Nuplọnmẹ Biblu tọn lẹ dohuhlọn taun bo gán diọ gbẹzan mẹtọn. Pọ́n apajlẹ omẹ awe ehelẹ tọn: Ricardo po Andres po.

RICARDO: Owhe 15 poun wẹ n’do bo jẹ gbẹdo hẹ jaguda-gbẹ́ de ji. Nuyiwa họntọn ṣie ehelẹ tọn bẹpla mi taun. E tlẹ lẹzun ojlo ṣie nado yì sẹ̀ngàn na owhe ao! E gán di gúgú sin nú. Amọ́ to lẹdo ṣie mẹ, mẹlẹ nọ mọ mẹhe ko sẹ̀ngàn pọ́n lẹ di mẹjọmẹ bo nọ sí yé. Nuhe ka nọ jlo yẹnlọsu niyẹn.

N’doalọ to nuhe jaguda lẹ nọ wà lẹpo mẹ, kakajẹ amà-nùnù, gblewa po danuwiwa po ji. To zánmẹ gbèdopo, jaguda-gbẹ́ mítọn pé avùn hẹ pipli de bọ mí desò do mídelẹ badabada. N’ko mọ okú ṣie hlan, amọ́ nude ma wà mi. To enẹgodo, n’jẹ nulẹnpọn ji taun do gbẹzan ṣie po nuhe wà n’te lẹ po ji, bọ n’basi dide nado diọ. Amọ́ nawẹ n’gán diọ gbọn? Fie wẹ n’na mọ alọgọ sọn?

Suhugan hẹnnumẹ ṣie lẹ tọn wẹ ma do ayajẹ. Gbẹzan yetọn gọ́ na nuhahun. Amọ́, whẹndo ylọnẹn ṣie de tọn ka do ayajẹ. N’yọnẹn dọ gbẹtọ dagbe wẹ yé yin, podọ nuhe Biblu dọ wẹ nọ deanana gbẹzan yetọn. Yé tlẹ ko dohia mi pọ́n dọ Jehovah wẹ Jiwheyẹwhe nọ yin. Enẹwutu, ojlẹ de to avùnhiho enẹlọ godo, n’hodẹ̀ hlan Jehovah bo tlẹ ylọ yinkọ etọn tlọlọ, bosọ biọ to e si nado gọalọna mi. E paṣa mi dọ to wunkẹngbe tlolo, Kunnudetọ Jehovah tọn de wá húhúhọ̀n na mi! E sọ jẹ Biblu plọn mi ji.

Amọ́, e ma dẹn bọ nude whlé mi pọ́n taun. Họntọn ṣie dai tọn lẹ nọ ylọ mi to alokan ji nado vọ́ jẹ gbẹdo hẹ yé ji. E ma bọawu, amọ́ n’nọ gbẹ́. N’magbe nado zindonukọn to Biblu pinplọn ṣie mẹ podọ e vivi na mi dọ n’wàmọ! Gbẹzan ṣie jẹ didiọ ji bọ n’do ayajẹ taun.

N’flindọ n’dọna Jiwheyẹwhe to odẹ̀ mẹ dọ, n’ko jlo pọ́n nado sẹ̀ngàn na owhe ao, na mẹlẹ nido nọ sí mi taidi jaguda de. Enẹwutu, n’biọ ẹ dọ ni dike ma sẹ̀n ẹn taidi yẹwhehodọtọ whenu-gigọ́ tọn de, e whè gbau na owhe ao nado gọalọna mẹdevo lẹ dile yè gọalọna yẹnlọsu do. Ewọ sè odẹ̀ ṣie, na n’ko yin yẹwhehodọtọ whenu-gigọ́ tọn na owhe 17 todin! Podọ n’ma ko sẹ̀ngàn pọ́n.

Susu to họntọn ṣie dai tọn lẹ mẹ wẹ ko to gànmẹ sọn owhe susu die. Mẹdevo lẹ ko kú. Eyin n’lẹnnupọndo gbẹzan ṣie ji, n’nọ dopẹ́ taun na hẹnnumẹ ṣie enẹlẹ he yin Kunnudetọ. Yé ma dibu nado gbọnvo, bo dike Biblu ni nọ deanana yé. Todin, n’do sisi na yé taun hú mẹhe to jaguda-gbẹ́ ṣie mẹ lẹ. Hú popolẹpo, e nọ vivi na mi dọ Jiwheyẹwhe plọn mi nado zan gbẹzan dagbe hugan lọ.

 ANDRES: Amà-nùnù, mẹhodu, mẹhuhu po galilọ po gbayipe taun to lẹdo he mẹ n’yin jiji bo whẹ́n te. Ahànnumunọ wẹ otọ́ ṣie bosọ peve to amasin sinsinyẹn (cocaïne) nùnù mẹ. Ewọ po onọ̀ ṣie po nọ to jlẹdọ bo nọ to avùnho mapote.

N’gbẹ́ pò to ovu bo jẹ ahàn sinsinyẹn nù ji bosọ nọ nù amà. N’ma nọ saba dọ́ whégbè, n’nọ to dindanpe bo nọ to ajojẹ bosọ nọ to nuhe n’ko fìn lẹ gọ̀ sà. Nado jihọntọn hẹ mi to whenue n’to whinwhẹ́n ja, otọ́ ṣie plọn mi lehe yè nọ bẹ amasin sinsinyẹn po nudevo he osẹ́n ma kẹalọyi lẹ po sọn tògodo bo nọ wá sà yé do. N’mọ akuẹ susu to ojlẹ kleun de mẹ. To gbèdopo, ponọ lẹ wá owhé ṣie gbè bo wle mi bosọ sawhẹdokọna mi dọ n’tẹnpọn nado hùmẹ. Enẹwutu, yè dawhẹna mi dọ n’na sẹ̀ngàn na owhe atọ́n.

To afọnnu de, yè lá bo basi oylọna gàntọ lẹ nado wá dotoaina hodọdopọ sinai do Biblu ji de he Kunnudetọ Jehovah tọn lẹ na deanana to gànpa lọ mẹ. N’basi dide nado yì. Nuhe n’sè lọ vivi na mi, bọ n’yigbe dọ Kunnudetọ lẹ ni jẹ Biblu plọn mi ji. Nuhe Owe-wiwe lẹ dọ wẹ yé nọ plọnmẹ tlọlọ, bo nọ do walọ he Jiwheyẹwhe kẹalọyi po dehe e ma kẹalọyi lẹ po hia mi.

E ma dẹn bọ n’mọdọ n’do hudo alọgọ tọn nado basi diọdo he jẹ lẹ, titengbe na gàntọ hatọ ṣie lẹ nọ sìn-adán na mi, na yé ma yiwanna nuhe plọn n’te wutu. N’biọ adọgbigbo po nuyọnẹn po to odẹ̀ mẹ, bọ Jehovah gọalọna mi. N’tlẹ penugo bo nọ yí adọgbigbo do dekunnuna gàntọ hatọ devo lẹ gando Biblu go.

To whenue tundote ṣie sẹpọ, budi mi sọmọ bọ n’tlẹ jlo dọ ma gbọṣi gànpamẹ. To whenue n’jlo na yì, gàntọ susu wẹ mìalọ hlan mi nado dọ e yì whedenu. Mẹdelẹ tlẹ mlán mi bo dọ “Yì whé poun, yẹwhenọ.”

Obu nọ di mi eyin n’lẹnnupọndo nuhe gbẹzan ṣie na ko yin ji, eyin n’ma ko na dotẹnmẹ Jiwheyẹwhe nado plọn mi. N’nọ dopẹ́ tlala dọ Jiwheyẹwhe yiwanna mi, bo ma pọ́n mi di mẹhe ma gán diọ gbede. a