Nuvẹun Na Busẹ Pete
Ayinamẹ e ji mí dọhodo wayi lẹ ko gọalọna gbẹtọ livilivi lẹ nado de nuvẹun sẹ̀ sọn ahun yetọn mẹ. Eyin mí na dọ hójọhó, gbẹtọvi lẹ ma gán de nuvẹun sẹ̀ sọn aihọn-gbẹ̀ lọ mẹ mlẹnmlẹn. Bọ etẹwẹ na de e sẹ̀ lo?
Aṣẹpipa He Jẹ
Gandutọ lẹ ma o penugo nado de nuvẹun sẹ̀. Amọ́, be aṣẹpipa de tin he enẹ gán pà ya?
Aṣẹpipa he na bayi enẹ
-
1. Dona gọalọna gbẹtọvi lẹ nado jo linlẹn agọ̀ do bo nọ lẹnnu dagbe gando yenọzo go.
-
2. Hù apà he nuvẹun ko do mẹsusu go lẹ, enẹ na zọ́n bọ e na bọawuna yé nado nọ yiwannamẹ.
-
3. Gandutọ etọn lẹ ma dona do nuvẹun etlẹ yin kẹnnẹ-kẹnnẹ de.
-
4. Dona kọ̀n akọ̀ lẹpo dopọ.
Biblu dohia dọ Jiwheyẹwhe ko do gandudu mọnkọ ai. Gandudu enẹ wẹ yè nọ ylọdọ “Ahọluduta Jiwheyẹwhe tọn.”—Luku 4:43.
Pọ́n nue gandudu enẹ na wà.
1. Oplọn Dagbe
“Mẹhe nọ nọ̀ aigba ji lẹ [na] nọ plọnnu gando dodowiwa go.”—ISAIA 26:9.
“Ale he dodowiwa nugbo na hẹnwa wẹ jijọho, podọ sinsẹ́n he dodowiwa nugbo na detọ́n wẹ vivomẹninọ po hihọ́ he na dẹn-to-aimẹ po.”—ISAIA 32:17.
Etẹwẹ enẹ dohia? E dohia dọ nudagbe kavi nue sọgbe wẹ Ahọluduta Jiwheyẹwhe tọn na plọn gbẹtọvi lẹ. Whenue gbẹtọ lẹ yọ́n dagbe dovo na oylan, yé nọ yiwanna dodo bo nọ gbẹwanna mawadodo bọ ehe nọ tọ́n to alio he mẹ yé nọ yinuwa hẹ yenọzo te mẹ. To Ahọluduta Jiwheyẹwhe tọn glọ, mẹlẹpo wẹ na mọdọ nue sọgbe wẹ e yin nado nọ yiwanna ode awetọ.
2. Azọ̀nhẹngbọ
Jiwheyẹwhe na “súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”—OSỌHIA 21:4.
Etẹwẹ enẹ dohia? E dohia dọ Ahọluduta Jiwheyẹwhe tọn na de awufiẹsa he nuvẹun ko hẹnwa lẹpo sẹ̀. Mẹe nuvẹun ko zọ́n bọ yè tafu lẹ ma nasọ hẹnmẹ do homẹ ba.
3. Aṣẹpipa Dagbe
“E ma na nọ dawhẹ sọgbe hẹ awusọhia nukunta tọn, kavi wọhẹmẹ to dodonu nuhe e sè poun lẹ tọn ji. E na nọ dawhẹ jijlọ na agbátọnọ, e nasọ nọ yí dodowiwa do wọhẹmẹ do ota homẹmimiọnnọ aigba ji tọn lẹ tọn mẹ.”—ISAIA 11:3, 4.
Etẹwẹ enẹ dohia? E dohia dọ sọn olọn mẹ Jesu Klisti he yin Ogàn Ahọluduta Jiwheyẹwhe tọn na nọ dawhẹ jijlọ bo ma na de akọ̀ de dovo na de. Jesu ma nọ ṣinyan akọ̀, podọ to gandudu etọn whenu, mẹtitafu depope maa tin to aihọn-gbẹ̀ lọ mẹ.
4. Kọndopọ
Ahọluduta Jiwheyẹwhe tọn nọ plọn gbẹtọ lẹ nado do ‘linlẹn dopolọ po owanyi dopolọ po bo nọ tin to kọndopọ mẹ mlẹnmlẹn bosọ nọ tindo linlẹn dopolọ.’—FILIPINU LẸ 2:2.
Etẹwẹ enẹ dohia? E dohia dọ kọndopọ he na nọ tòvi Ahọluduta Jiwheyẹwhe tọn lẹ ṣẹnṣẹn ma na yin nukunta tọn. Yé na “tin to kọndopọ mẹ mlẹnmlẹn,” na yé na yiwanna yede nugbonugbo wutu.
