NA JỌJA LẸ
9: Mẹhe Nkọ A Yin
NUHE E ZẸẸMẸDO
E ma yin yinkọ po awusọhia towe po kẹdẹ wẹ nọ do mẹhe nkọ a yin hia. Amọ́, jijọ, nuyise po walọ towe po sọ nọ do e hia. Nado dọ hójọhó, nue a yin blebu wẹ nọ do mẹhe nkọ a yin hia.
NUHEWUTU E YIN NUJỌNU
Eyin a jlo na basi hihọ́na mẹhe nkọ a yin, a dona tẹdo nuyise towe lẹ go bo ma na dike hagbẹ towe lẹ ni nọ basi nudide do asi na we.
“Mẹsusu nọ taidi ṣiṣavi he yè nọ sọnú na nado jla ajọ́ to avọ̀-satẹn lẹ. Yelọsu ma nọ de avọ̀ he yé na do, mẹdevo wẹ nọ dena yé.”—Jọja sunnu de he nọ yin Adrian.
“N’ko plọn nado nọ wà nue sọgbe eyin e tlẹ vẹawu. Lehe họntọn ṣie lẹ nọ yinuwa do po lehe n’nọ yinuwa hẹ yé do po gán zọ́n bọ n’na yọ́n mẹhe yin họntọn jọ họntọn ṣie lẹ.”—Jọja yọnnu de he nọ yin Courtney.
AYINAMẸ BIBLU TỌN: “Mì hodo titonu ehe ba blo, ṣigba mì yin adàdiọna gbọn ayiha mìtọn didiọ dali.”—Lomunu lẹ 12:2.
NUHE A SỌGAN WÀ
Nado yọ́n mẹhe nkọ a yin todin po mẹhe nkọ a jlo na lẹzun po, a dona tẹnpọn nado yọ́n nugopipe, madogán po nujinọtedo towe lẹ po. Aliho dagbe de nado bẹjẹeji wẹ nado na gblọndo na kanbiọ he bọdego lẹ.
Nugopipe: Nugopipe tẹlẹ wẹ n’do podọ azọ́n tẹlẹ wẹ n’yọ́n wà? Jijọ dagbe tẹlẹ wẹ n’tindo? (Di apajlẹ, be n’nọ nọ̀ gànmẹ ji, duto dee ji, wazọ́n sinsinyẹn bo nọ nanúmẹ ya?) Nudagbe tẹlẹ wẹ n’nọ wà?
AYINAMẸ: Be e nọ vẹawuna we nado doayi nudagbe he a nọ wà lẹ go wẹ ya? Kanse mẹjitọ kavi họntọn dejidego de nado dọ nudagbe he e nọ mọ to gowe lẹ na we, podọ nuhewutu e do mọdọ yé yin dagbe.
AYINAMẸ BIBLU TỌN: “Mì gbọ mẹdopodopo ni nọ dindona nuyiwa edetiti tọn lẹ, podọ to whenẹnu, ewọ na tindo whẹwhinwhẹ́n nado jaya gando edetiti kẹdẹ go, bọ e ma yin nado nọ yí ede jlẹdo mẹdevo go gba.”—Galatianu lẹ 6:4.
Madogán: Jijọ ṣie tẹlẹ wẹ n’dona vọ́ jlado? Ojlẹ tẹlẹ mẹ wẹ n’nọ saba yin whiwhlepọn nado wà nue ma sọgbe? Etẹwẹ n’gán wà nado nọ duto dee ji dogọ?
AYINAMẸ BIBLU TỌN: “Eyin mí dọ dọ, ‘Mí ma tindo ylando,’ mídelẹ klọ wẹ mí te podọ nugbo ma tin to mí mẹ.”—1 Johanu 1:8.
Nujinọtedo: Osẹ́n walọ dagbe tọn tẹlẹ wẹ n’nọ hodo, podọ etẹwutu? Be n’yise dọ Jiwheyẹwhe tin ya? Etẹlẹ wẹ hẹn mi kudeji dọ ewọ tin? Nuyiwa tẹlẹ wẹ n’nọ pọ́n di nue ma sọgbe podọ etẹwutu? Etẹwẹ yin todido ṣie na sọgodo?
AYINAMẸ BIBLU TỌN: “Nugopipe nulẹnpọn tọn na nọ họ́ we, bọ wuntuntun na nọ basi hihọ́na we.”—Howhinwhẹn lẹ 2:11.
A Gán Sọ Pọ́n Hosọ Ehelẹ
GBLỌNDO NA KANBIỌ 10 HE JỌJA LẸ NỌ KANSE
Omẹ Nankọ Wẹ N’Yin?
Nujinọtedo, nugopipe, dogbó, gọna yanwle towe lẹ yinyọnẹn na gọalọna we nado basi nudide dagbe lẹ to kọgbidinamẹ whenu.
