Sisi to Whẹndo Mẹ
NUHEWUTU SISI TO WHẸNDO MẸ DO YIN NUJỌNU
Eyin hagbẹ whẹndo tọn lẹ nọ na sisi yenọzo, nulẹ nọ yì ganji bọ asu, asi, po ovi lẹ po nọ mọdọ emi to hihọ́ mẹ.
-
Owe de dọ dọ, eyin asu po asi po nọ si ode awetọ, “e ma yin onú vonọtaun lẹ kẹdẹ mẹ [wẹ yé nọ do owanyi he yé do na yenọzo hia te gba], ṣigba to onú flinflin lẹ lọsu mẹ egbesọegbesọ.”—Owe lọ The Seven Principles for Making Marriage Work.
-
Dodinnanu de dohia dọ ovi he nọ símẹ lẹ nọ deji bo ma nọ mọ ovọ́ mẹ na yede. Yé nọ vẹ́ po mẹjitọ yetọn lẹ po bo ma nọ jẹ apọ̀nmẹzọ̀n sọmọ.
NUHE A GÁN WÀ
Dọhodopọ hẹ whẹndo towe. Tintan, dike mẹhe to whẹndo lọ mẹ lẹpo ni yọ́n nuhe “sisi” didohia bẹhẹn. Awetọ, lẹnnupọndo lehe hagbẹ whẹndo lọ tọn lẹpo dona nọ yinuwa do po lehe yé ma dona nọ yinuwa do po ji. Atọ̀ntọ, mì dọhodopọ to whẹndo mẹ, na mẹlẹpo nido yọ́n lehe yè na nọ do sisi hia do.
Ze apajlẹ dai. Eyin hagbẹ whẹndo tọn towe lẹ wanuyindo, be a nọ mọhodọdo yé go wẹ ya? Eyin yé dọ nuhe yé lẹn, be a nọ ṣàn yé kò wẹ ya? Kavi eyin yé to hodọna we, be a nọ dovọ́na yé wẹ ya?
Ayinamẹ: Tẹnpọn bo nọ pọ́n sisi di ahọ́ he a dù do asu kavi asi towe, po ovi towe lẹ po. Ma nọ mọdọ yé dona wà nude whẹpo do jẹna blo.
Nọ si mẹlẹ, eyin linlẹn towe tlẹ gbọnvo na yetọn. Eyin a to hodọ hẹ mẹde, ma nọ zan hogbe he na sọwhánmẹ taidi “tẹgbẹ janwẹ a nọ” kavi “a ma nọ [wà le-le] pọ́n gbede” blo. Homọdọdomẹgo mọnkọ lẹ na hẹn homẹgble hagbẹ whẹndo tọn towe lẹ bọ gbemanọpọ pẹvide poun gán wá lẹzun whẹgbè sinsinyẹn.
NUHE MÍ TO WIWÀ
Kunnudetọ Jehovah tọn lẹ nọ na tuli whẹndo lẹ dọ yé ni nọ na sisi yenọzo. Mí nọ saba dọhodeji to hosọ, owe po video he mí nọ detọ́n vọnu lẹ po mẹ.
NA ASU PO ASI PO LẸ: Hosọ debọdo-dego he nọ yin Alọgọ Na Whẹndo Lẹ gán gọalọna asu po asi po bọ . . .
-
yé na nọ dotoaina yenọzo ganji
-
yé ma na nọ nabọẹ demẹ na yenọzo eyin yé ma dogbepọ do nude ji
-
yé ma nasọ nọ dọnnu ba
(To nọtẹn Intẹnẹt tọn lọ jw.org ji, dín “Alọgọ Na Whẹndo Lẹ”)
NA MẸJITỌ LẸ: Hosọ debọdo-dego he nọ yin Alọgọ Na Whẹndo Lẹ gán gọalọna mẹjitọ lẹ bọ yé na plọn ovi yetọn lẹ bọ . . .
-
yé na nọ setonu
-
yé na nọ wà whégbèzọ́n lẹ
-
yé na nọ dọ “mì jaale” po “mì wanu” po
(To jw.org ji, dín “Ovi lẹ Pinplọn Whẹ́n” po “Jọja Aflanmẹ lẹ Pinplọn Whẹ́n” po)
Sọ pọ́n hosọ lọ “Onú Ṣidopo Delẹ He Ovi lẹ Dona Plọn” to Fọ́n! Sọha 2 2019 tọn mẹ gọna hosọ lọ “Onú 12 He Nọ Hẹn Ayajẹ Wá Whẹndo Mẹ” to Fọ́n! Sọha 2 2018 tọn mẹ, weda 8-11. (Dín hosọ lọ lẹ to jw.org ji)
NA JỌJA LẸ: Adà lọ Jọja Lẹ he to jw.org ji bẹ hosọ, video po nuplọnmẹwe lẹ po hẹn, ehe gán gọalọna jọja lẹ bọ . . .
-
yé na vẹ́ hẹ mẹjitọ yetọn lẹ po nọvi yetọn lẹ po
-
yé na nọ dọhona mẹjitọ yetọn lẹ po sisi po do osẹ́n he yé do na yé lẹ ji
-
yé na nọ wà nuhe na zọ́n bọ mẹjitọ yetọn lẹ na nọ dejido yé go lẹ
(To jw.org ji, dín “Jọja Lẹ”)
Vọnu wẹ yè nọ zan nọtẹn Intẹnẹt tọn lọ jw.org. Yè ma nọ sú akuẹ na nude to nọtẹn lọ ji, mọ yè ma na biọ to asi we nado biọ gbẹ̀mẹ kavi kàn nudọnamẹ mẹdetiti tọn de biọ we.
