Lẹdo hodidọ lọ tọn dohia dọ wẹndomẹ kavi lẹndai Jiwheyẹwhe tọn dile e sọawuhia do to Biblu mẹ wẹ apọsteli Paulu to alọdlẹndo.

Heblu lẹ 4:12 nọ saba yin dide do owe mítọn lẹ mẹ nado dohia dọ Biblu tindo huhlọn nado diọ gbẹzan mẹtọn, podọ zẹẹmẹ enẹ sọgbe taun. Ṣigba, nujọnu wẹ e yin nado pọ́n lẹdo hodidọ Heblu lẹ 4:12 tọn to aliho he gbloada humọ mẹ. Paulu to tulina Klistiani Heblu lẹ nado yinuwa to kọndopọ mẹ hẹ lẹndai Jiwheyẹwhe tọn lẹ. Suhugan lẹndai ehelẹ tọn wẹ tin to kandai wiwe lẹ mẹ. Paulu yí apajlẹ Islaelivi he yin whinwhlẹn sọn kanlinmọgbenu to Egipti lẹ tọn zan. Yé tindo todido lọ nado yì aigba Pagbe tọn lọ ji, yèdọ aigba de “he ji anọ́sin po owín po to sisà te,” fie yé sọgan duvivi gbọjẹ nujọnu tọn te.—Eks. 3:8; Deut. 12:9, 10.

Enẹ wẹ yin lẹndai Jiwheyẹwhe tọn he yin didehia. Ṣigba, to nukọn mẹ, Islaelivi lẹ hẹn ahun yetọn sinyẹn bo ma do yise hia, ehe zọ́n bọ suhugan yetọn gboawupo nado biọ gbọjẹ enẹ mẹ. (Sọh. 14:30; Jọṣ. 14:6-10) Etomọṣo, Paulu yidogọ dọ “opagbe nado biọ gbọjẹ [Jiwheyẹwhe tọn] mẹ” gbẹ́ to aimẹ. (Heb. 3:16-19; 4:1) E họnwun dọ “opagbe” enẹ yin apadewhe lẹndai Jiwheyẹwhe tọn. Dile Klistiani Heblu lẹ wà do, mí sọgan hia lẹndai enẹ bo yinuwa sọgbe hẹ ẹ. Nado zinnudeji dọ Owe-wiwe lẹ ji wẹ opagbe enẹ sinai do, Paulu yihodọ sọn Jenẹsisi 2:2 po Salmu lẹ 95:11 po mẹ.

Matin ayihaawe, homẹmiọnnamẹnu wẹ e yin na mí nado mọdọ “opagbe nado biọ gbọjẹ [Jiwheyẹwhe tọn] mẹ gbẹ́ pò to ote.” Mí deji dọ lẹndai sinai do Biblu ji lọ nado biọ gbọjẹ Jiwheyẹwhe tọn mẹ yọnbasi nugbo, bọ mí ko sọ ze afọdide lẹ nado biọ e mẹ. Mí ma wàmọ gbọn vivẹnudido nado hodo Osẹ́n Mose tọn dali kavi wà azọ́n devo lẹ nado dín nukundagbe Jehovah tọn gba. Kakatimọ, gbọn yise dali, mí ko yí ayajẹ do yinuwa sọgbe hẹ lẹndai Jiwheyẹwhe tọn he yin didehia lọ bosọ zindonukọn nado to mọwà. Humọ, dile e yin nùdego do to aga, gbẹtọ fọtọ́n susu lẹ lẹdo aihọn pé wẹ ko jẹ Biblu po adà voovo lẹndai Jiwheyẹwhe tọn lẹ tọn he yin didehia lẹ po plọn ji. Susu to yé mẹ wẹ nọ yin whinwhàn nado diọ aliho gbẹninọ tọn yetọn, do yise hia bo lẹzun Klistiani he yí baptẹm lẹ. Aliho he mẹ yé ko yin nuyiwadeji te yin kunnudenu he họnwun dọ “ohó Jiwheyẹwhe tọn tin to ogbẹ̀ bo tindo huhlọn.” Lẹndai Jiwheyẹwhe tọn he yin didehia, dile e sọawuhia do to Biblu mẹ, ko yinuwado gbẹzan mítọn ji bo na gbẹsọ to huhlọn tindo to gbẹzan mítọn mẹ.