ to Lomu ma nado “hodo titonu ehe ba blo.” (Lom. 12:1, 2) To whenue Paulu kanwehlan Lomunu lẹ, e họnwun dọ owhe delẹ ko juwayi sọn whenue agun lọ yin didoai. Etomọṣo, hogbe Paulu tọn lẹ dohia dọ pọndohlan po aṣa aihọn lọ tọn lẹ po gbẹ́ to nuyiwa do mẹdelẹ ji to agun lọ mẹ. Enẹwutu wẹ e do dotuhomẹna yé nado diọ pọndohlan po walọ yetọn po. Ayihaawe ma tin dọ ayinamẹ enẹ gando asu Klistiani lẹ go to egbehe. E blawu dọ pọndohlan aihọn lọ tọn ko yinuwado delẹ to yé mẹ ji bọ yé tlẹ ko wà danú do asi yetọn lẹ. b Nawẹ Jehovah nọ donukun dọ asu de ni yinuwa hẹ asi etọn gbọn? Mí mọ gblọndo lọ to wefọ he ji hosọ ehe sinai do mẹ.
5. Sọgbe hẹ 1 Pita 3:7, nawẹ asu de dona nọ yinuwa hẹ asi etọn gbọn?
5 Hia 1 Pita 3:7. Jehovah degbena asu lẹ nado nọ gbògbéna asi yetọn. Gbégbò didohia nọ dlẹnalọdo aliho he mẹ mí nọ yinuwa hẹ mẹhe mí nọ na sisi de te. Asu de he nọ gbògbéna asi etọn nọ yinuwa hẹ ẹ to aliho he jọmẹ de mẹ, podọ po owanyi po. To hosọ ehe mẹ, mí na gbadopọnna lehe asu de gán do gbégbò hia asi etọn do. Amọ́ jẹnukọn whẹ́, mì gbọ mí ni dọhodo walọ delẹ he nọ de yẹyi sọn asi lẹ go ji.
GBẸ́ WALỌYIZAN HE NỌ DE YẸYI SỌN ASI TOWE GO LẸ DAI
6. Numọtolanmẹ tẹwẹ Jehovah nọ tindo gando sunnu he nọ wà danú do asi yetọn lẹ go? (Kolosinu lẹ 3:19)
6 Danuwadomẹgo. Jehovah gbẹwanna mẹdepope he nọ wà danú. (Salm. 11:5) Na taun tọn, e nọ gblewhẹdo asu he nọ wà danú do asi yetọn lẹ. (Mal. 2:16; hia Kolosinu lẹ 3:19.) Sọgbe hẹ wefọ he ji hosọ mítọn sinai do, enẹ wẹ 1 Pita 3:7, eyin asu de ma nọ yinuwa hẹ asi etọn to aliho he sọgbe mẹ, ehe na bẹpla haṣinṣan etọn hẹ Jiwheyẹwhe. Jehovah tlẹ gán nọma dotoaina odẹ̀ etọn lẹ.
7. Sọgbe hẹ Efesunu lẹ 4:31, 32, hogbe wunmẹ tẹlẹ wẹ asu lẹ dona nọ dapana? (Sọ pọ́n “Zẹẹmẹ Hogbe de Tọn.”)
7 Danú didọ namẹ. Asu delẹ nọ yí hogbe homẹgble po whánsọmẹ po tọn lẹ zan na asi yetọn. Amọ́, Jehovah gbẹwanna “homẹgble, adánjijẹ, awhá po mẹzunzun . . . po.” c (Hia Efesunu lẹ 4:31, 32.) E nọ sè nulẹpo. Aliho he mẹ asu de nọ dọhona asi etọn te, etlẹ yin to nuglọ to owhé yetọn gbè nọ duahunmẹna Jehovah. Asu he nọ ylangbè na asi etọn nọ hẹn haṣinṣan etọn hẹ asi ẹ, podọ hẹ Jiwheyẹwhe gble.—Jak. 1:26.
8. Nukun tẹwẹ Jehovah nọ yí do pọ́n yẹdide fẹnnuwiwa tọn, podọ etẹwutu?
8 Yẹdide fẹnnuwiwa tọn pinpọn. Etẹwẹ yin numọtolanmẹ Jehovah tọn gando yẹdide fẹnnuwiwa tọn go? E gbẹwanna ẹn. Enẹwutu, asu de he nọ pọ́n yẹdide gblewa tọn lẹ nọ hẹn haṣinṣan etọn hẹ Jehovah gble bosọ nọ de yẹyi sọn asi ẹ go. d Jehovah nọ donukun dọ asu de ni yin nugbonọ na asi etọn, e ma yin to walọ mẹ kẹdẹ, amọ́ to linlẹn etọn lẹ mẹ ga. Jesu dọ dọ, sunnu he pọ́n yọnnu devo sọmọ bo tindo ojlo zogbe de na ẹn, ko deayọ hẹ ẹ dote “to ahun etọn mẹ.” e—Mat. 5:28, 29.
9. Naegbọn Jehovah do gbẹwanna dọ asu de ni nọ de asi etọn pò to zanhẹmẹ whenu?
9 Mẹdèpo to zanhẹmẹ whenu. Asu delẹ nọ gbidikọna asi yetọn nado do mahẹ to kọndopọ zanhẹmẹ tọn he demẹpò lẹ mẹ, ehe nọ zọ́n bọ asi lọ nọ do numọtolanmẹ lọ dọ emi ma wé kavi dọ yè ma yiwanna emi. Jehovah gbẹwanna walọ ṣejannabi po mẹtọnmahopọn po tọn mọnkọ lẹ. E nọ donukun dọ asu de ni yiwanna asi etọn bo wlebòna ẹn bosọ nọ na sisi numọtolanmẹ etọn lẹ. (Efe. 5:28, 29) Etẹwẹ lo eyin asu Klistiani de ko nọ zan aṣa mẹdèpo tọn enẹ kavi nọ wà danú do asi etọn kavi nọ pọ́n yẹdide fẹnnuwiwa tọn lẹ? Nawẹ e gán diọ linlẹn po walọyizan etọn lẹ po gbọn?
LEHE ASU DE GÁN DOALỌTENA WALỌYIZAN YLANKAN LẸ DO
10. Nawẹ asu lẹ gán mọaleyi sọn apajlẹ Jesu tọn mẹ gbọn?
10 Etẹwẹ gán gọalọna asu de nado duto aṣa danuwadomẹgo po mẹdèpo po tọn lẹ ji? E gán dovivẹnu nado hodo apajlẹ Jesu tọn. Dile etlẹ yindọ Jesu ma wlealọ pọ́n, aliho he mẹ e yinuwa hẹ devi etọn lẹ te yin apajlẹ lehe asu de dona nọ yinuwa hẹ asi etọn do tọn. (Efe. 5:25) Di dohia, lẹnnupọndo nuhe asu lẹ gán plọn sọn aliho he mẹ Jesu yinuwa hẹ apọsteli etọn lẹ te gọna aliho he mẹ e nọ dọhona yé te mẹ ji.
11. Nawẹ Jesu yinuwa hẹ apọsteli etọn lẹ gbọn?
11 Jesu yinuwa hẹ apọsteli etọn lẹ to aliho he jọmẹ bosọ doyẹyigona yé de mẹ. E ma nọ ylanhùn do yé go kavi paṣẹ glanglan do yé ji gbede. Dile etlẹ yindọ Jesu yin Oklunọ podọ Ogán yetọn, e ma mọdọ e yin dandan nado dohia dọ emi dohuhlọn hú yé. Kakatimọ, e nọ gbọn whiwhẹ dali yilizọn na yé. (Joh. 13:12-17) E dọna devi etọn lẹ dọmọ: “Mì . . . plọnnu sọn dè e, na homẹmimiọnnọ po whiwhẹnọ to ahun mẹ po wẹ yẹn, mìwlẹ nasọ mọ kọfanamẹ na mìde.” (Mat. 11:28-30) Doayi e go dọ Jesu yin homẹmimiọnnọ. Eyin mẹde yin homẹmimiọnnọ enẹ ma zẹẹmẹdo dọ e ma dohuhlọn. Kakatimọ, e tindo huhlọn homẹ tọn lọ nado duto ede ji. To whenue yè do adán nukun na ẹn, e nọ gbọṣi abọẹ bo nọ dava numọtolanmẹ etọn lẹ.
12. Nawẹ Jesu dọhona mẹdevo lẹ gbọn?
12 Jesu yí hogbe etọn lẹ zan nado miọnhomẹna mẹdevo lẹ bo fakọna yé. E ma ylangbè na hodotọ etọn lẹ. (Luku 8:47, 48) Etlẹ yin to whenue nukundiọsọmẹtọ lẹ zun in bo tẹnpọn nado do adán nukun na ẹn, “ewọ lọsu ma zunmẹ.” (1 Pita 2:21-23) To ojlẹ delẹ mẹ, Jesu tlẹ de nado gbọṣi abọẹ kakati nado ylangbè namẹ. (Mat. 27:12-14) Apajlẹ dagbe nankọ die na asu Klistiani lẹ!
13. Dile Matiu 19:4-6 dọ do, nawẹ asu de “nọ sẹbọdo asi etọn go” gbọn? (Sọ pọ́n yẹdide lọ.)
13 Jesu na anademẹ asu lẹ nado nọ yin nugbonọ na asi yetọn. E yihodọ sọn nuhe Otọ́ etọn dọ mẹ, mẹhe dọ dọ asu de dona “sẹbọdo asi etọn go.” (Hia Matiu 19:4-6.) Hogbe Glẹkigbe tọn he yin lilẹdo “sẹbọdo” to wefọ enẹ mẹ, to paa mẹ zẹẹmẹdo “nado tlẹ́.” Enẹwutu, haṣinṣan alọwle tọn he to asu po asi po de ṣẹnṣẹn dona sinyẹn sọmọ bọ e na taidi dọ yé yin titlẹ́ dopọ wẹ nkọ. Eyin kanṣiṣa he to ṣẹnṣẹn yetọn sán, yé omẹ awe lẹpo wẹ na sè vivẹ́. Asu he wleawuna haṣinṣan mọnkọ hẹ asi ẹ na gbẹ́ yẹdide fẹnnuwiwa tọn wunmẹ lẹpo dai. E na nọ yawu lẹ́ nukun sẹ̀ sọn “nuhe yin ovọ́ lẹ pinpọn” ji. (Salm. 119:37) Na nugbo tọn, e na basi alẹnu de hẹ nukun etọn lẹ ma nado pọ́n yọnnu depope kaka bo tindo ojlo zogbe na ẹn adavo asi etọn.—Jobu 31:1.
Asu nugbonọ de nọ gbẹ́ nado pọ́n yẹdide fẹnnuwiwa tọn (Pọ́n hukan 13tọ) g
14. Afọdide tẹlẹ wẹ asu he nọ wà danú de dona ze nado vọ́ haṣinṣan etọn hẹ Jehovah podọ hẹ asi etọn jlado?
14 Asu de he nọ wà danú do asi etọn kavi nọ dọ danú na ẹn dona ze afọdide voovo lẹ nado vọ́ haṣinṣan etọn hẹ Jehovah podọ hẹ asi ẹ jlado. Afọdide tẹlẹ? Tintan, e na kẹalọyi dọ emi do nuhahun sinsinyẹn de. Nudepope ma whlá do Jehovah. (Salm. 44:21; Yẹwh. 12:14; Heb. 4:13) Awetọ, e na doalọtena danuwiwa do asi etọn go bo diọ walọyizan etọn. (Howh. 28:13) Atọ̀ntọ, e na vẹvẹna asi etọn po Jehovah po bo biọ jonamẹ yetọn. (Owalọ 3:19) E sọ dona vẹ̀ Jehovah nado tindo ojlo lọ nado diọ podọ nado gọalọna ẹn nado nọ dava linlẹn, hodidọ po nuyiwa etọn lẹ po. (Salm. 51:10-12; 2 Kọl. 10:5; Flp. 2:13) Ẹnẹtọ, e na yinuwa to kọndopọ mẹ hẹ odẹ̀ etọn lẹ bo plọn nado gbẹwanna danuwiwa po mẹzunzun wunmẹ lẹpo po. (Salm. 97:10) Atọ́ntọ, e na dín alọgọ sọn lẹngbọhọtọ owanyinọ he to agun lọ mẹ lẹ dè madọngbàn. (Jak. 5:14-16) Ṣidopotọ, e na kàn ayiha de he na gọalọna ẹn nado dapana walọyizan mọnkọ lẹ to nukọn mẹ. Afọdide ehelẹ dopolọ wẹ asu de he nọ pọ́n yẹdide fẹnnuwiwa tọn dona ze. Jehovah na dona vivẹnudido etọn lẹ nado diọ walọyizan etọn. (Salm. 37:5) Amọ́, e ma ko pé dọ asu de ni gbẹ́ walọyizan he nọ de yẹyi sọn mẹgo lẹ dai. E sọ dona plọn nado nọ do gbégbò hia asi etọn. Nawẹ e gán wàmọ gbọn?
LEHE A NA NỌ GBÒGBÉNA ASI TOWE DO
15. Nawẹ asu de gán nọ do owanyi hia asi etọn gbọn?
15 Nọ do owanyi hia. Mẹmẹsunnu he wlealọ bo do ayajẹ delẹ yí do dó aṣa nado nọ wà nude to azán dopodopo ji nado do obá he mẹ yé yiwanna asi yetọn jẹ hia. (1 Joh. 3:18) Asu de gán nọ do owanyi sisosiso hia asi etọn to onú flinflin delẹ mẹ, taidi nado nọ hẹn alọ go na ẹn kavi nado nọ gbò e fán po owanyi po. E gán nọ kanwehlan ẹn bo nọ dọna ẹn dọ “N’jẹdò towe” kavi kanse e dọ “Nawẹ azán lọ to yìyì do?” Sọn ojlẹ de mẹ jẹ devo mẹ, e gán nọ kàn hogbe he e yí sọwhiwhe do de delẹ do kalti de ji nado do owanyi etọn hia ẹ kavi hẹn núdùdù he e yiwanna de wá whégbè na ẹn. Eyin asu de nọ wà onú ehelẹ, e na gbògbéna asi etọn bo hẹn haṣinṣan alọwle tọn yetọn lodo.
16. Naegbọn asu de dona nọ pà asi etọn?
16 Nọ do pinpẹn nutọn hia. Asu de he nọ gbògbéna asi etọn nọ dọ nuhewutu e do họakuẹ na ẹn podọ e nọ na ẹn tuli. Dopo to aliho he mẹ e nọ wàmọ te lẹ mẹ wẹ nado nọ flin bo nọ do pinpẹn nutọn hia na nuhe asi lọ nọ wà nado nọgodona ẹn lẹpo. (Kol. 3:15) Eyin asu de nọ yí ahundopo do pà asi etọn, enẹ na nọ whàn ẹn taun. E na nọ mọ ede to hihọ́ glọ, nọ mọdọ yè yiwanna emi podọ dọ yè sọ gbògbéna emi.—Howh. 31:28.
17. Nawẹ asu de gán nọ do sisi hia asi etọn gbọn?
17 Nọ jọmẹ bosọ nọ do sisi hia. Asu he yiwanna asi etọn nọ doyẹyigona ẹn bosọ nọ wlebòna ẹn. E nọ pọ́n ẹn hlan taidi nunina họakuẹ de sọn Jehovah dè. (Howh. 18:22; 31:10) Taidi kọdetọn de, e nọ jọmẹ hẹ ẹ bosọ nọ do sisi hia ẹ, etlẹ yin to whẹho zanhẹmẹ tọn mẹ. E ma na nọ gbidikọna ẹn nado do mahẹ to kọndopọ zanhẹmẹ tọn he na dotukla ayihadawhẹnamẹnu etọn, he na zọ́n bọ e ma na voawu kavi mọdọ yè de emi pò mẹ. f E nasọ dovivẹnu nado hẹn ayihadawhẹnamẹnu wiwe de go to Jehovah nukọn.—Owalọ 24:16.
18. Etẹwẹ asu lẹ dona magbe nado nọ wà? (Sọ pọ́n apotin lọ “ Aliho Ẹnẹ Delẹ Nado Yin Asu He Nọ Do Sisi Hia.”)
18 Asu lẹ emi, mì gán kudeji dọ Jehovah nọ mọ vivẹnudido mìtọn nado gbògbéna asi mìtọn to adà gbẹzan tọn mìtọn lẹpo mẹ bosọ nọ yọ́n pinpẹn etọn. Magbe nado nọ gbògbéna asi towe bo nọ dapana walọyizan he nọ de yẹyi sọn e go lẹ, podọ nọ jọmẹ hẹ ẹ, nọ do sisi hia ẹ bosọ nọ do owanyi hia ẹ. Eyin a nọ wàmọ, a na dohia ẹ dọ a yiwanna ẹn bọ e sọ họakuẹ na we. Nọ gbògbéna asi towe, podọ a na basi hihọ́na haṣinṣan titengbe hugan towe, enẹ wẹ haṣinṣan towe hẹ Jehovah.—Salm. 25:14.
OHÀN 131 “Nuhe Jiwheyẹwhe Ko Kọndopọ”
a Asu lẹ na mọaleyi eyin yé hia hosọ lọ “Be A Nọ Yinuwa Hẹ Yọnnu lẹ Dile Jehovah Nọ Wà Do Ya?” he to Atọ̀họ̀-Nuhihọ́ lọ Tọn janvier 2024 tọn mẹ.
b Mẹhe jiya danuwadomẹgo to whẹndo mẹ tọn lẹ gán mọaleyi eyin yé hia hosọ lọ “Alọgọ Na Mẹhe Go Yè Wadanu Do to Whẹndo mẹ Lẹ” to “Hosọ Devo Lẹ” mẹ, ehe to hosọ debọdo-dego lẹ glọ to jw.org ji podọ to JW Library® mẹ.
c ZẸẸMẸ HOGBE DE TỌN: “Mẹzunzun” nọ bẹ yinkọ mẹdèpo tọn dido namẹ, danú didọ namẹ po homọdọdomẹgo whẹwhẹ po hẹn. Ohó depope he nọ hẹn yinkọ mẹtọn gble, demẹpò kavi gbleawunamẹ nọ yin pinpọnhlan taidi mẹzunzun.
d To jw.org ji podọ to JW Library mẹ, pọ́n hosọ lọ “Yẹdide Gblewa Tọn Pinpọn Gán Hẹn Alọwle Towe Gbà.”
e Asi de he asu etọn nọ pọ́n yẹdide gblewa tọn gán mọaleyi sọn hosọ lọ “Eyin Alọwlemẹ Towe Nọ Pọ́n Yẹdide Gblewa Tọn Lẹ” he to Atọ̀họ̀-Nuhihọ́ lọ Tọn août 2023 tọn mẹ.
f Biblu ma na nudọnamẹ gigọ́ lẹ gando aliho zanhẹmẹ tọn he dona yin pinpọnhlan taidi wiwe kavi mawé to asu po asi po de ṣẹnṣẹn go. Asu po asi po Klistiani de dona basi nudide he na do gbemima yetọn nado gbògbéna Jehovah bo hẹn homẹ ode awetọ tọn hùn bosọ hẹn ayihadawhẹnamẹnu wiwe de go hia. To paa mẹ, asu po asi po de ma na dọhona mẹdevo lẹ gando whẹho aṣli tọn alọwle yetọn tọn ehe go.
g ZẸẸMẸ YẸDIDE TỌN: Azọ́nwatọgbẹ́ mẹmẹsunnu de tọn he ma yin Kunnudetọ lẹ to tintẹnpọn nado gbidikọna ẹn, na e nido pọ́n linlinwe yetọn he mẹ yẹdide fẹnnuwiwa tọn tin te.
