HOSỌ OPLỌN TỌN 33
Nukun Jehovah Tọn Tin to Omẹ Etọn lẹ Ji
“Nukun Jehovah tọn tin to mẹhe nọ dibusi i lẹ ji.”—SALM. 33:18.
OHÀN 4 “Jehovah Wẹ Lẹngbọhọtọ Ṣie”
BLADOPỌ *
1. Naegbọn Jesu do biọ dọ Jehovah ni họ́ hodotọ emitọn lẹ?
TO OZÁN he jẹnukọnna okú etọn mẹ, Jesu biọ onú vonọtaun de Otọ́ olọn mẹ tọn etọn. E biọ Jehovah nado basi hihọ́na hodotọ emitọn lẹ. (Joh. 17:15, 20) Na nugbo tọn, nukun Jehovah tọn nọ to omẹ etọn lẹ ji to whelẹponu, enẹ wẹ yindọ ewọ nọ penukundo yé go bosọ nọ basi hihọ́na yé. Amọ́, Jesu yọnẹn dọ hodotọ emitọn lẹ na pehẹ nukundiọsọmẹ he nkọ yé ma ko pehẹ pọ́n lẹ sọn Satani dè. Jesu sọ yọnẹn dọ yé na do hudo alọgọ Jehovah tọn nado nọavùnte sọta mẹgbeyinyan ylankan Lẹgba tọn lẹ.
2. Sọgbe hẹ Salmu lẹ 33:18-20, naegbọn mí ma dona dibuna nuhahun lẹ?
2 To egbehe, titonu Satani tọn nọ gbidikọna Klistiani nugbo lẹ to aliho sinsinyẹn mẹ. Mí nọ pehẹ ninọmẹ sinsinyẹn he gán hẹn mí gbọjọ bo tlẹ whlé nugbonọ-yinyin mítọn na Jehovah pọ́n lẹ. Amọ́ dile mí na mọdo to hosọ ehe mẹ, mí ma dona dibuna nudepope. Nukun Jehovah tọn to mí ji, to hogbe devo mẹ, ewọ nọ mọ nuhahun he mí to pipehẹ lẹ, podọ ewọ ko wleawufo hugan gbede pọ́n nado gọalọna mí na mí nido duto yé ji. Mì gbọ mí ni gbadopọnna apajlẹ Biblu tọn awe he do lehe “nukun Jehovah tọn tin to mẹhe nọ dibusi i lẹ ji” do hia.—Hia Salmu lẹ 33:18-20.
WHENUE MÍ DO NUMỌTOLANMẸ ṢOKẸDẸNINỌ TỌN
3. Whetẹnu lẹ wẹ mí gán do numọtolanmẹ ṣokẹdẹninọ tọn?
3 Dile etlẹ yindọ mí tin to whẹndo daho sinsẹ̀n-basitọ Jehovah tọn lẹ tọn de mẹ, mí gán nọ do numọtolanmẹ ṣokẹdẹninọ tọn to ojlẹ delẹ mẹ. Di apajlẹ, jọja lẹ gán nọ mọ yede to ṣokẹdẹ to whenue yé to zẹẹmẹ nuyise yetọn lẹ tọn basi to klasigbẹ́ yetọn lẹ nukọn kavi to whenue yé sẹtẹn yì agun yọyọ de mẹ. Delẹ to mí mẹ gán nọ do numọtolanmẹ awubla tọn kavi gán nọ diahi hẹ numọtolanmẹ agọ̀ lẹ, bo nọ lẹndọ mí dona doakọnna numọtolanmẹ ehelẹ míde ṣo. Mí gán nọ whleawu nado dọhona mẹdevo lẹ gando numọtolanmẹ mítọn lẹ go, na mí to nuhà dọ yé gán nọma mọnukunnujẹ yé mẹ wutu. Podọ to whedelẹnu, mí tlẹ gán nọ kanse míde eyin mẹde to mítọn dọ nugbonugbo. Mahopọnna nudepope he hẹn numọtolanmẹ ṣokẹdẹninọ tọn wá, e gán hẹn mí vọgán kavi zọ́n bọ mí na tindo ayimajai. Jehovah ma nọ jlo gbede dọ mí ni do numọtolanmẹ mọnkọ lẹ. Naegbọn mí gán dọ mọ?
4. Naegbọn yẹwhegán Elija do dọ dọ: “E wá pò yẹn ṣo”?
4 Lẹnnupọndo apajlẹ dawe nugbonọ lọ Elija tọn ji. E ko yì azán 40 linlán he e to hinhọ̀n nado whlẹn ogbẹ̀ ede tọn, na Jezebẹli ko whlé nado hù i wutu. (1 Ahọ. 19:1-9) To godo mẹ, to whenue e wá to edeṣo to oslò de mẹ, e dọna Jehovah dọmọ: ‘Yẹn ṣo wẹ yẹwhegán he pò.’ (1 Ahọ. 19:10) Yẹwhegán devo lẹ pò to otò lọ mẹ; Obadia ko kàn ayiha nado whlẹn yẹwhegán 100 sọn alọ Jezebẹli he to jijlo vẹkuvẹku nado hù yé tọn mẹ. (1 Ahọ. 18:7, 13) To whelọnu lo, naegbọn Elija do dó numọtolanmẹ ṣokẹdẹninọ tọn sọmọ? Be e lẹndọ yẹwhegán he Obadia whlẹn lẹpo ko kú todin wẹ ya? Be vlavo e mọ ede to ṣokẹdẹ na mẹdevo ma wá gọna ẹn nado sẹ̀n Jehovah whenue ewọ do ede hia taidi Jiwheyẹwhe nugbo lọ to Osó Kalmẹli kọ̀n godo wutu wẹ ya? Be vlavo e lẹndọ mẹdepope ma yọ́n obá he mẹ owù he mẹ e te sinyẹn jẹ wẹ ya, kavi na e mọdọ mẹdepope ma tlẹ to emitọn dọ wutu? Kandai lọ ma basi zẹẹmẹ numọtolanmẹ Elija tọn lẹ tọn to gigọ́ mẹ. Amọ́, nuhe mí yọnẹn hezeheze wẹ yindọ Jehovah mọnukunnujẹ nuhewutu Elija do mọ ede to ṣokẹdẹ mẹ, podọ Ewọ sọ yọ́n lehe e na gọalọna ẹn do na taun tọn.
Whenue mí tindo numọtolanmẹ ṣokẹdẹninọ tọn, homẹmiọnnamẹnu tẹwẹ mí gán plọn sọn aliho he mẹ Jehovah gọalọna Elija te mẹ? (Pọ́n hukan 5, 6tọ)
5. Nawẹ Jehovah hẹn Elija deji gbọn dọ e ma to ṣokẹdẹ?
5 Jehovah gọalọna Elija to aliho susu lẹ mẹ. E na tuli Elija nado dọho. Whla awe wẹ E kanse Elija dọmọ: “Etẹ wà wẹ a te tofi?” (1 Ahọ. 19:9, 13) To kanbiọ dopodopo godo, Jehovah dotoai dile Elija to nuhe to ahun ji na ẹn lẹ dọ. Jehovah gblọnna Elija bo dohia ẹ dọ emi tin po e po, podọ dọ Emi tindo huhlọn he sẹhundaga. E sọ hẹn Elija deji dọ ewọ gbẹ́ tindo sinsẹ̀n-basitọ hatọ susu devo lẹ. (1 Ahọ. 19:11, 12, 18) Matin ayihaawe, agbọ́ Elija tọn na ko jẹdò to whenue e dọ nuhe to ahun ji na ẹn lẹ na Jehovah bosọ dotoaina gblọndo Etọn godo. Jehovah de azọ́n titengbe susu lẹ na Elija. E biọ to e si nado yiamisisadode Hazaẹli taidi ahọlu do Silia ji, Jehu taidi ahọlu do Islaeli ji, podọ Eliṣa taidi yẹwhegán. (1 Ahọ. 19:15, 16) Gbọn azọ́ndenamẹ enẹlẹ didena Elija dali, Jehovah gọalọna ẹn nado ze ayiha do onú dagbe lẹ ji. Jehovah sọ na ẹn họntọn vivẹ́ de, enẹ wẹ Eliṣa. Nawẹ a gán mọ alọgọ Jehovah tọn yí gbọn whenue a mọ dewe to ṣokẹdẹ?
6. Etẹlẹ go wẹ a gán nọ hodẹ̀ gando to whenue a mọ dewe to ṣokẹdẹ? (Salmu lẹ 62:8)
6 Jehovah biọ to asi we nado nọ hodẹ̀ hlan emi. E nọ mọ nuhe pehẹ a te lẹ, podọ e nọ hẹn we deji dọ emi na dotoaina odẹ̀ towe lẹ to whepoponu. (1 Tẹs. 5:17) Homẹ etọn nọ hùn nado dotoaina sinsẹ̀n-basitọ etọn lẹ. (Howh. 15:8) Etẹlẹ go wẹ a gán nọ hodẹ̀ gando whenue a mọ dewe to ṣokẹdẹ? Nọ dọ nuhe to ahun ji na we lẹ na Jehovah dile Elija wà do. (Hia Salmu lẹ 62:8.) Nọ dọ ahunmẹdunamẹnu towe lẹ po lehe yé nọ yinuwado ji we do po na ẹn. Nọ biọ Jehovah dọ ni gọalọna we nado doakọnna numọtolanmẹ towe lẹ. Di apajlẹ, eyin a mọ dewe to ṣokẹdẹ bọ ahun towe gbàdo whenue a to kunnude to wehọmẹ, biọ Jehovah dọ ni gọalọna we nado tindo adọgbigbo he a do hudo etọn nado dọho. A tlẹ gán biọ ẹ dọ ni na we nuyọnẹn nado basi zẹẹmẹ nuyise towe lẹ tọn po zinzin po. (Luku 21:14, 15) Eyin a to ahidi hẹ numọtolanmẹ agọ̀ lẹ, biọ Jehovah dọ ni gọalọna we nado dọho hẹ Klistiani he whèwhín de gandego. A gán biọ Jehovah dọ ni gọalọna mẹhe a jlo na dọhona lọ nado dotoaina we po sọwhiwhe po. Eyin a nọ dọ nuhe to ahun ji na we lẹpo na Jehovah, bo nọ doayi lehe e nọ na gblọndo odẹ̀ towe lẹ tọn do go bosọ nọ kẹalọyi alọgọ mẹdevo lẹ tọn, numọtolanmẹ ṣokẹdẹninọ tọn towe na depò.
Be a nọ dín aliho lẹ nado gbloada na lizọnyizọn towe bosọ tindo mahẹ to e mẹ to pọmẹ hẹ mẹdevo lẹ ya? (Pọ́n hukan 7tọ)
7. Etẹwẹ a plọn sọn apajlẹ Mauricio tọn mẹ?
7 Jehovah ko de azọ́n dagbe de na mímẹpo nado wà. A gán deji dọ e nọ doayi nuhe a nọ wà nado penukundo azọ́ndenamẹ towe lẹ go to agun mẹ, podọ to lizọnyizọn lọ mẹ lẹpo go bosọ nọ yọ́n pinpẹn yetọn. (Salm. 110:3) Nawẹ alọnu towe hinhẹn ján to azọ́n ehe mẹ na gọalọna we gbọn to whenue a mọ dewe to ṣokẹdẹ? Pọ́n apajlẹ mẹmẹsunnu jọja de tọn he nọ yin Mauricio. * Ojlẹ vude to baptẹm etọn godo, dopo to họntọn alọmayiemẹ etọn lẹ mẹ jẹ nugbo lọ jodo ji vudevude. Mauricio dọmọ: “Whenue n’mọ bọ e jẹ dindanbu ji, enẹ yinuwado jidide ṣie ji. N’nọ kanse dee eyin n’gán yin nugbonọ na klandowiwe ṣie bo gbọṣi whẹndo Jehovah tọn mẹ zọnmii. N’mọ dee to ṣokẹdẹ bosọ lẹndọ mẹdepope ma gán mọnukunnujẹ numọtolanmẹ ṣie lẹ mẹ.” Etẹwẹ gọalọna Mauricio? E dọmọ: “N’gbloada na lizọnyizọn ṣie. Enẹ gọalọna mi ma nado ze ayiha do dee ji, podọ ma nado joawuna numọtolanmẹ agọ̀ ṣie lẹ. Azọ́nwiwa dopọ hẹ mẹdevo lẹ to lizọnyizọn lọ mẹ na mi ayajẹ bosọ de numọtolanmẹ ṣokẹdẹninọ tọn ṣie pò.” Na nugbo tọn, etlẹ yin to ojlẹ he mẹ mí ma gán nọ dọyẹwheho dopọ hẹ yisenọ hatọ mítọn lẹ nukun sọ nukun, mí nọ mọ huhlọn yí whenue mí doalọ to nuwiwa delẹ mẹ dopọ hẹ yé taidi kunnudide gbọn wekanhlanmẹ kavi alokan gblamẹ. Nudevo tẹwẹ sọ gọalọna Mauricio? E yidogọ dọmọ: “N’sọ hẹn alọnu ṣie ján to azọ́n susu devo lẹ mẹ to agun ṣie mẹ. N’nọ wà nuhe go n’pé lẹpo nado wleawuna azọ́ndenamẹ wehọmẹvi tọn ṣie lẹ bosọ nọ ze yé donukọnnamẹ to opli lẹ ji. Azọ́ndenamẹ enẹlẹ zọ́n bọ n’mọdọ n’họakuẹ na Jehovah po mẹdevo lẹ po.”
WHENUE WHLEPỌN SINSINYẸN LẸ HÚAGBỌ́ MÍ
8. Nawẹ whlepọn sinsinyẹn lẹ gán yinuwado mí ji gbọn?
8 To azán godo tọn ehelẹ mẹ, mí nọ donukun dọ mí na pehẹ whlepọn lẹ. (2 Tim. 3:1) Etomọṣo, ojlẹ he mẹ whlepọn lẹ wá mí ji te kavi whlepọn wunmẹ he yé yin gán gbàhundona mí. Mí gán pehẹ nuhahun akuẹzinzan tọn to ajiji mẹ, yè gán mọ azọ̀n sinsinyẹn de na mí, kavi mẹyiwanna mítọn de gán kú. To ojlẹ enẹlẹ mẹ, mí gán jẹflumẹ sinsinyẹn bọ ahun mítọn na gbàdo, titengbe eyin e taidi dọ mí to pipehẹ whlepọn lẹ dobọdo-dego kavi etlẹ yin whlepọn susu to ojlẹ dopolọ mẹ. Amọ́ flindọ Jehovah yọ́n ninọmẹ mítọn, podọ e gán gọalọna mí nado pehẹ whlepọn depope po jidide po.
9. Basi zẹẹmẹ whlepọn he Jobu pehẹ delẹ tọn.
9 Lẹnnupọndo lehe Jehovah gọalọna dawe nugbonọ lọ Jobu do ji. E pehẹ whlepọn he kàn dẹpẹ biọ lẹ to ojlẹ kleun de gblamẹ. To azán dopo gblamẹ, Jobu sè dọ nuylankan he hẹnmẹjọsi delẹ jọ he mẹ e hẹn kanlinpa etọn bu te, bọ devizọnwatọ etọn lẹ kú, podọ dehe tlẹ sọ ylan hugan wẹ yindọ ovi yiwanna etọn lẹ kú. (Jobu 1:13-19) Ojlẹ kleun de to enẹgodo, whenue Jobu gbẹ́ to awubla sinsinyẹn mẹ, e bẹ azọ̀n ylankan de he hẹn agbasa etọn gble bosọ hẹn awufiẹsa sinsinyẹn wá na ẹn. (Jobu 2:7) Ninọmẹ Jobu tọn ylan sọmọ bọ e dawhá dọmọ: “Ogbẹ̀ ṣie hiọawu na mi; n’masọ jlo na nọgbẹ̀ ba.”—Jobu 7:16.
Jehovah dọhona Jobu gando aliho susu he mẹ Ewọ nọ penukundo nudida Etọn lẹ go te go nado hẹn Jobu kudeji dọ emi yiwanna ẹn (Pọ́n hukan 10tọ)
10. Nawẹ Jehovah na Jobu nuhe sin hudo e do nado doakọnna whlepọn etọn lẹ gbọn? (Pọ́n yẹdide he to wepa ji.)
10 Nukun Jehovah tọn lẹ to Jobu ji. Na ewọ yiwanna Jobu wutu, E na ẹn nuhe sin hudo e do nado doakọnna whlepọn etọn lẹ po kọdetọn dagbe po. Jehovah dọhona Jobu bo flinnu in gando nuyọnẹn madodogbó Etọn go gọna aliho he mẹ e nọ yí owanyi do penukundo nudida Etọn lẹ go te. E dọho gando kanlin jiawu susu lẹ go. (Jobu 38:1, 2; 39:9, 13, 19, 27; 40:15; 41:1, 2) Jehovah sọ yí jọja sunnu nugbonọ de he nọ yin Elihu zan nado miọnhomẹna Jobu bosọ hẹn ẹn lodo. Elihu hẹn ẹn deji dọ Jehovah nọ suahọ sinsẹ̀n-basitọ Etọn lẹ to whelẹponu na akọndonanu yetọn wutu. Amọ́, Jehovah sọ whàn Elihu nado na ayinamẹ delẹ Jobu po owanyi po. Elihu gọalọna Jobu ma nado ze ayiha do whlepọn etọn lẹ ji glanglan, bosọ flinnu in gando lehe e whè sọ yijlẹdo Jehovah, yèdọ Didatọ wẹkẹ lọ tọn go. (Jobu 37:14) Jehovah sọ de azọ́n de na Jobu; ewọ dona hodẹ̀ na gbẹdohẹmẹtọ etọn atọ̀n lọ lẹ he waylando. (Jobu 42:8-10) To egbehe, nawẹ Jehovah nọ gọalọna mí gbọn whenue mí pehẹ whlepọn sinsinyẹn lẹ?
11. Nawẹ Biblu nọ miọnhomẹna mí to whlepọn mítọn lẹ whenu gbọn?
11 Jehovah ma nọ dọho hẹ mí tlọlọ dile e wà do to whẹho Jobu tọn mẹ, amọ́ E nọ dọhona mí gbọn Ohó Etọn Biblu gblamẹ. (Lom. 15:4) E nọ miọnhomẹna mí gbọn todido sọgodo tọn he e na mí gblamẹ. Lẹnnupọndo linlẹn Biblu tọn delẹ poun ji he gán miọnhomẹna mí whenue mí pehẹ whlepọn lẹ. To Owe-wiwe lẹ mẹ, Jehovah hẹn mí deji dọ nudepope, etlẹ yin whlepọn sinsinyẹn lẹ “ma na penugo nado klan mí sọn owanyi [emitọn go].” (Lom. 8:38, 39) E sọ hẹn mí deji dọ emi “ma dẹn do mẹhe nọ dawhá ylọ [emi]” to odẹ̀ mẹ lẹpo. (Salm. 145:18) Jehovah dọna mí dọ eyin mí nọ ganjẹ emi go, mí gán doakọnna whlepọn depope bo tlẹ sọ do ayajẹ jẹ obá de mẹ whenue mí to awufiẹsa mẹ. (1 Kọl. 10:13; Jak. 1:2, 12) Ohó Jiwheyẹwhe tọn sọ flinnu mí dọ whlepọn mítọn lẹ yin ojlẹ gli tọn bo ma nasọ nọ aimẹ dẹn, eyin yè yí yé jlẹdo ahọsumẹ ogbẹ̀ madopodo tọn he Jiwheyẹwhe zedonukọnna mí go. (2 Kọl. 4:16-18) Jehovah na mí todido dejidego lọ dọ emi na de mẹhe yin adọ̀ whlepọn mítọn lẹpo tọn lẹ sẹ̀, yèdọ Satani Lẹgba po mẹhe nọ hodo aliho ylankan etọn lẹ po. (Salm. 37:10) Be a ko plọn wefọ homẹmiọnnamẹ tọn delẹ do tamẹ he na gọalọna we nado doakọnna whlepọn he to nukọn ja lẹ ya?
12. Etẹwẹ Jehovah nọ donukun dọ mí ni wà eyin mí na mọaleyi sọn Ohó etọn mẹ to gigọ́ mẹ?
12 Jehovah nọ donukun dọ mí ni nọ de whenu dovo nado nọ plọn Biblu whẹwhẹ, podọ nado nọ lẹnnupọn sisosiso do nuhe mí nọ hia ji. Whenue mí yí nuhe mí plọn lẹ do yizan mẹ, yise mítọn nọ lodo dogọ, podọ mí nọ dọnsẹpọ Otọ́ olọn mẹ tọn mítọn dogọ. Taidi kọdetọn de, mí nọ mọ huhlọn dogọ nado doakọnna whlepọn lẹ. Jehovah sọ nọ na gbigbọ wiwe etọn mẹhe nọ ganjẹ Ohó etọn go lẹ. Podọ, gbigbọ enẹ gán na mí “huhlọn he hú jọwamọ tọn” nado doakọnna whlepọn depope.—2 Kọl. 4:7-10.
13. Nawẹ núdùdù gbigbọmẹ tọn he “afanumẹ nugbonọ podọ nuyọnẹntọ lọ” nọ wleawuna lẹ nọ gọalọna mí nado doakọnna whlepọn lẹ gbọn?
13 Po alọgọ Jehovah tọn po, “afanumẹ nugbonọ podọ nuyọnẹntọ lọ” nọ wleawuna hosọ susu lẹ, video lẹ po nuhiho he gán gọalọna mí nado wleawuna yise he lodo bosọ gbọṣi nukle to gbigbọ-liho lẹ po. (Mat. 24:45) Mí dona nọ yí awuwledainanu he wá do ganmẹ ehelẹ zan to gigọ́ mẹ. To agọe, mẹmẹyọnnu de to États-Unis do pinpẹn-nutọn-yinyọnẹn etọn hia na núdùdù gbigbọmẹ tọn ehe lẹpo. E dọmọ: “To owhe 40 he n’yizan to sinsẹ̀nzọn ṣie na Jehovah lẹ gblamẹ, tenọgligo-hinhẹn ṣie ko yin whiwhlepọn whlasusu.” E pehẹ whlepọn sinsinyẹn lẹ—húnkùntọ he nùahànmú de hù baba-daho etọn, mẹjitọ etọn lẹ bẹ awutu sinsinyẹn de bo kú, podọ ewọ lọsu sọ jẹ kansẹẹ-zọ̀n whla awe. Etẹwẹ gọalọna ẹn nado doakọnnanu? E dọmọ: “Jehovah penukundo go e to whepoponu. Núdùdù gbigbọmẹ tọn he e wleawuna gbọn afanumẹ nugbonọ podọ nuyọnẹntọ lọ gblamẹ lẹ gọalọna mi nado doakọnnanu. Enẹwutu, taidi Jobu n’gán dọmọ: ‘Kaka yẹn nado kú, yẹn ma na jo tenọgli ṣie do!’”—Jobu 27:5.
Nawẹ mí gán yin dona de na mẹdevo lẹ to agun mítọn mẹ gbọn? (Pọ́n hukan 14tọ)
14. Nawẹ Jehovah nọ yí sinsẹ̀n-basitọ hatọ mítọn lẹ zan nado nọgodona mí to whlepọn mítọn lẹ whenu gbọn? (1 Tẹsalonikanu lẹ 4:9)
14 Jehovah ko plọnazọ́n omẹ etọn lẹ nado nọ yiwanna bosọ nọ miọnhomẹna ode awetọ to ojlẹ ayimajai tọn lẹ mẹ. (2 Kọl. 1:3, 4; hia 1 Tẹsalonikanu lẹ 4:9.) Taidi Elihu, mẹmẹsunnu po mẹmẹyọnnu mítọn lẹ po nọ to jejeji nado gọalọna mí na mí nido hẹn nugbonọ-yinyin mítọn go to whenue mí pehẹ nuhahun lẹ. (Owalọ 14:22) Di apajlẹ, lẹnnupọndo lehe hagbẹ agun tọn Diane tọn lẹ na ẹn tuli bosọ gọalọna ẹn nado lodo to gbigbọ-liho to whenue asu etọn jẹazọ̀n sinsinyẹn de godo do ji. E dọmọ: “E ma bọawu paali. Amọ́, mí mọ alọ huhlọnnọ podọ owanyinọ Jehovah tọn to osun he vẹawu enẹlẹ gblamẹ. Agun mítọn wà nususu nado nọgodona mí. Yé nọ dla mí pọ́n, nọ ylọ mí to alokan ji, bosọ nọ gbò mí fán, podọ ehe lẹpo gọalọna mí nado doakọnnanu. Na n’ma nọ kùnhún wutu, mẹmẹsunnu po mẹmẹyọnnu lẹ po nọ hẹn ẹn diun dọ n’yì opli lẹ bosọ tọ́n na lizọnyizọn lọ to whenue n’penugo.” Dona daho de wẹ nado yin apadewhe whẹndo gbigbọmẹ tọn owanyinọ mọnkọ de tọn!
NỌ YỌ́N PINPẸN NUKUNPEDOMẸGO OWANYINỌ JEHOVAH TỌN
15. Naegbọn mí do kudeji dọ mí gán duto whlepọn lẹ ji?
15 Mímẹpo wẹ na pehẹ whlepọn wunmẹ de. Amọ́, dile mí ko mọ do, mí ma na pehẹ whlepọn de míde ṣo pọ́n gbede. Taidi otọ́ owanyinọ de, nukun Jehovah tọn lẹ nọ to mí ji to whepoponu. Ewọ ma dẹn do mí, e to gbesisọ mẹ nado dotoaina obiọ mítọn lẹ na alọgọ bosọ nọ to jejeji nado gọalọna mí. (Isa. 43:2) Mí kudeji dọ mí gán duto nuhahun lẹ ji, na ewọ ko gbọn alọtútlú dali wleawu nuhe sin hudo mí do nado doakọnnanu lẹpo tọn na mí wutu. E ko na mí nunina dẹ̀hiho tọn, Biblu, núdùdù gbigbọmẹ tọn susugege lẹ gọna pipli mẹmẹsunnu tọn owanyinọ de nado gọalọna mí to ojlẹ nuhudo tọn lẹ mẹ.
16. Nawẹ mí gán gbọṣi nukunpedomẹgo owanyinọ Jehovah tọn glọ gbọn?
16 Lehe mí yọ́n pinpẹn etọn do sọ dọ mí tindo Otọ́ olọn mẹ tọn de he sin nukun nọ to mí ji! “Mí nọ jaya to ewọ mẹ.” (Salm. 33:21) Mí gán dohia Jehovah dọ mí yọ́n pinpẹn nukunpedomẹgo owanyinọ etọn tọn eyin mí nọ yí nuhe e wleawu etọn nado gọalọna mí lẹpo zan to gigọ́ mẹ. Mí sọ dona yí adà mítọn wà nado gbọṣi nukunpedomẹgo Jiwheyẹwhe tọn glọ. To hogbe devo mẹ, eyin mí zindonukọn nado nọ wà nuhe go mí pé lẹpo nado nọ setonuna Jehovah bosọ nọ wà nuhe sọgbe to nukun etọn mẹ, nukun etọn na tin to mí ji kakadoi!—1 Pita 3:12.
OHÀN 30 Otọ́ Ṣie, Họntọn Ṣie, Jiwheyẹwhe Ṣie