“OWHE 15 wẹ n’do bo yí baptẹm, bọ to osun ṣidopo godo, n’jẹ alọdo to azọ́n gbehosọnalitọ alọgọtọ tọn mẹ ji. To owhe dopo godo, n’doalọwemẹ nado yin gbehosọnalitọ whepoponu tọn. To whenue n’yí gbedewema wehọmẹ daho tọn, n’biọ nado sẹ̀n to fie nuhudo wẹnlatọ Ahọluduta lọ tọn lẹ sù te. Nuhe jlo mi wẹ nado sẹtẹn sọn gbétatò ṣie mẹ podọ sọn onọ̀ daho ṣie he ma yin Kunnudetọ Jehovah tọn de pá. N’blawu taun to whenue nugopọntọ lẹdo tọn dọna mi dọ gbétatò enẹ he mẹ n’yin jiji te wẹ na yin aigba-denamẹ ṣie! N’tẹnpọn nado whlá numọtolanmẹ ṣie do e. N’dokọdò, bo dedo bosọ to nulẹnpọn do nuhe e dọ lọ ji. N’dọna azọ́nwatọgbẹ́ ṣie dọ: ‘N’lẹndọ n’to nuyiwa taidi Jona. Ṣigba, Jona wá yì Nineve to godo mẹ. Enẹwutu, yẹnlọsu na sẹ̀n to fie n’yin didohlan.’

“N’ko sẹ̀n na owhe ẹnẹ todin to gbétatò ṣie mẹ, podọ n’sọgan mọ lehe e yin nuyọnẹnnu do nado hodo anademẹ he yin nina mi. Pọndohlan agọ̀ he n’tindo wẹ yin nuhahun lọ. Todin, n’tindo ayajẹ taun. To osun dopo mẹ, n’penugo nado deanana plọnmẹ Biblu 24. Po alọgọ Jehovah tọn po, n’tlẹ bẹ Biblu pinplọn jẹeji hẹ onọ̀ daho ṣie he ko diọnukunsọ mi wayi.”

To Fiji, Biblu plọntọ de dona basi dide vlavo nado yì plidopọ daho de kavi nado plan asu etọn yì hùnwhẹ jijizan tọn hẹnnumẹ asu etọn tọn de tẹnmẹ. Asu etọn kẹalọyi dọ e sọgan yì plidopọ lọ. Yọnnu lọ dọna ẹn dọ emi sọgan wá hùnwhẹ lọ tẹnmẹ to plidopọ lọ godo. Ṣigba, to whenue e lẹkọ sọn plidopọ lọ, e mọdọ e pọnte na emi nado dapana ninọmẹ he sọgan ze gbigbọnọ-yinyin emitọn do owù mẹ, enẹwutu e masọ yì ba.

To whenue asu etọn dọna hẹnnumẹ etọn lẹ dọ emi nagbè asi emitọn nado yì “opli Kunnudetọ” lẹ tọn etọn whẹpo do wá hùnwhẹ lọ, yé dọna ẹn dọ, “E ma na wá; Kunnudetọ Jehovah tọn lẹ ma nọ dù hùnwhẹ jijizan tọn!” *

Taidi kọdetọn de, homẹ asu etọn tọn hùn taun dọ asi emitọn yí adọgbigbo do yinuwa sọgbe hẹ nuyise etọn lẹ po ayihadawhẹnamẹnu etọn po. Nugbonọ-yinyin etọn hùn dotẹnmẹ dote na ẹn to nukọn mẹ nado dekunnuna asu etọn, podọ na mẹdevo lẹ. Etẹwẹ yin kọdetọn lọ? Asu lọ yigbe nado plọn Biblu bo jẹ opli lẹ yì ji hẹ asi etọn.