Di apajlẹ, pọ́n nuhe mẹhe ko hia Biblu bo mọaleyi sọn e mẹ delẹ dọ.

“Gbẹzan ṣie ko wá pọnte taun. Ninọmẹ ṣie to apọ̀nmẹ podọ to numọtolanmẹ-liho ko diọ taun. N’do ayajẹ todin.”—Yọnnu de he nọ yin Fiona.

“Biblu pinplọn ko gọalọna mi nado yọ́n nuhewutu n’do togbẹ̀ bosọ do ayajẹ.”—Yọnnu de he nọ yin Gnitko.

“Gbẹzan ṣie ko wá pọnte taun todin. N’ko hẹn gbẹzan ṣie bọawu bo nọ zan whenu hẹ whẹndo ṣie todin.”—Sunnu de he nọ yin Andrew.

E ma yin omẹ ehelẹ kẹdẹ wẹ do numimọ ehelẹ nkọ gba. Lẹdo aihọn pé, mẹsusu ko mọdọ Biblu bẹ ayinamẹ dagbe lẹ hẹn he nọ wà dagbe namẹ.

Mì gbọ mí ni pọ́n lehe Biblu gán gọalọna mẹlẹ nado hẹn gbẹzan yetọn pọnte do to ninọmẹ ehelẹ mẹ:

• To agbasa-liho

• To numọtolanmẹ-liho

• To whẹndo mẹ podọ to họntọnjiji mẹ

• To akuẹzinzan-liho

• To gbigbọ-liho

Hosọ he bọdego lẹ na dohia dọ Biblu ma yin owe sinsẹ̀n tọn he jẹna sisi poun gba, amọ́ owe de wẹ he gán gọalọna mí to aliho susu mẹ.