To egbehe, Plidopọ Akọta lẹ tọn (ONU) to tintẹnpọn nado plọn tòvi lẹ lẹdo aihọn pé, na yé nido nọ hò dagbemẹninọ mẹlẹpo tọn pọ́n, nọ na sisi jlọjẹ mẹdevo lẹ tọn bosọ doalọtena nuyiwa he nọ hẹn aigba flu lẹ. Etẹwutu? Maher Nasser wlan to linlinwe de mẹ dọ, “ninọmẹ aimẹ tọn he to didiọ, sẹ́nhẹngba, zẹ́nmasọ to wamọnọ po adọkunnọ po ṣẹnṣẹn, awhàn, mẹsusu he to hinhọ̀n jẹgbé, danuwiwa do mẹsusu go dopọ, azọ̀n he nọ bẹplamẹ lẹ, gọna onú mọnkọtọn devo lẹ gbayipe lẹdo aihọn pé.”—UN Chronicle.

Mẹdevo lẹ tlẹ lẹndọ pọngbọ lọ wẹ yindọ gandudu dopo ni deanana aihọn lọ pete. Delẹ to mẹlọ lẹ mẹ wẹ, Dante, togán Italie tọn de he yin tamẹnuplọnmẹtọ po ohó milomilo-kantọ po (he nọgbẹ̀ sọn 1265 jẹ 1321) podọ weyọnẹntọ Albert Einstein (he nọgbẹ̀ to 1879 jẹ 1955). Dante lẹndọ jijọho ma gán tin to aihọn he klan to tonudidọ-liho de mẹ. E yihodọ sọn hogbe Jesu Klisti tọn lẹ mẹ bo dọ, “ahọluduta depope he klan sọta ede nọ jẹvọ́.”—Luku 11:17.

Ojlẹ vude to Wẹkẹ-Whàn awetọ he mẹ bọmbu daho awe hẹnnugble taun te godo, Albert Einstein kanwehlan ONU gbọn linlinwe de gblamẹ, na e nido yin hihia to opli daho yetọn de whenu. E wlan dọmọ: “ONU dona yinuwa to niyaniya mẹ nado wleawuna gandudu lẹdo aihọn pé de he na hẹn hihọ́ wá na mẹlẹpo.”

Amọ́, be jide tin dọ mẹhe na nọ gandudu enẹ mẹ lẹ ma na wá joawuna ahizi bo na gboawupo kavi gbidikọna gbẹtọ lẹ ya? Kavi be yelọsu na yinuwa di aṣẹpatọ devo lẹ wẹ ya? Kanbiọ ehelẹ flin mí nuhe whenuho-kantọ Grande Bretagne tọn Lord Acton dọ dọmọ: “Kùn wẹ huhlọn nọ kùnmẹ ṣọ̀-ṣọ̀; eyin huhlọn petepete tlẹ wá yin ninamẹ, kùn wẹ e nọ kùnmẹ di osọ́.”

Nugbo wẹ dọ eyin jijọho po pọninọ nujọnu tọn po na tin to gbẹtọvi lẹ ṣẹnṣẹn, be gbekọndopọ dona tin. Amọ́, nawẹ ehe gán pà mí gbọn? Be e tlẹ yọnbasi ya? Biblu dọ dọ e yọnbasi. Podọ ehe na mọ hẹndi dandan. Gbọnna? E ma na yin gbọn aṣẹpatọ he na hò ahizi lẹ gblamẹ gba. Amọ́, gbọn gandudu he Jiwheyẹwhe na zedai de gblamẹ. Humọ, gandudu ehe na yí jlọjẹ etọn zan nado paṣẹ do nudida etọn lẹ ji. Gandudu tẹwẹ? Biblu ylọ ẹ dọ “Ahọluduta Jiwheyẹwhe tọn.”—Luku 4:43.

Ahọluduta Jiwheyẹwhe tọn hodọ wẹ Jesu Klisti te to whenue e plọnmẹ nado nọ hodẹ̀ dọmọ: “Na Ahọluduta towe ni wá. Na ojlo towe ni yin wiwà . . . to aigba ji.” (Matiu 6:9, 10) Ojlo Jiwheyẹwhe tọn wẹ Ahọluduta lọ na hẹndi to aigba ji, e ma yin ojlo gbẹtọvi he gọ́ na nukunkẹn po ṣejannabi po lẹ tọn.

Ahọluduta Jiwheyẹwhe tọn sọ nọ yin yiylọdọ “Ahọluduta olọn tọn.” (Matiu 5:3) Etẹwutu? Dile etlẹ yindọ e na dugán do aigba ji, e ma yin aigba ji wẹ e na dugán sọn, amọ́ sọn olọn. Lẹnnupọndo ehe ji. Gandudu lẹdo aihọn pé ehe ma na do hudo akuẹ kavi nudepope tọn sọn tòvi etọn lẹ si. Kọgbọ daho de wẹ ehe na yin na gbẹtọvi lẹ!

Hogbe lọ “ahọluduta” dohia dọ Ahọluduta Jiwheyẹwhe tọn do ahọlu de. Jesu Klisti wẹ Ahọlu lọ, bo mọ aṣẹpipa etọn yí sọn Jiwheyẹwhe dè. Biblu dọ gando Jesu go dọmọ:

• “Huhlọn gandudu tọn na tin to abọ́ etọn ji . . . Jideji huhlọn gandudu etọn tọn po jijọho etọn po ma na wá vivọnu gbede.”—Isaia 9:6, 7.

•   “Yè sọ yí gandudu, gbégbò po ahọluduta de po na ẹn, na gbẹtọ lẹ, akọta lẹ po akọ̀ lẹpo po nido nọ wadevizọn na ẹn. Gandudu . . . etọn . . . ma na juwayi.”—Daniẹli 7:14.

• “Ahọluduta aihọn tọn ko lẹzun Ahọluduta Oklunọ mítọn [Jiwheyẹwhe] tọn po Klisti etọn tọn po.”—Osọhia 11:15.

To kọndopọ mẹ hẹ odẹ̀ he Jesu plọnmẹ lọ, Ahọluduta Jiwheyẹwhe tọn na hẹn ojlo Jiwheyẹwhe tọn di to gigọ́ mẹ to aigba ji. To whenẹnu, gbẹtọvi lẹpo wẹ na plọn nado nọ penukundo aigba go bọ e na gọ̀ jẹ lehe e te do to bẹjẹeji podọ nudida lẹ na vò to e ji.

Hú popolẹpo, Ahọluduta Jiwheyẹwhe tọn na nọ plọnnu mẹhe ji e na dugán do lẹ. Nuplọnmẹ dopolọ lẹ wẹ mẹlẹpo na mọyi. Gbemanọpọ kavi kinklan de ma na tin. Sọgbe hẹ Isaia 11:9, “Yé ma na nọ gbleawunamẹ paali kavi hẹn husudo depope wá . . . na e họnwun dọ aigba na gọ́ na oyọnẹn Jehovah tọn dile osin ṣinyọ́n ohù ji do.”

Mẹlẹpo na nọ yinuwa sọgbe hẹ nuhe ONU to jijlo bọ e ma pà ẹ lọ, enẹ wẹ yindọ gbẹtọvi lẹ na yiwanna jijọho lẹdo aihọn pé. Salmu lẹ 37:11 dọ dọ, “Yé nasọ nọ mọ awuvivi susu to jijọho susugege mẹ.” Hogbe delẹ taidi “sẹ́nhẹngba,” “aigba hinhẹnflu,” “ohẹ́n,” gọna “awhàn” ma nasọ nọ yin sisè ba. Amọ́ whetẹnu wẹ? Whetẹnu wẹ Ahọluduta Jiwheyẹwhe tọn na bẹ azọ́n taun? Nawẹ e na wàmọ gbọn? Podọ, nawẹ a sọgan mọaleyi sọn gandudu ehe mẹ gbọn? Gbọ mí ni pọ́n.