Nuhewutu A Dona Yọnẹn Eyin Mẹdatọ de Tin
Onú titengbe wẹ e yin nado yọnẹn eyin Mẹdatọ de tin kavi e ma tin. Etẹwutu? Eyin a kudeji dọ Jiwheyẹwhe ganhunupotọ de tin nugbo, vlavo a na jlo nado dín kunnudenu he dohia dọ ewọ wẹ dowatọ Biblu tọn. Podọ eyin a dejido Biblu go, be a gán duale etọn to adà ehelẹ mẹ.
A na do ayajẹ dogọ to gbẹ̀mẹ
BIBLU DỌMỌ: ‘Jiwheyẹwhe wà dagbe, bo nọ na mì jikun sọn olọn podọ ojlẹ sinsẹ́n susugege lẹ tọn bosọ nọ yí núdùdù do pekọna mì bo nọ yí ayajẹ do gọ́ ahun mìtọn.’—Owalọ lẹ 14:17.
NUHE E ZẸẸMẸDO: Jiwheyẹwhe wẹ dá nudagbe he a to vivi etọn dù to ogbẹ̀ lọ mẹ lẹpo. A na nọ dopẹ́ dogọ eyin a wá mọnukunnujẹemẹ dọ owanyi he Jiwheyẹwhe do na we wẹ zọ́n bọ ewọ do na we onú enẹlẹ.
A gán mọ ayinamẹ dagbe lẹ nado zan ogbẹ̀ towe
BIBLU DỌMỌ: “Hiẹ na mọnukunnujẹ nuhe dodowiwa, whẹdida dodo po nuhe sọgbe po zẹẹmẹdo mẹ, yèdọ zẹẹmẹ gigọ́ nudagbe lẹpo tọn.”—Howhinwhẹn lẹ 2:9.
NUHE E ZẸẸMẸDO: Jiwheyẹwhe wẹ dá we bo yọ́n nuhe sin hudo a do nado do ayajẹ. Biblu hihia na gọalọna we nado yọ́n lehe a na zan ogbẹ̀ towe do.
A na mọ gblọndo na kanbiọ he nọ duahunmẹna we lẹ
BIBLU DỌMỌ: ‘A na mọ oyọnẹn Jiwheyẹwhe tọn.’—Howhinwhẹn lẹ 2:5.
NUHE E ZẸẸMẸDO: Eyin a mọnukunnujẹemẹ dọ Mẹdatọ de tin nugbo, e na bọawuna we nado mọ gblọndo na kanbiọ titengbe taidi ehelẹ: Naegbọn mí do to ogbẹ̀ lọ mẹ? Naegbọn yajiji do sù sọmọ? Etẹwẹ nọ jọ to okú godo? Gblọndo Biblu tọn lẹ gán gọalọna we susu.
A na nọ pọ́n sọgodo hlan po ayajẹ po
BIBLU DỌMỌ: “‘Yẹn yọ́n nuhe lẹn n’te gando mì go lẹ ganji,’ wẹ Jehovah dọ, ‘yèdọ linlẹn jijọho tọn lẹ bọ e ma yin nugbajẹmẹji tọn lẹ, na mìwlẹ nido tindo sọgodo dagbe de po todido de po.’”—Jelemia 29:11.
NUHE E ZẸẸMẸDO: Jiwheyẹwhe dopà dọ zande din, emi na de kanyinylan, yajiji po okú lọsu po sẹ̀. Jidide do ohó Jiwheyẹwhe tọn enẹlẹ go na gọalọna we nado nọ doakọnna nuhahun gbẹ̀mẹ tọn lẹ.
A Gán Sọ Pọ́n Hosọ Ehelẹ
FỌ́N!
Nuhe Nọ Hẹn Ayajẹ Wá—Nuhewutu Mí Do Togbẹ̀
Gblọndo dindin na kanbiọ daho hugan gbẹ̀mẹ tọn lẹ yin aliho titengbe de nado tindo ayajẹ.
