AZỌ́N Ahọluduta lọ tọn ma yinukọn sọmọ to Brésil to bẹjẹeji 1930 lẹ tọn. Ṣigba to 1935, gbehosọnalitọ lẹ, yèdọ Nathaniel po Maud Yuille po wlanwe dohlan Joseph F. Rutherford, he nọ deanana azọ́n yẹwhehodidọ tọn lọ to whenẹnu. Yé ze yede jo nado wà sinsẹ̀nzọn lọ, podọ yé dọ dọ homẹ emitọn na “hùn nado yì fidepope.”

Nathaniel he yin họ̀gbátọ-gán de bo tindo owhe 62 to whenẹnu, ko yí gbọjẹ whenu gaa tọn. Ewọ ko yin anadenanutọ sinsẹ̀nzọn tọn to agun Kunnudetọ Jehovah tọn lẹ tọn de mẹ to San Francisco, Californie to États-Unis. To finẹ, e ko basi titona azọ́n yẹwhehodidọ tọn lọ bo yí nuyizan gbèzeyiaga tọn zan nado hẹn wẹndagbe lọ gbayipe. Numimọ po ojlo he e tindo po yin dona de to azọ́ndenamẹ yọyọ etọn taidi devizọnwatọ alahọ tọn to Brésil mẹ​—yèdọ aigba-denamẹ de he gbloada bọ yè nọ do ogbè susu to e ji.

To 1936, Nathaniel po Maud po wá Brésil, gọna Antonio P. Andrade he yin gbehosọnalitọ hatọ podọ gbesetọ yetọn. Yé hẹn agbàn họakuẹ de​—yèdọ glamafonu 35 po mọto he tindo zomọ gbèzeyiaga tọn de po. Nudi wẹnlatọ Ahọluduta lọ tọn 60 poun wẹ tin to Brésil he yin atọ́ntọ to otò he klohugan to aihọn lọ mẹ lẹ mẹ to whenẹnu! Etomọṣo, nuyizan gbèzeyiaga tọn ehelẹ na gọalọna yé nado jẹ gbẹtọ livi susu dè to owhe kleun de poun gblamẹ.

Osun dopo to wiwá whẹndo Yuille tọn godo, alahọ basi titona plidopọ sinsẹ̀nzọn tọn tintan to Brésil, he yin bibasi to tòdaho São Paulo tọn mẹ. E taidi dọ Maud wẹ kùn mọto he tindo zomọ gbèzeyiaga tọn lọ bọ zomọ lọ nọ to oylọ basina gbẹtọ lẹ nado wá hodidọ na mẹlẹpo lọ tẹnmẹ, podọ omẹ 110 wẹ wá! Tito-to-whinnu plidopọ lọ tọn yinuwado wẹnlatọ lẹ ji bo whàn yé nado tindo mahẹ dogọ to sinsẹ̀nzọn  kunnudegbe tọn mẹ. Yé plọn lehe yé sọgan yí owe lẹ po kalti kunnudide tọn lẹ po zan do, gọna hoyidokanji glamafonu tọn lẹ to Glẹnsigbe, Allemagne-gbè, Hongrie-gbè, Pologne-gbè po Espagne-gbè po mẹ, podọ to nukọn mẹ to Portugal-gbè mẹ.

Plidopọ sinsẹ̀nzọn tọn atọ̀n he yin bibasi to São Paulo, Rio de Janeiro po Curitiba po to 1937 lẹ whànmẹ taun na azọ́n wẹndagbe-jijlá tọn. Plidopọ-watọ lẹ nọ to yìyì po mọto lọ po to azọ́n họndekọn-jẹ-họndekọn tọn mẹ. José Maglovsky, he yin jọja sunnu de to whenẹnu wá wlan dọmọ: “Mí nọ bẹ owe sinai do Biblu ji mítọn lẹ do tafo de ji, podọ dile [mọto lọ] to owẹ̀n he yin yiyidokanji de lá, mí nọ dọhona mẹhe tọ́n wá nado pọ́n nuhe to jijọ lẹ.”

Baptẹm nọ yin bibasi to tọ̀sisa lẹ mẹ, dile tọ̀lẹtọ́ lẹ nọ to yede hú to owhè-nù to yakẹ. Dotẹnmẹ hundote nankọ die nado lá wẹndagbe lọ na gbẹtọ lẹ po alọgọ mọto enẹ tọn po! Dile hodidọ baptẹm tọn Mẹmẹsunnu Rutherford tọn nọ to núdọ po awhá lélé po sọn nuyizan gbèzeyiaga tọn lẹ mẹ, tlintlindo-dintọ lẹ nọ lẹdo mọto lọ bo nọ dotoai dile gbesetọ de nọ to zẹẹmẹ basina yé do Portugal-gbè mẹ. To enẹgodo, mẹhe jlo na yí baptẹm lẹ nọ yí ahun lẹpo do jihàn Ahọluduta lọ tọn lẹ he yin yiyidokanji do Pologne-gbè mẹ. Mẹmẹsunnu po mẹmẹyọnnu lẹ po nọ jihàn lọ hẹ yé to ogbè devo lẹ mẹ. Owhewe 1938 tọn na linlin dọmọ: “Ehe flin mí lehe mẹdopodopo mọnukunnujẹ ogbè etọn titi mẹ do to Pẹntikọsti.”

To vivọnu plidopọ lọ lẹ tọn, to Sẹgbe lẹpo, vlavo owhè hùn kavi jikun ja, hodidọ sinai do Biblu ji he yin yiyidokanji lẹ nọ to yinyin hihò sọn mọto lọ mẹ bọ gbẹtọ lẹ nọ sè to nọtẹn ayidedai tọn lẹ, to owhé lẹ gbè podọ to azọ́nwhé he to ṣẹnṣẹn São Paulo tọn po tòpẹvi he sẹpọ ẹ lẹ po mẹ. Hodidọ sunmẹsunmẹ tọn de nọ yin hihò sọn mọto lọ mẹ na pòtọnọ 3 000 delẹ he nọ nọ̀ lẹdo de mẹ to nudi kilomẹtlu 97 do agewaji-whèyihọ São Paulo tọn. To ojlẹ de godo, agun he to jijideji de yin didoai. Mahopọnna nuyiwadomẹji he pòzọ̀n sọgan tindo do wẹnlatọ Ahọluduta lọ tọn enẹlẹ ji, yé biọgbè nado dla pòtọnọ lẹdo devo mẹ tọn lẹ pọ́n nado hẹn owẹ̀n homẹmiọnnamẹ tọn he to Biblu mẹ jẹ yè dè.

Sẹpọ vivọnu 1938 tọn wẹ owẹ̀n Ahọluduta lọ tọn wá yin yiyidokanji do Portugal-gbè mẹ te. To azán he gbè yè nọ basi hùnwhẹ oṣiọ lẹ tọn te, mọto lọ nọ yì sọn ṣiọditẹn de jẹ devo bo nọ to hoyidokanji lọ lẹ “Où sont les morts?,” “Jéhovah” po “Richesses” po hò, ehe jẹ omẹ hugan 40 000 he to aluẹmẹ lẹ dè!

Nugbo Biblu tọn he to yinyin lilá to gbangba lọ ma hẹn homẹ sinsẹ̀ngán lẹ tọn hùn bọ yé nọ saba gbidikọna aṣẹpatọ lẹ nado doalọtena mọto he tindo zomọ gbèzeyiaga tọn lọ. Mẹmẹyọnnu Yuille flin nujijọ de he mẹ yẹwhenọ lẹdo lọ tọn de sisẹ́ gbẹtọgun de nado lẹdo mọto lọ. Amọ́, ogán lẹdo lọ tọn po ponọ lẹ po wá bo dotoaina tito-to-whinnu lọ blebu. Ogán lọ yí owe sinai do Biblu ji de whẹpo do yì. Mẹde ma dú zingidi hẹ mí to azán lọ gbè. Mahopọnna nukundiọsọmẹ mọnkọtọn, Owhewe 1940 tọn na linlin gando Brésil go dọ owhe 1939 tọn yin “ojlẹ dagbe hugan nado sẹ̀n Yẹwhehọludutanọ Daho lọ bo lá oyín etọn.”

“Mọto he tindo zomọ gbèzeyiaga tọn Watch Tower tọn” hẹn diọdo daho de wá na azọ́n yẹwhehodidọ tọn to Brésil. E yí adà daho de wà nado jẹ gbẹtọ livi susu lẹ dè po owẹ̀n Ahọluduta lọ tọn po. Dile etlẹ yindọ mọto he mẹsusu yọnẹn ganji enẹ yin sisà to 1941, Kunnudetọ Jehovah tọn susu zindonukọn nado to wẹndagbe lọ lá na ahunjijlọnọ lẹ to aigba-denamẹ Brésil tọn he gbloada lọ ji.​—Sọn onú hoho sẹdotẹn mítọn to Brésil.