To tito tintọ́n wehọmẹ tọn de whenu, yè sawhẹdokọna sunnu jọja delẹ dọ yé zanhẹ wehọmẹvi sunnu de gánnugánnu. Wehọmẹ he ma yin ahọlu tọn bo diyin taun de wẹ yemẹpo nọ yì to Canada. To whenue nulọ jọ godo, Leonard Stern wlan to linlinwe de mẹ dọmọ: “Eyin jọja lẹ tlẹ yọnnuin, sewé, bosọ do akuẹ taun, enẹ ma nọ glọnalina yé nado wà nuylankan.”—Ottawa Citizen.

Stern sọ dọmọ: “Mí nọ saba lẹndọ oplọn dagbe nina ovi lẹ wẹ dona nọ duahunmẹna mẹjitọ lẹ hugan. Amọ́, e di dọ nuhe nọ duahunmẹna mẹjitọ lẹ hugan wẹ yindọ ovi lẹ ni sewé bo wá geze to gbẹ̀mẹ.”

Nugbo wẹ dọ wehọmẹ yìyì yin nujọnu. Amọ́, wepinplọn aihọn tọn dagbe hugan ma gán gọalọnamẹ nado duto ojlo kavi linlẹn agọ̀ lẹ ji. Todin, fie wẹ mí gán mọ nuplọnmẹ he na gọalọna mí nado tindo walọ dagbe te?

Biblu taidi mẹpọ́nnu de. Eyin mí nọ hia ẹ, e na gọalọna mí nado doayi walọ ylankan mítọn lẹ go. (Jakọbu 1:23-25) Amọ́, e ma yin enẹ kẹdẹ wẹ Biblu nọ wà. E sọ nọ gọalọnamẹ nado diọ, bọ yè nọ wleawuna jijọ dagbe lẹ he nọ zọ́n bọ jijọho po pọninọ po nọ tin. Delẹ to jijọ enẹlẹ mẹ wẹ, dagbewà, homẹdagbe, homẹfa, mawazẹjlẹgo po owanyi po. Owanyi tlẹ yin yiylọdọ “gẹdẹ he nọ kọ̀n gbẹtọ lẹ dopọ to aliho pipé de mẹ.” (Kolosinu lẹ 3:14) Naegbọn owanyi do dohuhlọn sọmọ? Pọ́n nuhe Biblu dọ gandego.

• “Owanyi nọ fahomẹ bo nọ yin homẹdagbenọ. Owanyi ma nọ whànwu. E ma nọ ze ede daga, ma nọ kla [kavi, yigo], ma nọ wanu jẹagọ, ma nọ dín ale edetiti tọn lẹ, ma nọ gblehomẹ aplà. E ma nọ basi kandai nuṣiwa tọn. E ma nọ jaya to mawadodo [kavi, nuylankan] mẹ, ṣigba nọ jaya to nugbo mẹ. E nọ ṣinyọnnudo nulẹpo, . . . nọ doakọnna nulẹpo. Owanyi ma nọ gboawupo gbede.”—1 Kọlintinu lẹ 13:4-8.

• “Owanyi ma nọ wà nuylankan do kọmẹnu etọn go.”—Lomunu lẹ 13:10.

• “Hú popolẹpo, mì tindo owanyi sisosiso na ode awetọ, na owanyi nọ ṣinyọnnudo ylando susugege.”—1 Pita 4:8.

Eyin a to mẹhe yiwanna we lẹ ṣẹnṣẹn, nawẹ e nọ ṣí na we? Be a ma nọ mọdọ emi to hihọ́ mẹ, bo nọ voawu bọ ayiha towe sọ nọ jai ya? Mọwẹ, na a yọnẹn dọ yé nọ dín dagbe towe, bo ma na desọn ojlo mẹ gbede nado wadanu do we to aliho depope mẹ.

Owanyi gán sọ whàn mẹlẹ nado diọ jijọ bo tlẹ jo aṣa ylankan lẹ do, na dagbe mẹdevo lẹ tọn. Di  apajlẹ, to whenue dawe he mí na ylọdọ George lẹzun baba-daho, e nọ jlo nado nọpọ́ hẹ ovivi etọn. Amọ́, nuhahun de tin. George ko peve to azọ̀-nùnù mẹ, bọ ovisu etọn ma jlo dọ ni nọ nù azọ̀ to viyẹyẹ lọ pá. Etẹwẹ George wà? Dile e tlẹ ko to azọ̀ nù sọn owhe 50 die gbọ́n, e jo aṣa ehe do na dagbe ovivi etọn tọn wutu. Mọwẹ, owanyi dohuhlọn taun!

Yè ma nọ ji mẹde po owanyi po. Mẹjitọ lẹ wẹ nọ plọn ovi yetọn lẹ nado do owanyi hia. Yé nọ na núdùdù ovi yetọn lẹ, nọ họ́ yé bosọ nọ gọalọ to whenue nude wà yé kavi bọ yé jẹazọ̀n. Mẹjitọ dagbe lẹ nọ dọho hẹ ovi yetọn lẹ bosọ nọ plọnnu yé. Yé sọ nọ domẹplọnlọ ovi yetọn lẹ go, ehe nọ biọ dọ yé ni plọn yé nuhe sọgbe po nuhe ma sọgbe lẹ po. Gbọnvona enẹ, mẹjitọ dagbe lẹ nọ ze apajlẹ dagbe dai na ovi yetọn lẹ.

Amọ́, e blawu dọ mẹjitọ delẹ ma nọ wàmọ. Be ehe dohia dọ ovi yetọn lẹ ma gán wá do walọ dagbe hia wẹ ya? Paali! Mẹsusu he delẹ to yé mẹ whẹ́n to whẹndo he do nuhahun lẹ mẹ, tlẹ ko basi diọdo susu to gbẹ̀mẹ bo lẹzun tòvi dagbe he go yè gán dejido lẹ. Dile mí na mọ do to hosọ he bọdego mẹ, delẹ to yé mẹ tlẹ yin mẹhe mẹsusu lẹndọ yé ma gán diọ gbede!