Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Onú titengbe tẹlẹ wẹ mẹjitọ lẹ sọgan wà nado plọn jọja aflanmẹ yetọn nado sẹ̀n Jehovah?

Nujọnu wẹ e yin dọ mẹjitọ lẹ ni nọ yiwanna jọja aflanmẹ yetọn lẹ bo nọ ze apajlẹ whiwhẹ tọn dai. Onú titengbe wẹ e sọ yin dọ mẹjitọ lẹ ni nọ yí zinzin zan bosọ nọ tẹnpọn nado mọnukunnujẹ jọja aflanmẹ yetọn lẹ mẹ.—w15 15/11, w. 9-11.

Etẹlẹ ji wẹ mí dona nọ lẹnnupọndo whẹpo do dọho?

Nado yí odẹ́ mítọn do wà dagbe, mí dona hẹn onú ehelẹ do ayiha mẹ (1) whenue mí na nọ dọho (Yẹwh. 3:7), (2) nuhe mí na nọ dọ (Howh. 12:18), podọ (3) lehe mí na nọ dọho do (Howh. 25:15).—w15 15/12, w. 19-22.

Nuyiwa nugbomadọ tọn tẹlẹ wẹ Klistiani lẹ nọ dapana?

Klistiani nugbo lẹ nọ dapana lalodido po mẹnudidọ mẹhẹngble tọn po. Yé ma nọ fúfú lalo po ohó he ma sọgbe lẹ po pé nado hẹn yinkọ dagbe mẹdevo lẹ tọn gble, mọjanwẹ yé ma nọ hòmẹdu kavi jẹajo do niyẹn.—wp16.1, w. 5.

Mẹnu lẹ wẹ yin “yẹwhenọgán” he yin nùdego to Biblu mẹ?

E họnwun dọ hogbe lọ “yẹwhenọgán” nọ dlẹnalọdo omẹ nukundeji yẹwhenọduta lọ tọn lẹ, ehe bẹ yẹwhenọ daho he ko yin didesẹ lẹ hẹn.—wp16.1, w. 10.

Nawẹ mí dona nọ yinuwa hẹ mẹde he nọ dù akla bo nọ nù ovẹn to oflin whenu gbọn?

Klistiani lẹ ma nọ ze omẹ enẹlẹ daga. Mẹhe yin mẹyiamisisadode nugbonugbo de ma na jlo nado yin zizedaga, mọjanwẹ ewọ ma nọ basi nulila gando haṣinṣan he e tindo hẹ Jiwheyẹwhe go do niyẹn. (Mat. 23:8-12)—w16.01, w. 23-24.

Etẹwẹ mí sọgan plọn sọn lehe Ablaham lẹzun họntọn Jiwheyẹwhe tọn do mẹ?

Ablaham sọgan ko plọnnu gando Jiwheyẹwhe go sọn Ṣẹmi dè. Podọ aliho he mẹ Jiwheyẹwhe yinuwa hẹ Ablaham po whẹndo etọn po te hẹn numimọ etọn jideji. Mílọsu sọgan tẹnpọn nado nọ wà nudopolọ.—w16.02, w. 9-10.

Mẹnu wẹ yí weta po wefọ lẹ po do Biblu mẹ?

To owhe kanweko 13tọ whenu, sinsẹ̀ngán Stephen Langton yí weta lẹ do Biblu mẹ. Vọkan-basitọ Ju lẹ wẹ yí wefọ lẹ do Owe-wiwe Heblu tọn mẹ jẹnukọn, podọ to owhe kanweko 16tọ whenu, weyọnẹntọ Robert Estienne wà nudopolọ na Owe-wiwe Glẹki tọn lẹ.—wp16.2, w. 14-15.

Be Satani plan Jesu yì aga tẹmpli lọ tọn to agbasa mẹ nado whlé e pọ́n wẹ ya?

Mí ma sọgan dọ po nujikudo po. Matiu 4:5 po Luku 4:9 po sọgan zẹẹmẹdo dọ Jesu yin pinplan yì finẹ to numimọ de mẹ kavi dọ ewọ ṣite to fihe yiaga taun de to lẹdo tẹmpli lọ tọn mẹ.—w16.03, w. 31-32.