ETẸWẸ pẹ̀n na nudi kilo 1,4 poun, ṣigba bo yin alọdlẹndo taidi “nuhe doglẹ hugan he nkọ mí ma ko mọ pọ́n to wẹkẹ mítọn mẹ”? Apọ̀n gbẹtọvi tọn wẹ. E jiawu taun. Lehe mí plọnnu susu gando e go do, mọ wẹ pinpẹn-nutọn-yinyọnẹn mítọn na azọ́n “jiawu” Jehovah tọn lẹ na siso do. (Salm. 139:14) Lẹnnupọndo dopo poun to nugopipe susu he apọ̀n mítọn tindo lẹ mẹ ji, enẹ wẹ nado nọ yí nukun homẹ tọn do pọ́n nulẹ.

Etẹwẹ nukun homẹ tọn yíyí do pọ́n nulẹ zẹẹmẹdo? Wezẹhomẹ de basi zẹẹmẹ etọn taidi “nugopipe he a tindo nado wleawuna yẹdide kavi linlẹn lẹ to ayiha towe mẹ gando nuhe yin nuyọyọ po ojlofọndotenamẹnu lẹ po go kavi gando nuhe a ma ko tindo numimọ etọn pọ́n lẹ go.” Po zẹẹmẹ enẹ po to ayiha mẹ, be a ma kọngbedopọ dọ a nọ yí nukun homẹ tọn towe zan whẹwhẹ ya? Di apajlẹ, be hiẹ ko hia kavi sèhó gando nọtẹn de he a ma dlapọn gbede go ya? Be enẹ glọnalina we nado wleawuna yẹdide nọtẹn lọ tọn to apọ̀nmẹ wẹ ya? Na taun tọn, whedepopenu he mí lẹnnupọndo nude he mí ma sọgan mọ, sè, dọ́pọ́n, doalọ e go, kavi sewán etọn ji, nukun homẹ tọn mítọn yizan wẹ mí te.

Biblu gọalọna mí nado mọnukunnujẹemẹ dọ gbẹtọvi lẹ yin awuwlena bo yin didá to apajlẹ Jiwheyẹwhe tọn mẹ. (Jen. 1:26, 27) Be enẹ ma zẹẹmẹdo dọ, to linlẹn de mẹ, Jehovah lọsu tindo nugopipe lọ nado nọ yí nukun homẹ tọn zan ya? Na ewọ mọdọ e jẹ nado dá mí po nugopipe ehe po wutu, e sọgbe hẹ lẹnpọn dagbe dọ ewọ ni donukun dọ mí ni nọ yí i zan nado mọnukunnujẹ ojlo etọn mẹ. (Yẹwh. 3:11) Nawẹ mí sọgan nọ yí nugopipe mítọn ehe zan po nuyọnẹn po nado mọnukunnujẹ ojlo Jiwheyẹwhe tọn mẹ gbọn, podọ aliho nulú tọn tẹlẹ mẹ wẹ mí ma dona nọ yí nugopipe enẹ zan te?

(1) Odlọ kléwhète tọn kúkú to ojlẹ he ma sọgbe mẹ kavi gando nuhe ma sọgbe lẹ go.

Odlọ kléwhète tọn kúkú ma ylan to ede mẹ. Na nugbo tọn, kunnudenu tin dọ e sọgan yin alenu. Etomọṣo, e yọnbasi dọ mí ni tindo mahẹ to nuwiwa delẹ mẹ to ojlẹ he ma sọgbe mẹ, na Yẹwhehodọtọ 3:1 gọalọna mí nado yọnẹn dọ “ojlẹ de [tin] na nuwiwa lẹpo.” Di apajlẹ, eyin mí nọ na dotẹnmẹ ayiha mítọn nado dánpe to opli agun tọn lẹ kavi Biblu pinplọn mẹdetiti tọn whenu, be alọgọ de yin wẹ nukun homẹ tọn mítọn te ya kavi aliglọnnamẹnu de? Jesu lọsu na avase he hẹnmẹ lẹnnupọn de gando owù lọ nado na dotẹnmẹ ayiha mítọn nado lẹn nuhe ma sọgbe lẹ go, taidi nulinlẹnpọn do fẹnnuwiwa ji. (Mat. 5:28) Delẹ to nuhe mí sọgan yí nukun homẹ tọn do pọ́n lẹ mẹ sọgan hẹn homẹgble Jehovah taun. Odlọ kléwhète tọn kúkú gando fẹnnuwiwa go sọgan planmẹ jẹ fẹnnuwiwa kọ̀n. Magbe ma nado dike gbede na nukun homẹ tọn towe ni hẹn we jẹla sọn Jehovah dè blo!

(2) Linlẹn lọ tintindo dọ agbasanu lẹ sọgan namẹ hihọ́ he dẹn-to-aimẹ.

Mí tindo nuhudo agbasanu lẹ tọn podọ yé nọ yọ́n-na-yizan. Etomọṣo, e họnwun dọ mí na jẹflumẹ eyin mí jẹ linlẹn ji dọ yé yin asisa hihọ́ tọn po ayajẹ nujọnu tọn po. Ahọlu nuyọnẹntọ lọ Sọlomọni wlan dọmọ: “Adọkun wẹ yin tòdaho gángán adọkunnọ tọn; e sọ nọ taidi adó hihọ́-basinamẹ  tọn de to linlẹn etọn mẹ.” (Howh. 18:11) Di apajlẹ, lẹnnupọndo nuhe jọ ji to whenue jikun daho de ja bọ otọ̀ gbà fisusu to tòhò Manille tọn mẹ to Philippines to septembre 2009. Be mẹhe tindo agbasanu susu lẹ ma jiya to nujijọ ehe whenu wẹ ya? Dawe adọkunnọ de he hẹn nutindo etọn susu bu to nugbajẹmẹji lọ whenu dọ dọ jikun sinsinyẹn enẹ hẹn onú mẹlẹpo tọn gble bo hẹn “nuhahun po yajiji po wá na akuẹnọ lẹ po wamọnọ lẹ po.” E sọgan bọawu nado lẹndọ agbasanu lẹ nọ hẹn hihọ́ nujọnu tọn wá. Ṣigba nugbo lọ wẹ yindọ, e ma nọ yinmọ.

 (3) Nuhiha glanglan gando nuhe sọgan nọma jọ gbede lẹ go.

Jesu na mí ayinamẹ ma nado yin “magbọjẹnọ” zẹjlẹgo. (Mat. 6:34) Mẹhe nọ hànu to whepoponu nọ yí nukun homẹ tọn etọn zan zẹjlẹgo. Dile mí to nuhà gando nuhahun he mí yí nukun homẹ tọn do to mimọ lẹ go, yèdọ nuhahun he ma ko jọ lẹ kavi he sọgan nọma jọ gbede lẹ, e bọawu dọ mí ni hẹn huhlọn susu gú. Owe-wiwe lẹ dohia dọ nuhiha mọnkọtọn sọgan hẹnmẹ gbọjọ kavi tlẹ hẹn apọṣimẹ sinsinyẹn wá. (Howh. 12:25, nudọnamẹ odò tọn.) Lehe e yin nujọnu nado yí ayinamẹ Jesu tọn do yizan mẹ do sọ gbọn didapana nuhiha glanglan dali bo nọ pehẹ nuhahun he azán dopodopo hẹnwa.

(1) Nado nọ mọ owù lẹ hlan nukọn bo nọ dapana yé.

Owe-wiwe lẹ na tuli mí nado yin zinzintọ bo nọ mọnú hlan nukọn. (Howh. 22:3) Gbọn nukun homẹ tọn mítọn yiyizan dali, mí sọgan lẹnnupọndo kọdetọn he nudide lẹ sọgan hẹnwa ji whẹpo do nọ basi yé. Di apajlẹ, eyin a yin oylọ-basina nado yì nuwiwa pọmẹ tọn de tẹnmẹ, nawẹ nukun homẹ tọn sọgan gọalọna we gbọn bọ a na basi nudide nuyọnẹn tọn vlavo nado yì kavi nado gọ̀n? To whenue a ko lẹnnupọndo nuhe bọdego ehelẹ ji godo, enẹ wẹ mẹdevo he yin oylọ-basina lẹ, omẹ sọha he na wá, fihe e na yin bibasi te po ogàn he mẹ e na yin bibasi te po, kanse dewe dọ: ‘Etẹwẹ sọgan jọ to finẹ?’ Be a sọgan yí nukun homẹ tọn do mọ nuwiwa pọmẹ tọn dagbe de he na tin to kọndopọ mẹ hẹ nunọwhinnusẹ́n Biblu tọn lẹ ya? Ehe wiwà sọgan hẹn we penugo nado mọ nujijọ lọ hlan to ayiha towe mẹ. Nukun homẹ tọn towe yiyizan nado basi nudide nuyọnẹn tọn lẹ na gọalọna we nado dapana ninọmẹ he na hẹn awugble wá na we to gbigbọ-liho lẹ.

(2) Nado nọ lẹnnupọn jẹnukọn do lehe a na didẹ nuhahun lẹ do ji.

Nukun homẹ tọn yiyizan sọ nọ bẹ “nugopipe lọ nado pannukọn nuhahun de bo didẹ ẹ” hẹn. Mí ni dọ dọ hiẹ po mẹde po tindo wiwọ́ to agun towe mẹ. Nawẹ a na dọnsẹpọ mẹmẹsunnu kavi mẹmẹyọnnu towe nado tẹnpọn bo basi jijọho  gbọn? Nususu ji wẹ a dona lẹnnupọndo. Nawẹ yè nọ dọhona ẹn gbọn? Ojlẹ tẹwẹ na yọ́n hugan nado dọhodo nuhahun lọ ji? Hogbe tẹlẹ podọ kọnugbè tẹwẹ na yọ́n hugan nado zan? Gbọn nukun homẹ tọn towe yiyizan dali, a sọgan lẹnnupọn jẹnukọn do aliho voovo he mẹ a na didẹ nuhahun lọ te lẹ ji bo de aliho he a mọdọ e na tindo kọdetọn dagbe hugan bo nasọ yin alọkẹyi po awubibọ po. (Howh. 15:28, nudọnamẹ odò tọn.) Nulinlẹnpọn to aliho mọnkọtọn mẹ nado didẹ ninọmẹ sinsinyẹn de na gọalọna we nado yidogọna jijọho to agun mẹ. Na nugbo tọn, aliho dagbe de niyẹn nado yí nukun homẹ tọn towe zan.

(3) Nado hẹn Biblu pinplọn mẹdetiti tọn towe zun alenu.

Biblu hihia egbesọegbesọ yin nujọnu. Etomọṣo, weta susu hihia kẹdẹ ma ko pé. Mí dona nọ tunwun nuplọnmẹ yọ́n-na-yizan he tin to Biblu mẹ lẹ go, bosọ nọ yin whinwhàn nado yí yé do yizan mẹ to gbẹzan mítọn mẹ. Biblu hihia mítọn dona nọ hẹn pinpẹn-nutọn-yinyọnẹn mítọn na aliho Jehovah tọn lẹ jideji. Nukun homẹ tọn mítọn sọgan gọalọna mí nado wà ehe. Gbọnna? Lẹnnupọndo owe Hodo Apajlẹ Yise Yetọn Tọn ji. Kandai he tin to owe ehe mẹ lẹ hihia sọgan yinuwado nukun homẹ tọn mítọn ji, na yé na gọalọna mí nado mọ fie nulọ lẹ jọ te po ninọmẹ mẹhe go Biblu donù lọ lẹ tọn po hlan. Mí nọ yin alọgọna nado mọ nuhe tin to finẹ lẹ, sè nudidọ lẹ, sewán lẹ, bo doayi numọtolanmẹ mẹhe yin nùdego lẹ tọn go. Ehe nọ zọ́n bọ mí nọ doayi nuplọnmẹ dagbedagbe lẹ po linlẹn tulinamẹ tọn lẹ po go sọn kandai Biblu tọn he mí sọgan nọ lẹndọ mí ko jẹakọ hẹ ganji lẹ mẹ. Nukun homẹ tọn mítọn yiyizan to aliho ehe mẹ to Biblu pinplọn mẹdetiti tọn whenu na hẹn oplọn mítọn zun alenu taun.

(4) Nado wleawuna awuvẹmẹ bosọ nọ do e hia.

Awuvẹmẹ yin jẹhẹnu dagbedagbe de he yin alọdlẹndo taidi awufiẹsa mẹdevo tọn to ahun mítọn mẹ. Na Jehovah po Jesu po nọ do awuvẹmẹ hia wutu, mí na wà dagbe nado hodo apajlẹ yetọn. (Eks. 3:7; Salm. 72:13) Nawẹ mí sọgan wleawuna jẹhẹnu ehe gbọn? Dopo to aliho dagbe hugan lẹ mẹ nado wleawuna awuvẹmẹ wẹ nado nọ yí nukun homẹ tọn mítọn zan. Vlavo mí ma ko jugbọn ninọmẹ he mẹ mẹmẹsunnu kavi mẹmẹyọnnu hatọ mítọn tin te mẹ pọ́n. Etomọṣo, a sọgan kanse dewe dọ: ‘Eyin yẹn wẹ tin to ninọmẹ ehe mẹ, etẹwẹ na ko yin numọtolanmẹ ṣie? Etẹ sin hudo n’na tindo?’ Nukun homẹ tọn yiyizan nado mọ gblọndo na kanbiọ enẹlẹ na gọalọna mí nado nọ vẹawumẹ dogọ. Na nugbo tọn, adà gbẹzan Klistiani tọn mítọn lẹpo he bẹ lizọnyizọn mítọn po haṣinṣan mítọn hẹ Klistiani devo lẹ po hẹn wẹ na pọnte eyin mí nọ do awuvẹmẹ hia.

(5) Nado mọ lehe gbẹninọ na te to aihọn yọyọ lọ mẹ hlan.

Owe-wiwe lẹ bẹ zẹẹmẹ ojlofọndotenamẹ tọn lẹ hẹn gando lehe gbẹninọ na te do to aihọn yọyọ dopagbe Jiwheyẹwhe tọn mẹ go. (Isa. 35:5-7; 65:21-25; Osọ. 21:3, 4) Owe mítọn lẹ nọ bẹ yẹdide whanpẹnọ susu lẹ hẹn he nọ hẹn zẹẹmẹ enẹlẹ họnwun dogọ. Etẹwutu? Yẹdide lọ lẹ nọ yinuwado ayiha mítọn ji bo nọ gọalọna mí nado mọ míde hlan taidi mẹhe to vivi dona sọgodo tọn ehelẹ tọn dù. Jehovah, mẹhe yin Didatọ nugopipe lọ nado yí nukun homẹ tọn do pọ́n nulẹ tọn, yọ́n lehe nugopipe ehe dohuhlọn sọ hugan mẹdevo depope. Nugopipe ehe yiyizan nado lẹnnupọndo opagbe etọn lẹ ji sọgan na mí jide gando hẹndi yetọn go bo na gọalọna mí nado gbọṣi nugbonọ-yinyin mẹ mahopọnna avùnnukundiọsọmẹnu he mí nọ doakọnna to egbehe lẹ.

Jehovah gbọn owanyi dali na mí nugopipe jiawu lọ nado nọ yí nukun homẹ tọn do mọ nulẹ. Na nugbo tọn, nugopipe ehe sọgan gọalọna mí nado sẹ̀n ewọ ganji to gbẹzan egbesọ tọn mítọn mẹ. Mì gbọ mí ni do pinpẹn-nutọn-yinyọnẹn mítọn hia na Mẹhe na mí nunina jiawu ehe gbọn yíyí i zan po nuyọnẹn po to azán dopodopo ji dali.