Mẹdepope to egbehe ma gán dọ na taun tọn lehe awusọhia apọsteli Paulu tọn na ko te. Yẹdide he yè yí alọ do de, ehe owe mítọn lẹ nọ bẹhẹn lẹ nọ yin anazọ́n he ma sinai do kunnudenu dodinnanu dòkunkun tọn lẹ ji.

Amọ́, nudọnamẹ delẹ tin gando awusọhia apọsteli Paulu tọn go. Di apajlẹ, Le Phare de la Tour de Sion (Glẹnsigbe) 1^er mars 1902 tọn dọmọ: “Na nuhe dù awusọhia Paulu tọn: . . . To owe lọ ‘Acts of Paul and Thecla’ mẹ, . . . he yin kinkan to nudi 150 W.M., zẹẹmẹ de yin bibasi gando awusọhia Paulu tọn go, bo na ko yin dehe yọ́n hugan lọ bosọ nọ yin alọkẹyi. Tofi, e yin zẹẹmẹ basina di ‘omẹ gli, he ahọ̀n etọn mọ́n, afọ etọn lẹ kẹ̀, omẹ titli de, nukundama etọn lẹ pé yede bọ e do awọntin gaa.’”

Otànwe The Oxford Dictionary of the Christian Church (zinjẹgbonu 1997 tọn) dọ gando kandai enẹ go dọ: “E yọnbasi dọ owe ‘Acts’ bẹ nudọnamẹ delẹ hẹn he whenuho dohia dọ yé yin nugbo.” To owhe 100 dowhenu tọn lẹ mẹ, yè nọ yí nukun nujọnu tọn do pọ́n The Acts of Paul and Thecla, podọ nue do enẹ hia wẹ yindọ alọnuwe etọn 80 wẹ to Glẹkigbe mẹ bọ vọkan etọn lẹ tin to ogbè devo lẹ mẹ. Enẹwutu, yẹdide anazọ́n tọn mítọn lẹ nọ sọgbe hẹ nudọnamẹ hohowhenu tọn delẹ he gando awusọhia apọsteli lọ tọn go.

Amọ́, nudevo lẹ yin nujọnu hú awusọhia Paulu tọn. Etlẹ yin to lizọnyizọn Paulu tọn whenu, mẹdelẹ he tindo pọndohlan agbasa tọn mọhodọdego dọ, “tintin tofi ewọ lọsu tọn yin madogánnọ podọ ohó etọn nọ vlẹ.” (2 Kọl. 10:10) Ṣigba, flindọ numimọ he Jesu dohia ẹ to azọ́njiawu-liho de wẹ whàn ẹn nado lẹzun Klistiani. Mí sọgan sọ lẹnnupọndo nuhe Paulu wadotana taidi ‘núzinzan dide de na Klisti nado hẹn oyín Jesu tọn yì akọta lẹ dè’ ji. (Owalọ 9:3-5, 15; 22:6-8) Humọ, lẹnnupọndo lehe owe Biblu tọn he Jehovah gbọdo Paulu nado kàn lẹ sọgan hẹn ale wá na mí do ji.

Paulu ma doawagun gando nuhe e wadotana whẹpo do lẹzun Klistiani lẹ go; mọ e ma dọho gando awusọhia ede tọn go. (Owalọ 26:4, 5; Flp. 3:4-6) E kẹalọyi dọ, “Yẹn wẹ yin pẹvi pete to apọsteli lẹ mẹ, podọ yẹn ma jẹ nado yin yiylọdọ apọsteli de.” (1 Kọl. 15:9) E wá wlan dọmọ: “Yẹn mẹhe whè hú mẹhe yin pẹvi pete to omẹ wiwe lẹpo mẹ wẹ nukundagbe majẹhẹ ehe yin nina, na yẹn nido lá wẹndagbe lọ gando dona susugege mayọnjlẹ Klisti tọn go na akọta lẹ.” (Efe. 3:8) Na nugbo tọn, owẹ̀n enẹ yin nujọnu hú ahunmẹdunamẹnu depope gando awusọhia Paulu tọn go.