Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Dile mẹjitọ he yì otò devo mẹ lẹ to alọgọna ovi yetọn lẹ to gbigbọ-liho, naegbọn yé dona lẹnnupọndo whẹho ogbè tọn ji?

E yọnbasi dọ ovi lẹ ni plọn ogbè lẹdo lọ tọn to wehọmẹ podọ to lẹdo he mẹ yé nọ nọ̀. Eyin ovi de sè ogbè susu, enẹ sọgan gọalọna ẹn taun. Mẹjitọ lẹ dona lẹnnupọndo agun he mẹ ovi yetọn lẹ na nọ nado mọnukunnujẹ nugbo lọ mẹ ganji bosọ yinukọn to gbigbọ-liho te ji, vlavo yé na kọnawudopọ hẹ agun he nọ do ogbè lẹdo lọ tọn kavi dehe nọ do ogbè mẹjitọ lọ lẹ tọn. Mẹjitọ Klistiani lẹ nọ ze dagbemẹninọ ovi yetọn lẹ tọn do otẹn tintan mẹ kakati nido yin nujlomẹ yetọn titi lẹ.—w17.05, weda 9-11.

Whenue Jesu kanse Pita dọ: “Be hiẹ yiwanna mi hú ehelẹ ya?” etẹwẹ hogbe lọ “ehelẹ” to alọdlẹndo? (Joh. 21:15)

E taidi dọ whèvi he to apá na yé lẹ wẹ Jesu to alọdlẹndo kavi azọ́n whèhuhu tọn lọ. To okú Jesu tọn godo, Pita lẹkọ do azọ́n etọn hoho lọ kọ̀n, yèdọ azọ́n whèhuhu tọn. Klistiani lẹ dona gbeje otẹn he mẹ agbasazọ́n yetọn tin te to ahun yetọn mẹ pọ́n.—w17.05, weda 22-23.

Naegbọn Ablaham do biọ to asi etọn si nado dọ dọ nọviyọnnu emitọn wẹ e yin? (Jen. 12:10-13)

Na nugbo tọn, nọviyọnnu daa Ablaham tọn wẹ Sala yin. Eyin Sala ko dọ dọ asi etọn wẹ emi yin dai wẹ, Ablaham sọgan ko yin hùhù, bọ kúnkan he Jiwheyẹwhe dopagbe etọn na ẹn lọ ma na ko wá gbọn ewọ gblamẹ ba.—wp17.3, weda 14-15.

Ayiha tẹwẹ Elias Hutter kàn nado gọalọna mẹhe jlo na plọn Heblugbe lẹ?

E jlo na gọalọna wehọmẹvi etọn lẹ nado yọ́n vogbingbọn he tin to hogbe tangan Heblugbe tọn he to Biblu mẹ lẹ po wekun he jẹnukọn kavi dehe gbọngodo lẹ po ṣẹnṣẹn. Enẹwutu, e nọ zín hogbe tangan lẹ po wekun he tàn po, bo nọ zín wekun he jẹnukọn kavi dehe gbọngodo lẹ po wekun he ma tàn po. Aliho dopolọ wẹ yin hihodo to nudọnamẹ odò tọn Les Saintes Écritures—Traduction du monde nouveau—avec notes et références tọn lẹ mẹ.—wp17.4, weda 11-12.

Etẹlẹ ji wẹ Klistiani de dona lẹnnupọndo nado yọnẹn eyin ewọ na tindo osò de nado basi hihọ́na ede sọta mẹdevo lẹ?

Onú delẹ die: Onú wiwe wẹ ogbẹ̀ yin to nukun Jiwheyẹwhe tọn mẹ. Jesu ma na tuli hodotọ etọn lẹ nado hẹn ohí nado basi hihọ́na yede gba. (Luku 22:36, 38) Mí dona yí ohí mítọn lẹ do tùn glepọnu. Ogbẹ̀ họakuẹ taun hú agbasanu lẹ. Mí nọ na sisi ayihadawhẹnamẹnu mẹdevo lẹ tọn, podọ mí dona ze apajlẹ dagbe dai. (2 Kọl. 4:2)—w17.07, weda 31-32.

Naegbọn kandai he Matiu basi gando ovu whenu Jesu tọn go do gbọnvona dehe Luku basi?

Matiu na ayidonugo nujijọ he mẹ Josẹfu sọawuhia te lẹ, taidi lehe e yinuwa do to whenue Malia mọhò, to whenue angẹli de dọna ẹn nado họnyi Egipti, podọ to godo mẹ nado lẹkọ. Malia wẹ Luku na ayidonugo hugan; di apajlẹ, whenue e dla Elizabẹti pọ́n, podọ nuyiwa etọn to whenue ovi pẹvi lọ Jesu gbọṣi tẹmpli mẹ.—w17.08, weda 32.

Etẹwẹ yin delẹ to avùnnukundiọsọmẹnu he Biblu ko pehẹ lẹ mẹ?

Dile ojlẹ to yìyì, hogbe po hodidọ he yin yiyizan to Biblu mẹ delẹ po sọgan wá diọ. Diọdo he wá aimẹ to tonudidọ-liho lẹ wẹ nọ magbe ogbè he na gbayipe hugan tọn. Nukundiọsọmẹ delẹ fọ́n sọta lẹdogbedevomẹ Biblu tọn do ogbè he gbayipe hugan lẹ mẹ.—w17.09, weda 19-21.

Be mí tindo angẹli hihọ́-basinamẹtọ de wẹ ya?

Lala. Jesu dọ dọ angẹli devi emitọn lẹ tọn nọ to Jiwheyẹwhe nukọn. (Mat. 18:10) Nuhe dọ e te wẹ yindọ, angẹli lẹ nọ tindo ojlo to devi etọn lẹ mẹ, e ma yindọ angẹli lẹ nọ basi hihọ́na dopodopo yetọn to azọ́njiawu-liho wẹ gba.—wp17.5, weda 5.

Owanyi tẹwẹ yiaga hugan?

Owanyi lọ a·gaʹpe wẹ yin owanyi he yiaga hugan, na e sinai do nunọwhinnusẹ́n he sọgbe lẹ ji wutu. Dile e sọgan bẹ numọtolanmẹ sisosiso lẹ hẹn, nuhe nọ do e hia hugan wẹ nuyiwa matin ṣejannabi na dagbe mẹdevo lẹ tọn.—w17.10, weda 7.