Yé nọtena awhànpa olọn mẹ tọn he tindo mahẹ to vasudo Jelusalẹm tọn mẹ bo nasọ tindo mahẹ to vasudo titonu ylankan Satani tọn mẹ to Amagẹdọni whenu lẹ. Naegbọn nukunnumọjẹnumẹ he yin vivọjlado ehe do sọgbe hẹ lẹnpọn dagbe?

Jẹnukọnna 607 J.W.M., Jehovah do numimọ de hia Ezekiẹli gando nuhe na jọ to Jelusalẹm whẹpo e nado yin vivasudo lẹ go. To numimọ lọ mẹ, Ezekiẹli mọ bọ nuylankan susu to jijọ to Jelusalẹm. Ewọ mọ sunnu ṣidopo he tindo adánwanu mẹhusudo tọn lẹ. E sọ mọ dawe de to sunnu enẹlẹ ṣẹnṣẹn he “do alavọ” bosọ tindo “wesinzo wekantọ tọn.” (Ezek. 8:6-12; 9:2, 3) Dawe ehe yin gbedena dọmọ: “Jugbọn tòdaho lọ mẹ, . . . bo do ohia nukọnna mẹhe to lewu bo to hunwẹn na osùnú he to yinyin wiwà to tòdaho lọ mẹ lẹpo wutu.” Enẹgodo, sunnu he tindo adánwanu mẹhusudo tọn lẹ yin gbedena nado hù mẹhe to tòdaho lọ mẹ bo ma tindo ohia lẹpo. (Ezek. 9:4-7) Etẹwẹ numimọ ehe plọn mí, podọ mẹnu wẹ dawe lọ he tindo wesinzo wekantọ tọn?

Dọdai ehe yin didọ to 612 J.W.W., podọ hẹndi etọn tintan dlẹnalọdo vasudo Jelusalẹm tọn gbọn awhànpa Babilọninu lẹ tọn dali, yèdọ nujijọ de he na wá aimẹ owhe atọ́n poun to dọdai lọ godo. Dile etlẹ yindọ Babilọninu lẹ he yin kosi wẹ yin dotẹnmẹna nado hẹn vasudo enẹ wá aimẹ, Jehovah wẹ yí yé zan nado wàmọ. (Jel. 25:9, 15-18) Jehovah wà ehe nado sayana omẹ etọn lẹ he lẹzun atẹṣitọ. Etomọṣo, e ma yin mẹlẹpo wẹ dona yin vivasudo. Dodonọ lẹ ma yin vivasudo dopọ hẹ mẹylankan lẹ. Jehovah gbọn owanyi dali hẹn ẹn diun dọ Ju he ma kẹalọyi nuylankan he to jijọ to tòdaho lọ mẹ lẹ yin whinwhlẹngán.

Ezekiẹli ma tindo mahẹ to azọ́n hiadogonamẹ tọn lọ po vasudo tọn lọ po mẹ. Kakatimọ, angẹli lẹ wẹ deanana azọ́n whẹdida hinhẹnṣẹ tọn lọ. Dọdai ehe hùn dotẹnmẹ dote na mí nado mọ nuhe nọ jọ to agblò gbigbọmẹ tọn olọn tọn mẹ. Gbọnvona dọ Jehovah deazọ́nna angẹli etọn lẹ nado penukundo vasudo mẹylankan lẹ tọn go, e sọ biọ to yé si nado klan dodonọ he na yin whinwhlẹngán lẹ dovo. *

To owhe he wayi lẹ mẹ, mí ko basi zẹẹmẹ dọ to hẹndi egbezangbe tọn numimọ lọ tọn mẹ, dawe he tindo wesinzo wekantọ tọn lọ nọtena pipotọ mẹyiamisisadode lẹ tọn. Mí nọ lẹndọ eyin mẹde kẹalọyi wẹndagbe lọ, be mẹlọ ko yin hiadogona na whlẹngán niyẹn. Ṣigba to owhe agọe tọn lẹ mẹ, e wá họnwun dọ vọjlado de dona yin bibasi gando zẹẹmẹ ehe go. Sọgbe hẹ nuhe yin didọ to Matiu 25:31-33 mẹ, Jesu wẹ nọ dawhẹna gbẹtọ lẹ. Ewọ na dawhẹ godo tọn etọn to nukunbibia daho lọ whenu, bo na klan gbẹtọ taidi lẹngbọ he na gán lẹ dovo na gbẹtọ taidi gbọgbọẹ he na yin vivasudo lẹ.

Enẹwutu, po nukunnumọjẹnumẹ he yin vivọjlado ehe po, etẹlẹ wẹ mí plọn sọn numimọ Ezekiẹli tọn mẹ? E whè gbau onú atọ́n:

1.  To ojlẹ he jẹnukọnna vasudo Jelusalẹm tọn lọ mẹ, Ezekiẹli po Jelemia po na avase gbẹtọ lẹ gando nugbajẹmẹji he na wá tòdaho lọ ji go, kẹdẹdile Isaia wà do jẹnukọnna yé. To egbehe, Jehovah to pipli pẹvi devizọnwatọ yiamisisadode etọn lẹ tọn yizan nado na núdùdù omẹ etọn lẹ, podọ nado na avase mẹdevo lẹ whẹpo nukunbibia daho lọ nido gbajẹgbonu. Mọdopolọ, devizọnwatọ whégbè tọn Klisti tọn lẹpo nọ tindo mahẹ to avase lọ hinhẹn gbayipe mẹ.—Mat. 24:45-47.

2.  Ezekiẹli ma tindo mahẹ to ohia didogona mẹhe yin whinwhlẹngán lẹ mẹ; nudopolọ wẹ e yin na devizọnwatọ Jehovah tọn egbezangbe tọn lẹ. Nuhe yé nọ wà poun wẹ nado lá owẹ̀n Jehovah tọn, he yin apadewhe azọ́n yẹwhehodidọ yetọn tọn, he  to yinyin wiwà to anademẹ angẹli lẹ tọn glọ.—Osọ. 14:6.

3.  To azán Ezekiẹli tọn gbè, mẹdepope ma mọ hiadogonamẹ jọnun de yí do nukọn ede tọn. Nudopolọ wẹ na jọ to egbehe. Etẹwẹ gbẹtọ lẹ dona wà nado yin hiadogona to yẹhiadonu-liho na whlẹngán? Yé dona kẹalọyi yẹwheho he to yinyin didọ lọ, ze gbẹtọ-yinyin Klistiani tọn do, klan yede do wiwe na Jehovah, bosọ yí nugbonọ-yinyin do nọgodona mẹmẹsunnu Klisti tọn lẹ. (Mat. 25:35-40) Mẹhe to onú ehelẹ wà lẹ na mọ hiadogonamẹ na whlẹngán yí to nukunbibia daho he ja lọ whenu.

4.  To hẹndi egbezangbe tọn mẹ, dawe he hẹn wesinzo wekantọ tọn lọ nọtena Jesu Klisti, yèdọ omẹ mayinukundomọ lọ he nọ dohiagona mẹhe na yin whinwhlẹngán lẹ. Gbẹtọ susugege lọ na mọ hiadogonamẹ yetọn yí to whenue yé na yin whẹdana taidi lẹngbọ to nukunbibia daho lọ whenu. Ehe na zọ́n bọ yé na tin to hukan mẹhe na mọ ogbẹ̀ madopodo yí lẹ tọn ji.—Mat. 25:34, 46. *

5.  To hẹndi egbezangbe tọn mẹ, dawe ṣidopo he hẹn adánwanu mẹhusudo tọn lọ lẹ nọtena Jesu gọna awhànpa olọn mẹ tọn etọn lẹ he ewọ to anadena. Yé na và akọta lẹ sudo bo na de kanyinylan wunmẹ lẹpo sẹ̀ to madẹnmẹ.—Ezek. 9:2, 6, 7; Osọ. 19:11-21.

Nukunnumimọjẹ nuplọnmẹ họakuẹ ehelẹ mẹ hẹn jidide mítọn lodo dogọ dọ Jehovah ma nọ và dodonọ po mẹylankan po sudo dopọ gba. (2 Pita 2:9; 3:9) Ehe sọ flinnu mí dọ nujọnu wẹ azọ́n yẹwhehodidọ tọn he to yinyin wiwà to egbehe lọ yin. Mẹlẹpo wẹ dona sè avase lọ whẹpo opodo lọ nido wá!—Mat. 24:14.