Mẹdelẹ ka doayi e go dọ jọja he nọ yí whenu susu zan to Intẹnẹt ji lẹ gán . . .

• nọ pò na alokan zinzan kẹdẹ.

• nọ vannukundomẹ kavi dọ yè ni vannukundo yé to Intẹnẹt ji.

• nọ mọ yẹdide gblewa tọn lẹ, eyin yelọsu ma tlẹ jlo.

NỌ PÒ NA ALOKAN

Yè nọ bayi nue to Intẹnẹt ji lẹ po aihun he yè nọ dà to alokan ji lẹ po to aliho de mẹ bọ eyin mẹde jẹ zinzan ji e gán vẹawuna ẹn nado tlọ́n e kọ̀n. Owe de dọ dọ “aplikasiọn he to alokan mítọn mẹ lẹ nọ yin bibayi do de na mí ni saa do nọ to ofẹ̀n whè do alokan mẹ poun.” (Reclaiming Conversation) Eyin mí nọ yí whenu susu do nọ to aplikasiọn ajọwiwa tọn lẹ pọ́n, mí na to akuẹ dín do apòmẹ na ajọjlatọ lẹ poun wẹ.

LẸNNUPỌNDO EHE JI: Be e taidi dọ ovi towe lẹ wá pò na alokan kavi onú mọnkọ lẹ kẹdẹ zinzan wẹ ya? Nawẹ a gán gọalọna yé nado nọ zan whenu yetọn ganji gbọn?—EFESUNU LẸ 5:15, 16.

NUKUNVANDOMẸ

Mẹdelẹ nọ ylanhùn do mẹdevo lẹ go whenue yé to Intẹnẹt ji bọ enẹ gán taidi dọ yé to nukunvandomẹ.

Mẹhe nọ ṣì Intẹnẹt zan delẹ nọ jlo dọ mẹlẹ ni yiwanna emi na nue emi nọ zedo e ji lẹ wutu. Kavi eyin mẹde wá mọdọ yè ma ylọ emi do tito de kọ̀n, vlavo yè ma ylọ ẹ do agọ́ de tẹnmẹ, e gán mọdọ hagbẹ lẹ ma ylọ emi dọ nude.

LẸNNUPỌNDO EHE JI: Be ovi towe lẹ nọ jọmẹ whenue yé to Intẹnẹt zan ya? (Efesunu lẹ 4:31) Nawẹ e nọ ṣí na yé eyin yé mọdọ yè de emi pò?

YẸDIDE GBLEWA TỌN

E nọ bọawu taun nado mọ yẹdide gblewa tọn lẹ to Intẹnẹt ji. Nudelẹ tin he nọ zọ́n bọ mẹjitọ lẹ gán yọ́n nue ovi yetọn lẹ nọ pọ́n to Intẹnẹt ji, amọ́ yé ma nọ wazọ́n ganji to whedelẹnu bọ ovi lẹ gbẹ́ nọ mọ onú gblewa tọn lẹ.

E gán jẹagọdo osẹ́n nado sẹ́ hodidọ po yẹdide gblewa tọn lẹ po do mẹlẹ. Podọ, sọgbe hẹ osẹ́n lẹdo dopodopo tọn po owhe mẹhe sẹ́ onú mọnkọtọn lẹ do mẹdevo tọn po, yè gán sawhẹ do jọja he pọ́n kavi má yẹdide gblewa tọn yọpọvu lẹ tọn pé.

LẸNNUPỌNDO EHE JI: Nawẹ a gán gọalọna ovi towe lẹ ma nado nọ pọ́n kavi sẹ́ yẹdide gblewa tọn do mẹlẹ to Intẹnẹt ji gbọn?—EFESUNU LẸ 5:3, 4.

PLỌN OVI TOWE LẸ

Nugbo wẹ dọ e nọ bọawuna ovi lẹ nado zan alokan kavi onú mọnkọ lẹ ganji, amọ́ yé gbẹ́ do hudo alọgọ tọn. Owe de dọ dọ eyin yè ze alokan he nọ zan Intẹnẹt na ovi lẹ whenue e ma ko sù dọ yé ni zan, e nọ “taidi dọ yè to didọna yé dọ yé ni lọ́n biọ tọ̀mẹ wẹ nkọ whenue yé ma ko yọ́n sinlìn.” (Indistractable)

De ayinamẹ he a jlo na hodo lẹ kavi kàn dehe hiẹ lọsu lẹn.

• Dọna ovi towe nado nọ jọmẹ hẹ mẹlẹ to Intẹnẹt ji

• Gọalọna ovi towe ma nado nọ mọdọ hagbẹ lẹ de emi pò

• Wà nuhe go a pé lẹpo nado họ́ ovi towe na e nikaa pọ́n nugbigble lẹ to Intẹnẹt ji

• Nọ pọ́n nue to alokan ovi towe tọn mẹ

• De ojlẹ nẹmu he ovi towe na nọ zan alokan na to gbèdopo

• Dosẹ́n na ovi towe dọ e ma dona zan alokan to whenue e ko yihọ

• Dosẹ́n dọ mẹde ma dona zan alokan to whenue whẹndo lọ to núdù to pọmẹ