To Numọtolanmẹ-Liho
Biblu na avase sọta numọtolanmẹ agọ̀ lẹ bo na mí tuli nado nọ wleawuna numọtolanmẹ he sọgbe lẹ.
HOMẸGBLE
AYINAMẸ BIBLU TỌN: “Mẹhe nọ whleawu nado gblehomẹ pọnte hú mẹhe yin huhlọnnọ.”—Howhinwhẹn lẹ 16:32.
NUHE E ZẸẸMẸDO: Eyin mí plọn nado nọ dava homẹgble mítọn, e na nọ wà dagbe na mí. E nọ sọgbe nado gblehomẹ to ninọmẹ delẹ mẹ, amọ́ homẹgble aplà nọ hẹnnugble. Dodinnanutọ lẹ dohia dọ homẹgble aplà nọ zọ́n bọ mẹsusu nọ dọ kavi wà nudelẹ he nọ wá vẹna yé.
NUHE A GÁN WÀ: Plọn nado nọ dava homẹgble towe. Mẹdelẹ nọ lẹndọ adidudu yin ohia adọgbigbo tọn, amọ́ ohia madogán tọn wẹ. Biblu dọmọ: “Kẹdẹdi tòdaho de he yè gbà adó biọ e mẹ, ehe ma tindo adó jọ adó de ba, mọ wẹ mẹhe ma sọgan dava homẹgble etọn te.” (Howhinwhẹn lẹ 25:28) Nuhe nọ gọalọnamẹ nado dava homẹgble wẹ nado nọ mọnukunnujẹ nuhe jọ lẹ mẹ ganji whẹpo do dọho kavi yinuwa. Biblu dọmọ: “Ayihaawe ma tin dọ zinzin mẹde tọn na hẹn ẹn whleawu nado gblehomẹ.” (Howhinwhẹn lẹ 19:11) Nuyọnẹnnu wẹ nado nọ whesọ bo dotoai nado mọnukunnujẹ nuhe jọ lọ mẹ ganji, na ehe nọ gọalọ ma nado gblehomẹ aplà.
NỌ DOPẸ́
AYINAMẸ BIBLU TỌN: “Mì nisọ nọ dopẹ́.” —Kolosinu lẹ 3:15.
NUHE E ZẸẸMẸDO: Mẹhe ma nọ yọ́n pinpẹn nulẹ tọn ma gán do ayajẹ to gbẹ̀mẹ. Mẹhe adán sinsinyẹn ko gbò lẹ tlẹ yọnẹn dọ nugbo wẹ ehe. Yé nọ dọ dọ nuhe nọ gọalọna yé hugan wẹ nado nọ ze ayiha do nudagbe lẹ ji bo nọ dapana nulinlẹnpọn mapote do adán he gbò yé lẹ ji.
NUHE A GÁN WÀ: Tẹnpọn bo nọ ze ayiha do nudagbe he nọ jọ to azán dopodopo ji lẹ ji. E ma yin dandan dọ ni yin onú vonọtaun lẹ. Nọ lẹnnupọndo nuhe tlẹ yin onú flinflin lẹ ji, di whanpẹ whèzizẹ tọn, hodọdopọ dagbe hẹ mẹvivẹ de kavi finfọn bo mọ azán yọyọ devo. Eyin a plọn nado nọ doayi nudagbe ehelẹ go bosọ nọ yọ́n pinpẹn yetọn, a na do ayajẹ.
A gán mọaleyi taun eyin a nọ lẹnnupọndo nuhewutu a do yiwanna whẹndo towe po họntọn lẹ po ji. To whenue a ko yọ́n nuhe a yiwanna gando yé go, dọ ẹ na yé tlọlọ kavi vlavo to wekanhlanmẹ de mẹ, to wekanhlanmẹ Intẹnẹt ji tọn kavi alokan ji tọn de mẹ. Ehe gán zọ́n bọ mì na vẹ́ dogọ, bọ a nasọ mọ ayajẹ he nunamẹ nọ hẹnwa.—Owalọ lẹ 20:35.
AYINAMẸ BIBLU TỌN DEVO LẸ
A sọgan mọ hoyidokanji Biblu tọn lẹ yí. Yé tin to nudi ogbè 40 mẹ to jw.org ji
NỌ DAPANA NUDINDỌN.
“Avùn de bibẹjẹeji nọ taidi whenue dogbó osin tọn lẹ yin hùnhùn; whẹpo whẹgbè nido bẹ, yawu tọ́n sọn finẹ.”—HOWHINWHẸN LẸ 17:14.
MA NỌ HANÚ GLANGLAN GANDO SỌGODO GO BLO.
“Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ. Tukla azán dopodopo tọn ko pé na ẹn.”—MATIU 6:34.
MA NỌ DIKE NUMỌTOLANMẸ TOWE NI NỌ KÙN WE BLO, NỌ WHESỌ BO NỌ LẸNNUPỌN GANJI.
“Nugopipe nulẹnpọn tọn na nọ họ́ we, bọ wuntuntun na nọ basi hihọ́na we.”—HOWHINWHẸN LẸ 2:11.
