1. Ale tẹwẹ mí nọ mọyi eyin mí yì Oflin okú Klisti tọn he nọ yin bibasi to whemẹwhemẹ lọ tẹnmẹ?

 MATIN ayihaawe, a kọngbedopọ dọ nunina he họakuẹ taun de wẹ ofligọ lọ yin! (2 Kọl. 9:15) Na Jesu yí ogbẹ̀ gbẹtọvi tọn etọn do sanvọ́ wutu, a gán jihọntọn pẹkipẹki hẹ Jehovah Jiwheyẹwhe. A gán sọ tindo todido lọ nado nọgbẹ̀ kakadoi. Lehe e sọgbe do sọ dọ mí ni yọ́n pinpẹn ofligọ lọ tọn bo dopẹna Jehovah, yèdọ mẹhe desọn owanyi mẹ do wleawuna ẹn! (Lom. 5:8) Jesu ze hùnwhẹ Oflin okú etọn tọn he nọ yin bibasi to whemẹwhemẹ lọ dai, nado gọalọna mí na mí nido yọ́n pinpẹn ofligọ lọ tọn bo ma yí nukunpẹvi do pọ́n ẹn gbede.—Luku 22:19, 20.

2. Etẹ ji wẹ mí na dọhodo to hosọ ehe mẹ?

² To owhe ehe mẹ, Oflin lọ na yin bibasi to samedi 12 avril 2025. Ayihaawe ma tin dọ mímẹpo wẹ to tito basi nado yì. Mí na mọ ale susu yí eyin mí yí whenu zan to ojlẹ Oflin tọn lọ mẹ do lẹnayihamẹpọn a do nuhe Jehovah po Visunnu etọn po ko wà na mí lẹ ji. To hosọ ehe mẹ, mí na dọhodo nuhe ofligọ lọ plọn mí gando Jehovah po Visunnu etọn po go ji. Hosọ he bọdego na gọalọna mí nado mọnukunnujẹ aliho he mẹ mí gán mọaleyi sọn ofligọ lọ mẹ te mẹ, gọna lehe mí gán dohia dọ mí yọ́n pinpẹn etọn do.

NUHE OFLIGỌ LỌ PLỌN MÍ GANDO JEHOVAH GO LẸ

3. Nawẹ okú mẹdopo tọn gán fli gbẹtọ livi susu lẹ gọ̀ gbọn? (Sọ pọ́n yẹdide lọ.)

³ Ofligọ lọ plọnnu mí gando whẹdida dodo Jehovah tọn go. (Deut. 32:4) Gbọnna? Lẹnnupọndo ehe ji: To whenue Adam vẹtoli, mí dugu ylando he hẹn okú wá lọ tọn. (Lom. 5:12) Nado  tún mí dote sọn ylando po okú po si, Jehovah do Jesu hlan nado fli mí gọ̀. Amọ́, nawẹ avọ́sinsan gbẹtọvi pipé dopo tọn gán fli gbẹtọ livi susu lẹ gọ̀ gbọn? Apọsteli Paulu basi zẹẹmẹ dọmọ: “Kẹdẹdile mẹsusu lẹzun ylandonọ gbọn tolivivẹ mẹdopo [Adam] tọn gblamẹ do, mọdopolọ ga wẹ mẹsusu na lẹzun dodonọ gbọn tonusise mẹdopo [Jesu] tọn gblamẹ do.” (Lom. 5:19; 1 Tim. 2:6) To hogbe devo mẹ, tolivivẹ gbẹtọvi pipé dopo tọn wẹ zọ́n bọ mí lẹzun afanumẹ ylando po okú po tọn. Enẹwutu, tonusise gbẹtọvi pipé dopo tọn wẹ e biọ nado tún mí dote.

4. Naegbọn Jehovah ma na dotẹnmẹ ahunjijlọnọ he to kúnkan Adam tọn mẹ lẹ nado nọgbẹ̀ kakadoi poun?

⁴ Be dandan wẹ dọ Jesu ni kú nado whlẹn mí ya? Be Jehovah ma gán ko de poun nado na dotẹnmẹ ahunjijlọnọ he to kúnkan Adam tọn mẹ lẹ nado nọgbẹ̀ kakadoi ya? To nukun gbẹtọvi mapenọ lẹ tọn mẹ, mọwiwà na ko yọ́n bosọ sọgbe hẹ lẹnpọn dagbe. Amọ́, enẹ ma sọgbe hẹ whẹdida dodo pipé Jehovah tọn. Na Jehovah nọ dawhẹ dodo wutu, e ma na de gbede nado miọnnukundo nuyiwa tolivivẹ tọn Adam tọn he jẹ gànna-gànna enẹ.

5. Naegbọn mí gán kudeji dọ Jehovah na nọ wà nuhe sọgbe to whepoponu?

⁵ Amọ́ etẹwẹ lo eyin Jehovah ma ko wleawu ofligọ lọ tọn, bo ze whẹdida dodo do apadopo gbọn dotẹnmẹ nina visunnu po viyọnnu mapenọ Adam tọn lẹ po nado nọgbẹ̀ kakadoi dali? Mẹlẹ gán nọ hànu dọ Jiwheyẹwhe na miọnnukundo whẹdida dodo to whẹho devo lẹ mẹ. Di apajlẹ, be e ma na gboawupo nado hẹn delẹ to opà etọn lẹ mẹ di ya? Mí ma dona nọ hànu dọ onú mọnkọ de gán jọ. Nugbo lọ dọ Jehovah hẹn whẹdida dodo ṣẹ mahopọnna nususu he e biọ to e si, enẹ wẹ nado yí Visunnu vivẹ́ etọn do sanvọ́, hẹn mí kudeji dọ ewọ na nọ wà nuhe sọgbe to whepoponu.

6. Etẹwẹ yin aliho de he mẹ ofligọ lọ nọ do owanyi Jehovah tọn hia te? (1 Joh. 4:9, 10)

⁶ Gbọnvona dọ ofligọ lọ nọ gọalọna mí nado mọdọ Jehovah nọ dawhẹ dodo, e sọ nọ gọalọna mí na taun tọn nado mọ obá he mẹ owanyi etọn siso jẹ. (Joh. 3:16; hia 1 Johanu 4:9, 10.) Nuplọnmẹ ofligọ lọ tọn dehia mí dọ Jehovah jlo dọ mí ni nọgbẹ̀ kakadoi, podọ ojlo etọn wẹ yindọ mí ni yin hagbẹ whẹndo etọn tọn. Lẹnnupọndo ehe ji: Whenue Adam waylando, Jehovah yàn ẹn sọn whẹndo sinsẹ̀n-basitọ Etọn lẹ tọn mẹ. Taidi kọdetọn de, depope mítọn ma yin jiji do whẹndo Jiwheyẹwhe tọn mẹ. Amọ́ to dodonu ofligọ lọ tọn ji, Jehovah nọ jona ylando mítọn lẹ, podọ to godo mẹ ewọ na hẹn gbẹtọvi he do yise hia bosọ yin tonusetọ lẹpo wá whẹndo etọn mẹ. Etlẹ yin todin, mí gán duvivi haṣinṣan  dagbe de tọn hẹ Jehovah podọ hẹ sinsẹ̀n-basitọ hatọ lẹ. Na nugbo tọn, Jehovah yiwanna mí sisosiso!—Lom. 5:10, 11.

7. Nawẹ yajiji Jesu tọn gọalọna mí nado mọ obá he mẹ Jehovah yiwanna mí jẹ gbọn?

⁷ Mí gán mọnukunnujẹ obá he mẹ Jehovah yiwanna mí jẹ mẹ dogọ, eyin mí lẹnnupọndo avọ́sinsan he e biọ to e si nado wleawuna ofligọ lọ ji. Satani sọalọakọ́n dọ devizọnwatọ Jiwheyẹwhe tọn depope ma na hẹn nugbonọ-yinyin etọn na Ewọ go to whenue e vẹawu taun nado wàmọ. Nado dohia dọ lalo wẹ whẹsadokọnamẹ enẹ, Jehovah dike bọ Jesu jiya whẹpo do kú. (Jobu 2:1-5; 1 Pita 2:21) Jehovah to pinpọn bọ sinsẹ̀nnọ nukundiọsọmẹtọ lẹ ṣàn Jesu kò, bọ awhànfuntọ lẹ hò e bo whè e do pòtin go. Enẹgodo, Jehovah to mimọ bọ Visunnu vivẹ́ etọn yin jijodo nado kú okú awufiẹsa tọn de. (Mat. 27:28-31, 39) Jehovah do huhlọn nado doalọtena ninọmẹ lọ. Di apajlẹ whenue nukundiọsọmẹtọ lẹ dọ dọ: “Gbọ [Jiwheyẹwhe] ni whlẹn ẹn gán todin eyin E tindo ojlo to ewọ mẹ,” Jehovah gán ko wàmọ poun. (Mat. 27:42, 43) Amọ́ eyin Jiwheyẹwhe dademẹ, ofligọ depope ma na ko yin súsú, podọ todido de ma na ko tin na mí. Enẹwutu, Jehovah dike bọ Visunnu etọn doakọnna yajiji kakajẹ whenue e gbọ gbigbọ godo tọn etọn.

8. Be Jehovah sè vivẹ́ to whenue e mọ bọ Visunnu etọn to yaji ya? Basi zẹẹmẹ. (Sọ pọ́n yẹdide lọ.)

⁸ Mì gbọ mí ni ma nọ lẹn blo dọ na Jiwheyẹwhe yin ganhunupotọ wutu, e ma nọ tindo numọtolanmẹ! Mí yin didá to apajlẹ etọn mẹ, po nugopipe lọ po nado nọ tindo numọtolanmẹ, enẹwutu e sọgbe nado lẹndọ Jehovah nọ tindo numọtolanmẹ lẹ. Biblu dọ gandego dọ “homẹgble e sinsinyẹn” podọ e “blawu.” (Salm. 78:40, 41) Sọ lẹnnupọndo numimọ Ablaham po Isaki po tọn ji. Flindọ yè degbena Ablaham nado yí visunnu etọn dopo gee lọ do sanvọ́. (Jen. 22:9-12; Heb. 11:17-19) Yí nukun homẹ tọn do pọ́n numọtolanmẹ voovo he Ablaham na ko tindo dile e to awuwle nado yí ohí do hù Isaki. Lehe Jehovah na ko blawu humọ do sọ dile e to pinpọn bọ gbẹtọ jijọ-madi-Jiwheyẹwhe tọn lẹ yí kanyinylan do to yasana Visunnu etọn kakajẹ okú!—Pọ́n video lọ Hodo Apajlẹ Yise Yetọn Tọn—Ablaham, Apá 2​tọ to jw.org ji.

9. Etẹwẹ a gán plọn sọn Lomunu lẹ 8:32, 38, 39 mẹ gando owanyi he Jehovah tindo na hiẹ po sinsẹ̀n-basitọ hatọ towe lẹ po go?

⁹ Ofligọ lọ plọn mí dọ mẹdepope ma yiwanna mí sọ Jehovah—etlẹ yin hẹnnumẹ kavi họntọn he mí vẹ́ hẹ hugan de. (Hia Lomunu lẹ 8:32, 38, 39.) Matin ayihaawe, Jehovah yiwanna mí hugan lehe mí yiwanna míde do. Be a jlo na nọgbẹ̀ kakadoi ya? Jehovah sọ jlo na we humọ. Be a jlo dọ ylando towe lẹ ni yin jijona  ya? Jehovah jlo na jo yé na we hú lehe a jlo do. Nuhe e biọ to asi we poun wẹ nado kẹalọyi nunina họakuẹ etọn gbọn yise didohia gọna tonusise dali. Na nugbo tọn, ofligọ lọ wẹ yin dohia owanyi sisosiso he Jiwheyẹwhe tindo na mí tọn. Podọ to aihọn yọyọ lọ mẹ, mí na tlẹ sọ plọnnu susu dogọ gando owanyi Jehovah tọn go.—Yẹwh. 3:11.

NUHE OFLIGỌ LỌ PLỌN MÍ GANDO JESU GO

10. (a) Etẹ na taun tọn wẹ hẹn Jesu blawu gando okú etọn go? (b) Aliho tẹlẹ mẹ wẹ Jesu suwhẹna oyín Jehovah tọn te? (Sọ pọ́n apotin lọ “ Tenọgligo Hinhẹn Jesu Tọn Suwhẹna Oyín Jehovah Tọn.”)

¹⁰ Yinkọ dagbe Jiwheyẹwhe tọn nọ duahunmẹna Jesu. (Joh. 14:31) Jesu blawu to whenue e mọdọ owhẹ̀ nùzinzan po sébibla po tọn he na yin sisadokọna emi gán hẹn vlẹko wá oyín Otọ́ emitọn tọn ji. Enẹwutu wẹ e hodẹ̀ dọ: “Otọ́ ṣie, eyin e yọnbasi, dike kọfo ehe ni juwayi sọn dè e.” (Mat. 26:39) Na Jesu hẹn tenọgli etọn go na Jehovah kakajẹ okú wutu, e suwhẹna oyín Otọ́ etọn tọn.

11. Nawẹ Jesu do owanyi sisosiso hia gbẹtọ lẹ gbọn? (Joh. 13:1)

¹¹ Ofligọ lọ sọ plọn mí dọ onú gbẹtọ lẹ tọn nọ duahunmẹna Jesu, titengbe onú devi etọn lẹ tọn. (Howh. 8:31; hia Johanu 13:1.) Di apajlẹ, Jesu yọnẹn dọ adà lizọnyizọn aigba ji tọn etọn delẹ na kàn dẹpẹ biọ, titengbe okú awufiẹsa tọn etọn. Amọ́ enẹ ma zọ́n bọ Jesu hẹn azọ́ndenamẹ etọn to aigba ji di po mananọmawà po. Kakatimọ, Jesu yí ahun lẹpo do dọyẹwheho, plọnnumẹ bosọ yilizọn na mẹdevo lẹ. Etlẹ yin to kú-zangbe Jesu tọn, e yí whenu zan nado klọ́afọna apọsteli etọn lẹ bo dọho homẹmiọnnamẹ tọn susu lẹ na yé bosọ na yé anademẹ godo tọn lẹ. (Joh. 13:12-15) Enẹgodo whenue Jesu to pòtin ji, e basi tito na mẹde nido penukundo onọ̀ etọn go bosọ yí  whenu vude zan nado na todido sẹ́nhẹngbatọ he to kúdonu de. (Luku 23:42, 43; Joh. 19:26, 27) Gbọnmọ dali, okú Jesu tọn po gbẹzan aigba ji tọn etọn blebu po do owanyi sisosiso etọn na mí hia.

12. Linlẹn tẹ mẹ wẹ Jesu zindonukọn nado to avọ́san do ota mítọn mẹ te?

¹² Dile etlẹ yindọ Klisti kú “whladopo podọ kakadoi,” e gbẹ́ to avọ́san do ota mítọn mẹ. (Lom. 6:10) Gbọnna? E zindonukọn nado nọ yí whenu etọn zan bosọ to vivẹnudo na mí nido duvivi ale he ofligọ lọ hẹn ẹn yọnbasi lẹ tọn. Lẹnnupọndo nuhe e to wiwà to alọnu lẹ ji. E to sinsẹ̀n taidi Ahọlu mítọn, Yẹwhenọ Daho podọ ota agun lọ tọn. (1 Kọl. 15:25; Efe. 5:23; Heb. 2:17) Ewọ wẹ to azọ́nwa nado bẹ mẹyiamisisadode lẹ po gbẹtọ susugege lọ po pli, yèdọ azọ́n de he na fó whẹpo nukunbibia daho lọ nido wá vivọnu. b (Mat. 25:32; Malku 13:27) E sọ nọ hẹn ẹn diun dọ devizọnwatọ nugbonọ etọn lẹ dùnú ganji to gbigbọ-liho to azán godo tọn ehelẹ mẹ. (Mat. 24:45) Podọ to Gandudu Owhe Fọtọ́n Tọn etọn blebu gblamẹ, e na zindonukọn nado to nukunpedo mí go. Matin ayihaawe, Jehovah na mí Visunnu etọn nugbonugbo!

MA DOALỌTENA NUPINPLỌN GBEDE BLO

13. Nawẹ ayihamẹlinlẹnpọn gán gọalọna we nado to nuplọn gando owanyi he Jiwheyẹwhe po Klisti po tindo na mí go gbọn?

¹³ A gán gbẹ́ to nuplọn gando owanyi he Jehovah Jiwheyẹwhe po Klisti Jesu po tindo na mí go eyin a zindonukọn nado nọ lẹnayihamẹpọn do owanyi he yé dohia mí ji. Vlavo to ojlẹ Oflin tọn owhe ehe tọn mẹ, a gán yí sọwhiwhe do hia Owe Wẹndagbe tọn lẹ dopo kavi humọ. Ma tẹnpọn nado hia nususu dopọ ji blo. Kakatimọ, yiagbọji bo dín whẹwhinwhẹ́n devo lẹ he wutu mí dona yiwanna Jehovah po Jesu po. Podọ, wà nuhe go a pé lẹpo nado má nuhe a plọn lẹ hẹ mẹdevo lẹ.

14. Sọgbe hẹ Salmu lẹ 119:97 po nudọnamẹ odò tọn po, nawẹ dodinnanu bibasi gán gọalọna mí nado to nuplọn gando ofligọ lọ gọna nuplọnmẹ devo lẹ go gbọn? (Sọ pọ́n yẹdide lọ.)

¹⁴ Eyin a ko to nugbo lọ mẹ sọn owhe susu die, a gán nọ kanse dewe eyin e yọnbasi nado mọ nuyọyọ lẹ plọn gando hosọ he mí ko jẹakọ hẹ taun delẹ go taidi whẹdida dodo Jiwheyẹwhe tọn, owanyi etọn po ofligọ lọ po. Nugbo lọ wẹ yindọ, nuhe mí gán plọn gando hosọ enẹlẹ po devo lẹ po go madodogbó. Enẹwutu, etẹwẹ a gán wà? Nọ mọaleyi to gigọ́ mẹ sọn nudọnamẹ dagbedagbe he owe mítọn lẹ nọ  bẹhẹn lẹ mẹ. Eyin a tọ́n jẹ wefọ he mẹ a ma mọnukunnujẹ ganji de ji, nọ basi dodinnanu. Enẹgodo, to azán lọ blebu gblamẹ, lẹnayihamẹpọn do nuhe a mọ gọna nuhe e plọn we gando Jehovah, Visunnu etọn po owanyi he yé tindo na we po go ji.—Hia Salmu lẹ 119:97 po nudọnamẹ odò tọn po.

15. Naegbọn mí dona zindonukọn nado to nuhọakuẹ lẹ dín to Biblu mẹ?

¹⁵ Ma gbọjọ blo eyin a ma nọ mọ nuyọyọ de kavi nuhe whànmẹ de to whedepopenu he a sinai nado hia Biblu kavi basi dodinnanu. To linlẹn de mẹ, a taidi mẹhe to sika dín de. E nọ fahomẹ na gànhiho susu kavi azán susu lẹ nado mọ etlẹ yin sika vude poun. Etomọṣo, e nọ sinyẹnlin, na sika kẹnnẹ-kẹnnẹ depope he e mọ nọ họakuẹ to nukun etọn mẹ. Lehe nugbo Biblu tọn depope he yin mimọ họakuẹ humọ do sọ! (Salm. 119:127; Howh. 8:10) Enẹwutu, fahomẹ bo tẹdo tito Biblu hihia tọn towe go.—Salm. 1:2.

16. Nawẹ mí gán hodo apajlẹ Jehovah po Jesu po tọn gbọn?

¹⁶ Dile a to nuplọn, nọ dín aliho lẹ nado yí nuhe a plọn lẹ do yizan mẹ. Di dohia, nọ hodo apajlẹ whẹdida dodo Jehovah tọn bo nọ yinuwa hẹ mẹdevo lẹ matin mẹnukuntahihopọn. Hodo apajlẹ owanyi he Jesu tindo na Otọ́ etọn po mẹdevo lẹ po tọn bo nọ wleawufo nado jiya na oyín Jehovah tọn wutu bosọ nọ yí dewe do sanvọ́ do ota Klistiani hatọ towe lẹ tọn mẹ. Humọ, hodo apajlẹ Jesu tọn gbọn kunnudidena mẹdevo lẹ dali, na yelọsu nido tindo dotẹnmẹ lọ nado kẹalọyi nunina họakuẹ Jehovah tọn.

17. Etẹwẹ mí na gbadopọnna to hosọ he bọdego mẹ?

¹⁷ Lehe mí mọnukunnujẹ ofligọ lọ mẹ bosọ yọ́n pinpẹn etọn do sọ, mọ wẹ mí na yiwanna Jehovah po Visunnu etọn po dogọ do niyẹn. Taidi kọdetọn de, owanyi he yelọsu tindo na mí na jideji. (Joh. 14:21; Jak. 4:8) Enẹwutu, mì gbọ mí ni nọ yí awuwledainanu Jehovah tọn lẹ zan nado zindonukọn bo to nuplọn gando ofligọ lọ go. To hosọ he bọdego mẹ, mí na gbadopọnna aliho delẹ he mẹ mí gán mọaleyi sọn ofligọ lọ mẹ te gọna lehe mí gán do pinpẹn nutọn mítọn hia na owanyi Jehovah tọn do.