TO OWHE he wayi mẹ lẹdo aihọn pé, sunnu fọtọ́n susu wẹ yin pipà taidi mẹho agun tọn po devizọnwatọ lizọnyizọnwiwa tọn po. Eyin a yin dopo to mẹmẹsunnu vivẹ́ enẹlẹ mẹ, ayihaawe ma tin dọ homẹ towe hùn na lẹblanulọkẹyi sinsẹ̀nzọn tọn yọyọ he a mọyi.

Ṣigba, e sọgbe ga dọ a sọgan nọ hanú vude. Jason, mẹho agun tọn jọja de dọmọ: “Tlolo he n’yin pipà, n’mọdọ azọngban yọyọ lọ lẹ na húagbọ́ mi.” Mose po Jelemia po mọdọ emi ma pegan to whenue yé mọ azọ́ndenamẹ yọyọ lẹ yí sọn Jehovah dè. (Eks. 4:10; Jel. 1:6) Eyin a tindo numọtolanmẹ mọnkọtọn lẹ, nawẹ a sọgan duto yé ji bo to nukọnyi zọnmii gbọn? Lẹnnupọndo apajlẹ devi Timoti tọn ji.—Owalọ 16:1-3.

E yọnbasi dọ Timoti ko sẹpọ vivọnu owhe aflanmẹ tọn kavi ko tindo owhe 20 linlán, whenue apọsteli Paulu basi oylọna ẹn nado lẹzun tomẹyitọ hatọ etọn. To bẹjẹeji, na Timoti gbẹ́ yin jọja wutu, e sọgan ko nọ gboawupo nado yin nujikudonọ, bo nọ whleawu nado yinuwa to azọ́ndenamẹ yọyọ etọn mẹ. (1 Tim. 4:11, 12; 2 Tim. 1:1, 2, 7) Ṣigba to owhe ao godo, Paulu sọgan dọna agun Filipi tọn dọmọ: “Yẹn tindo todido to Oklunọ Jesu mẹ nado do Timoti hlan mì dè to madẹnmẹ . . . Na yẹn ma tindo mẹdevo de he tindo ayilinlẹn he taidi ewọ tọn.”—Flp. 2:19, 20.

Etẹwẹ gọalọna Timoti nado lẹzun mẹho agun tọn ayidego tọn de? Gbọ mí ni gbadopọnna onú ṣidopo delẹ he mí sọgan plọn sọn apajlẹ etọn mẹ.

1. E nọ penukundo gbẹtọ lẹ go ganji. Paulu dọna mẹmẹsunnu he to Filipi lẹ dọmọ: “[Timoti] na penukundo mì go sọn ahun mẹ wá.” (Flp. 2:20) Na nugbo tọn, Timoti nọ homẹtọnpọn. Dagbemẹninọ gbẹtọ lẹ tọn to gbigbọ-liho nọ duahunmẹna ẹn sisosiso, podọ e nọ wleawufo nado yí ede zan do ota yetọn mẹ.

Payi ma nado taidi húnkùntọ he go ohó milomilo de dọho gando dọ, nuhe nọ duahunmẹna ẹn wẹ nado jẹ húnglintẹn dopodopo do gànmẹ kakati ni yin nado nọ ze ahisinọ lẹ. William, he ko sẹ̀n taidi mẹho agun tọn na owhe 20 linlán bọ yè nọ na sisi de, na ayinamẹ sunnu he ṣẹṣẹ yin pipà lẹ dọmọ: “Mì nọ yiwanna mẹmẹsunnu lẹ. Nuhudo yetọn lẹ ni nọ duahunmẹna mì hugan tito-bibasina nulẹ to agun mẹ.”

2. E nọ ze onú gbigbọmẹ tọn lẹ do otẹn tintan mẹ. Paulu do lehe apajlẹ Timoti tọn gbọnvona mẹdevo lẹ tọn do hia dọmọ: “Mẹhe pò lẹpo wẹ nọ to ale yetọn titi lẹ dín, e ma yin Jesu Klisti tọn lẹ gba.” (Flp. 2:21) Lomu wẹ Paulu kàn wekanhlanmẹ lọ sọn. E doayi e go dọ mẹmẹsunnu he to finẹ lẹ nọ hẹn alọnu yetọn ján to yanwle mẹdetiti tọn lẹ mẹ zẹjlẹgo. Jẹ obá de mẹ, yé ma nọ yí yede zan to azọ́n lọ mẹ to gigọ́ mẹ. Amọ́, Timoti ma nọ wàmọ! To whenue dotẹnmẹ lẹ hundote nado gọalọ to nukọnyiyi wẹndagbe lọ tọn mẹ, e yinuwa taidi Isaia, mẹhe dọmọ: “Yẹn die! Do mi hlan!”—Isa. 6:8.

Nawẹ a sọgan hẹn jlẹkajininọ go to azọngban mẹdetiti tọn lẹ po gbigbọmẹ tọn towe lẹ po ṣẹnṣẹn gbọn? Tintan, nọ yọ́n nuhe dona tin to otẹn tintan mẹ lẹ. Paulu na tuli mí nado nọ “mọdona nuhe  yin nujọnu hugan lẹ.” (Flp. 1:10) Nọ ze nuhe to otẹn tintan mẹ na Jiwheyẹwhe lẹ do otẹn tintan mẹ. Awetọ, hẹn gbẹzan towe bọawu. Zẹhudo nuhe nọ gú whenu po huhlọn mẹtọn po lẹ ji. Paulu dotuhomẹna Timoti dọmọ: “Nọ họ̀nna ojlo jọja whenu tọn lẹ, ṣigba nọ doafọna dodowiwa, yise, owanyi, jijọho.”—2 Tim. 2:22.

3. E nọ wazọ́n sinsinyẹn to sinsẹ̀nzọn wiwe lọ mẹ. Paulu flinnu Filipinu lẹ dọmọ: “Mìwlẹ yọ́n kunnudenu he [Timoti] ko na gando ede go, dọ ewọ ko wazọ́n hẹ mi taidi ovi de hẹ otọ́ na nukọnyiyi wẹndagbe lọ tọn.” (Flp. 2:22) Timoti ma yin adidọnọ. E wazọ́n sinsinyẹn dopọ hẹ Paulu, podọ ehe hẹn haṣinṣan owanyi tọn he to ṣẹnṣẹn yetọn lodo dogọ.

To egbehe, azọ́n susu wẹ tin to titobasinanu Jiwheyẹwhe tọn mẹ. Azọ́n enẹ nọ hẹn pekọ wá namẹ taun bo sọgan sọ dọ̀n we sẹpọ Klistiani hatọ lẹ dogọ. Enẹwutu, yí do basi yanwle nado nọ tindo “nususu nado wà to azọ́n Oklunọ tọn mẹ” to whepoponu.—1 Kọl. 15:58.

4. E nọ yí nuhe e plọn lẹ do yizan mẹ. Paulu kanwehlan Timoti dọmọ: “Hiẹ ko na ayidonugo sọwhiwhe tọn nuplọnmẹ ṣie, aliho gbẹzan tọn ṣie, lẹndai ṣie, yise ṣie, homẹfa ṣie, owanyi ṣie, akọndonanu ṣie.” (2 Tim. 3:10) Na Timoti nọ yí nuhe e plọn lẹ do yizan mẹ wutu, e pegan na azọngban pinpẹn lẹ.—1 Kọl. 4:17.

Be a do ayinamẹtọ gbigbọmẹ tọn de ya? Eyin a ma do, naegbọn a ma nado dín omẹ mọnkọtọn de? Tom, he yin mẹho agun tọn na owhe susu, flin dọmọ: “Mẹho numimọnọ de do ojlo nujọnu tọn hia to yẹn mẹ bo na mi azọ́nplọnmẹ dagbe. N’nọ kàn ayinamẹ lẹ sè e whẹwhẹ bosọ nọ yí yé do yizan mẹ. Ehe zọ́n bọ n’yawu wleawuna adọgbigbo.”

5. E nọ to azọ́nplọn ede zọnmii. Paulu dotuhomẹna Timoti dọmọ: “Nọ to dewe plọn po yanwle lọ po nado tindo mẹdezejo na Jiwheyẹwhe.” (1 Tim. 4:7) Aihundatọ lanmẹyiya tọn de sọgan tindo anademẹtọ de, ṣigba ewọ lọsu dona nọ plọnazọ́n ede. Paulu na tuli Timoti dọmọ: “Zindonukọn nado nọ jo dewe na wehihia gbangba tọn, na tudohomẹnamẹ, na mẹpinplọn. . . . Nọ lẹnnupọndo onú ehelẹ ji; jo dewe na yé, na nukọnyiyi towe nido họnwun hezeheze na gbẹtọ lẹpo.”—1 Tim. 4:13-15.

Hiẹ lọsu dona nọ to nugopipe towe lẹ hẹn pọnte. Nọ to nukọnyi to gbigbọ-liho bosọ nọ jẹakọ hẹ anademẹ agọe tọn he titobasinanu lọ na lẹ. Humọ, nọ dapana jidide do dewe titi go zẹjlẹgo—vlavo gbọn linlẹn dali dọ a ko tindo numimọ susu bo sọgan penukundo whẹho depope go eyin a ma tlẹ basi dodinnanu sọwhiwhe tọn. Taidi Timoti, “nọ payi dewe po mẹpinplọn towe po go to whepoponu.”—1 Tim. 4:16.

6. E nọ ganjẹ gbigbọ Jehovah tọn go. Paulu lẹnnupọndo lizọnyizọn Timoti tọn ji bo flinnu in dọmọ: “Nọ basi hihọ́na nuhọakuẹ lọ he yin zizedo alọmẹ na we gbọn gbigbọ wiwe he tin to mí mẹ lọ dali.” (2 Tim. 1:14) Nado wàmọ, Timoti dona ganjẹ gbigbọ Jiwheyẹwhe tọn go.

Donald he ko yin mẹho agun tọn na owhe susu lẹ doayi e go dọmọ: “Sunnu azọngbannọ lẹ dona nọ wlebòna haṣinṣan yetọn hẹ Jiwheyẹwhe. Mẹhe nọ wàmọ lẹ sin ‘huhlọn na nọ jẹ e ji.’ Eyin yé nọ biọ gbigbọ Jiwheyẹwhe tọn to odẹ̀ mẹ bo nọ wleawuna sinsẹ́n etọn, yé na yin dona nujọnu tọn de na mẹmẹsunnu yetọn lẹ.”—Salm. 84:7; 1 Pita 4:11.

Tulinamẹnu daho de wẹ e yin nado mọdọ mẹmẹsunnu susu he ṣẹṣẹ yin pipà, taidi hiẹ lẹ, to nukọnyiyi basi to gbigbọ-liho. Jason, he yin nùdego to bẹjẹeji, dọmọ: “Sọn whenue gbọ́n n’yin pipà di mẹho, n’ko plọn nususu, podọ jidide ṣie ko jideji. Todin, n’to vivi azọ́ndenamẹ ṣie tọn dù taun, podọ n’nọ mọ ẹn di lẹblanulọkẹyi jiawu de!”

Be a na to nukọnyi zọnmii to gbigbọ-liho ya? Yí do basi yanwle towe nado plọnnu sọn apajlẹ Timoti tọn mẹ. Gbọnmọ dali, hiẹ lọsu na yin dona de na omẹ Jiwheyẹwhe tọn lẹ.