TO ALIHO delẹ mẹ, Biblu plọntọ ahundoponọ lẹ sọgan yin yiyijlẹdo mẹhe nọ dín sika lẹ go. Yé dona dovivẹnu vẹkuvẹku bo zindonukọn to dogbigbapọnna Owe-wiwe lẹ mẹ nado mọ nuyọnẹn mayọnjlẹ. Taidi Biblu plọntọ lẹ, etẹwẹ dogbigbapọnna delẹ to aliho atọ̀n he mẹ sika nọ yin mimọ te lẹ mẹ sọgan plọn mí?

Mí ni dọ dọ a to zọnlinzin gbọn tọ̀sisa de tó bo mọ nude he taidi agán pẹvi de he to kinkọ́n to owhè-nù. A dẹ́ do odò, podọ homẹ towe hùn dọ a mọ sika pẹvi de. Sika he a mọ whè hú ota ṣana-kún de tọn, bosọ vẹ́ mimọ hú diamọndi akuẹgegenu de. Ayihaawe ma tin dọ a pọ́n filọ lẹdo pé, na vlavo a sọgan sọ mọ sika flinflin devo lẹ.

Mọdopolọ, to ojlẹ de mẹ wayi, to azán he a ma sọgan wọn de gbè, devizọnwatọ Jehovah tọn de sọgan ko húhú ohọ̀n towe nado dọhona we do owẹ̀n todido tọn he tin to Biblu mẹ ji. Vlavo a flin ojlẹ he mẹ a mọ sika pẹvi gbigbọmẹ tọn towe tintan te ganji. E sọgan ko yin whenue a mọ yinkọ Jiwheyẹwhe tọn, Jehovah whla tintan to Biblu mẹ. (Salm. 83:18) Kavi vlavo to whenue a plọn dọ emi sọgan lẹzun họntọn Jehovah tọn. (Jak. 2:23) To afọdopolọji, a yọnẹn dọ emi mọ nude he yọ́n hú sika! Podọ, a na ko tin to jejeji nado mọ sika gbigbọmẹ tọn flinflin devo lẹ.

To whedelẹnu, sika flinflin lẹ nọ pli do tándo po tọ̀sisa lẹ po mẹ. To osun kleun delẹ gblamẹ, sika-dintọ azọ́n sinsinyẹnwatọ lẹ sọgan mọ sika kilo susu he yè sọgan sà yin dọla Amelika tọn fọtọ́n susu.

To whenue a jẹ Biblu plọn hẹ Kunnudetọ Jehovah tọn de ji, a sọgan ko tindo numọtolanmẹ mẹhe to sika dín to fie sika sù te de tọn. Ayihamẹlinlẹnpọn do wefọ Biblu tọn lẹ ji debọdo-dego na ko hẹn oyọnẹn towe jideji, podọ ehe hẹn ale wá na we taun to gbigbọ-liho. Dile a yí jejejininọ do to alọkẹyi nugbo họakuẹ Biblu tọn enẹlẹ, a plọn lehe a sọgan dọnsẹpọ Jehovah bo hẹn dewe do owanyi etọn mẹ do, nado sọgan mọ ogbẹ̀ madopodo.​—Jak. 4:8; Juda 20, 21.

Kẹdẹdile sika-dintọ de nọ jẹtukla nado mọ sika he nọ yin mimọ to tọ̀sisa mẹ de do, a sọgan ko nọ jẹtukla nado dín adọkunnu gbigbọmẹ tọn he họakuẹ lẹ mọ. To whenue a ko plọn nugbo dodonu tọn Biblu  tọn lẹ godo, e yọnbasi dọ a yin whinwhàn nado ze afọdide he plan we jẹ klandowiwe po baptẹm po kọ̀n lẹ.​—Mat. 28:19, 20.

Sika-dintọ de sọgan mọ sika flinflin he ma sù sọmọ to osó he miyọ́n dù lẹ mẹ. Adà osó lọ tọn delẹ nọ bẹ gànmú susu hẹn sọmọ bọ eyin yè kùn yé bo gbà yé, yè sọgan mọ sika akú. To whenue yè kùn osé lọ bo gbà ẹ godo tlolo, e sọgan gbẹ́ vẹawu nado mọ sika lọ to gànmú lọ mẹ. Etẹwutu? Na eyin yè gbà osé tọnu dopo bo mọ gànmú sika tọn akuẹgegenu to e mẹ, nudi sika glamu 10 poun wẹ yè sọgan mọ! Etomọṣo, na sika-kùntọ de, vivẹnudido enẹ ma yin ovọ́.

Mọdopolọ to whenue nukunnumọjẹnumẹ mẹde tọn tlẹ ko zẹ̀ “nuplọnmẹ dodonu tọn Klisti tọn” go, mẹlọ dona gbẹ́ dovivẹnu. (Heb. 6:1, 2) A dona dovivẹnu vẹkuvẹku nado mọ nuagokun yọyọ lẹ po nuplọnmẹ yọ́n-na-yizan lẹ po to oplọn Biblu tọn towe whenu. Enẹwutu, dile a tlẹ sọgan ko to Owe-wiwe lẹ plọn sọn owhe susu die, etẹwẹ a sọgan wà nado hẹn ẹn diun dọ oplọn mẹdetiti tọn gbẹ́ nọ hẹn ale wá na we?

Hẹn ojlo vẹkuvẹku he a tindo na nupinplọn go. Nọ na ayidonugo sọwhiwhe tọn nudọnamẹ flinflin lẹ. Zindonukọn nado to vivẹnudo, podọ a na mọ adọkunnu Owe-wiwe lẹ tọn he taidi sika flinflin lẹ, enẹ wẹ nuyọnẹn po anademẹ Jiwheyẹwhe tọn po. (Lom. 11:33) Nado hẹn oyọnẹn Owe-wiwe tọn towe jideji, nọ yí azọ́nwanu dodinnanu tọn he tin-to-aimẹ to ogbè towe mẹ lẹ zan ganji. Nọ yí sọwhiwhe do dín anademẹ po gblọndo kanbiọ Biblu tọn voovo he a tindo nuhudo etọn po. Biọ to mẹdevo lẹ si nado dọ wefọ po hosọ he yé mọdọ e yin alọgọnamẹnu po tulinamẹnu po taun lẹ na we. Nọ má nuagokun ojlofọndotenamẹ tọn he a mọ to whenue a to Ohó Jiwheyẹwhe tọn plọn lẹ hẹ mẹdevo lẹ.

Na nugbo tọn, yanwle towe ma yin nado hẹn oyọnẹn towe jideji poun. Apọsteli Paulu na avase dọ “oyọnẹn nọ kla.” (1 Kọl. 8:1) Enẹwutu, dovivẹnu vẹkuvẹku nado yin whiwhẹnọ bo lodo to yise mẹ zọnmii. Sinsẹ̀n-bibasi whẹndo tọn po oplọn mẹdetiti tọn Biblu tọn gbesisọ tọn po na gọalọna we nado nọgbẹ̀ sọgbe hẹ nujinọtedo Jehovah tọn lẹ bo nasọ whàn we nado gọalọna mẹdevo lẹ. Hú popolẹpo, a na jaya, na a mọ nude he họakuẹ tlala hú sika wutu.​—Howh. 3:13, 14.