NAEGBỌN a sọgan kudeji dọ hogbe enẹlẹ yin nugbo, podọ dọ Jehovah nọ hò towe pọ́n nugbonugbo? Whẹwhinwhẹ́n dopo wẹ yindọ Biblu dọ mọ tlọlọ. 1 Pita 5:7 dọmọ: “Mì to magbọjẹ mìtọn lẹpo bẹ dlan ewọ ji, na e to mìtọn hòpọn wutu.” Etẹwẹ hẹn we kudeji dọ Jehovah Jiwheyẹwhe nọ tindo ojlo to hiẹ mẹ?

Jẹnukọn whẹ́, Jiwheyẹwhe tindo jẹhẹnu he a sọgan nọ jlo dọ họntọn vivẹ́ towe lẹ ni tindo. To paa mẹ, mẹhe nọ tlúalọ bosọ nọ yinuwa hẹ ode awetọ po homẹdagbe po lẹ wẹ nọ lẹzun họntọn vivẹ́. Dile a sọgan ko doayi e go do, Jehovah yin homẹdagbenọ bosọ nọ nanú gbẹtọvi lẹ egbesọegbesọ. Lẹnnupọndo apajlẹ dopo ji: “E nọ hẹn owhè etọn zẹ̀ do mẹylankan lẹ po mẹdagbe lẹ po ji bosọ nọ hẹn jikun ja do dodonọ lẹ po mawadodonọ lẹ po ji.” (Mat. 5:45) Dagbe tẹwẹ owhè po jikun po nọ wà? Dopo to nuhe yé nọ wà lẹ mẹ wẹ yindọ, Jiwheyẹwhe nọ yí yé zan nado ‘yí núdùdù do pekọna gbẹtọvi lẹ bo nọ yí ayajẹ do gọ́ ahun yetọn mẹ.’ (Owalọ 14:17) Mọwẹ, Jehovah nọ hẹn ẹn diun dọ aigba nọ de núdùdù susugege tọ́n, podọ onú ṣinṣinyan wẹ nọ hẹn ayajẹ wá na mí sọ núdùdù dagbe de.

To whelọnu lo, naegbọn huvẹ do gbayipe sọmọ? Na nuhe nọ saba duahunmẹna gandutọ lẹ hugan wẹ nado paṣẹ bo tindo akuẹ susu kakati nado hẹn gbẹzan tòvi lẹ tọn pọnte. To madẹnmẹ, Jehovah na didẹ nuhahun nukunkẹn tọn enẹ, gbọn Ahọluduta olọn mẹ tọn he Visunnu etọn Jesu yin Ahọlu na lọ yíyí do diọtẹnna titonu tonudidọ tọn dintọn dali. To ojlẹ enẹ mẹ, mẹde ma nasọ nọ nọ̀ huvẹ ba.  Todin whẹ́, Jiwheyẹwhe nọ gọalọna devizọnwatọ nugbonọ etọn lẹ. (Salm. 37:25) Be enẹ ma dohia dọ ewọ nọ hò mẹtọn pọ́n ya?

Họntọn dagbe de na nọ yí whenu etọn zan dopọ hẹ we. E sọgan yí gànhiho susu zan nado dọho hẹ we do nuhe gando mì omẹ awe lẹ go ji. Podọ họntọn dagbe de na dotoaina we po sọwhiwhe po to whenue a to nuhahun po ahunmẹdunamẹnu towe lẹ po dọna ẹn. Be Jehovah nọ dotoai namẹ to aliho enẹ mẹ ya? Na nugbo tọn, mọwẹ! E nọ dotoaina odẹ̀ mítọn lẹ. Enẹwutu, Biblu na mí tuli nado “nọ sinyẹnlin to odẹ̀ mẹ,” bo tlẹ “nọ hodẹ̀ to whepoponu.”—Lom. 12:12; 1 Tẹs. 5:17.

Ojlẹ nẹmu wẹ Jehovah nọ jlo na yizan nado dotoaina odẹ̀ towe lẹ? Apajlẹ Biblu tọn de gọalọna mí nado yọ́n gblọndo lọ. Whẹpo Jesu do ṣinyan apọsteli etọn lẹ, e “yí ozán lọ blebu do hodẹ̀ hlan Jiwheyẹwhe.” (Luku 6:12) To odẹ̀ enẹ mẹ, e yọnbasi dọ Jesu gbeje susu to devi etọn lẹ mẹ pọ́n dopodopo, bo lẹnnupọndo jẹhẹnu po awugbopo yetọn lẹ po ji, bosọ biọ alọgọ Otọ́ etọn tọn nado de yé. To whenue ai họ́n, Jesu yọnẹn dọ emi ko ṣinyan mẹhe pegan hugan nado sẹ̀n taidi apọsteli emitọn lẹ. Taidi “Sisètọ odẹ̀ tọn,” homẹ Jehovah tọn nọ hùn nado dotoaina odẹ̀ ahundopo tọn lẹpo. (Salm. 65:2) Eyin mẹde tlẹ yí gànhiho susu lẹ do hodẹ̀ gando whẹho he to ahunmẹduna ẹn taun de go, Jehovah ma nọ hia gànmẹ na mẹlọ.

Eyin e jẹ whẹho jonamẹ tọn ji, e nọ vẹawuna họntọn dagbe lẹ lọsu nado jona ode awetọ to ninọmẹ delẹ mẹ. To whedelẹnu, mẹhe ko yin họntọn na ojlẹ dindẹn lẹ tlẹ nọ sánkanna haṣinṣan yetọn, na yé mọdọ e vẹawu taun nado jona ode awetọ wutu. Jehovah ma nọ wàmọ. Biblu dotuhomẹna gbẹtọvi ahundoponọ lẹpo nado biọ jonamẹ etọn, “na ewọ na jonamẹ to gigọ́ mẹ.” (Isa. 55:6, 7) Etẹwẹ nọ whàn Jiwheyẹwhe nado jonamẹ sọn ojlo mẹ wá sọmọ?

Owanyi mayọnjlẹ Jiwheyẹwhe tọn wẹ. Ewọ yiwanna aihọn lọ sọmọ bọ e namẹ Visunnu etọn,  Jesu, nado whlẹn gbẹtọvi lẹ sọn ylando po awugble he ylando nọ hẹnwa yé ji po si. (Joh. 3:16) Na nugbo tọn, ale he ofligọ lọ hẹnwa lẹ sù humọ. Gbọn avọ́sinsan Klisti tọn gblamẹ, Jiwheyẹwhe nọ jona mẹhe ewọ yiwanna lẹ sọn ojlo mẹ wá. Apọsteli Johanu wlan dọmọ: “Eyin mí yigbe ylando mítọn lẹ tọn, nugbonọ podọ dodonọ wẹ ewọ nado jo ylando mítọn lẹ na mí.” (1 Joh. 1:9) Na jonamẹ Jehovah tọn wutu, gbẹtọvi lẹ sọgan zindonukọn nado to họntọnji hẹ ẹ, podọ ehe yinyọnẹn nọ yinuwado mí ji sisosiso.

Họntọn nugbo lẹ nọ nọgodona yede to whenue yé tindo nuhudo alọgọ tọn. Be Jehovah nọ wà nudopolọ ya? Ohó etọn dọmọ: “Eyin [dopo to devizọnwatọ Jiwheyẹwhe tọn lẹ mẹ] tlẹ jai, e ma na takiti, na Jehovah nọ hẹn alọ go na ẹn.” (Salm. 37:24) Jehovah ‘nọ hẹn alọ go na devizọnwatọ etọn lẹ’ to aliho voovo lẹ mẹ. Doayi numimọ ehe go sọn lopo Sainte Croix ji to Caraïbe.

Jọja yọnnu de yin kọgbidina gbọn klasigbẹ́ etọn lẹ dali, na e gbẹ́ sọgbe hẹ nuyise etọn lẹ ma nado jihàn na asia wutu. To whenue e ko hodẹ̀ bo biọ alọgọ Jehovah tọn godo, e basi nudide nado yinuwa gando whẹho lọ go. To nuzedonukọnnamẹ klasi tọn etọn he bọdego whenu, e ze hosọ etọn sinai do hànjiji na asia ji. E yí Owe Ṣie He Bẹ Otàn Biblu Tọn lẹ Hẹn zan nado basi zẹẹmẹ lehe kandai Ṣadlaki, Mẹṣaki po Abẹdinẹgo po tọn yinuwado nudide etọn ji do tọn. E dọmọ: “Jehovah basi hihọ́na Heblu atọ̀n enẹlẹ, na yé ma basi sinsẹ̀n hlan boṣiọ de wutu.” Enẹgodo, e ze owe lọ donukọnna wehọmẹvi he to finẹ lẹpo. Widopo to wehọmẹvigbẹ́ etọn lẹ mẹ wẹ jlo na mọ vọkan owe lọ tọn de yí. Na viyọnnu jọja lọ mọdọ Jehovah na emi huhlọn po nuyọnẹn po nado dekunnu gando whẹho he ma bọawu enẹ go wutu, homẹ etọn hùn taun.

Eyin a tindo ayihaawe gbede dọ Jehovah ma nọ hò towe pọ́n, lẹnayihamẹpọn do wefọ Biblu tọn taidi ehelẹ ji, Salmu lẹ 34:17-19; 55:22; po 145:18, 19 po. Biọ to Kunnudetọ he ko to sinsẹ̀n sọn ojlẹ dindẹn die lẹ si nado dọ lehe Jehovah ko hò yetọn pọ́n do na we. Podọ, to whenue a tindo nuhudo alọgọ Jiwheyẹwhe tọn, hodẹ̀ hlan ẹn gando whẹho lọ go. E ma na dẹn bọ a na mọ lehe Jehovah ‘nọ hò towe pọ́n’ do.