JỌṢUA pannukọn avùnnukundiọsọmẹnu de he dobu. E dona deanana akọta Islaeli tọn gbọn nuhahun sinsinyẹn lẹ mẹ sọyi Aigba Pagbe tọn ji. Ṣigba, Jehovah na ẹn jide dọ ewọ na tindo kọdetọn dagbe, podọ e na ẹn tuli dọmọ: ‘Yin adọgbotọ bo yin huhlọnnọ. Nọ yìn Osẹ́n ṣie. Nọ hia ẹ to okle po ozán po, na hiẹ nido sọgan yí sọwhiwhe do yìn nuhe yin kinkan do e mẹ lẹpo. To whenẹnu, hiẹ na yin kọdetọn dagbenọ podọ hiẹ na nọ yinuwa po nuyọnẹn po.’—Jọṣ. 1:7, 8.

Mílọsu nọ pehẹ avùnnukundiọsọmẹnu he kàn dẹpẹ biọ lẹ to “ojlẹ awusinyẹn tọn he vẹawu nado pehẹ” ehelẹ mẹ. (2 Tim. 3:1) Taidi Jọṣua, mí na tindo kọdetọn dagbe eyin mí hodo ayinamẹ he Jehovah na ewọ. Mí sọgan nọ hia Biblu to gbesisọ mẹ, bo nọ yí sọwhiwhe do yí nunọwhinnusẹ́n etọn lẹ zan na whlepọn he mí nọ pannukọn lẹ.

Amọ́, susu mítọn na kẹalọyi dọ mí ma yin nuplọntọ dagbe hugan lẹ, podọ e ma nọ bọawuna mí nado plọnnu. Etomọṣo, na e yin nujọnu taun nado plọn Biblu wutu, gbadopọnna apotin lọ “ Tẹ́n Ayinamẹ Ehelẹ Pọ́n,” nado mọ ayinamẹ dagbe delẹ he na hẹn nupinplọn towe yin kọdetọn dagbenọ podọ awuvivinu dogọ.

Salmu-kantọ lọ jihàn dọmọ: “Deanana mi gbọn ali gbedide towe lẹ tọn ji, na enẹ mẹ wẹ n’nọ mọ awuvivi te.” (Salm. 119:35) Dogbigbapọnna Ohó Jiwheyẹwhe tọn sọgan hẹn awuvivi susu wá na we. A na plọn nuhọakuẹ susu dile a to dodinnanu basi nado mọ adọkunnu gbigbọmẹ tọn lẹ.

Dile etlẹ yindọ hiẹ ma na deanana akọta de dile Jọṣua wà do, hiẹ lọsu nọ pehẹ avùnnukundiọsọmẹnu mẹdetiti tọn lẹ. Enẹwutu taidi Jọṣua, nọ plọnnu bo nọ wanu sọgbe hẹ nuhe yin kinkandai na ale towe lẹ. Eyin a wàmọ, hiẹ lọsu na yin kọdetọn dagbenọ podọ hiẹ na nọ yinuwa po nuyọnẹn po.