Nọ Homẹtọnpọn Bosọ Jọmẹ Taidi Jehovah
“Ayajẹnọ wẹ mẹdepope he nọ hò agbátọnọ tọn pọ́n.”—SALM. 41:1.
1. Nawẹ owanyi nọ sọawuhia to omẹ Jiwheyẹwhe tọn lẹ ṣẹnṣẹn gbọn?
OMẸ Jiwheyẹwhe tọn lẹ yin whẹndo gbigbọmẹ tọn de he owanyi nọ dohiagona. (1 Joh. 4:16, 21) Owanyi enẹ nọ sọawuhia, e ma yin to nuyiwa vonọtaun lẹ mẹ gba, ṣigba to nuyiwa flinflin lẹ mẹ taidi ohó mẹtọnhopọn tọn lẹ didọ gọna nuyiwa to aliho he jọmẹ lẹ mẹ. Whenue mí yinuwa to aliho he jọmẹ bo do mẹtọnhopọn hia mẹ, mí “nọ hodo apajlẹ Jiwheyẹwhe tọn, taidi ovi yiwanna lẹ.”—Efe. 5:1.
2. Nawẹ Jesu do owanyi Jiwheyẹwhe tọn nkọ hia gbọn?
2 Jesu hodo apajlẹ Otọ́ etọn tọn to aliho pipé mẹ. Jesu dọmọ: “Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo, yẹn nasọ fakọna mì . . . , na homẹmimiọnnọ po whiwhẹnọ to ahun mẹ po wẹ yẹn.” (Mat. 11:28, 29) Eyin mí nọ hodo apajlẹ Klisti tọn bo nọ “hò agbátọnọ tọn pọ́n,” mí nọ mọ nukundagbe Otọ́ olọn mẹ tọn mítọn tọn yí bosọ nọ tindo ayajẹ susu. (Salm. 41:1) Mì gbọ mí ni pọ́n lehe mí sọgan nọ do mẹtọnhopọn hia mẹdevo lẹ to whẹndo mẹ, agun mẹ, podọ to lizọnyizọn lọ mẹ do.
NỌ DO MẸTỌNHOPỌN HIA TO WHẸNDO MẸ
3. Nawẹ asu de dona nọ do nukunnumimọjẹ mẹmẹ po mẹtọnhopọn po hia to ojlẹ dopolọ mẹ gbọn? (Pọ́n yẹdide he tin to bẹjẹeji hosọ ehe tọn.)
3 Asu lẹ dona nọ yin nukọntọ to mẹdevo lẹ tọn hihopọn mẹ to whẹndo mẹ. (Efe. 5:25; 6:4) Di apajlẹ, yé yin tulina nado nọ “yí oyọnẹn” do nọhẹ asi yetọn lẹ, ehe sọgan sọ zẹẹmẹdo “nado nọ do mẹtọnhopọn hia yé; nado nọ mọnukunnujẹ yé mẹ.” (1 Pita 3:7; Odò.) Kanṣiṣa pẹkipẹki de tin to nukunnumọjẹnumẹ po mẹtọnhopọn po ṣẹnṣẹn. Di apajlẹ, asu he nọ mọnukunnujẹ mẹmẹ de nọ yọnẹn dọ, taidi alọgọtọ de, asi emitọn gbọnvona emi to adà susu mẹ, amọ́ e ma yìdo hú emi. (Jen. 2:18) Gbọnmọ dali, ewọ nọ hò numọtolanmẹ asi lọ tọn lẹ pọ́n, bo nọ yí yẹyi po gbégbò po do yinuwa hẹ ẹ. Asi de to Canada dọmọ: “Asu ṣie ma nọ yí nukunpẹvi do pọ́n numọtolanmẹ ṣie lẹ gbede, kavi dọna mi dọ ‘A ma dona nọ do numọtolanmẹ enẹlẹ.’ E sọ yin todoaitọ dagbe. Eyin e to alọgọna mi nado vọ́ pọndohlan ṣie jlado gando whẹho de go, e nọ wàmọ po homẹdagbe po.”
4. Nawẹ asu de dona nọ do mẹtọnhopọn hia asi etọn to whenue e to nuyiwa hẹ yọnnu devo lẹ gbọn?
4 Asu mẹtọnhopọntọ de sọ nọ hẹn numọtolanmẹ asi etọn tọn lẹ do ayiha mẹ to whenue e to nuwadopọ hẹ yọnnu devo lẹ. E ma nọ daihun gblewa tọn hẹ yé kavi do ojlo he ma sọgbe hia to yé mẹ; mọjanwẹ e masọ nọ wàmọ to whenue e to nọtẹn Intẹnẹt tọn voovo lẹ yizan do niyẹn. (Jobu 31:1) Na nugbo tọn, e nọ yin nugbonọ na asi ẹ, e ma yin na e yiwanna ẹn wutu kẹdẹ gba, ṣigba na e yiwanna Jiwheyẹwhe bosọ gbẹwanna oylan wutu ga.—Hia Salmu lẹ 19:14; 97:10.
5. Nawẹ asi de sọgan do mẹtọnhopọn hia asu etọn gbọn?
5 Eyin asu de nọ hodo apajlẹ Jesu Klisti tọn, yèdọ tatọ́ etọn, ewọ nọ gọalọna asi etọn nado wleawuna “sisi sisosiso” na ẹn. (Efe. 5:22-25, 33) Taidi kọdetọn de, sisi he asi lọ tindo na whàn ẹn nado do mẹtọnhopọn hia asu etọn ga, vlavo to whenue ewọ dona yí whenu susu dogọ zan na azọngban yẹwhehọluduta tọn lẹ kavi to whenue nuhahun lẹ húagbọ́ asu lọ. Asu de to Grande-Bretagne dọmọ: “To whedelẹnu, eyin nuyiwa ṣie lẹ diọ, asi ṣie nọ doayi e go dọ nude to ahunmẹduna mi. Enẹwutu, e nọ hodo nunọwhinnusẹ́n he tin to Howhinwhẹn lẹ 20:5 mẹ, eyin etlẹ biọ dọ ewọ ni nọte kakajẹ ojlẹ dagbe lọ mẹ nado ‘dọ̀n nuhe to ahunmẹduna mi lẹ tọ́n,’ eyin nuhahun lọ yin whẹho de he ji n’sọgan dọhodo hẹ ẹ.”
6. Nawẹ mímẹpo sọgan na tuli ovi lẹ nado nọ hò mẹdevo lẹ tọn pọ́n gbọn, podọ nawẹ ovi lẹ na mọaleyi gbọn?
6 Eyin mẹjitọ lẹ nọ hò ode awetọ tọn pọ́n, apajlẹ dagbe zedai na ovi yetọn lẹ wẹ yé te. Na nugbo tọn, mẹjitọ lẹ tindo azọngban titengbe lọ nado plọn ovi lẹ lehe yè nọ hò mẹdevo lẹ tọn pọ́n do. Di apajlẹ, mẹjitọ lẹ sọgan plọn yé ma nado nọ họ̀nwezun gbọn Plitẹnhọ Ahọluduta tọn mẹ. To nuwiwa pọmẹ tọn de whenu, mẹjitọ lẹ sọgan dọna ovi yetọn lẹ nado dike mẹhomẹ lẹ ni jẹnukọnna yé to whenue yé to nado yí núdùdù. E họnwun dọ mẹlẹpo to agun mẹ wẹ sọgan gọalọna mẹjitọ lẹ. Di apajlẹ, eyin ovi de do mẹtọnhopọn hia mí, vlavo bo hùnhọ̀n na mí, mí dona pà ovi lọ. Mọwiwà sọgan tindo nuyiwadomẹji dagbe do jọja lọ ji, bo zín do ahun etọn mẹ dọ, “ayajẹ sù to nunamẹ mẹ hú to mimọyi mẹ.”—Owalọ 20:35.
MÌ NỌ “HÒ ODE AWETỌ TỌN PỌ́N” TO AGUN MẸ
7. Nawẹ Jesu do mẹtọnhopọn hia dawe tókunọ de gbọn, podọ etẹlẹ wẹ mí sọgan plọn sọn apajlẹ Jesu tọn mẹ?
7 To gbèdopo, to whenue Jesu to lẹdo Dekapole tọn mẹ, gbẹtọ lẹ “hẹn dawe tókunọ he ma sọgan nọ dọho de wá e dè.” (Malku 7:31-35) Kakati Jesu ni hẹnazọ̀ngbọna ẹn to mẹmẹ, ewọ “plan ẹn sọn gbẹtọgun lọ mẹ” bo hẹnazọ̀ngbọna ẹn. Etẹwutu? Oblọ he to dawe lọ go lẹ sọgan zọ́n bọ e ma na voawu to gbẹtọgun de mẹ. Vlavo Jesu mọnukunnujẹ ehe mẹ wutu wẹ e do plan ẹn jẹ olá bo hẹnazọ̀ngbọna ẹn. Nugbo wẹ dọ míwlẹ ma gán wà azọ́njiawu azọ̀nhẹngbọ tọn lẹ. Amọ́, mí sọgan nọ hò nuhudo po numọtolanmẹ sinsẹ̀n-basitọ hatọ mítọn lẹ tọn po pọ́n, podọ mí dona nọ wàmọ. Apọsteli Paulu wlan dọmọ: “Mì gbọ mí ni nọ na ayidonugo ode awetọ nado nọ whàn mídelẹ hlan owanyi po azọ́n dagbe lẹ po kọ̀n.” (Heb. 10:24) Jesu mọnukunnujẹ numọtolanmẹ dawe tókunọ lọ tọn mẹ bo do mẹtọnhopọn hia ẹ. Apajlẹ dagbe nankọ die na mí!
8, 9. Aliho tẹlẹ mẹ wẹ mí sọgan do mẹtọnhopọn hia mẹhomẹ lẹ po madogánnọ lẹ po te? (Na apajlẹ delẹ.)
8 Nọ do mẹtọnhopọn hia mẹhomẹ po madogánnọ lẹ po. Nuhe agun Klistiani tọn yin yinyọnẹn na hugan wẹ owanyi, e ma yin kọdetọn dagbe etọn. (Joh. 13:34, 35) Owanyi enẹ nọ whàn mí nado wà nuhe go mí pé lẹpo nado gọalọna mẹhomẹ po madogánnọ lẹ po, na yé nido nọ wá opli lẹ bosọ nọ lá wẹndagbe lọ. Mí tlẹ nọ wàmọ eyin nuhe yé sọgan wà lẹ tindo dogbó. (Mat. 13:23) Michael he azọ̀n glọn do kẹkẹvi de mẹ do pinpẹn-nutọn sisosiso hia na alọgọ he e mọyi sọn whẹndo etọn po mẹmẹsunnu he to pipli kunnudegbe tọn etọn mẹ lẹ po dè. E dọmọ: “Alọgọ yemẹpo tọn wẹ zọ́n bọ n’nọ penugo nado yì suhugan opli lẹ tọn bosọ nọ tindo mahẹ to lizọnyizọn lọ mẹ whẹwhẹ. N’yiwanna kunnudide gbangba tọn taun.”
9 Mẹhomẹ po madogánnọ lẹ po tin to whẹndo Bẹtẹli tọn susu lẹ mẹ. Anadenanutọ owanyinọ lẹ nọ do mẹtọnhopọn hia devizọnwatọ nugbonọ ehelẹ bo nọ basi tito, na yé nido nọ dekunnu gbọn wekanhlanmẹ po alokan po gblamẹ. Bill he do owhe 86 bo nọ kanwehlan mẹhe to lẹdo he to olá lẹ mẹ dọmọ: “Mí yọ́n pinpẹn lẹblanulọkẹyi he mí tindo nado kanwehlan mẹlẹ tọn.” Nancy he do nudi owhe 90 dọmọ: “N’ma nọ mọ wekanhlanmẹ lẹ taidi wema wiwlo do wepò lẹ mẹ poun. Sinsẹ̀nzọn kunnudegbe tọn wẹ. Gbẹtọ lẹ dona yọ́n nugbo lọ!” Ethel he yin jiji to 1921 dọmọ: “Awufiẹsa mẹ wẹ n’nọ te to whelẹponu. To whedelẹnu, e ma nọ fá bọ n’do nọ sọnú tata.” Mahopọnna enẹ, e nọ duvivi kunnudide to alokan ji tọn bo ko tindo gọyìpọn dagbedagbe delẹ. Barbara he tindo owhe 85 dọmọ: “Agbasamalo ṣie zọ́n bọ e nọ vẹawuna mi taun nado yì kunnudegbe to gbesisọ mẹ. Amọ́, kunnudide to alokan ji nọ hẹn ẹn yọnbasi na mi nado dọhona mẹdevo lẹ. A wanu, Jehovah!” To nuhe ma pé owhe dopo gblamẹ, pipli he bẹ mẹhomẹ vivẹ́ lẹ hẹn de yí gànmẹ 1 228 zan to lizọnyizọn lọ mẹ, kàn wekanhlanmẹ 6 265, tindo hodọdopọ alokan ji tọn 2 000 linlán, bo do owe 6 315 gbonu! Matin ayihaawe, vivẹnudido ehe hẹn homẹ Jehovah tọn hùn!—Howh. 27:11.
10. Nawẹ mí sọgan gọalọna mẹmẹsunnu mítọn lẹ nado mọaleyi sọn opli lẹ mẹ to gigọ́ mẹ gbọn?
10 Nọ do mẹtọnhopọn hia to opli Klistiani tọn lẹ ji. Mí nọ jlo dọ mẹmẹsunnu mítọn lẹ ni mọaleyi sọn opli lẹ mẹ to gigọ́ mẹ. Yé sọgan wàmọ eyin mí nọ do mẹtọnhopọn hia. Gbọnna? Aliho dopo wẹ nado nọ wá do gànmẹ, gbọnmọ dali mí na dapana ayihafẹsẹnamẹ he ma yin dandan tọn lẹ. E gán wá jọ bọ mí na gbọwhenu, na nujijọ madonukun lẹ wutu. Amọ́, eyin mí nọ saba gbọwhenu, mí dona lẹnnupọndo lehe mí sọgan nọ do mẹtọnhopọn hia dogọ do ji. Sọ nọ flindọ, Jehovah po Visunnu etọn po wẹ basi oylọna mí. (Mat. 18:20) Ayihaawe ma tin dọ yé jẹna sisi sisosiso mítọn!
11. Naegbọn mẹhe nọ ze adà opli tọn lẹ donukọnnamẹ lẹ dona nọ hodo anademẹ he tin to 1 Kọlintinu lẹ 14:40 mẹ?
11 Mẹmẹsunnu mítọn lẹ tọn hihopọn sọ zẹẹmẹdo tonusisena anademẹ lọ he dọmọ: “Mì gbọ nulẹpo ni nọ yin wiwà dile e jẹ do podọ to titoji.” (1 Kọl. 14:40) Mẹmẹsunnu he nọ ze adà opli tọn lẹ donukọnnamẹ lẹ nọ hodo anademẹ enẹ gbọn gànmẹ ji ninọ dali. Gbọnmọ dali, yé nọ hò hodọtọ he bọdego po agun lọ tọn po pọ́n. Vlavo fidindẹn wẹ mẹmẹsunnu delẹ nọ wá sọn. Mẹdevo lẹ sọgan nọ do kẹkẹ kavi mọto whẹpo do jẹ whégbè. Podọ mẹdevo lẹ sọgan tindo alọwlemẹ mayisenọ lẹ he nọ to gigọ̀ yetọn ṣọ́.
12. Naegbọn mẹho azọ́n sinsinyẹnwatọ lẹ do jẹna “sisi tlala to owanyi mẹ”? (Pọ́n apotin lọ “ Nọ Do Mẹtọnhopọn Hia Mẹhe to Anadenanu Lẹ.”)
12 Lẹngbọhọtọ gbigbọmẹ tọn he nọ wazọ́n sinsinyẹn to agun mẹ bo nọ yí zohunhun do deanananu to lizọnyizọn lọ mẹ lẹ lọsu jẹna mẹtọnhopọn vonọtaun. (Hia 1 Tẹsalonikanu lẹ 5:12, 13.) E họnwun dọ, a nọ yọ́n pinpẹn vivẹnu he mẹho lẹ nọ do dó ota towe mẹ lẹ tọn. Enẹwutu, nọ wà nuhe go a pé lẹpo nado do pinpẹn-nutọn ehe hia gbọn gbekinkọndopọ hẹ yé po godoninọna yé sọn ojlo mẹ wá po dali. To popolẹpo mẹ, “yewlẹ wẹ to mì họ́ bo yọnẹn dọ yé na dogbè.”—Heb. 13:7, 17.
NỌ DO MẸTỌNHOPỌN HIA TO LIZỌNYIZỌN LỌ MẸ
13. Etẹwẹ mí sọgan plọn sọn aliho he mẹ Jesu yinuwa hẹ gbẹtọ lẹ te mẹ?
13 Isaia dọ dọdai gando Jesu go dọmọ: “Ewọ ma na gídí ofán he yè ko gbà depope, podọ e ma na ṣí miyọ́ngbán-kàn he to azọ̀ tì depope.” (Isa. 42:3) Jesu nọ vẹawu gbẹtọ lẹ na e yiwanna yé wutu. E nọ mọnukunnujẹ numọtolanmẹ mẹhe taidi ofán he yè ko gbà kavi miyọ́ngbán-kàn he to azọ̀ tì lẹ tọn mẹ. Abajọ ewọ yin mẹtọnhopọntọ, homẹdagbenọ bosọ nọ fahomẹ. E tlẹ nọ bọawuna yọpọvu lẹ nado dọnsẹpọ ẹ. (Malku 10:14) Nugbo wẹ dọ mí ma tindo zinzin gọna nugopipe mẹpinplọn tọn Jesu tọn! Amọ́, mí gán nọ hò gbẹtọ lẹ tọn pọ́n to aigba-denamẹ mítọn ji, podọ mí dona nọ wàmọ. Ehe bẹ lehe mí nọ dọhona yé do, whenue mí nọ wàmọ, po lehe hodidọ mítọn nọ dẹnsọ do po hẹn.
14. Naegbọn mí dona nọ na ayidonugo vonọtaun aliho he mẹ mí nọ dọhona gbẹtọ lẹ te?
14 Nawẹ mí dona nọ dọhona gbẹtọ lẹ gbọn? To egbehe, gbẹtọ livi madosọha lẹ wẹ ko “yin hinhẹn jẹ agbá bosọ yin kọgbẹ́ e go” gbọn ajọwatọ, tonudọtọ po nukọntọ sinsẹ̀n tọn he nọ hòmẹdu bo masọ do lẹblanu lẹ po dali. (Mat. 9:36) Ehe ko zọ́n bọ mẹsusu yin homọdọdonugotọ bo ma tindo todido. To whelọnu lo, lehe e yin nujọnu do sọ dọ mí ni nọ yí homẹdagbe po mẹtọnhopọn po do de hogbe mítọn lẹ po aliho he mẹ mí nọ dọho te po! Na nugbo tọn, mẹsusu wẹ owẹ̀n mítọn nọ dọ̀n, e ma yin na oyọnẹn Biblu tọn kavi nukunnumọjẹnumẹ dagbe he mí tindo wutu kẹdẹ gba, ṣigba, na ojlo ahundopo tọn he mí nọ tindo to yé mẹ po mẹtọnhopọn mítọn po wutu ga.
15. Aliho yọ́n-na-yizan tẹlẹ mẹ wẹ mí sọgan do mẹtọnhopọn hia mẹhe mí nọ dekunnuna lẹ te?
15 Aliho susu mẹ wẹ mí sọgan nọ do mẹtọnhopọn hia mẹhe mí nọ dekunnuna lẹ te. Di apajlẹ, aliho mẹpinplọn tọn dagbe de wẹ nado nọ kàn kanbiọ lẹ sè. Mí dona nọ wàmọ to aliho he jọmẹ bosọ do sisi hia mẹ. Gbehosọnalitọ he nọ dekunnu to aigba-denamẹ he ji mẹsusu ma nọ gbàdo-mẹmẹ bosọ nọ kuwinyan te de plọn ma nado nọ kàn kanbiọ he sọgan demẹpò lẹ sè. Ehe bẹ kanbiọ he mẹlọ ma sọgan na gblọndo etọn kavi na gblọndo he ma sọgbe na lẹ hẹn. Di apajlẹ, gbehosọnalitọ lọ nọ dapana kanbiọ delẹ taidi, ‘Be mì yọ́n yinkọ Jiwheyẹwhe tọn ya?’ kavi ‘Be mì yọ́n nuhe Ahọluduta Jiwheyẹwhe tọn yin ya?’ Kakatimọ, e nọ dọ dọ, “N’plọn to Biblu mẹ dọ Jiwheyẹwhe tindo yinkọ etọn titi. Be n’gán do yinkọ enẹ hia mì ya?” Na nugbo tọn, aṣa lẹ po gbẹtọ lẹ po nọ gbọnvo, enẹwutu, mí ma dona yin hẹngogonọ. Ṣigba, mí dona nọ do mẹtọnhopọn po sisi po hia to whelẹponu, ehe nọ biọ dọ mí ni tẹnpọn nado jẹakọ hẹ mẹhe to lẹdo mítọn mẹ lẹ ganji.
16, 17. Nawẹ mẹtọnhopọn didohia kọmẹnu mítọn lẹ sọgan gọalọ nado yọ́n (a) ogàn he mẹ mí na yì owhé yetọn gbè te gbọn? (b) ojlẹ nẹmu he mí na yizan do dọho hẹ yé gbọn?
16 Whetẹnu wẹ mí dona nọ dla kọmẹnu mítọn lẹ pọ́n? Mí nọ yì sọn họndekọn jẹ họndekọn matin oylọ-basinamẹ whétọ lẹ tọn. Enẹwutu, nujọnu taun wẹ e yin nado nọ dla gbẹtọ lẹ pọ́n to ojlẹ he mẹ e na bọawuna yé nado dọhodopọ hẹ mí te! (Mat. 7:12) Di apajlẹ, be mẹhe to aigba-denamẹ towe ji lẹ ma nọ yawu fọ́n to sẹfifo lẹ wẹ ya? Eyin mọ wẹ, a sọgan nọ bẹjẹeji po kunnudide tòhomẹ-liho ji tọn gọna gbangba tọn po, kavi basi gọyìpọn mẹhe a yọnẹn dọ yé na ko fọ́n bo ko wleawufo lẹ tọn.
17 Nawẹ mí dona nọ yé dè dẹnsọ? Mẹsusu sin alọnu nọ ján taun, enẹwutu, e sọgan sọgbe nado nọ nọ̀ glido to gọyìpọn towe lẹ whenu, e whè gbau to tintan whenu. E nọ pọnte nado dotana hodọdopọ hẹ whétọ de to ojlẹ kleun de gblamẹ hugan nado dẹn gbau to e dè. (1 Kọl. 9:20-23) Eyin gbẹtọ lẹ mọdọ ninọmẹ yetọn po alọnu yetọn he ján taun po nọ duahunmẹna mí, yé sọgan tindo ojlo dogọ dọ mí ni lẹkọwa. Na nugbo tọn, mí dona nọ do adà sinsẹ́n gbigbọ tọn lẹ hia to lizọnyizọn mítọn mẹ. Eyin mí wàmọ, mí nọ lẹzun “azọ́nwatọ hatọ Jiwheyẹwhe tọn lẹ” nugbonugbo, etlẹ yin nuyizan de he Jehovah sọgan yí do dọ̀n mẹde wá nugbo mẹ.—1 Kọl. 3:6, 7, 9.
18. Dona tẹlẹ wẹ mẹtọnhopọn sọgan hẹnwa na mí?
18 Enẹwutu, mì gbọ mí ni dovivẹnu lẹpo nado nọ do mẹtọnhopọn hia to whẹndo mẹ, to agun mẹ podọ to lizọnyizọn lọ mẹ. Eyin mí wàmọ, mí na mọ dona susugege yí to egbehe podọ to osọ he ja. Salmu lẹ 41:1, 2 dọmọ: “Ayajẹnọ wẹ mẹdepope he nọ hò agbátọnọ tọn pọ́n; Jehovah na whlẹn mẹlọ to azán nugbajẹmẹji tọn gbè. . . . Ewọ na yin yiylọdọ ayajẹnọ to aigba ji.”
