HOSỌ OPLỌN TỌN 5
OHÀN 108 Owanyi Nugbo Jiwheyẹwhe Tọn
Lehe Mí Nọ Mọaleyi sọn Owanyi Jehovah Tọn Mẹ Do
“Klisti Jesu wá aihọn mẹ nado whlẹn ylandonọ lẹ gán.”—1 TIM. 1:15.
NUHE E BẸHẸN
Lehe mí nọ mọaleyi sọn ofligọ lọ mẹ do gọna lehe mí gán do pinpẹn nutọn mítọn hia Jehovah do.
1. Etẹwẹ mí gán wà nado hẹn homẹ Jehovah tọn hùn?
MÍ NI dọ dọ a na nunina vonọtaun he yọ́npọ́n bosọ yọ́n-na-yizan de mẹhe a yiwanna de. Lehe a na jẹflumẹ do sọ eyin mẹlọ ze e do númẹ poun bo ma tlẹ sọ lẹnnupọndeji! To alọ devo mẹ, ayihaawe ma tin dọ homẹ towe na hùn taun eyin mẹlọ yí nuhe a na ẹn lọ zan to aliho dagbe mẹ bosọ dohia dọ emi yọ́n pinpẹn etọn. Etẹwẹ yin nuagokun lọ? Jehovah ze Visunnu etọn jo do ota mítọn mẹ. Lehe homẹ Jehovah tọn dona nọ hùn do sọ whenue mí do pinpẹn nutọn hia na nunina họakuẹ enẹ, podọ na owanyi etọn he whàn ẹn nado wleawu ofligọ lọ tọn!—Joh. 3:16; Lom. 5:7, 8.
2. Etẹwẹ mí na gbadopọnna to hosọ ehe mẹ?
2 Amọ́ dile ojlẹ to yìyì, mí gán jẹ nukunpẹvi yí do pọ́n nunina ofligọ lọ tọn ji. Mọwiwà na taidi dọ mí ze nunina Jiwheyẹwhe tọn do númẹ wẹ nkọ. Homẹ mítọn hùn do nunina lọ go, amọ́ mí ze e whlá. Ma nado dike enẹ ni jọ, mí dona nọ hẹn pinpẹn nutọn mítọn na nuhe Jiwheyẹwhe po Klisti po wà na mí jẹ yọyọ whẹwhẹ. Hosọ ehe gán gọalọna mí nado wàmọ. Mí na gbadopọnna lehe mí nọ mọaleyi sọn ofligọ lọ mẹ do todin gọna lehe mí gán mọaleyi sọn e mẹ do to sọgodo. Mí nasọ dọhodo lehe mí gán do pinpẹn nutọn hia na owanyi Jehovah tọn titengbe to ojlẹ Oflin tọn ehe mẹ do ji.
LEHE MÍ NỌ MỌALEYI DO TODIN
3. Etẹwẹ yin aliho de he mẹ mí ko to alemọyi sọn ofligọ lọ mẹ te todin?
3 Mí ko to alemọyi sọn avọ́sinsan ofligọ tọn Klisti tọn mẹ. Di apajlẹ, to dodonu ofligọ lọ tọn ji, Jehovah nọ jona ylando mítọn lẹ. E ma to dandannu glọ nado jona mí. Amọ́ e nọ wàmọ sọn ojlo mẹ wá. Salmu-kantọ lọ jihàn bo do pinpẹn nutọn hia dole: “Na hiẹ yọ́n bo nọ wleawu nado jonamẹ, Jehovah E.”—Salm. 86:5; 103:3, 10-13.
4. Mẹnu lẹ wẹ Jehovah wleawu ofligọ lọ tọn na? (Luku 5:32; 1 Timoti 1:15)
4 Mẹdelẹ gán nọ lẹndọ emi ma jẹna jonamẹ Jehovah tọn. Na taun tọn, depope mítọn ma jẹna. Apọsteli Paulu mọnukunnujẹemẹ dọ emi “ma jẹ nado yin yiylọdọ apọsteli de.” Podọ, e yidogọ dọ: “Gbọn nukundagbe majẹhẹ Jiwheyẹwhe tọn dali wẹ yẹn do yin nuhe yẹn yin.” (1 Kọl. 15:9, 10) Whenue mí lẹnvọjọ sọn ylando mítọn lẹ mẹ, Jehovah nọ jona mí. Etẹwutu? E ma yin na mí jẹna wutu wẹ gba, amọ́ na e yiwanna mí wutu. Eyin numọtolanmẹ nuvọ́nọ-yinyin tọn nọ dotukla we, flindọ Jehovah wleawuna ofligọ lọ, e ma yin na mẹhe ma do ylando lẹ amọ́ na ylandonọ he lẹnvọjọ lẹ.—Hia Luku 5:32; 1 Timoti 1:15.
5. Be owhẹ̀ depope to mí mẹ tọn na whẹ́n nado lẹndọ mí do jlọjẹ na lẹblanu Jehovah tọn ya? Basi zẹẹmẹ.
5 Eyin mí tlẹ ko zan owhe susu to sinsẹ̀nzọn Jehovah tọn mẹ, depope to mí mẹ ma dona nọ mọdọ mí do jlọjẹ na lẹblanu Jehovah tọn. Na nugbo tọn, Jehovah nọ yọ́n pinpẹn nugbonọ-yinyin mítọn tọn. (Heb. 6:10) E na mí Visunnu etọn taidi nunina de sọn ojlo mẹ wá, e ma yin taidi ahọsumẹ sinsẹ̀nzọn he mí wà na ẹn lẹ tọn. Eyin mí nọ mọdọ mí jẹna lẹblanu kavi mí tindo jlọjẹ vonọtaun de, na nugbo tọn didọ wẹ mí te dọ ovọ́ mẹ wẹ Klisti kú do.—Yijlẹdo Galatianu lẹ 2:21 go.
6. Naegbọn Paulu do wazọ́n sinsinyẹn to sinsẹ̀nzọn Jehovah tọn mẹ?
6 Paulu yọnẹn dọ emi ma gán jẹna nukundagbe Jiwheyẹwhe tọn. Bọ naegbọn e do wazọ́n sinsinyẹn sọmọ to sinsẹ̀nzọn Jehovah tọn mẹ? E ma yin nado do ede hia di mẹhe jẹna nukundagbe majẹhẹ Jehovah tọn gba, amọ́ nado dohia dọ emi yọ́n pinpẹn etọn. (Efe. 3:7) Taidi Paulu, mí nọ zindonukọn nado to Jehovah sẹ̀n po zohunhun po, e ma yin nado jẹna lẹblanu Jehovah tọn, amọ́ nado dohia dọ mí yọ́n pinpẹn etọn.
7. Aliho devo tẹ mẹ wẹ mí nọ mọaleyi sọn ofligọ lọ mẹ te to alọnu din? (Lomunu lẹ 5:1; Jakọbu 2:23)
7 Aliho devo he mẹ mí nọ mọaleyi sọn ofligọ lọ mẹ te todin wẹ yindọ mí gán tindo haṣinṣan mẹdetiti tọn pẹkipẹki de hẹ Jehovah. a Dile e yin nùdego do to hosọ he wayi mẹ, whenue mí yin jiji, mí ma tindo haṣinṣan de hẹ Jiwheyẹwhe. Amọ́ na ofligọ lọ tọn wutu, mí gán gbọṣi “jijọho mẹ hẹ Jiwheyẹwhe,” podọ enẹgodo, mí gán dọnsẹpọ ewọ.—Hia Lomunu lẹ 5:1; Jakọbu 2:23.
8. Naegbọn mí dona nọ yọ́n pinpẹn etọn na Jehovah dọ mí do lẹblanulọkẹyi lọ nado hodẹ̀?
8 Lẹnnupọndo adà haṣinṣan mítọn hẹ Jehovah tọn dopo poun ji, enẹ wẹ lẹblanulọkẹyi dẹ̀hiho tọn. Gbọnvona dọ Jehovah nọ sè odẹ̀ gbangba tọn he omẹ etọn lẹ nọ hò eyin yé pli dopọ, e sọ nọ sè odẹ̀ he dopodopo mítọn nọ hò to nuglọ lẹ. Odẹ̀ gán hòhuwhẹ ayiha mítọn bo na mí jijọho ahun mẹ tọn, amọ́ e sọ nọ wà humọ. E gán hẹn haṣinṣan mítọn hẹ Jiwheyẹwhe sinyẹn deji. (Salm. 65:2; Jak. 4:8; 1 Joh. 5:14) To whenue Jesu to aigba ji, e nọ hodẹ̀ whẹwhẹ na e yọnẹn dọ Jehovah nọ dotoai, podọ dọ dẹ̀hiho na hẹn haṣinṣan etọn hẹ Otọ́ etọn sinyẹn dogọ. (Luku 5:16) Lehe mí yọ́n pinpẹn etọn do sọ dọ to dodonu avọ́sinsan Jesu tọn ji mí gán lẹzun họntọn Jehovah tọn bo tlẹ nọ dọhona Ẹn to odẹ̀ mẹ!
LEHE MÍ GÁN MỌALEYI DO TO SỌGODO
9. Nawẹ sinsẹ̀n-basitọ nugbonọ lẹ na mọaleyi sọn ofligọ lọ mẹ to sọgodo gbọn?
9 Nawẹ sinsẹ̀n-basitọ nugbonọ Jehovah tọn lẹ na mọaleyi sọn ofligọ lọ mẹ to sọgodo gbọn? Yé na mọ ogbẹ̀ madopodo yí. Mẹsusu nọ lẹndọ ehe ma yọnbasi, na sọn owhe fọtọ́n susu lẹ die wẹ gbẹtọvi lẹ ko to kúkú. Amọ́, lẹndai dowhenu tọn Jehovah tọn wẹ yindọ gbẹtọvi lẹ ni nọgbẹ̀ kakadoi. Eyin Adam ma ko waylando wẹ, mẹde ma na ko lẹndọ ogbẹ̀ madopodo yin hójijlẹ de poun. Podọ to whenue e yindọ ogbẹ̀ madopodo gán taidi nuhe jiawu to ojlẹ mítọn mẹ, ahọ́ he Jehovah sú nado vọ́ todido mítọn ehe hẹn gọwá sọ jiawu ga, enẹ wẹ nunina Visunnu vivẹ́ etọn tọn.—Lom. 8:32.
10. Etẹwẹ mẹyiamisisadode lẹ po lẹngbọ devo lẹ po to nukundo?
10 Dile etlẹ yindọ ogbẹ̀ madopodo yin ale sọgodo tọn de, Jehovah jlo dọ mí ni nọ lẹnnupọn deji bẹsọn din. Mẹyiamisisadode lẹ to nukọnpọnhlan ogbẹ̀ nujọnu tọn de to olọn mẹ whenue yé na dugán hẹ Klisti do aigba ji. (Osọ. 20:6) Lẹngbọ devo lẹ to nukọnpọnhlan nado nọgbẹ̀ to paladisi mẹ to aigba ji, fie awufiẹsa po awubla po ma na tin te. (Osọ. 21:3, 4) Be a yin dopo to lẹngbọ devo he tindo todido lọ nado nọgbẹ̀ kakadoi to aigba ji lẹ mẹ ya? Ale enẹ ma yin ahọsumẹ homẹmiọnnamẹ tọn de poun! Nuhewutu gbẹtọvi lẹpo do yin didá niyẹn. Gbẹninọ to aigba ji na hẹn ayajẹ mayọnjlẹ wá na mí.
11, 12. Dona tẹlẹ wẹ mí gán to nukọnpọnhlan nado duvivi yetọn to Paladisi mẹ? (Sọ pọ́n yẹdide lọ lẹ.)
11 Yí nukun homẹ tọn do pọ́n lehe ogbẹ̀ towe na ṣí to Paladisi mẹ to aigba ji. A ma nasọ nọ hànu gando awutu kavi okú go ba. (Isa. 25:8; 33:24) Jehovah na hẹn pekọ wá na ojlo towe he sọgbe lẹpo. Etẹ go wẹ e na jlo we nado plọnnu gando? Be kanlin lẹ wẹ ya? Hànjinu de hihò wẹ ya? Kavi lehe yè nọ de yẹdide do? Ayihaawe ma tin dọ mí na do hudo yẹdenanutọ lẹ, họ̀gbátọ lẹ po gle-zọ́nwatọ lẹ po tọn. E họnwun dọ mí nasọ do hudo mẹhe na wazọ́n nukunpedonugo tọn lẹ gọna mẹhe na gọalọ to adà devo lẹ mẹ tọn taidi mẹhe na dà núdùdù, wleawuna azọ́nwanu lẹ po mẹhe na wlebòna aigba whanpẹnọ lọ po lẹ. (Isa. 35:1; 65:21) Po ojlẹ madopodo he to nukọn na we po, a na do whenu nado tẹ́n azọ́nyinyọnẹn depope he ji a gán ko lẹnnupọndo pọ́n.
12 Lehe e na yin ayajẹnu do sọ nado dokuavọna mẹhe na yin finfọnsọnku lẹ! (Owalọ 24:15) Sọ pọ́n lehe homẹ towe na hùn nado plọnnu dogọ gando Jehovah go bo gbadopọnna azọ́n nudida tọn etọn madosọha lẹ do sọ. (Salm. 104:24; Isa. 11:9) Hú popolẹpo, pọ́n lehe ayajẹ towe na sù sọ nado nọ sẹ̀n Jehovah matin numọtolanmẹ whẹhuhu tọn depope! Be a na jlo “nado dugbẹ ylando tọn na ojlẹ gli de” bo gbẹkọ dona sọgodo tọn enẹlẹ go wẹ ya? (Heb. 11:25) Matin ayihaawe, lala wẹ! Dona enẹlẹ ma gán yin yiyijlẹdo avọ́sinsan depope he mí dona basi todin go. Flindọ Paladisi aigba ji tọn ma na to todido sọgodo tọn de yin kakadoi. E na wá mọ hẹndi to gbèdopo. Eyin Jehovah ma ko yiwanna mí jẹ obá lọ mẹ bo na mí Visunnu etọn, depope to onú ehelẹ mẹ ma na yọnbasi!
Dona tẹlẹ sin vivi wẹ a to jejeji hugan nado dù to Paladisi mẹ? (Pọ́n hukan 11, 12tọ)
YỌ́N PINPẸN OWANYI JEHOVAH TỌN
13. Nawẹ mí gán do pinpẹn nutọn hia na owanyi Jehovah tọn gbọn? (2 Kọlintinu lẹ 6:1)
13 Nawẹ mí gán do pinpẹn nutọn hia Jehovah na ofligọ he e wleawu etọn na mí gbọn? Gbọn azọ́n etọn zizedo otẹn tintan mẹ to gbẹzan mítọn mẹ dali. (Mat. 6:33) Hú popolẹpo, Jesu kú “na mẹhe to ogbẹ̀ lẹ ma nado nọgbẹ̀ na yede ba, ṣigba na mẹlọ he kú na yé bo yin finfọn.” (2 Kọl. 5:15) Ayihaawe ma tin dọ mí ma jlo na gbọ lẹndai nukundagbe majẹhẹ tọn Jehovah tọn go.—Hia 2 Kọlintinu lẹ 6:1.
14. Nawẹ mí gán do yise hia to anademẹ Jehovah tọn lẹ mẹ gbọn?
14 Mí gán sọ do pinpẹn nutọn hia na owanyi Jehovah tọn eyin mí nọ do yise hia to anademẹ etọn lẹ mẹ. Gbọnna? Whenue mí jlo na basi nudide lẹ, taidi obá he mẹ mí na doafọna wepinplọn jẹ kavi agbasazọ́n wunmẹ he mí na kẹalọyi, mí dona nọ lẹnnupọndo nuhe Jehovah jlo dọ mí ni wà ji. (1 Kọl. 10:31; 2 Kọl. 5:7) Whenue mí do yise hia gbọn azọ́n lẹ dali, nujiawu de nọ jọ—yise mítọn to Jehovah mẹ gọna haṣinṣan mítọn hẹ ewọ nọ lodo dogọ. Todido mítọn nọ hẹnai dogọ.—Lom. 5:3-5; Jak. 2:21, 22.
15. Nawẹ mí gán do pinpẹn nutọn hia to ojlẹ Oflin tọn lọ mẹ gbọn?
15 Aliho devo sọ tin he mẹ mí gán do pinpẹn nutọn hia na owanyi Jehovah tọn te. Enẹ wẹ nado yí ojlẹ Oflin tọn ehe zan nado dohia Jehovah lehe mí yọ́n pinpẹn ofligọ lọ tọn do. Gbọnvona dọ mí na basi tito nado yì Oflin lọ, mí gán basi oylọna mẹdevo lẹ ga. (1 Tim. 2:4) Basi zẹẹmẹ nuhe na jọ to Oflin lọ whenu tọn na mẹhe a ylọ lẹ. A na mọdọ alenu wẹ e yin nado do video lọ lẹ Naegbọn Jesu Do Kú? po Flin Okú Jesu Tọn po hia yé to jw.org ji. Mẹho agun tọn lẹ dona hẹn ẹn diun dọ yé basi oylọna mẹhe gbọjọ lẹ. Pọ́n lehe ayajẹ na te do to olọn mẹ podọ to aigba ji whenue delẹ to lẹngbọ Jehovah tọn he danbú lẹ mẹ yin whinwhàn nado lẹkọwa apó lọ mẹ! (Luku 15:4-7) To Oflin lọ whenu, mì gbọ mí ni yí do basi yanwle ma nado dọnudo ode awetọ kẹdẹ, amọ́ titengbe mẹyọyọ lẹ kavi mẹhe wá e dẹn lẹ. Mí jlo dọ yé ni mọdọ yè yí emi ganji!—Lom. 12:13.
16. Naegbọn mí dona lẹnnupọndo lizọnyizọn mítọn hinhẹn gblodeji to ojlẹ Oflin tọn mẹ ji?
16 Be a gán hẹn nuwiwa gbigbọmẹ tọn towe jideji to ojlẹ Oflin tọn lọ mẹ ya? Mọwiwà yin aliho dagbe de nado do pinpẹn nutọn hia na nuhe Jiwheyẹwhe po Klisti po ko wà na mí lẹpo. Lehe mí to míde zejo na sinsẹ̀nzọn Jehovah tọn sọ, mọ wẹ mí na duvivi godonọnamẹ etọn tọn do niyẹn, podọ ehe na zọ́n bọ jidide mítọn to ewọ mẹ na lodo dogọ. (1 Kọl. 3:9) Podọ, hẹn ẹn diun dọ a tẹdo tito Biblu hihia ojlẹ Oflin tọn lọ tọn he to Dogbapọnna Owe-Wiwe lẹ Egbesọegbesọ kavi apotin he to nuplọnwe opli osẹ ṣẹnṣẹn tọn mẹ go. A tlẹ gán sọ de nado ze tito nupinplọn tọn towe sinai do wefọ Biblu tọn ehelẹ ji.
17. Etẹwẹ nọ hẹn homẹ Jehovah tọn hùn? (Sọ pọ́n apotin lọ, “ Aliho Delẹ Nado Yọ́n Pinpẹn Owanyi Jehovah Tọn.”)
17 Nugbo wẹ dọ ninọmẹ towe gán nọma na we dotẹnmẹ nado hodo ayinamẹ he yin nina to hosọ ehe mẹ lẹpo. Amọ́, flindọ Jehovah ma nọ yí nuhe a gán wà jlẹdo nuhe mẹdevo lẹ gán wà go; e nọ mọ nuhe to ahun towe mẹ. Homẹ etọn nọ hùn whenue a do pinpẹn nutọn ahundopo tọn hia na nunina họakuẹ etọn, yèdọ ofligọ lọ.—1 Sam. 16:7; Malku 12:41-44.
18. Naegbọn mí do nọ yọ́n pinpẹn nuhe Jehovah Jiwheyẹwhe po Jesu Klisti po wà na mí tọn?
18 Ofligọ lọ kẹdẹ wẹ zọ́n bọ mí nọ mọ jona ylando mítọn lẹ tọn, jihọntọn hẹ Jehovah bosọ tindo todido ogbẹ̀ madopodo tọn. Mì gbọ mí ni nọ dohia to whepoponu dọ mí yọ́n pinpẹn owanyi Jehovah tọn, ehe whàn ẹn nado hẹn dona ehelẹ tin-to-aimẹ na mí. (1 Joh. 4:19) Mì gbọ mí nisọ nọ do pinpẹn nutọn hia Jesu, mẹhe yiwanna mí sisosiso bo ze ogbẹ̀ gbẹtọvi tọn etọn jo do ota mítọn mẹ!—Joh. 15:13.
OHÀN 154 Owanyi Nugbo
