A Gán Do Ayajẹ to Whẹndo Mẹ
Nunina dagbe wẹ alọwle po ovi lẹ po yin bọ Mẹdatọ lọ na mí. E jlo dọ mí ni do ayajẹ to whẹndo mẹ. Enẹ wẹ zọ́n bọ e do na mí ayinamẹ dagbe lẹ na mí nido do ayajẹ to whẹndo mẹ. Ayinamẹ enẹlẹ tin to owe wiwe he ko tin e ma pọ́ de mẹ. Pọ́n apajlẹ delẹ.
Asu Ni Nọ Yiwanna Asi Etọn
“Asu lẹ dona nọ yiwanna asi yetọn taidi agbasa yetọn titi. Sunnu he yiwanna asi etọn yiwanna ede, na mẹdepope ma nọ gbẹwanna agbasa edetiti tọn gbede; ṣigba e nọ na ẹn núdùdù bo nọ wlebòna ẹn.”—EFESUNU LẸ 5:28, 29.
Asu wẹ yin tatọ́ to whẹndo mẹ. (Efesunu lẹ 5:23) Amọ́, asu dagbe ma nọ ylanhùn, mọ e ma nọ yin hẹngogonọ. E nọ yọ́n otẹn asi etọn tọn bo nọ na ẹn nuhe sin hudo e do lẹ. E nọ hò etọn pọ́n, e ma nọ dọ dọ emitọn ji janwẹ e na gbò do. (Filipinu lẹ 2:4) E ma nọ whleawu nado dọho po asi etọn po bo ka sọ nọ dotó e, eyin e to hodọ. E “ma nọ gblehomẹ sinsinyẹn do” asi etọn go. E ma nọ ze alọ do e ji, mọ e ma nọ yí ohó do sọwhán ẹn.—Kolosinu lẹ 3:19.
Asi Ni Nọ Na SiSi Asu Etọn
“Asi dona tindo sisi sisosiso na asu etọn.”—EFESUNU LẸ 5:33.
Asi he nọ na sisi asu etọn nọ nọgodona nudide he asu lọ bayi lẹ, ehe nọ zọ́n bọ whẹndo yetọn nọ do ayajẹ. Eyin e tlẹ ṣinuwa, e ma nọ de e pò. Kakatimọ, e nọ yinuwa hẹ ẹ po walọmimiọn po bo gbẹ́ nọ na ẹn sisi. (1 Pita 3:4) Eyin e jlo na dọ̀n ayiha asu etọn tọn wá whẹho de ji, e nọ de ojlẹ dagbe de bo nọ dọhona ẹn po sisi po.—Yẹwhehodọtọ 3:7.
Asu po Asi po Dona Nọ Nọ̀ Gbèji Na Yede
“Sunnu na . . . sẹbọdo asi etọn go, yé nasọ lẹzun agbasalan dopo.”—JENẸSISI 2:24.
Eyin sunnu de po yọnnu de po wlealọ, yé nọ lẹzun họntọn vivẹ́. Na alọwle yetọn nido lodo, asu po asi po dona nọ dọ-homẹ na yede bo nọ hò ode awetọ tọn pọ́n to onú flinflin lẹ mẹ. Asu po asi po dona nọ nọ̀ gbèji na yede bọ depope to yé mẹ ma dona deayọ. Nuylankan taun wẹ ayọdide yin. Jidedomẹgo masọ nọ tin podọ e tlẹ gán gbà whẹndo.—Heblu lẹ 13:4.
Mẹjitọ lẹ Ni Nọ Plọn Ovi Yetọn Lẹ
“Plọn ovi do aliho he ewọ dona gbọn ji; eyin ewọ tlẹ whẹ́n mẹho, e ma na tọ́n sọn e ji.”—HOWHINWHẸN LẸ 22:6, nudọnamẹ odò tọn.
Jiwheyẹwhe wẹ deazọ́nna mẹjitọ lẹ nado nọ plọn ovi yetọn lẹ. Yé dona nọ plọn jijọ dagbe ovi yetọn lẹ bosọ nọ ze apajlẹ dagbe dai na yé. (Deutelonomi 6:6, 7) Mẹjitọ he yọnnuin ma nọ yinuwa aplà eyin ovi de ṣinuwa. Mẹjitọ lọ ‘nọ dotoai, nọ whleawu nado dọho bo nọ whleawu nado gblehomẹ.’ (Jakọbu 1:19) Eyin e biọ dọ mẹjitọ lọ ni dọ̀n otó na ovi lọ, e nọ nọte bọ homẹgble etọn nọ wá odò bọ e nọ domẹplọnlọ ovi lọ go po owanyi po.
Ovi lẹ Ni Nọ Setonuna Mẹjitọ Yetọn Lẹ
“Mì ovi lẹ emi, mì nọ setonuna mẹjitọ mìtọn lẹ . . . ‘Gbògbéna otọ́ towe po onọ̀ towe po.’”—EFESUNU LẸ 6:1, 2.
Ovi dona nọ setonuna otọ́ po onọ̀ etọn po bo nọ na yé sisi. Ayajẹ, jijọho po pọninọ po nọ tin to whẹndo he mẹ ovi lẹ nọ na sisi mẹjitọ yetọn lẹ te. Ovi he ko whẹ́n mẹho lẹ lọsu nọ penukundo mẹjitọ yetọn lẹ go ganji bo nọ dohia dọ emi to gbégbòna yé. Di apajlẹ, e gán yindọ yé na gọalọna yé nado jla nulẹ do to whégbè kavi nado na yé akuẹ eyin e biọ domọ.—1 Timoti 5:3, 4.
A Gán Sọ Pọ́n Hosọ Ehelẹ
WHẸNDO TOWE SỌGAN YIN AYAJẸNỌ
Dín Anademẹ Jiwheyẹwhe Tọn Nado Tindo Alọwle Ayajẹnọ
Kanbiọ kleunkleun awe delẹ kinkanse dewe sọgan gọalọna we nado hẹn alọwle towe pọnte dogọ.
ATỌ̀HỌ̀-NUHIHỌ́ LỌ TỌN
Asu lẹ Emi—Mì Dike Owhé Mìtọn Ni Yin Bẹtẹn De
Whẹndo de sọgan tindo akuẹ bo vò ganṣo bosọ jẹdò onú titengbe de tọn.
ALỌWLE & WHẸNDO
Lehe a Sọgan Yin Otọ́ Dagbe de Do
Asu wunmẹ he a yin todin wẹ na do otọ́ wunmẹ he a na yin whenue ovi towe na yin jiji hia.
YỌ́N MÍ DOGỌ
Biọ Dọ Kunnudetọ de Ni Wá Dla We Pọ́n
Dọhodo kanbiọ sinai do Biblu ji de ji, kavi plọnnu dogọ gando Kunnudetọ Jehovah tọn lẹ go.
