TO JỌWAMỌ-LIHO, gbẹtọ lẹ nọ jlo nado duvivi gbẹzan ayajẹnọ de tọn. Ṣigba, to azán godo tọn ehelẹ mẹ, mẹlẹpo wẹ nọ pannukọn whlepọn “he vẹawu nado pehẹ lẹ.” (2 Tim. 3:1) Whẹdida mawadodo, agbasamalo, azọ́nmamọwa, awufiẹsa kavi nudevo depope he nọ hẹn magbọjẹ po awubla po wá lẹ sọgan zọ́n bọ vudevude, mẹdelẹ na hẹn ayajẹ yetọn bu. Devizọnwatọ Jiwheyẹwhe tọn lẹ lọsu tlẹ sọgan wá jẹflumẹ bọ ayajẹ yetọn na depò. Eyin ehe jọ do gowe, nawẹ a gán gọ̀ ayajẹ towe mọyi gbọn?

Nado na gblọndo na kanbiọ enẹ, jẹnukọn whẹ́, mí dona mọnukunnujẹ nuhe ayajẹ nujọnu tọn yin mẹ, gọna lehe mẹdevo lẹ ko penugo nado hẹn ayajẹ yetọn go mahopọnna whlepọn lẹ do. Enẹgodo, mí na plọn nuhe mí gán wà nado hẹn ayajẹ mítọn go bosọ hẹn ẹn jideji.

Vogbingbọn tin to gbẹtọ ayajẹnọ po mẹhe jọmẹ kavi nọ konu poun po ṣẹnṣẹn. Di apajlẹ, to whenue ahànnumunọ de ko nùahàn susu godo, e gán jẹ aglinjẹ ji bo to nukiko do na mẹlẹ. Amọ́, eyin ahàn lọ wá họ́n na ẹn, nukiko etọn nọ fó podọ e sọgan gọ̀ biọ gbẹzan he gọ́ na awubla po nuhahun po de mẹ. Aglinjijẹ ojlẹ gli tọn etọn enẹ ma yin ayajẹ nugbo.—Howh. 14:13.

To vogbingbọn mẹ, ayajẹ yin jẹhẹnu ahun mẹ tọn de. E yin zẹẹmẹ basina taidi “numọtolanmẹ he nọ fọndote na yè tindo nudagbe de kavi to nukundo e wutu.” E yin numọtolanmẹ homẹhunhun kavi awuvivi tọn de he ma nọ busẹ vlavo mí to ninọmẹ dagbe mẹ kavi lala. (1 Tẹs. 1:6) Na nugbo tọn, nude sọgan to tuklado mẹde to ahun mẹ ṣogan bọ e na gbẹ́ tindo ayajẹ. Di apajlẹ, apọsteli lẹ yin hihò badabada na yé dọho gando Klisti go wutu. Ṣogan, yé “tọ́nyi sọn hagbẹ Whẹdatẹn Daho Ju lẹ tọn lọ nukọn bo to ayajẹ na yé ko yin hihia jẹ nado yin winyando na oyín etọn wutu.” (Owalọ 5:41) E họnwun dọ yé ma to ayajẹ na yé yin hihò wutu. Ṣigba, taidi devizọnwatọ Jiwheyẹwhe tọn lẹ, yé tindo ayajẹ nugbo na yé hẹn tenọgli yetọn hlan ewọ go wutu.

Mí ma yin jiji po ayajẹ mọnkọtọn po; mọdopolọ yè ma nọ wleawuna ẹn to zánto dopo mẹ. Etẹwutu? Na ayajẹ nugbo yin adà sinsẹ́n gbigbọ wiwe Jiwheyẹwhe tọn. Po alọgọ gbigbọ Jiwheyẹwhe tọn po, mí sọgan wleawuna “gbẹtọ-yinyin yọyọ lọ” to gigọ́ mẹ, ehe bẹ ayajẹ hẹn. (Efe. 4:24; Gal. 5:22) Podọ, to whenue mí wleawuna ayajẹ, mí nọ penugo dogọ nado pehẹ magbọjẹ gbẹ̀mẹ tọn lẹ.

Ojlo Jehovah tọn wẹ yindọ nudagbe lẹ ni tin to aigba ji, e ma yin nuylankan he mí nọ saba mọ to egbehe lẹ gba. Etomọṣo, walọyizan ylankan mẹdevo lẹ tọn ma nọ hò ayajẹ Jehovah tọn yí. Ohó Jiwheyẹwhe tọn dọmọ: “Huhlọn po ayajẹ po tin to fininọ etọn.” (1 Otàn. 16:27) Humọ, nudagbe he devizọnwatọ etọn lẹ to wiwà lẹ nọ hẹn “homẹ [Jehovah tọn] hùn.”—Howh. 27:11.

Mí sọgan hodo apajlẹ Jehovah tọn ma nado nọ hanú zẹjlẹgo to whenue nulẹ ma wá yì do lehe mí lẹn do. Kakati nado hẹn ayajẹ mítọn  bu, mí sọgan ze ayiha do nudagbe he mí tindo todin lẹ ji, bo yí homẹfa do nọtepọn nuhe pọnte hugan lẹ to nukọn mẹ. *

Mí sọgan sọ mọ apajlẹ mẹsusu tọn to Biblu mẹ he hẹn ayajẹ yetọn go mahopọnna ninọmẹ sinsinyẹn he yé pehẹ lẹ. Ablaham he yin dopo to yé mẹ, doakọnna ninọmẹ he ze ogbẹ̀ do owù mẹ lẹ gọna avùnnukundiọsọmẹnu lẹ sọn mẹdevo lẹ dè. (Jen. 12:10-20; 14:8-16; 16:4, 5; 20:1-18; 21:8, 9) Mahopọnna kọgbidinamẹnu enẹlẹ, Ablaham hẹn ayajẹ ahun mẹ tọn etọn go. Etẹwẹ gọalọna ẹn? Ewọ hẹn todido etọn nado nọgbẹ̀ to aihọn yọyọ lọ mẹ to gandudu Mẹsia tọn glọ do ayiha mẹ gligli. (Jen. 22:15-18; Heb. 11:10) Jesu dọmọ: “Ablaham otọ́ mìtọn jaya tlala dile e to nukundo nado mọ azán ṣie.” (Joh. 8:56) Mí sọgan hodo apajlẹ Ablaham tọn gbọn ayihamẹlinlẹnpọn do ayajẹ he to nukọn ja lẹ ji dali.—Lom. 8:21.

Taidi Ablaham, apọsteli Paulu po Sila po ze ayiha do opagbe Jiwheyẹwhe tọn lẹ ji. Yé tindo yise dolido, podọ yé hẹn ayajẹ yetọn go gligli, mahopọnna adán he gbò yé lẹ. Di apajlẹ, to whenue yé ko doakọnna mẹhiho kanyinylan tọn de bosọ yin zizedo gànpamẹ godo, to “zángbodawe mẹ, [yé] to dẹ̀ho bo yí ohàn do to Jiwheyẹwhe pà.” (Owalọ 16:23-25) Gbọnvona dọ todido yetọn na yé huhlọn, e sọ hẹn Paulu po Sila po gọ́ na ayajẹ, na yé to yaji do oyín Klisti tọn tamẹ wutu. Mí sọgan hodo apajlẹ Paulu po Sila po tọn gbọn dona he nọ wá sọn Jiwheyẹwhe sinsẹ̀n po nugbonọ-yinyin po mẹ lẹ hinhẹn do ayiha mẹ dali.—Flp. 1:12-14.

To egbehe, pipli mẹmẹsunnu lẹ tọn mítọn bẹ apajlẹ dagbenọ susu hẹn he gbẹ́ yin ayajẹnọ mahopọnna whlepọn lẹ. Di apajlẹ, to novembre 2013, jẹhọn-ahizi sinsinyẹn de gbànú to Philippines bo hẹn owhé whẹndo Kunnudetọ tọn 1 000 linlán gble. George, mẹhe owhé etọn gbakija mlẹnmlẹn to tòpẹvi Tacloban tọn mẹ dọmọ: “Mẹmẹsunnu lẹ hẹn ayajẹ yetọn go, mahopọnna nujijọ lọ. N’ma tlẹ yọ́n lehe n’na basi zẹẹmẹ ayajẹ he mí tindo tọn do.” Whedepopenu he mí pannukọn nuhahun sinsinyẹn lẹ, mí na hẹn ayajẹ mítọn go eyin mí nọ lẹnayihamẹpọn do nuhe Jehovah ko wà na mí lẹ ji po pinpẹn-nutọn-yinyọnẹn po. Nudevo tẹwẹ Jehovah ko na mí he wutu mí dona jaya?

Nudevo tẹwẹ sọgan hẹn ayajẹ wá na mí sọ haṣinṣan he mí tindo hẹ Jiwheyẹwhe? Yí nukun homẹ tọn do pọ́n: Mí yọ́n Nupojipetọ Wẹkẹ lọ tọn. Ewọ wẹ Otọ́ mítọn, Jiwheyẹwhe mítọn, podọ Họntọn mítọn!—Salm. 71:17, 18.

Mí sọ nọ yí nukun nujọnu tọn do pọ́n ogbẹ̀ he e na mí po nugopipe he mí tindo nado duvivi etọn po. (Yẹwh. 3:12, 13) Taidi nudida nuyọnẹntọ he Jehovah ko dọ̀n wá ede dè lẹ, mí yọ́n nuhe yin ojlo Jiwheyẹwhe tọn na mí. (Kol. 1:9, 10) Enẹwutu, gbẹzan mítọn tindo zẹẹmẹ, podọ mí sọ tindo anademẹ dagbe lẹ. To vogbingbọn mẹ, lẹndai ogbẹ̀ tọn ma họnwun na suhugan gbẹtọvi lẹ tọn. Nado zinnudo vogbingbọn ehe ji, Paulu wlan dọmọ: “‘Nukun ma ko mọ podọ otó ma ko sè, mọjanwẹ ahun gbẹtọ tọn ma ko lẹn nuhe Jiwheyẹwhe ko wleawu etọn dai na mẹhe yiwanna ẹn lẹ.’ Na míwlẹ wẹ Jiwheyẹwhe ko yí gbigbọ etọn do de yé hia.” (1 Kọl. 2:9, 10) Be mí ma nọ jaya dọ mí mọnukunnujẹ ojlo po lẹndai Jehovah tọn po mẹ ya?

Lẹnnupọndo nudevo he Jehovah ko wà na omẹ etọn lẹ ji. Be homẹ mítọn ma nọ hùn dọ ylando mítọn lẹ sọgan yin jijona mí ya? (1 Joh. 2:12) Na lẹblanu Jiwheyẹwhe tọn wutu, mí tindo todido nujọnu tọn dọ aihọn yọyọ de na wá to madẹnmẹ. (Lom. 12:12) Etlẹ yin todin, Jehovah wleawu pipli sinsẹ̀n-basitọ hatọ lẹ tọn de na mí, he nọ yinuwado mí ji to aliho dagbe mẹ. (Salm. 133:1) Ohó Jehovah tọn sọ hẹn mí deji dọ Ewọ nọ basi hihọ́na mí sọn Satani po aovi etọn lẹ po si. (Salm. 91:11) Eyin mí lẹnayihamẹpọn do dona he wá sọn Jiwheyẹwhe dè ehe lẹpo ji, ayajẹ mítọn na jideji bosọ gọfla.—Flp. 4:4.

Be Klistiani he ko yin ayajẹnọ de sọgan sọ hẹn ayajẹ etọn jideji ya? Jesu dọmọ: “Yẹn ko dọ onú ehelẹ na mì, na ayajẹ ṣie nido tin to mì mẹ bọ ayajẹ mìtọn nido yin hinhẹn gọ́.” (Joh. 15:11) Be ehe ma dohia dọ mí sọgan hẹn ayajẹ mítọn jideji ya? Vivẹnudido towe lẹ nado hẹn ayajẹ towe jideji sọgan yin yiyijlẹdo nukunpipedo miyọ́n he to jiji de go. A dona to nake yí do miyọ́n lọ mẹ nado na ẹn huhlọn dogọ. Mọdopolọ, a dona to gbigbọnọ-yinyin towe hẹn pọnte dogọ, na ayajẹ towe nido jideji. Flindọ, gbigbọ Jiwheyẹwhe tọn wẹ nọ hẹn ayajẹ dote. Enẹwutu, a na wleawuna ayajẹ dogọ, eyin a nọ biọ alọgọ gbigbọ Jehovah tọn to gbesisọ mẹ, nọ hodẹ̀ bosọ nọ lẹnayihamẹpọn do Ohó gbọdo etọn ji.—Salm. 1:1, 2; Luku 11:13.

A nasọ hẹn ayajẹ towe jideji eyin a nọ hẹn alọnu towe ján to azọ́n he nọ hẹn homẹ Jehovah tọn hùn lẹ mẹ. (Salm. 35:27; 112:1) Etẹwutu? Na mí yin didá nado nọ “dibusi Jiwheyẹwhe nugbo lọ bo setonuna gbedide etọn lẹ, na ehe wẹ nubiọtomẹsi gbẹtọ tọn lẹpo.” (Yẹwh. 12:13) To hogbe devo mẹ, mí yin didá nado wà ojlo Jiwheyẹwhe tọn. Enẹwutu, to jọwamọ-liho, eyin mí nọ sẹ̀n Jehovah, mí na gọ́ na ayajẹ. *

Eyin mí wleawuna ayajẹ Jiwheyẹwhe tọn nkọ, dona he mí na mọyi lẹ na zẹ̀ numọtolanmẹ ayajẹ tọn poun tintindo go. Di apajlẹ, homẹ Otọ́ olọn mẹ tọn mítọn tọn na hùn do mí go, dile mí to Ewọ sẹ̀n po ayajẹ po mahopọnna whlepọn depope. (Deut. 16:15; 1 Tẹs. 5:16-18) Humọ, ayajẹ nugbo tintindo na zọ́n bọ mí na dapana agbasanu lẹ bibẹpli, bo na dovivẹnu nado yí míde zan dogọ do Ahọluduta Jiwheyẹwhe tọn tamẹ. (Mat. 13:44) Eyin mí doayi dagbe he ehe wà na mí go, ayajẹ po dagbemẹninọ mítọn po na jideji, podọ mí na yidogọna ayajẹ mẹdevo lẹ tọn.—Owalọ 20:35; Flp. 1:3-5.

“Eyin a tindo ayajẹ po pekọ po todin, e yọnbasi taun dọ a na tindo agbasalilo dagbe to nukọn mẹ.” Nuhe dodinnanutọ Wehọmẹ Alavọ tọn Nebraska tọn to États-Unis wlan niyẹn, to whenue e gbeje dodinnanu delẹ pọ́n gando agbasalilo go. Ehe sọgbe hẹ nuhe Biblu dọ dọmọ: “Amasin dagbe de wẹ ahun he gọ́ na ayajẹ yin.” (Howh. 17:22) Na nugbo tọn, eyin a nọ hẹn ayajẹ towe jideji, e yọnbasi taun dọ a na tindo agbasalilo dagbe dogọ.

Enẹwutu, mahopọnna dọ mí to gbẹnọ to ojlẹ ayimajai tọn lẹ mẹ, mí sọgan wleawuna ayajẹ nugbo he na dẹn-to-aimẹ, eyin mí mọ gbigbọ wiwe yí gbọn dẹ̀hiho, nupinplọn po ayihamẹlinlẹnpọn do Ohó Jehovah tọn po ji dali. Mí sọ nọ hẹn ayajẹ mítọn jideji gbọn nulinlẹnpọn do dona he mí ko tindo lẹ ji, apajlẹ yise mẹdevo lẹ tọn hihodo, po vivẹnudido nado wà ojlo Jiwheyẹwhe tọn po dali. Eyin mí nọ wà ehelẹ, mí sọgan kọngbedopọ hẹ nugbo he tin to Salmu lẹ 64:10 mẹ, he dọmọ: “Dodonọ na nọ jaya to Jehovah mẹ bo na nọ dín fibẹtado to ewọ mẹ.”