1. Etẹlẹ wẹ yè ko plọn we gando Mẹdatọ mítọn go?

EYIN a yin pinplọn whẹ́n taidi Kunnudetọ Jehovah tọn de, e yọnbayi dọ a ni ko plọnnu gando Jehovah go sọn vuwhenu. Yè ko plọn we dọ ewọ wẹ Mẹdatọ lọ, dọ e tindo jẹhẹnu dagbe lẹ, podọ dọ e tindo lẹndai owanyinọ de na gbẹtọvi lẹ.—Jen. 1:1; Owalọ 17:24-27.

2. Nukun tẹwẹ mẹdelẹ nọ yí do pọ́n mẹhe yise dọ Mẹdatọ de tin lẹ?

² Amọ́, mẹsusu ma yise dọ Jiwheyẹwhe tin, kaka bo na wá dọ dọ ewọ wẹ Mẹdatọ lọ. Kakatimọ, yé yise dọ nulẹ wá aimẹ gbọn kosọ dali bo wá to didiọ vudevude sọn nuvikun pẹvi lẹ ji jẹ nutogbẹ̀ he doglẹ lẹ ji. Delẹ to omẹ ehelẹ mẹ yin wesetọ dahodaho lẹ. Yé gán nọ dọ dọ lẹnunnuyọnẹn ko dohia dọ nuhe to Biblu mẹ lẹ ma sọgbe, podọ dọ mẹhe ma yì wehọmẹ kavi wunvinọ lẹ wẹ nọ yise dọ Mẹdatọ de tin.

3. Naegbọn e do yin nujọnu dọ mílọsu ni nọ hẹn yise mítọn lodo?

³ Be nuhe omẹ nukundeji enẹlẹ nọ dọ lẹ na zọ́n bọ mí na tindo ayihaawe dọ Jehovah wẹ Mẹdatọ owanyinọ mítọn ya? Na taun tọn, nuhewutu mí do yise dọ Jehovah wẹ Mẹdatọ lọ wẹ na magbe enẹ tọn. Be na yè plọn mí nado yí enẹ sè wutu wẹ mí do wá tadona enẹ kọ̀n ya, kavi na mílọsu lẹ yí whenu do gbeje kunnudenu lẹ pọ́n na míde? (1 Kọl. 3:12-15) Mahopọnna lehe e ko dẹnsọ bọ mí yin Kunnudetọ Jehovah tọn, mímẹpo wẹ dona to yise mítọn hẹn lodo zọnmii. Gbọnmọ dali, mí ma na yin hinhẹn buali gbọn “tamẹnuplọnmẹ po oklọ ovọ́” he mẹhe jẹagọdo Ohó Jiwheyẹwhe tọn lẹ nọ plọnmẹ lẹ po dali. (Kol. 2:8; Heb. 11:6) Na e nido pà mí, hosọ ehe na gbadopọnna (1) nuhewutu mẹsusu ma yise dọ Mẹdatọ de tin, (2) lehe a gán wleawuna yise to Mẹdatọ towe Jehovah mẹ do, podọ (3) lehe a gán hẹn yise he lodo enẹ go do.

4. Sọgbe hẹ Heblu lẹ 11:1 po nudọnamẹ odò tọn po, etẹ ji wẹ yise nujọnu tọn nọ sinai do?

⁴ Mẹdelẹ nọ lẹndọ yise tintindo zẹẹmẹdo nado yí nude sè matin kunnudenu. Amọ́ sọgbe hẹ Biblu, enẹ ma yin yise jọ yise. (Hia Heblu lẹ 11:1 po nudọnamẹ odò tọn po.) Doayi e go dọ yise tintindo to nuhe ma nọ yin mimọ delẹ mẹ taidi Jehovah, Jesu po Ahọluduta olọn tọn po, sinai do kunnudenu he dutomẹji lẹ ji. (Heb. 11:3) Weyọnẹntọ de he yin Kunnudetọ Jehovah tọn dọ ẹ dole: “Yise mítọn ma yin wunvi tọn he nọ gbẹkọ kunnudenu lẹnunnuyọnẹn tọn lẹ go.”

5. Naegbọn mẹsusu ma yise dọ Mẹdatọ de tin?

⁵ Mí gán nọ kanse dọ, ‘Eyin kunnudenu dolido lẹ tin dọ Mẹdatọ de tin, naegbọn mẹsusu ma do yise dọ Jiwheyẹwhe wẹ dowatọ ogbẹ̀ tọn?’ Na mẹdelẹ ma gbadopọnna kunnudenu lẹ na yede pọ́n gbede wutu wẹ. Robert he yin Kunnudetọ Jehovah tọn de todin dọmọ: “Na yè ma nọ dohia gbede to wehọmẹ dọ nulẹ yin didá wutu, n’nọ lẹndọ Mẹdatọ de ma tin. Whenue n’do owhe 22 wẹ n’dọho hẹ Kunnudetọ Jehovah tọn lẹ, bo wá sè hoyijlẹdohogo sinai do Biblu ji he dutomẹji delẹ he dohia dọ Jiwheyẹwhe wẹ dá nulẹpo.” *—Pọ́n apotin lọ “ Ayinamẹ de Na Mẹjitọ Lẹ.”

6. Naegbọn mẹdelẹ nọ jẹagọdo dọ Mẹdatọ de tin?

⁶ Mẹdelẹ ma yise dọ Mẹdatọ de tin, na yé nọ dọ dọ nuhe yé gán mọ po nukun po lẹ kẹdẹ wẹ yé nọ yise. Amọ́ na nugbo tọn, yé yise dọ nuhe nukun ma sọgan mọ delẹ tin taidi huhlọn nudọnwado tọn, na yé do kunnudenu ehe tọn wutu. Yise wunmẹ he yin nùdego to Biblu mẹ bẹ kunnudenu “onú  tangan he ma yin mimọ” devo lẹ tọn hẹn. (Heb. 11:1) E nọ biọ whenu po vivẹnudido po nado gbadopọnna kunnudenu lọ lẹ na míde, podọ mẹsusu ma nọ jlo na dovivẹnu nado wàmọ. Mẹhe ma dindona kunnudenu lẹ na ede, gán wá tadona lọ kọ̀n dọ Jiwheyẹwhe de ma tin.

7. Be weyọnẹntọ lẹpo wẹ jẹagọdo dọ Jiwheyẹwhe wẹ dá wẹkẹ lọ ya? Bayi zẹẹmẹ.

⁷ To whenue lẹnunnuyọnẹntọ delẹ ko gbeje kunnudenu lẹ pọ́n godo, yé wá kudeji dọ Jiwheyẹwhe wẹ dá wẹkẹ lọ. * Taidi Robert he go mí donù wayi, mẹdelẹ gán lẹn poun dọ Mẹdatọ de ma tin, na yè ma plọn yé gbede to wehọmẹ alavọ tọn dọ nulẹ yin didá wutu. Amọ́, lẹnunnuyọnẹntọ susu ko wá yọ́n Jehovah bosọ yiwanna ẹn. Dile apajlẹ lẹnunnuyọnẹntọ  ehelẹ tọn dohia do, mímẹpo dona wleawuna yise to Jiwheyẹwhe mẹ, mahopọnna obá he mẹ mí sewé jẹ. Mẹdevo depope ma gán wàmọ do otẹn mítọn mẹ.

8, 9. (a) Kanbiọ tẹ ji wẹ mí na dọhodo todin? (b) Nawẹ nupinplọn gando nudida lẹ go gán hẹn ale wá na we gbọn?

⁸ Nawẹ a gán hẹn yise towe to Mẹdatọ lọ mẹ lodo gbọn? Mì gbọ mí ni dọhodo aliho ẹnẹ delẹ ji.

⁹Nọ plọnnu gando nudida lẹ go. A gán wleawuna yise to Mẹdatọ lọ mẹ, eyin a nọ yí sọwhiwhe do pọ́n kanlin lẹ, atin lẹ po sunwhlẹvu lẹ po. (Salm. 19:1; Isa. 40:26) Lehe a to nuplọn gando onú enẹlẹ go sọ, mọ wẹ a na kudeji dogọ dọ Jehovah wẹ Mẹdatọ lọ do niyẹn. Owe mítọn lẹ nọ saba bẹ hosọ he basi zẹẹmẹ do adà voovo nudida tọn lẹ ji hẹn. Ma nọ dapana hosọ enẹlẹ blo, eyin a mọdọ e vẹawu nado mọnukunnujẹ yé mẹ to gigọ́ mẹ. Nọ plọn yé sisosiso jẹ obá he mẹ a penugo jẹ. Podọ, ma wọn nado nọ vọ́ nuhe to nọtẹn Intẹnẹt tọn jw.org ji lẹ pọ́n blo, enẹ wẹ video dagbedagbe he dọhodo nudida lẹ ji bo yin didohia to plidopọ daho agọe tọn lẹ ji.

10. Apajlẹ tẹwẹ dohia dọ nudida lẹ nọ dekunnu gando tintin Mẹdatọ de tọn go? (Lomunu lẹ 1:20)

¹⁰ Whenue a to nuplọn gando nudida lẹ go, nọ na ayidonugo sọwhiwhe tọn nuhe kunnudenu lẹ dohia gando Mẹdatọ mítọn go. (Hia Lomunu lẹ 1:20.) Di apajlẹ, a gán ko yọnẹn dọ gbọnvona dọ owhè nọ na hinhọ́n he nọ hẹn gbẹninọ yọnbayi, adà hinhọ́n etọn tọn delẹ gán sọ gbleawunamẹ. Míwu gbẹtọvi lẹ dona yin hihọ́-basina sọn hinhọ́n mọnkọ lẹ si. Podọ, nue nọ jọ niyẹn! Gbọnna? Aigba he yin owhé mítọn tindo whèhẹ etọn titi, enẹ wẹ ozi de he lẹdo e bo nọ glọnalina hinhọ́n owhè tọn he nọ gbleawunamẹ lẹ. Dile hinhọ́n owhè tọn he nọ gbleawunamẹ lọ lẹ to sinsinyẹn deji, mọ wẹ whèhẹ ehe nọ to titli dogọ do niyẹn. Din, be a ma kọngbedopọ dọ mẹde janwẹ dona ko to godona onú ehelẹ, podọ dọ ewọ dona yin Mẹdatọ owanyinọ de he tindo nuyọnẹn ya?

11. Fitẹ wẹ a gán mọ kunnudenu he hẹn yise mẹtọn lodo gando nudida lẹ go te? (Pọ́n apotin lọ “ Azọ́nwanu Delẹ He Gán Hẹn Yise Mẹtọn Lodo.”)

¹¹ A gán mọ kunnudenu susu he nọ hẹn yise mẹtọn lodo gando nudida lẹ go, eyin a pọ́n Index des publications Watch Tower mẹ, podọ eyin a bayi dodinnanu to jw.org ji. A gán jlo nado bẹjẹeji po hosọ debọdo-dego lọ lẹ “Be E Yin Didá Wẹ Ya” po gọna video yetọn lẹ. Hosọ po video ehelẹ po ma dite, podọ yé bẹ nudọnamẹ jiawu delẹ hẹn gando kanlin lẹ po nudida devo lẹ po go. Yé sọ bẹ apajlẹ lehe lẹnunnuyọnẹntọ lẹ ko pọ́n do nudida lẹ go nado wleawuna nudelẹ do tọn hẹn.

12. Etẹlẹ wẹ mí dona nọ na ayidonugo whenue mí to Biblu plọn?

¹²Nọ plọn Biblu. Weyọnẹntọ he go mí donù wayi ma kẹalọyi to tintan whenu dọ Mẹdatọ de tin. Amọ́, e wá yise dile ojlẹ to yìyì. E dọmọ: “E ma yin nue n’plọn to lẹnunnuyọnẹn mẹ kẹdẹ ji wẹ yise ṣie sinai do gba. E sọ sinai do Biblu pinplọn po sọwhiwhe po ji ga.” Vlavo a ko tindo oyọnẹn he pegan gando nuplọnmẹ Biblu tọn lẹ go. Etomọṣo, nado hẹn yise towe to Mẹdatọ lọ mẹ lodo, a dona zindonukọn nado to Ohó Jiwheyẹwhe tọn plọn. (Jọṣ. 1:8; Salm. 119:97) Nọ doayi zẹẹmẹ gigọ́ he Biblu nọ bayi gando nujijọ whenuho tọn go lẹ go. Nọ na ayidonugo lehe dọdai etọn lẹ mọ hẹndi do, gọna lehe nuhe Biblu-kantọ lẹ kàn lẹ sọgbe hẹ yede do. Mọwiwà gán zọ́n bọ a na hẹn yise towe lodo dọ Mẹdatọ owanyinọ he tindo nuyọnẹn de wẹ dá mí, podọ dọ ewọ  wẹ dowatọ Biblu tọn. *—2 Tim. 3:14; 2 Pita 1:21.

13. Na apajlẹ nuyọnẹn he tin to Ohó Jiwheyẹwhe tọn mẹ de tọn.

¹³ Whenue a to Ohó Jiwheyẹwhe tọn hia, nọ doayi lehe ayinamẹ etọn lẹ yọ́n-na-yizan do sọ go. Di apajlẹ, sọn ojlẹ dindẹn lẹ die wẹ Biblu ko na avase dọ wanyina akuẹ nọ hẹn awugble po “awufiẹsa susu” po wá. (1 Tim. 6:9, 10; Howh. 28:20; Mat. 6:24) Be avase enẹ gbẹ́ yin nugbo to egbehe ya? Owe de dọmọ: “To paa mẹ, mẹhe yiwanna adọkunnu lẹ ma nọ do ayajẹ sọmọ, podọ yé nọ saba jẹflumẹ sinsinyẹn. Etlẹ yin mẹhe to linlẹn poun nado jẹ adọkun lẹ nọ tindo nuhahun apọ̀nmẹ tọn, gọna nuhahun agbasalilo tọn susu.” (The Narcissism Epidemic) Enẹwutu, lehe avase Biblu tọn lọ ma nado yiwanna akuẹ yin alenu do sọ! Be a gán lẹnnupọndo nunọwhinnusẹ́n Biblu tọn devo lẹ he nọ hẹn ale wá lẹ ji ya? Lehe mí to pinpẹn ayinamẹ Biblu tọn lẹ tọn yọnẹn sọ, mọ wẹ mí nọ dejido nuyọnẹn mayọnjlẹ Mẹdatọ owanyinọ mítọn tọn go dogọ do niyẹn. (Jak. 1:5) Taidi kọdetọn de, mí nọ tindo ayajẹ dogọ to gbẹ̀mẹ.—Isa. 48:17, 18.

14. Etẹwẹ Biblu pinplọn na dehia we gando Jehovah go?

¹⁴Nọ plọnnu po yanwle he sọgbe lọ po, enẹ wẹ nado yọ́n Jehovah dogọ. (Joh. 17:3) Dile a to Owe-wiwe lẹ plọn, a na doayi jẹhẹnu Jehovah tọn lẹ go, enẹ wẹ dehe sọ nọ sọawuhia to nudida lẹ mẹ. Nupinplọn gando jẹhẹnu ehelẹ go nọ hẹn mí kudeji dọ Jehovah tin nugbonugbo. (Eks. 34:6, 7; Salm. 145:8, 9) Dile a to Jehovah yọnẹn dogọ, yise towe to ewọ mẹ na jideji, owanyi he a tindo na ẹn na siso dogọ, podọ haṣinṣan towe hẹ ẹ nasọ lodo dogọ.

15. Nawẹ a na mọaleyi gbọn eyin a nọ má nuhewutu a do yise dọ Jiwheyẹwhe tin lẹ hẹ mẹdevo lẹ?

¹⁵Nọ má nuhewutu a do yise dọ Jiwheyẹwhe tin lẹ hẹ mẹdevo lẹ. Dile a to mọwà, yise towe na lodo dogọ. Amọ́ etẹwẹ lo, eyin mẹhe a dekunnuna de kanhose we gando tintin Jiwheyẹwhe tọn go, bọ a ma yọ́n nuhe a na gblọn? Tẹnpọn bo dín gblọndo he sinai do Owe-wiwe ji de na kanbiọ lọ to owe mítọn de mẹ, podọ enẹgodo, má ẹn hẹ mẹlọ. (1 Pita 3:15) A gán sọ biọ alọgọ Kunnudetọ hatọ numimọnọ de tọn. Vlavo mẹlọ kẹalọyi gblọndo he wá sọn Biblu mẹ wẹo kavi lala, dodinnanu he a bayi lẹ na hẹn ale wá na we. Yise towe na lodo dogọ. Taidi kọdetọn de, a ma na yí mẹhe e taidi dọ yé yin nuyọnẹntọ kavi wesetọ bo nọ dọ dọ Mẹdatọ de ma tin lẹ sè.

16. Etẹwẹ gán jọ eyin mí ma zindonukọn nado to yise mítọn hẹn lodo?

¹⁶ Mahopọnna whenue gbọ́n mí ko to Jehovah sẹ̀n, mí dona zindonukọn nado to awuwlena yise he lodo de to ewọ mẹ bosọ hẹn e go. Etẹwutu? Na eyin mí ma tin to aṣeji, yise mítọn gán miọn. Ma wọn blo dọ yise nọ bẹ kunnudenu onú tangan he ma yin mimọ lẹ tọn hẹn. Po awubibọ po, mí sọgan wọnji nuhe mí ma gán mọ de go. Abajọ Paulu do ylọ yise matindo dọ “ylando he nọ bẹpla mí po awubibọ po lọ.” (Heb. 12:1) Eyin mọ wẹ, nawẹ mí gán dapana omọ̀ enẹ gbọn?—2 Tẹs. 1:3.

17. Etẹwẹ gán gọalọna mí nado hẹn yise he lodo de go?

¹⁷ Jẹnukọn whẹ́, nọ vẹ̀ Jehovah whẹwhẹ dọ ni na we gbigbọ wiwe etọn. Etẹwutu? Na yise yin adà sinsẹ́n gbigbọ tọn de wutu. (Gal. 5:22, 23) Mí ma gán wleawuna yise to Mẹdatọ mítọn mẹ bosọ hẹn e go, eyin alọgọ gbigbọ wiwe etọn tọn dẹ́n. Eyin mí zindonukọn nado to gbigbọ Jehovah tọn biọ, ewọ ma na tẹ̀ ẹ mí. (Luku 11:13) Na taun tọn, mí gán nọ  hodẹ̀ dọmọ: “Do yise yise ji na mí.”—Luku 17:5.

18. Sọgbe hẹ Salmu lẹ 1:2, 3, lẹblanulọkẹyi tẹ sin vivi wẹ mí gán dù?

¹⁸ Humọ, nọ plọn Ohó Jiwheyẹwhe tọn to gbesisọ mẹ. (Hia Salmu lẹ 1:2, 3.) Whenue salmu ehe yin kinkan, vude poun to Islaelivi lẹ mẹ wẹ tindo vọkan Osẹ́n Jiwheyẹwhe tọn blebu. Etomọṣo, vọkan delẹ tin he ahọlu po yẹwhenọ lẹ po gán yizan, podọ to owhe ṣinawe lẹpo mẹ, tito nọ yin bibayi na Osẹ́n Jiwheyẹwhe tọn nido yin hihia na “sunnu lẹ, yọnnu lẹ, ovi lẹ” po mẹhe to jonọ-gbéji to Islaeli lẹ po. (Deut. 31:10-12) To azán Jesu tọn gbè, omẹ vude poun si wẹ yè nọ mọ vọkan owe-hihá lẹ tọn te, podọ suhugan yetọn nọ yin mimọ to sinagọgu lẹ mẹ. Amọ́ to egbehe, suhugan mẹlẹ tọn wẹ gán hia apadewhe Biblu tọn kavi Biblu blebu. Lẹblanulọkẹyi daho de wẹ enẹ yin. Nawẹ mí gán dohia dọ mí yọ́n pinpẹn lẹblanulọkẹyi enẹ tọn gbọn?

19. Etẹwẹ mí dona wà nado hẹn yise he lodo de go?

¹⁹ Mí gán dohia dọ mí yọ́n pinpẹn lẹblanulọkẹyi lọ nado tindo Ohó Jiwheyẹwhe tọn, eyin mí nọ hia ẹ to gbesisọ mẹ. Mí ma dona nọ bayi oplọn mẹdetiti tọn gbọn kosọ dali, enẹ wẹ to whenue mí vò. Mí gán hẹn yise he lodo de go, eyin mí tindo aṣa lọ nado nọ plọnnu to gbesisọ mẹ.

20. Etẹwẹ mí dona magbe nado wà?

²⁰ To vogbingbọn mẹ na “nuyọnẹntọ lẹ po weyọnẹntọ” aihọn ehe tọn lẹ po, mí tindo yise dolido de he sinai do Ohó Jiwheyẹwhe tọn ji. (Mat. 11:25, 26) Biblu pinplọn nọ zọ́n bọ mí nọ yọ́n nuhewutu ninọmẹ nulẹ tọn do fọ́n bo to yinylan deji to aigba ji, gọna nuhe Jehovah na wà gandego to madẹnmẹ. Enẹwutu, mì gbọ mí ni magbe nado hẹn yise mítọn lodo bo gọalọna mẹsusu dile e gán yọnbayi do nado tindo yise to Mẹdatọ mítọn mẹ. (1 Tim. 2:3, 4) Podọ mì gbọ mí ni to nukọnpọnhlan ojlẹ he mẹ mẹhe to aigba ji lẹpo na vọ́ hogbe he to Osọhia 4:11 mẹ lẹ dọ dọmọ: “Jehovah Jiwheyẹwhe mítọn, hiẹ wẹ jẹ nado mọ gigo . . . na hiẹ wẹ dá nulẹpo.”