Kandai Biblu tọn he to Jenẹsisi 22:6 mẹ dọ dọ nado wleawu nado yì basi avọ́nunina to fidindẹn de, Ablaham “didá nake avọ́nunina mimẹ̀ lọ tọn Isaki visunnu etọn. Podọ ewọ lọsu hẹn miyọ́n po ohí po to alọ etọn lẹ mẹ, yé omẹ awe lẹ sọ zọnpọ bo to yìyì.”

Owe-wiwe lẹ ma donù aliho he mẹ miyọ́n nọ yin fiflọ to hohowhenu te go. Ṣigba, gando kandai he ji mí to hodọdo lọ go, e whè gbau zẹẹmẹ-basitọ dopo kudeji dọ “e na vẹawu nado hẹn miyọ́n bo zingbejizọnlin dindẹn” he nkọ Ablaham po Isaki po zìn. Enẹwutu, e sọgan yindọ nuhe yè nọ yí do flọ miyọ́n lẹ wẹ kandai lọ to alọdlẹndo.

Ṣigba, mẹdevo lẹ sọ dọ dọ, e ma nọ bọawu paali nado flọ miyọ́n to hohowhenu. To fie e yọnbasi te lẹ, gbẹtọ lẹ na ko nọ mọdọ kakati nado hòkàn whẹpo do flọ miyọ́n dopo, e na bọawu hugan nado yì de miyọ́nkán to mẹhe to apá yetọn dè. Enẹwutu, weyọnẹntọ susu yise dọ nuhẹnnú de wẹ Ablaham na ko hẹn—vlavo okòzẹ́n de he yè yí gẹdẹ do hẹn—ehe mẹ ewọ na ko de miyọ́nkán he to jiji lẹ do, yèdọ akán miyọ́nawu he yin dide sọn adò he yè flọ to ozán he jẹnukọn lọ mẹ. (Isa. 30:14) Akán miyọ́nawu he yin hinhẹn pé to aliho mọnkọtọn mẹ lẹ sọgan yin yiyizan nado flọ nake-miyọ́n to ojlẹ depope mẹ to gbejizọnlin de whenu.