Alokan Kavi Nuyizan Mọnkọ lẹ Gán Bẹpla Hiẹ po Họntọn Towe lẹ Po
Omẹ awe gán kanwehlan yede, ylọ yede kavi dọho gbọn Intẹnẹt ji po awubibọ po, eyin yé tlẹ to awà voovo ji to ogbẹ̀ lọ mẹ. Na omẹ mọnkọ lẹ, alokan kavi nuyizan mọnkọ lẹ nọ wà dagbe taun.
Amọ́, eyin alokan kavi nuyizan mọnkọ lẹ kẹdẹ ji wẹ mẹde nọ dọho hẹ họntọn etọn lẹ te, e gán zọ́n bọ . . .
-
e ma na nọ vẹawu họntọn etọn lẹ sọmọ ba.
-
e na nọ mọ ede to ṣokẹdẹ bo nasọ mọ vọ́ mẹ na ede.
-
e na nọ ví do ede tọn kẹdẹ mẹ.
NUHE A DONA YỌNẸN
AWUVẸMẸ
Eyin mí na vẹawu mẹde, e na biọ dọ mí ni nọ yiagbọji bo ze ayiha do nue to mẹlọ gbò ji, amọ́ enẹ gán vẹawu eyin nue yè kàn hlan mí lẹ wẹ mí nọ to hihia whelẹponu kavi owe janwẹ mílọsu nọ to kinkan hlan mẹlẹ mapote.
Eyin mẹhe kannu hlan we lẹ sù gbau, e gán vẹawuna we nado na gblọndo nue họntọn de kàn hlan we tọn. A ni saa gblọn nude na mẹhe kannu hlan we lẹ wẹ na to ayiha mẹ na we bọ a ma tlẹ na mọdọ alọgọ biọ wẹ họntọn de te.
LẸNNUPỌNDO EHE JI: Nawẹ a gán dohia họntọn towe lẹ dọ emi nọ hò yetọn pọ́n nugbonugbo gbọn eyin a to nukan hlan yé to alokan kavi nuyizan mọnkọ de ji?—1 PITA 3:8.
MỌ VỌ́ MẸ NA EDE
Weyọnẹntọ delẹ dindonanu bo dọ dọ mẹsusu wẹ e nọ wá vẹna dọ yé ko zan whenu susu to Intẹnẹt ji. Weyọnẹntọ lọ lẹ dọ dọ mẹhe nọ yì pọ́n fọto po onú yọyọ he mẹdevo lẹ zedo Intẹnẹt ji po lẹ “nọ wá mọdọ whenu wẹ emi hẹngu poun.”
Gbọnvona enẹ, fọto dagbedagbe he mẹdevo lẹ zedo Intẹnẹt ji pinpọn gán zọ́n bọ mẹde na jẹ ede mọ di gbẹ́gọ́nu ji. E gán di na mẹlọ dọ mẹhe pò lẹpo wẹ to gbẹdu bọ mẹde ma to etọn dọ.
LẸNNUPỌNDO EHE JI: Whenue a to Intẹnẹt ji, etẹwẹ a gán wà bo ma nado nọ mọdọ mẹdevo lẹ tọn pọnte hú emitọn?—GALATIANU LẸ 6:4.
VÍ DO EDE TỌN MẸ
Mẹplọntọ de doayi e go dọ delẹ to wehọmẹvi etọn lẹ mẹ nọ ví do yede tọn kẹdẹ mẹ bo nọ jlo dọ họntọn yetọn lẹ ni saa to yetọn dọ poun. Dagbe he họntọn enẹlẹ na wà na yé kẹdẹ wẹ yé nọ to dindin. Eyin mẹde nọ yinuwa domọ, be e nọ pọ́n họntọn etọn lẹ di ọdinatẹẹ de niyẹn, na whenue yè do hudo etọn wẹ yè nọ tá ẹ bosọ nọ ṣí i eyin yè zan ẹn pó.
LẸNNUPỌNDO EHE JI: Be nue a nọ zedo Intẹnẹt ji lẹ nọ dohia dọ a nọ jlo na whlẹnagbà kavi nọ jlo na dọ̀n ayiha mẹlẹ tọn wá dewe ji wẹ ya?—GALATIANU LẸ 5:26.
NUHE A GÁN WÀ
OBÁ TẸ MẸ A NỌ ZAN ALOKAN JẸ?
Eyin a nọ yí alokan kavi onú mọnkọ lẹ zan do lehe e jẹ do bọ yé ma nọ deanana we, e na zọ́n bọ a na yọ́n lehe nulẹ to yìyì do na họntọn towe lẹ bọ mì na tlẹ vẹ́ dogọ.
AYINAMẸ BIBLU TỌN: ‘Owanyi ma nọ dín ale edetiti tọn lẹ.’—1 KỌLINTINU LẸ 13:4, 5.
De ayinamẹ he a jlo na hodo lẹ kavi kàn dehe hiẹ lọsu lẹn.
-
Nọ dọho hẹ mẹlẹ tlọlọ (kakati a nido nọ to nukan hlan yé poun)
-
Nọ ze alokan do olá (kavi bayi i do de bọ e ma na dọnú) whenue a to hodọ hẹ mẹdevo lẹ
-
De whenu he a nọ zan to Intẹnẹt ji pò
-
Nọ dotoai ganji hugan dai tọn
-
Dọho hẹ họntọn he nulẹ ma to awubọ na de
