HOSỌ OPLỌN TỌN 3
OHÀN 35 “Mọdona Nuhe Yin Nujọnu Hugan Lẹ”
Nọ Basi Nudide He Nọ Hẹn Homẹ Jehovah Tọn Hùn Lẹ
“Budisi Jehovah wẹ bẹjẹeji nuyọnẹn tọn, podọ oyọnẹn Omẹ Wiwe Hugan lọ tọn wẹ nọ namẹ nukunnumọjẹnumẹ.”—HOWH. 9:10.
NUHE E BẸHẸN
Lehe a gán yí oyọnẹn, nukunnumọjẹnumẹ po wuntuntun po zan nado basi nudide nuyọnẹn tọn lẹ do.
1. Avùnnukundiọsọmẹnu tẹwẹ mímẹpo nọ pehẹ?
EGBESỌEGBESỌ wẹ mí dona nọ basi nudide lẹ. Nudide delẹ nọ taidi nuhe bọawu nado basi, taidi dehe gando núdùdù afọnnu tọn kavi whenue mí na yìhọ do go. Na nuhe dù whẹho devo lẹ, e nọ vẹawu taun nado basi nudide. Yé gán yinuwado mẹyiwanna mítọn lẹ, agbasalilo, ayajẹ kavi sinsẹ̀n-bibasi mítọn ji. Mí nọ jlo dọ nudide mítọn lẹ ni hẹn ale wá na míwlẹ po whẹndo mítọn po. Hú popolẹpo, todido mítọn wẹ yindọ nudide mítọn lẹ ni nọ hẹn homẹ Jehovah tọn hùn.—Lom. 12:1, 2.
2. Afọdide tẹlẹ wẹ na gọalọna we nado nọ basi nudide nuyọnẹn tọn lẹ?
2 E na bọawuna we dogọ nado nọ basi nudide nuyọnẹn tọn lẹ eyin a nọ (1) dindona nudọnamẹ lẹ, (2) gbadopọnna linlẹn Jehovah tọn gando whẹho lọ go, podọ (3) yí sọwhiwhe do dà yọnbasi he tin lẹ pọ́n. Hosọ ehe na dọhodo afọdide enẹlẹ ji, podọ e nasọ gọalọna mí nado mọ lehe mí gán plọn huhlọn wuntuntun tọn mítọn do.—Howh. 2:11.
NỌ DINDONA NUDỌNAMẸ LẸ
3. Na apajlẹ nuhewutu a dona nọ dindona nudọnamẹ lẹ whẹpo do basi nudide de tọn.
3 Afọdide tintan nado basi nudide dagbe de wẹ nado dindona nudọnamẹ lẹ. Naegbọn ehe do yin nujọnu? Mí ni dọ dọ awutunọ de yì dotowhé na azọ̀n sinsinyẹn de wutu. Be doto lọ na basi nudide gando aliho nukunpedomẹgo tọn de go domọ poun eyin e ma gbeje awutunọ lọ pọ́n kavi kanhose e wẹ ya? E họnwun dọ lala wẹ. Hiẹ lọsu na basi nudide dagbe hugan lẹ eyin a lẹnnupọndo nudọnamẹ he gando ninọmẹ lọ go lẹ ji jẹnukọn. Nawẹ a gán wàmọ gbọn?
4. Sọgbe hẹ Howhinwhẹn lẹ 18:13, nawẹ a gán hẹn ẹn diun dọ a yọ́n nudọnamẹ lẹ gbọn? (Sọ pọ́n yẹdide lọ.)
4 A gán nọ dindona nudọnamẹ lẹ eyin a nọ kanhose. Mí ni dọ dọ a yin oylọ-basina yì nuwiwa pọmẹ tọn de tẹnmẹ. Be a dona yì wẹ ya? Eyin a ma má do jonọyitọ lọ kavi a ma yọ́n lehe nulẹ na yì do, e na biọ dọ a ni kàn kanbiọ delẹ sè mẹlọ taidi: “Fitẹ wẹ nuwiwa lọ na yin bibasi te, podọ to whetẹnu? Omẹ nẹmu mọ wẹ ja? Mẹnu wẹ na deanana nuwiwa lọ? Mẹnu lẹ wẹ ja? Etẹlẹ wẹ na yin wiwà to otẹn lọ mẹ? Be ahàn sinsinyẹn na yin yiyizan wẹ ya?” Gblọndo kanbiọ ehelẹ tọn na gọalọna we nado basi nudide nuyọnẹn tọn.—Hia Howhinwhẹn lẹ 18:13.
Nọ kàn kanbiọ lẹ sè nado dindona nudọnamẹ lẹ (Pọ́n hukan 4tọ) a
5. Etẹwẹ a dona wà to whenue a ko bẹ nudọnamẹ lẹ pli godo?
5 Todin he a ko bẹ nudọnamẹ lẹ pli, yí sọwhiwhe do lẹnnupọndo ninọmẹ lọ blebu ji. Di apajlẹ, etẹwẹ a na wà eyin mẹhe ma nọ na sisi nunọwhinnusẹ́n Biblu tọn lẹ na wá nuwiwa lọ tẹnmẹ kavi eyin ahàn sinsinyẹn na yin yiyizan matin mẹde he na penukundego? Be a mọdọ e yọnbasi dọ nuwiwa ehe ni wá lẹzun agọ́ gànyìn ya? (1 Pita 4:3) To alọ devo mẹ, etẹwẹ lo eyin gànmẹ nuwiwa lọ tọn wá jẹ do opli kavi kunnudegbe gànmẹ towe ji? Eyin a lẹnnupọndo ninọmẹ lọ blebu ji, e na bọawuna we dogọ nado basi nudide dagbe. Amọ́, afọdide devo gbẹ́ pò he a dona ze. A yọ́n pọndohlan towe gando ninọmẹ lọ go; amọ́ etẹwẹ yin numọtolanmẹ Jehovah tọn gandego?—Howh. 2:6.
GBADOPỌNNA LINLẸN JEHOVAH TỌN
6. Sọgbe hẹ Jakọbu 1:5, naegbọn mí dona nọ hodẹ̀ nado biọ alọgọ Jehovah tọn?
6 Biọ to Jehovah si dọ ni gọalọna we nado mọnukunnujẹ linlẹn etọn mẹ. Jehovah dopà nado na mí nuyọnẹn nado doayi e go eyin vlavo nudide de na hẹn homẹ etọn hùn kavi lala. E nọ yí ‘alọtútlú do na mẹlẹpo nuyọnẹn mọnkọ matin whẹgbledomẹ.’—Hia Jakọbu 1:5.
7. Nawẹ a gán tindo pọndohlan Jehovah tọn gbọn? Na apajlẹ.
7 To whenue a ko biọ anademẹ Jehovah tọn to odẹ̀ mẹ godo, yí sọwhiwhe do doayi gblọndo etọn go. Di apajlẹ: Eyin a to ali bu to gbejizọnlin de whenu, a gán kàn ali biọ mẹhe nọ nọ̀ lẹdo lọ mẹ de. Amọ́, be a na dedo to whenue mẹlọ ma ko na gblọndo wẹ ya? Paali. A na yí sọwhiwhe do dotoaina anademẹ etọn lẹ. Mọdopolọ, whenue a ko biọ nuyọnẹn Jehovah godo, tẹnpọn nado mọ gblọndo etọn gbọn osẹ́n po nunọwhinnusẹ́n Biblu tọn he gando ninọmẹ towe go lẹ po dindin dali. Di dohia, whenue a jlo na de eyin a na yì nuwiwa pọmẹ tọn he go mí donù wayi lọ tẹnmẹ kavi lala, a gán lẹnnupọndo nuhe Biblu dọ gando agọ́ gànyìn, ogbẹ́ ylankan dido po onú Ahọluduta lọ tọn lẹ zizedo otẹn tintan mẹ na nujlomẹ mẹdetiti tọn lẹ po ji.—Mat. 6:33; Lom. 13:13; 1 Kọl. 15:33.
8. Etẹwẹ a gán wà eyin a do hudo alọgọ tọn nado mọ nudọnamẹ he dín a te? (Sọ pọ́n yẹdide lọ.)
8 Etomọṣo to whedelẹnu, a gán nọ do hudo alọgọ tọn nado mọ nudọnamẹ he dín a te. A gán mọ ayinamẹ sọn mẹmẹsunnu kavi mẹmẹyọnnu numimọnọ de dè. Amọ́, a nasọ mọaleyi sọn dodinnanu he hiẹ lọsu basi lẹ mẹ. Nudọnamẹ họakuẹ susu lẹ wẹ tin to owe nupinplọn tọn mítọn lẹ mẹ taidi Anademẹwe Dodinnanu Tọn po Wefọ lẹ He Nọ Gọalọ Nado Nọgbẹ̀ Di Klistiani po mẹ. Ma wọn yanwle lọ blo, enẹ wẹ nado basi nudide de he na hẹn homẹ Jehovah tọn hùn.
Gbadopọnna linlẹn Jehovah tọn (Pọ́n hukan 8tọ) b
9. Nawẹ mí gán kudeji gbọn dọ nudide mítọn na hẹn homẹ Jehovah tọn hùn? (Efesunu lẹ 5:17)
9 Nawẹ mí gán kudeji gbọn dọ nudide mítọn na hẹn homẹ Jehovah tọn hùn? Tintan whẹ́, mí dona yọ́n ewọ ganji. Biblu dọ dọ “oyọnẹn Omẹ Wiwe Hugan lọ tọn wẹ nọ namẹ nukunnumọjẹnumẹ.” (Howh. 9:10) Mọwẹ, nado tindo nukunnumọjẹnumẹ nugbo, mí dona yọ́n jẹhẹnu Jehovah tọn lẹ, lẹndai etọn po nuhe e yiwanna kavi nuhe e gbẹwanna lẹ po. Kanse dewe dọ, ‘Po nuhe n’yọnẹn gando Jehovah go po, nudide tẹwẹ n’gán basi he na hẹn homẹ etọn hùn?’—Hia Efesunu lẹ 5:17.
10. Naegbọn nunọwhinnusẹ́n Biblu tọn lẹ do yin nujọnu hugan aṣa whẹndo de tọn kavi lẹdo de tọn?
10 Nado hẹn homẹ Jehovah tọn hùn, mí dona nọ wà nudelẹ he ma na vivi na mẹhe sẹpọ mí lẹ to whedelẹnu. Di apajlẹ, mẹjitọ ahundoponọ delẹ gán tẹkudeji dọ viyọnnu yetọn he ko whẹ́n mẹho de ni wlealọ hẹ sunnu he apò etọn mẹ pẹ̀n de—kavi he gán penugo bo na asigbàn he yinukunkẹ de—eyin sunnu lọ ma tlẹ lodo to gbigbọ-liho. Nugbo wẹ dọ yé jlo dọ viyọnnu yetọn ni vò to agbasa-liho, amọ́ mẹnu wẹ na gọalọna ẹn na e nido yinukọn to gbigbọ-liho? Nukun tẹwẹ Jehovah nọ yí do pọ́n whẹho lọ? Mí mọ gblọndo lọ to Matiu 6:33 mẹ. To finẹ, Klistiani lẹ yin tudohomẹna nado “to Ahọluduta lọ . . . dín whẹ́.” Dile etlẹ yindọ mí nọ gbògbéna mẹjitọ mítọn lẹ bo nọ na sisi mẹhe to lẹdo mítọn mẹ lẹ, nuhe nọ duahunmẹna mí hugan wẹ nado hẹn homẹ Jehovah tọn hùn.
YÍ SỌWHIWHE DO DÀ YỌNBASI HE TIN LẸ PỌ́N
11. Jẹhẹnu he yin hodọdeji to Filipinu lẹ 1:9, 10 mẹ tẹwẹ na gọalọna we nado dà yọnbasi he a tindo lẹ pọ́n?
11 To whenue a ko gbadopọnna nunọwhinnusẹ́n Biblu tọn he gando nudide towe go lẹ godo, e na biọ dọ a ni dà yọnbasi he tin lẹ pọ́n. (Hia Filipinu lẹ 1:9, 10.) Jẹhẹnu lọ wuntuntun na gọalọna we nado doayi kọdetọn yọnbasi dopodopo tọn go. To whedelẹnu, e gán bọawu nado basi nudide lọ. Amọ́, e ma yin nudide lẹpo wẹ nọ bọawu. Wuntuntun na gọalọna we nado basi nudide nuyọnẹn tọn lẹ, etlẹ yin to ninọmẹ he gẹdẹ lẹ mẹ.
12, 13. Nawẹ wuntuntun gán gọalọna we nado basi nudide nuyọnẹn tọn gando agbasazọ́n go gbọn?
12 Pọ́n ninọmẹ ehe. Mí ni dọ dọ a to azọ́n de dín nado penukundo whẹndo towe go. Azọ́n awe wẹ to nukọnna we. A gbadopọnna nudọnamẹ lọ lẹpo, bo yọ́n azọ́n wunmẹ he wẹ, gànhiho nẹmu he e na dù gọna ojlẹ nẹmu he e na nọ biọ to asi we nado yì azọ́n lọ mẹ po mọmọ po sọyi. Azọ́n awe lọ lẹ depope ma jẹagọdo Owe-wiwe. Vlavo a yiwanna dopo to yé mẹ, na azọ́n wunmẹ he e yin yọ́n to nukun towe mẹ kavi akuẹ etọn yinukunkẹ wutu. Amọ́, nudevo lẹ gbẹ́ pò he ji a dona lẹnnupọndo whẹpo do basi nudide de.
13 Di apajlẹ, be azọ́n lọ na glọnalina we nado nọ yì opli agun tọn delẹ wẹ ya? Be azọ́n lọ na yí whenu he e na biọ nado penukundo whẹndo towe go to numọtolanmẹ-liho podọ to gbigbọ-liho wẹ ya? Kanbiọ mọnkọ lẹ kinkanse na gọalọna we nado ze “nuhe yin nujọnu hugan lẹ” do otẹn tintan mẹ na agbasanu lẹ, enẹ wẹ sinsẹ̀n-bibasi towe po nuhudo whẹndo towe tọn lẹ po. To whenẹnu, a gán basi nudide he Jehovah na dona de.
14. Nawẹ zinzin yiyizan podọ owanyi didohia na gọalọna mí ma nado hẹn mẹdevo lẹ dahli gbọn?
14 Wuntuntun sọ nọ whàn mí nado ze lehe nudide mítọn gán yinuwado mẹdevo lẹ ji do dó lẹnpọn mẹ, na mí nikaa “hẹn mẹdevo lẹ dahli.” (Flp. 1:10) Ehe yin nujọnu whenue mí to nudide mẹdetiti tọn lẹ basi to adà delẹ mẹ taidi nusisọ́ po aṣọ́dido po tọn. Di apajlẹ, mí gán yiwanna nusisọ́ kavi aṣọ́dido wunmẹ de. Amọ́, etẹwẹ lo eyin ehe na dotukla mẹdevo lẹ to agun lọ mẹ kavi to gbonu agun lọ tọn? Wuntuntun na gọalọna mí nado nọ na sisi numọtolanmẹ yetọn lẹ. Owanyi na whàn mí nado nọ dín ale “mẹdevo tọn” bosọ nọ nọ̀ jlẹkaji. (1 Kọl. 10:23, 24, 32; 1 Tim. 2:9, 10) To whenẹnu, mí na basi nudide de he do owanyi po sisi po hia mẹdevo lẹ.
15. Tito tẹwẹ yin dandan whẹpo a nido wanu sọgbe hẹ nudide titengbe de?
15 Eyin a jlo na basi nudide titengbe de, nọ lẹnnupọndo nuhe e na biọ nado wanu sọgbe hẹ ẹ ji. Jesu plọn mí nado nọ “lẹn akuẹ etọn.” (Luku 14:28) Enẹwutu, nọ lẹnnupọndo whenu, nutindo gọna vivẹnudido he e na biọ to asi we nado wanu sọgbe hẹ nudide lọ ji. To ninọmẹ delẹ mẹ, a gán dọhodopọ hẹ whẹndo towe nado yọ́n nuhe hagbẹ whẹndo lọ tọn dopodopo na wà nado nọgodona nudide lọ. Naegbọn tito mọnkọ do yin nujọnu? E gán dohia dọ vọjlado delẹ tin he a dona basi gando nudide towe go kavi dọ nudide devo bibasi wẹ na pọnte hugan. Podọ whenue a dọhodopọ hẹ hagbẹ whẹndo tọn towe lẹ bo dotoaina linlẹn yetọn lẹ, yé na to gbesisọ mẹ dogọ nado wazọ́n dopọ hẹ we na nudide lọ nido tindo kọdetọn dagbe.—Howh. 15:22.
BASI NUDIDE HE NA DO KỌDETỌN DAGBE
16. Afọdide tẹlẹ wẹ na gọalọna we nado basi nudide he na tindo kọdetọn dagbe? (Sọ pọ́n apotin lọ “ Lehe A Gán Nọ Basi Nudide Nuyọnẹn Tọn lẹ Do.”)
16 Eyin a ko ze afọdide he mí slẹ to aga lẹ, be a ko wleawufo nado basi nudide nuyọnẹn tọn de niyẹn. A ko dindona nudọnamẹ lẹ bosọ gbadopọnna nunọwhinnusẹ́n he na gọalọna we nado basi nudide de he na hẹn homẹ Jehovah tọn hùn. Todin, a gán biọ Jehovah nado gọalọna we na nudide towe nido tindo kọdetọn dagbe.
17. Etẹwẹ yin aṣli lọ nado nọ basi nudide dagbe lẹ?
17 Eyin a tlẹ ko basi nudide he tindo kọdetọn dagbe susu lẹ wayi, nọ flindọ aṣli lọ nado basi nudide dagbe lẹ wẹ nado nọ ganjẹ nuyọnẹn Jehovah tọn go, e ma yin do nukunnumọjẹnumẹ kavi numimọ towe titi go. Ewọ kẹdẹ wẹ gán na we oyọnẹn nugbo, nukunnumọjẹnumẹ po wuntuntun po, yèdọ adà titengbe nuyọnẹn tọn lẹ. (Howh. 2:1-5) Jehovah gán gọalọna we nado nọ basi nudide he na hẹn homẹ etọn hùn lẹ.—Salm. 23:2, 3.
OHÀN 28 Họntọnjiji hẹ Jehovah
