Sisi Nina Mẹdevo Lẹ
NUHEWUTU SISI NINA MẸDEVO LẸ DO YIN NUJỌNU
Eyin mí nọ si mẹdevo lẹ, e nọ zọ́n bọ mí ma nọ hẹn ninọmẹ de vantan dogọ.
-
Oló Biblu tọn de dọ dọ: “Gblọndo he yin nina po ogbè dẹẹdẹ po nọ lilẹ́ adi sẹ̀, ṣigba, hogbe kàunkàun nọ fọ́n homẹgble dote.” (Howhinwhẹn lẹ 15:1) Ohó po walọ mẹmasi tọn lẹ po ma nọ wà dagbe de, e nọ hẹn nulẹ vantan poun wẹ.
-
Jesu dọ dọ: “Sọn susugege nuhe tin to ahun mẹ lẹ tọn mẹ wẹ onù nọ dọtọ́n.” (Matiu 12:34) Ohó mẹmasi tọn lẹ didọ nọ do nuhe mí nọ lẹn gando mẹhe akọ̀, hẹnnu kavi ninọmẹ gbẹ̀mẹ tọn yetọn gbọnvo na mítọn go lẹ hia.
Yè basi dodinnanu de to agọe bo kanhose gbẹtọ 32 000 linlán to otò 28 mẹ. Hugan odaa mẹlọ lẹ tọn wẹ dọ dọ yé ma ko mọ mẹmasi he to aihọn lọ mẹ todin nkọ pọ́n.
NUHE A GÁN WÀ
Nọ na sisi mẹlẹpo to wehọmẹ kavi azọ́nmẹ, eyin linlẹn mìtọn lẹ ma tlẹ nọ yin nudopolọ. Nọ dín nuhe ji mì gán do linlẹn dopolọ do lẹ. Enẹ na zọ́n bọ a ma na nọ mọhodọdomẹgo kavi dawhẹnamẹ.
Nue a jlo dọ yè ni nọ wà na we wẹ a ni nọ wà na mẹdevo lẹ. Eyin a nọ jọmẹ hẹ mẹdevo lẹ bo ma nọ yinuwa hẹ yé to aliho agọ̀ mẹ, e yọnbasi taun dọ yelọsu ni wà nudopolọ na we.
Nọ jonamẹ. Eyin mẹde ṣì hodọna we kavi ṣinuwa do we, nọ miọnnukundo bo nọ dọna dewe dọ mẹlọ ma desọn ojlo mẹ do wàmọ.
NUHE MÍ TO WIWÀ
To fie Kunnudetọ Jehovah tọn lẹ nọ nọ̀ bosọ nọ wazọ́n te lẹ, yé nọ na sisi gbẹtọ lẹ.
Mí nọ do nuhe Biblu dọ hia mẹlẹpo vọnu amọ́, mí ma nọ zín nuyise po linlẹn mítọn lẹ po do mẹdevo lẹ ji. Mí nọ tẹnpọn bo nọ hodo ayinamẹ Biblu tọn bo nọ yí “walọmimiọn po sisi sisosiso po” do dọ nuhe to Biblu mẹ na yé.—1 Pita 3:15; 2 Timoti 2:24.
Mí ma nọ de mẹde dovo, podọ to opli mítọn lẹ ji, mí nọ kẹalọyi mẹdepope he jlo na yọ́n nuhe Biblu plọnmẹ lẹ, mahopọnna ninọmẹ gbẹ̀mẹ tọn mẹlọ tọn. Mí nọ tẹnpọn nado jọmẹ bo nọ na sisi he jẹ “gbẹtọ wunmẹ lẹpo.”—1 Pita 2:17.
Mí nọ na sisi aṣẹpipa he to lẹdo he mẹ mí nọ nọ̀. (Lomunu lẹ 13:1) Mí nọ yìn-sẹ́n bosọ nọ sú takuẹ. Nugbo wẹ dọ mí ma nọ doalọ to tonudidọ mẹ, amọ́ mí nọ na sisi jlọjẹ he mẹdevo lẹ do nado de nuhe jlo yé na nuhe dù whẹho tonudidọ tọn lẹ.
