Wleawuna Awuvẹmẹ Na “Gbẹtọ Wunmẹ Lẹpo”
WHENUE Jesu plọn devi etọn lẹ lehe yé na lá wẹndagbe lọ do, e yọnẹn ganji dọ gbẹtọ lẹ ma na kẹalọyi owẹ̀n Ahọluduta lọ tọn to whelẹponu. (Luku 10:3, 5, 6) To lizọnyizọn lọ mẹ, mí sọgan nọ dukosọna mẹdelẹ he nọ ylanhùn do mí go kavi tlẹ nọ yinuwa hẹ mí po kanyinylan po. Nado dọ hójọhó, nuyiwahẹmẹ mọnkọtọn lẹ sọgan hẹn ẹn vẹawuna mí nado zindonukọn to awuvẹmẹ didohia mẹhe mí nọ dọyẹwheho na lẹ mẹ.
Mẹhe nọ do awuvẹmẹ hia nọ doayi nuhudo po nuhahun mẹdevo lẹ tọn po go, nọ ze ede do otẹn yetọn mẹ bo nọ jlo nado gọalọna yé. Ṣigba, eyin awuvẹmẹ he mí tindo na mẹhe mí nọ dukosọ hẹ to lizọnyizọn lọ mẹ lẹ jẹ didepo ji, zohunhun po kọdetọn dagbe tintindo mítọn po sọgan jẹ didepo ji ga. To alọ devo mẹ, eyin mí wleawuna awuvẹmẹ, e nọ taidi dọ mí to nake yí do miyọ́n de mẹ wẹ nkọ—mí nọ to zohunhun mítọn na lizọnyizọn hẹn sinyẹn deji!—1 Tẹs. 5:19.
Nawẹ mí sọgan wleawuna awuvẹmẹ gbọn etlẹ yin to whenue mọwiwà vẹawu taun? Mì gbọ mí ni lẹnnupọndo apajlẹ atọ̀n delẹ ji he e jẹ dọ mí ni hodo—yèdọ apajlẹ Jehovah, Jesu po apọsteli Paulu po tọn.
HODO APAJLẸ AWUVẸMẸ JEHOVAH TỌN
Na owhe fọtọ́n susu lẹ, Jehovah doakọnna vlẹko he yin hinhẹnwa oyín etọn ji. Etomọṣo, ewọ gbẹ́ yin “homẹdagbenọ hlan mayọndagbenọ lẹ po mẹylankan lẹ po.” (Luku 6:35) Homẹfa etọn nọ do homẹdagbe he e tindo hia. Jehovah jlo dọ “gbẹtọ wunmẹ lẹpo” ni yin whinwhlẹngán. (1 Tim. 2:3, 4) Dile etlẹ yindọ Jiwheyẹwhe gbẹwanna kanyinylan, gbẹtọvi lẹ họakuẹ to nukun etọn mẹ podọ ewọ ma jlo dọ depope yetọn ni hẹn ogbẹ̀ etọn bu.—2 Pita 3:9.
Jehovah mọnukunnujẹ obá he mẹ Satani ko penugo nado tọ́nnukunna gbẹtọvi mayisenọ lẹ jẹ mẹ. (2 Kọl. 4:3, 4) Nuyise po pọndohlan agọ̀ lẹ po ko yin pinplọn mẹsusu sọn ovu whenu yetọn, ehe nọ hẹn ẹn vẹawuna yé nado kẹalọyi nugbo lọ. Jehovah jlo vẹkuvẹku nado gọalọna omẹ mọnkọtọn lẹ. Nawẹ mí yọ́n enẹ gbọn?
Lẹnnupọndo pọndohlan Jehovah tọn gando Ninevenu hohowhenu tọn lẹ go ji. Mahopọnna danuwiwa yetọn lẹ, Jehovah dọna Jona dọmọ: “Be onú Nineve tòdaho-gbó lọ tọn, ehe mẹ gbẹtọ hugan 120 000 he ma tlẹ yọ́n vogbingbọn to nuhe sọgbe po nuhe ma sọgbe po ṣẹnṣẹn lẹ tin te, . . . ma dona biọlanmẹna yẹnlọsu ya?” (Jona 4:11) Jehovah mọdọ Ninevenu enẹlẹ gbọagba to gbigbọ-liho, podọ lẹblanu whàn ẹn nado deazọ́nna Jona nado yì na yé avase.
Taidi Jehovah, gbẹtọ lẹ nọ họakuẹ to nukun mítọn mẹ. Mí sọgan hodo apajlẹ etọn, eyin mí nọ dovivẹnu vẹkuvẹku nado gọalọna mẹdepope he sọgan dotoai, eyin yé tlẹ taidi mẹhe sọgan nọma wá kẹalọyi nugbo lọ lẹ.
HODO APAJLẸ AWUVẸMẸ JESU TỌN
Taidi Otọ́ etọn, Jesu vẹawu mẹhe tindo nuhudo gbigbọmẹ tọn lẹ. “To whenue e mọ gbẹtọgun lẹ, onú yetọn wàlẹblanuna ẹn, na yé yin hinhẹn jẹ agbá bosọ yin kọgbẹ́ e go taidi lẹngbọ lẹ he ma tindo lẹngbọhọtọ de wutu.” (Mat. 9:36) Jesu mọnú zẹ̀ awusọhia gbẹtọ lọ lẹ tọn go; ewọ yọnẹn dọ nuyise lalo lẹ wẹ ko yin pinplọn mẹhe wá dotoaina hodidọ emitọn lẹ, podọ nukọntọ sinsẹ̀n tọn lẹ ko yinuwa hẹ yé to aliho agọ̀ mẹ. Mahopọnna dọ Jesu yọnẹn dọ mẹsusu na na dotẹnmẹ onú voovo lẹ nado glọnalina yé ma nado kẹalọyi owẹ̀n lọ, ewọ gbẹ́ zindonukọn nado “to nususu plọn yé.”—Malku 4:1-9.
A jẹflumẹ blo eyin mẹde ma do ojlo hia to tintan whenu
Ninọmẹ lẹ nọ diọ to gbẹ̀mẹ, bọ nudopolọ sọgan jọ gando aliho he mẹ mẹde nọ yinuwa hlan nugbo lọ te go
Whenue gbẹtọ lẹ gbẹ́ owẹ̀n he lá mí te dai, mí dona nọ mọnú zẹ̀ awusọhia gbonu tọn go bo kanse míde nuhewutu yé do yinuwa domọ. Mẹdelẹ sọgan ko tindo pọndohlan agọ̀ gando Biblu kavi sinsẹ̀n Klistiani tọn go, na walọyizan ylankan mẹhe sọalọakọ́n dọ emi yin Klistiani lẹ tọn wutu. Vlavo yè ko dolalo na mẹdelẹ gando nuyise mítọn lẹ go. Podọ mẹdevo lẹ sọgan lẹzun aṣagbọ́nu na kọmẹnu kavi hẹnnumẹ yetọn lẹ, eyin yé kẹalọyi owẹ̀n mítọn.
Mẹdelẹ he mí nọ dukosọ hẹ to lizọnyizọn lọ mẹ sọgan gbẹ́ owẹ̀n lọ dai, na nujijọ ylankan delẹ he yé pehẹ ko gbleawuna yé sinsinyẹn to numọtolanmẹ-liho wutu. Mẹmẹyọnnu mẹdehlan de he nọ yin Kim dọmọ: “To adà aigba-denamẹ mítọn tọn de ji, mẹsusu ko jiya na awhàn de wutu, bo hẹn nutindo yetọn lẹpo bu. Yé ma tindo todido nujọnu tọn depope na sọgodo. Yé jẹflumẹ bosọ hẹn jidide yetọn bu pete. To lẹdo ehe mẹ, mí nọ saba dukosọ hẹ mẹhe jẹagọdo owẹ̀n mítọn lẹ. To gbèdopo he n’to yẹwhehodọ, whétọ de tọ́navùn mi.”
Nawẹ Kim gbẹ́ hẹn awuvẹmẹ etọn go mahopọnna aliho mọnkọtọn he mẹ yè yinuwa hẹ ẹ te gbọn? E dọmọ: “Eyin yè yinuwa hẹ mi po kanyinylan po, n’nọ tẹnpọn nado hẹn Howhinwhẹn lẹ 19:11 do ayiha mẹ, ehe dọmọ: ‘Ayihaawe ma tin dọ zinzin mẹde tọn na hẹn ẹn whleawu nado gblehomẹ.’ Nuhe ko jọ wayi to gbẹzan mẹhe to aigba-denamẹ mítọn ji lẹ tọn mẹ finflin nọ gọalọna mi nado yinuwa hẹ yé po awuvẹmẹ po. Podọ, e ma yin mẹhe mí mọ lẹpo wẹ nọ diọnukunsọ mí. To lẹdo enẹ dopolọ mẹ, mí tindo gọyìpọn dagbedagbe delẹ.”
Mí sọgan nọ kanse míde dọ, ‘Nawẹ n’na ko yinuwa hlan owẹ̀n Ahọluduta tọn lọ gbọn eyin n’tin to ninọmẹ mẹhe mí nọ dọyẹwheho na lẹ tọn nkọ mẹ?’ Di apajlẹ, eyin yè ko dolalo na mí whlasusu gando Kunnudetọ Jehovah tọn lẹ go lo? To ninọmẹ mọnkọtọn lẹ mẹ, vlavo mílọsu na yinuwa to aliho agọ̀ mẹ, bọ e na biọ dọ yè ni do awuvẹmẹ hia mí. Eyin mí nọ flin gbedide Jesu tọn lọ nado nọ yinuwa hẹ mẹdevo lẹ kẹdẹdile mí na ko jlo dọ yé ni yinuwa hẹ mí do, enẹ na whàn mí nado nọ vẹawumẹ, etlẹ yin to whenue mọwiwà kàn dẹpẹ biọ.—Mat. 7:12.
HODO APAJLẸ AWUVẸMẸ PAULU TỌN
Apọsteli Paulu tlẹ do awuvẹmẹ hia nukundiọsọmẹtọ he nọ wadanu lẹ. Etẹwutu? Na e nọ flin mẹhe nkọ ewọ lọsu ko yin wayi. E dọmọ: “Nùzantọ, homẹkẹndomẹtọ po kanylantọ de po wẹ yẹn yin dai. Etomọṣo, lẹblanu yin didohia mi, na wunvi po yise matindo po mẹ wẹ yẹn yinuwa te wutu.” (1 Tim. 1:13) Ewọ mọnukunnujẹemẹ dọ lẹblanu daho wẹ Jehovah po Jesu po dohia emi. E yọnbasi dọ ewọ nọ mọ nuyiwa hoho edetiti tọn lẹ to walọ mẹdelẹ he e dọyẹwheho na lẹ tọn mẹ.
To whedelẹnu, Paulu pehẹ mẹhe nuyise lalo ko doadọ̀do to ahun mẹ na taun lẹ. Nawẹ ewọ yinuwa gbọn? Owalọ lẹ 17:16 na linlin dọ to whenue Paulu to Atẹni, “adi do e to whenue e mọdọ tòdaho lọ gọ́ na boṣiọ lẹ.” Etomọṣo, Paulu yí nuhe ko doadi na ẹn enẹ dopolọ zan nado na kunnudide dagbedagbe de. (Owalọ 17:22, 23) E nọ diọadana aliho yẹwhehodidọ tọn etọn lẹ sọgbe hẹ ninọmẹ omẹ voovo he e dukosọna lẹ tọn, na ewọ “nido gbọn aliho he yọnbasi lẹpo mẹ whlẹn mẹdelẹ gán.”—1 Kọl. 9:20-23.
Mí sọgan hodo apajlẹ Paulu tọn gbọn ayidonugo nujọnu tọn nina pọndohlan agọ̀ kavi nuyise lalo mẹhe mí nọ pehẹ lẹ tọn dali, bo nọ wá yí zinzin zan nado ze “wẹndagbe nudagbe tọn” donukọnna yé. (Isa. 52:7) Mẹmẹyọnnu de he nọ yin Dorothy dọmọ: “To aigba-denamẹ mítọn ji, yè ko plọn mẹsusu dọ Jiwheyẹwhe ylanhùn bo nọ yawu dawhẹnamẹ. N’nọ pà omẹ mọnkọtọn lẹ na nuyise dolido he yé tindo to Jiwheyẹwhe mẹ, enẹgodo n’nọ dọ̀n ayidonugo yetọn wá nuhe Biblu dọ gando jẹhẹnu Jehovah tọn he dọnmẹdogo lẹ po opagbe sọgodo tọn etọn lẹ po go ji.”
“NỌ YÍ DAGBE DO GBAWHÀN OYLAN TỌN”
Dile mí to nukọnyi to “azán godo tọn lẹ” mẹ, mí sọgan donukun dọ walọyizan mẹhe mí nọ dọyẹwheho na lẹ tọn “na to yinylan deji dogọ.” (2 Tim. 3:1, 13) Ṣigba, mí ma dona dike doyiyi walọ dagbe tọn ehe ni hù numọtolanmẹ awuvẹmẹ tọn mítọn vudevude kavi hò ayajẹ mítọn yí. Jehovah sọgan na mí huhlọn nado “nọ yí dagbe do gbawhàn oylan tọn.” (Lom. 12:21) Gbehosọnalitọ de he nọ yin Jessica dọmọ: “N’nọ saba dukosọna mẹdelẹ he ma nọ do whiwhẹ hia bo nọ yí nukunpẹvi do pọ́n mí podọ owẹ̀n he lá mí te. Ehe sọgan yin apọṣimẹnu de. Eyin n’bẹ hodọdopọ de jẹeji, n’nọ hodẹ̀ hlan Jehovah do ahun mẹ dọ ni gọalọna mi, na mado nọ mọ mẹlọ dile ewọ nọ wà do. Ehe nọ zọ́n bọ kakati nado ze ayiha do numọtolanmẹ ṣie lẹ ji, n’nọ lẹnnupọndo lehe n’na gọalọna mẹlọ do ji.”
Mí nọ zindonukọn nado to mẹhe tindo ninọmẹ ahun mẹ tọn he jẹna ogbẹ̀ madopodo lẹ dín
Mẹdelẹ nọ wá kẹalọyi owẹ̀n lọ eyin mí yí homẹfa do to vivẹnudo nado gọalọna yé to gbigbọ-liho
Mí sọ dona lẹnnupọndo lehe mí na nọ na tuli azọ́nwatọgbẹ́ mítọn lẹ do ji. Jessica dọmọ: “Eyin ode to mí mẹ tindo numimọ ylankan de, n’nọ tẹnpọn ma nado nọ to nulẹnpọn do enẹ ji. Kakatimọ, n’nọ diọ hodọdopọ lọ wá whẹho ayajẹ tọn lẹ ji, taidi dagbe he lizọnyizọn mítọn nọ wà mahopọnna nuyiwahẹmẹ agọ̀ mẹdelẹ tọn.”
Jehovah yọ́n avùnnukundiọsọmẹnu he mí nọ pehẹ to lizọnyizọn lọ mẹ lẹ ganji. Lehe ewọ dona nọ gọ́ na ayajẹ do sọ to whenue mí hodo apajlẹ lẹblanu tọn etọn! (Luku 6:36) Na nugbo tọn, Jehovah ma na to awuvẹmẹ etọn dohia kakadoi. Mí sọgan deji dọ ewọ yọ́n ogàn dagbe lọ he mẹ e na hẹn aihọn ehe wá opodo te. Kakajẹ whenẹnu, yẹwhehodidọ mítọn yin whẹho niyaniya tọn de. (2 Tim. 4:2) Mì gbọ mí ni zindonukọn nado to azọ́ndenamẹ mítọn hẹndi po zohunhun po gọna awuvẹmẹ sisosiso na “gbẹtọ wunmẹ lẹpo.”
