1. Whlepọn tẹwẹ Josẹfu pehẹ, podọ nawẹ e yinuwa gbọn?

 VISUNNU Jakọbu tọn Josẹfu pehẹ whlepọn sinsinyẹn de. Yọnnu de dọna ẹn dọmọ: “Wá dọ́ dè e.” Asi ogán etọn he nọ yin Pọtifali tọn wẹ. Amọ́, Josẹfu gbẹ́ nuzedonukọnnamẹ etọn dai. To egbehe, mẹde gán kanse dọ, ‘Naegbọn Josẹfu do gbẹ́ mẹtẹnpọn ehe dai?’ Pọtifali ma to whégbè. Humọ, Josẹfu yin afanumẹ de to whédo lọ mẹ; e họnwun dọ yọnnu ehe gán ko hẹn gbẹninọ vẹawuna ẹn na e gbẹ́ obiọ etọn dai wutu. Etomọṣo, Josẹfu zindonukọn nado gbẹ́ nuzedonukọnnamẹ mapote yọnnu lọ tọn lẹ dai. Etẹwutu? E dọmọ: “Nawẹ yẹn sọgan waylan daho ehe do bo gbọnmọ dali waylando do Jiwheyẹwhe?”—Jen. 39:7-12.

2. Nawẹ Josẹfu yọnẹn gbọn dọ ayọdide yin ylando de sọta Jiwheyẹwhe?

² Nawẹ Josẹfu yọnẹn gbọn dọ Jiwheyẹwhe etọn na pọ́n ayọdide hlan taidi ‘oylan daho’ de? Nudi owhe kanweko donu awe godo wẹ Osẹ́n Mose tọn he bẹ gbedide he họnwun ehe hẹn dọ “Hiẹ ma dona deayọ” na wá yin kinkandai. (Eks. 20:14) Amọ́, Josẹfu yọ́n Jehovah sọmọ bọ e mọnukunnujẹ numọtolanmẹ Etọn gando walọ mawé ehe go mẹ. Di apajlẹ, ayihaawe ma tin dọ Josẹfu yọnẹn dọ ojlo Jehovah tọn wẹ yindọ alọwle ni tin to sunnu dopo po yọnnu dopo po ṣẹnṣẹn. Podọ, e na ko sè lehe Jehovah yinuwa do to ninọmẹ voovo awe mẹ nado basi hihọ́na Sala, na yè nikaa de yẹyi sọn e go whenue e to owù zanhẹmẹ gánnugánnu tọn mẹ. Mọdopolọ, Jiwheyẹwhe yinuwa nado basi hihọ́na Lebeka he yin asi Isaki tọn. (Jen. 2:24; 12:14-20; 20:2-7; 26:6-11) Dile Josẹfu to nulẹnpọn do ninọmẹ ehelẹ ji, e doayi nuhe yin dagbe po oylan po go to nukun Jiwheyẹwhe  tọn mẹ. Na Josẹfu yiwanna Jiwheyẹwhe etọn wutu, e sọ yiwanna nujinọtedo dodo tọn etọn lẹ, podọ e magbe nado tẹdo yé go.

3. Etẹwẹ mí na gbadopọnna to nupinplọn ehe mẹ?

³ Be a yiwanna dodowiwa ya? Ayihaawe ma tin dọ mọwẹ. Amọ́, mapenọ wẹ mímẹpo, podọ eyin mí ma tin to aṣeji, pọndohlan aihọn tọn gando dodowiwa go gán yinuwado mí ji po awubibọ po. (Isa. 5:20; Lom. 12:2) Enẹwutu, mí na dọhodo nuhe dodowiwa yin, gọna ale he mí nọ mọyi eyin mí yiwanna ẹn ji. Enẹgodo, mí na gbadopọnna afọdide atọ̀n he na gọalọna mí nado hẹn owanyi mítọn na nujinọtedo Jehovah tọn lẹ siso dogọ.

4. Linlẹn agọ̀ tẹwẹ mẹsusu nọ do gando dodowiwa go?

⁴ Eyin mẹlẹ lẹnnupọndo gbẹtọ dodonọ de ji, ayiha mẹsusu tọn gán yì mẹhe nọ yigo, mẹhe nọ mọhodọdomẹgo, kavi dodonọ-jlatọ de ji. Amọ́, Jiwheyẹwhe ma yiwanna jijọ enẹlẹ paali. Whenue Jesu to aigba ji, e jẹagọdo nukọntọ sinsẹ̀n tọn azán etọn gbè tọn lẹ sinsinyẹn, yèdọ mẹhe ze nujinọtedo dodo tọn yetọn titi dai lẹ. (Yẹwh. 7:16; Luku 16:15) Dodowiwa nujọnu tọn ma yin nudopolọ po dodonọ jijlá po to aliho depope mẹ.

5. Sọgbe hẹ Biblu, etẹwẹ dodowiwa yin? Na apajlẹ delẹ.

⁵ Jẹhẹnu dagbedagbe de wẹ dodowiwa yin. Do glido, e zẹẹmẹdo nado wà nuhe sọgbe to nukun Jehovah Jiwheyẹwhe tọn mẹ. To Biblu mẹ, hogbe he nọ yin yiyizan na “dodowiwa” lẹ nọ bẹ linlẹn gbẹninọ sọgbe hẹ nujinọtedo he yiaga hugan tọn lẹ hẹn, enẹ wẹ nujinọtedo Jehovah tọn lẹ. Di apajlẹ, Jehovah dọ dọ ajọwatọ lẹ dona nọ yí “ojlẹnu he pé” de zan. (Deut. 25:15) Hogbe dowhenu tọn Heblugbe tọn he yin lilẹdo “pé” gán sọ yin lilẹdo “dodo.” Enẹwutu, Klistiani he jlo na wà dodo to nukun Jiwheyẹwhe tọn mẹ de, na yin nugbonọ mlẹnmlẹn to whẹho ajọwiwa tọn etọn lẹpo mẹ. Gbẹtọ dodonọ sọ nọ yiwanna whẹdida dodo, e nọ vẹna ẹn taun whenue e mọ bọ yè to nuyiwa hẹ mẹde to aliho mawadodo tọn mẹ. Podọ, “nado hẹn homẹ [Jehovah tọn] hùn to gigọ́ mẹ,” mẹhe yin dodonọ nugbonugbo de nọ lẹnnupọndo nukun he Ewọ na yí do pọ́n nudide he e nọ basi lẹ ji.—Kol. 1:10.

6. Naegbọn mí gán dejido nujinọtedo dagbe po oylan po tọn Jehovah tọn lẹ go? (Isaia 55:8, 9)

⁶ Biblu dọ gando Jehovah go dọ ewọ wẹ Asisa dodowiwa tọn. Enẹwutu, e yin yiylọdọ “nọtẹn dodowiwa tọn.” (Jel. 50:7) Taidi Mẹdatọ lọ, Jehovah kẹdẹ wẹ mẹlọ he tindo jlọjẹ nado ze nujinọtedo dagbe po oylan po tọn lẹ dai. Na Jehovah yin pipé wutu, pọndohlan etọn gando dagbe po oylan po go yiaga taun na mítọn he ji mape po ylando po nọ saba yinuwado. (Howh. 14:12; hia Isaia 55:8, 9.) Amọ́, na mí yin didá to apajlẹ Jiwheyẹwhe tọn mẹ wutu, mí nọ penugo nado nọgbẹ̀ sọgbe hẹ nujinọtedo dodo tọn etọn lẹ. (Jen. 1:27) Podọ, mí nọ yiwanna nado wàmọ. Owanyi he mí do na Otọ́ mítọn nọ whàn mí nado hodo apajlẹ etọn dile mí penugo do.—Efe. 5:1.

7. Naegbọn mí do hudo nujinọtedo dejidego lẹ tọn? Na apajlẹ.

⁷ Mí nọ mọaleyi eyin mí kẹalọyi nujinọtedo dagbe po oylan po tọn Jehovah tọn lẹ. Be a yọ́n nuhewutu wẹ ya? Yí nukun homẹ tọn do pọ́n nuhe na jọ eyin akuẹṣẹtọ dopodopo wẹ nọ dọ nẹmu he e na ṣẹ́ akuẹ de yin, kavi eyin ajọwatọ dopodopo wẹ nọ basi dide nujlẹnu he e na zan tọn. Kọdetọn lọ lẹ na ylan taun. Podọ, eyin dotozọ́nwatọ lẹ gboawupo nado hodo aliho nukunpedomẹgo tọn tangan lẹ, awutunọ delẹ gán kú. Ayihaawe ma tin dọ nujinọtedo dejidego lẹ yin hihọ́ de. Mọdopolọ, nujinọtedo dagbe po oylan po tọn Jiwheyẹwhe tọn lẹ nọ basi hihọ́na mí.

8. Dona tẹlẹ wẹ to sẹdotẹnmẹ na mẹhe yiwanna nado nọ wà nuhe sọgbe lẹ?

 ⁸ Jehovah nọ dona mẹhe nọ dovivẹnu nado nọgbẹ̀ sọgbe hẹ nujinọtedo etọn lẹ. E dopà dọmọ: “Dodonọ lẹ wẹ na dugu aigba tọn, yé nasọ nọgbẹ̀ to e ji kakadoi.” (Salm. 37:29) Be a gán yí nukun homẹ tọn do pọ́n lehe gbẹtọvi lẹ na to kọndopọ mẹ, to jijọho mẹ, bosọ do ayajẹ do eyin mẹdopodopo nọ hodo nujinọtedo Jehovah tọn lẹ ya? Jehovah jlo dọ a ni duvivi ogbẹ̀ mọnkọ de tọn. Matin ayihaawe, dopodopo mítọn tindo whẹwhinwhẹ́n dagbe lẹ nado yiwanna dodowiwa! Nawẹ mí gán hẹn owanyi mítọn na jẹhẹnu ehe sinyẹn deji gbọn? Mì gbọ mí ni gbadopọnna afọdide atọ̀n delẹ he mí gán ze.

9. Etẹwẹ na gọalọna mí nado yiwanna dodowiwa?

⁹ Afọdide 1: Yiwanna Mẹlọ he ze nujinọtedo lọ lẹ dai. Nado yiwanna dodowiwa, mí dona hẹn owanyi mítọn na Mẹlọ he ze nujinọtedo dagbe po oylan po tọn dai lẹ siso deji. Lehe mí yiwanna Jehovah sọ, mọ wẹ mí na jlo nado nọgbẹ̀ sọgbe hẹ nujinọtedo dodo tọn etọn lẹ do niyẹn. Di apajlẹ: Eyin Adam po Evi po ko yiwanna Jehovah wẹ, yé ma na ko vẹtolina osẹ́n dodo tọn etọn pọ́n gbede.—Jen. 3:1-6, 16-19.

10. Nawẹ Ablaham wá yọ́n Jehovah dogọ gbọn?

¹⁰ E họnwun dọ mí ma jlo na jai jẹ nuṣiwa dopolọ mẹ taidi Adam po Evi po. Mí gán dapana kọdetọn enẹ eyin mí zindonukọn nado nọ plọnnu gando Jehovah go bo nọ yiwanna jẹhẹnu etọn lẹ, bosọ nọ dovivẹnu nado mọnukunnujẹ aliho nulẹnpọn tọn etọn mẹ. Dile mí to mọwà, ayihaawe ma tin dọ owanyi mítọn na Jehovah na sinyẹn deji. Pọ́n apajlẹ Ablaham tọn. E yiwanna Jehovah sisosiso. Etlẹ yin to whenue e mọdọ e vẹawuna emi nado mọnukunnujẹ nudide Jehovah tọn lẹ mẹ, Ablaham ma whèkọdakun. Kakatimọ, e dovivẹnu nado yọ́n Jehovah dogọ. Di apajlẹ, to whenue e sèho gando nudide Jehovah tọn nado và Sodọmi po Gomọla po sudo go, Ablaham dibu to tintan whenu dọ “Whẹdatọ aigba lẹpo tọn” na và dodonọ po mẹylankan po sudo dopọ. To nukun Ablaham tọn mẹ, enẹ taidi nuhe ma sọgan wá linlẹn mẹ gbede, enẹwutu, e yí whiwhẹ do kàn kanbiọ debọdo-dego delẹ sè Jehovah. Jehovah yí homẹfa do na ẹn gblọndo. To godo mẹ, Ablaham wá mọnukunnujẹemẹ dọ Jehovah nọ gbeje ahun gbẹtọvi lẹpo tọn pọ́n, podọ E ma nọ và homẹvọnọ sudo dopọ hẹ ylanwatọ gbede.—Jen. 18:20-32.

11. Nawẹ Ablaham dohia gbọn dọ emi yiwanna Jehovah bosọ nọ dejidego?

¹¹ Hodọdopọ he Jehovah tindo hẹ Ablaham gando tòdaho Sodọmi po Gomọla po tọn lẹ go yinuwadeji sisosiso. Ayihaawe ma tin dọ e wá yiwanna Otọ́ etọn bo tlẹ sọ nọ na ẹn sisi hugan dai tọn. To owhe lẹ godo, jidide Ablaham tọn to Jehovah mẹ yin whiwhlepọn sinsinyẹn. Jehovah biọ to e si nado yí visunnu yiwanna etọn Isaki do sanvọ́ na emi. Amọ́, Ablaham ko wá yọ́n Jiwheyẹwhe etọn dogọ todin, enẹwutu, to ninọmẹ ehe mẹ, e masọ kàn kanbiọ de biọ Ẹ ba. Ablaham wà nuhe Jehovah biọ to e si lọ poun. Etomọṣo, yí nukun homẹ tọn do pọ́n lehe e na ko vẹawuna ẹn sọ dile e to awuwle na azọ́ndenamẹ lọ! Ablaham dona ko lẹnnupọn sisosiso do nuhe e plọn gando Jehovah go lẹ ji. E yọnẹn dọ Jehovah ma na wà nuhe ma sọgbe kavi ma do owanyi hia de gbede. Sọgbe hẹ nuhe apọsteli Paulu dọ, Ablaham mọdọ Jehovah penugo nado fọ́n visunnu vivẹ́ etọn Isaki sọn kú. (Heb. 11:17-19) To popolẹpo mẹ, Jehovah ko dopà dọ Isaki na lẹzun otọ́ akọta de tọn, podọ to ojlẹ enẹ mẹ, Isaki ma ko jivi. Ablaham yiwanna Jehovah, enẹwutu, e deji dọ Otọ́ emitọn na yinuwa po dodowiwa  po. Gbọn yise dali, e setonu mahopọnna lehe e vẹawu sọ.—Jen. 22:1-12.

12. Nawẹ mí gán hodo apajlẹ Ablaham tọn gbọn? (Salmu lẹ 73:28)

¹² Nawẹ mí gán hodo apajlẹ Ablaham tọn gbọn? Taidi ewọ, mí dona zindonukọn nado to nuplọn gando Jehovah go. Dile mí to mọwà, mí na dọnsẹpọ ẹ bo na tlẹ sọ yiwanna ẹn dogọ. (Hia Salmu lẹ 73:28.) Ayihadawhẹnamẹnu mítọn na yin pinplọn nado nọ lẹnnupọn dile Jiwheyẹwhe nọ wà do. (Heb. 5:14) Taidi kọdetọn de, whenue mẹde tẹnpọn nado sisẹ́ mí nado wà nude he ma sọgbe, mí na gbẹ́. Mí na gbẹwanna linlẹn lọ tata nado wà nudepope he na hẹn awufiẹsa wá na Otọ́ mítọn bo na hẹn haṣinṣan mítọn hẹ ewọ gble. Amọ́, nawẹ mí gán sọ dohia gbọn dọ mí yiwanna dodowiwa?

13. Nawẹ mí gán doafọna dodowiwa gbọn? (Howhinwhẹn lẹ 15:9)

¹³ Afọdide 2tọ: Nọ dovivẹnu egbesọegbesọ nado yiwanna dodowiwa. Eyin mí jlo dọ agbasakan mítọn lẹ ni sinyẹn, mí dona nọ dovivẹnu nado daihun lanmẹyiya tọn egbesọegbesọ. Mọdopolọ, e sọ nọ biọ vivẹnudido sinsinyẹn nado yiwanna nujinọtedo dodo Jehovah tọn lẹ. Nude wẹ he a gán nọ basi egbesọegbesọ. Jehovah yin lẹnpọn dagbenọ, podọ e ma nọ donukun gbede dọ mí ni wà nuhe zẹ̀ huhlọn mítọn go. (Salm. 103:14) E hẹn mí deji dọ, Emi “yiwanna mẹhe nọ doafọna dodowiwa.” (Hia Howhinwhẹn lẹ 15:9.) Eyin mí to afọdona yanwle tangan de to sinsẹ̀nzọn Jehovah tọn mẹ, mí nọ zindonukọn nado to vivẹnudo nado jẹ yanwle enẹ kọ̀n. Nudopolọ wẹ gando afọdidona dodowiwa go. Podọ, Jehovah na yí homẹfa do gọalọna mí nado to nukọnyi, bosọ to vọjlado lẹ basi dile ojlẹ to yìyì.—Salm. 84:5, 7.

14. Etẹwẹ yin “tùnudo dodowiwa tọn,” podọ naegbọn mí do dó hudo etọn?

¹⁴ Jehovah gbọn owanyi dali flinnu mí dọ dodowiwa ma yin agbànpẹnmẹnu de. (1 Joh. 5:3) Kakatimọ, hihọ́ de wẹ e yin, yèdọ nude he mí nọ do hudo etọn egbesọegbesọ. Flin gbaja gbigbọmẹ tọn he sin zẹẹmẹ apọsteli Paulu basi lọ. (Efe. 6:14-18) Adà etọn tẹwẹ nọ basi hihọ́na ahun awhànfuntọ lọ tọn? “Tùnudo dodowiwa tọn” wẹ, ehe nọtena nujinọtedo dodo  Jehovah tọn lẹ. Kẹdẹdile tùnudo de nọ basi hihọ́na ahun jọnun de do, nujinọtedo dodo Jehovah tọn lẹ gán basi hihọ́na ahun yẹhiadonu tọn towe, enẹ wẹ gbẹtọ-yinyin homẹ tọn towe. Enẹwutu, nujọnu wẹ e yin nado hẹn ẹn diun dọ gbaja gbigbọmẹ tọn towe bẹ tùnudo dodowiwa tọn hẹn!—Howh. 4:23.

15. Nawẹ a gán ze tùnudo dodowiwa tọn do gbọn?

¹⁵ Nawẹ a gán ze tùnudo dodowiwa tọn do gbọn? A gán wàmọ eyin a nọ dejido nujinọtedo Jiwheyẹwhe tọn lẹ go to nudide he a nọ basi egbesọegbesọ lẹ mẹ. Whenue a to nudide basi gando nuhe ji a na nọ dọhodo, nuhiho he a na dotoaina, ayidedai he a na pọ́n, kavi owe he a na hia lẹ go, jẹnukọn whẹ́, kanse dewe dọ: ‘Etẹwẹ n’to didó do ahun ṣie mẹ? Be Jehovah na kẹalọyi onú mọnkọ ya? Kavi walọ mawé, danuwiwa, nukunkẹn po ṣejannabi po wẹ e nọ ze daga, yèdọ nudelẹ he Jehovah nọ pọnhlan taidi mawadodo?’ (Flp. 4:8) Eyin nudide he a nọ basi lẹ tin to kọndopọ mẹ hẹ ojlo Jehovah tọn, be a to dotẹnmẹ na nujinọtedo dodo etọn lẹ nado basi hihọ́na ahun towe niyẹn.

16, 17. Nawẹ Isaia 48:18 hẹn mí deji dọ mí gán nọgbẹ̀ sọgbe hẹ nujinọtedo dodo Jehovah tọn lẹ kakadoi gbọn?

¹⁶ Be a ko hanú pọ́n eyin a gán zindonukọn nado to gbẹnọ sọgbe hẹ nujinọtedo dodo Jehovah tọn lẹ egbesọegbesọ podọ to owhe lẹ gblamẹ ya? Lẹnnupọndo apajlẹ de he Jehovah yizan to Isaia 48:18 mẹ ji. (Hia.) Jehovah dopà dọ dodowiwa mítọn gán “taidi agbówhẹn ohù tọn lẹ.” Mí ni dọ dọ a ṣite to ohù daho de tó, bo to agbówhẹn etọn lẹ pọ́n dile yé to minmlin mapote, yèdọ debọdo-dego. To ninọmẹ enẹ mẹ, be a na hanú dọ agbówhẹn enẹlẹ na wá doalọte to gbèdopo poun wẹ ya? Lala! A yọnẹn dọ agbówhẹn lọ lẹ ko to gbigbaṣinyọn huto enẹ na owhe susu lẹ, podọ ayihaawe ma tin dọ yé na zindonukọn domọ.

¹⁷ Dodowiwa towe gán yin yiyijlẹdo agbówhẹn ohù tọn lẹ go! Gbọnna? Whenue a jlo na basi nudide de, lẹnnupọndo nuhe Jehovah na jlo dọ a ni wà ji jẹnukọn whẹ́. Enẹgodo, yinuwa sọgbe hẹ ojlo etọn. Mahopọnna lehe nudide lọ gán sinyẹn sọ, Otọ́ owanyinọ towe na to finẹ to whepoponu nado gọalọna we nado nọtegli masẹafọ, podọ nado to gbẹnọ egbesọegbesọ to kọndopọ mẹ hẹ nujinọtedo dodo Etọn lẹ.—Isa. 40:29-31.

18. Naegbọn mí ma dona nọ yí nujinọtedo mítọn titi lẹ do dawhẹna mẹdevo lẹ?

¹⁸ Afọdide 3tọ: Nọ jo whẹdida do alọ Jehovah tọn mẹ. Dile mí to vivẹnudo sinsinyẹn nado nọgbẹ̀ sọgbe hẹ nujinọtedo dodo Jehovah tọn lẹ, mí dona dapana whẹdidana mẹdevo lẹ gọna dodonọ jijlá. Kakati nado nọ yí nukunpẹvi do pọ́n mẹdevo lẹ, taidi dọ mí do jlọjẹ nado dawhẹna yé to dodonu nujinọtedo mítọn titi lẹ tọn ji wẹ nkọ, mí nọ hẹn do ayiha mẹ dọ, Jehovah wẹ yin “Whẹdatọ aigba lẹpo tọn.” (Jen. 18:25) Jehovah ma de azọ́n whẹdida tọn enẹ na mí. Na nugbo tọn, Jesu degbe dọmọ: “Mì sọ dawhẹnamẹ ba blo, na mì nikaa yin whẹdana.”—Mat. 7:1. *

19. Nawẹ Josẹfu dohia gbọn dọ emi nọ dejido whẹdida Jehovah tọn go?

¹⁹ Mì gbọ mí ni lẹnnupọndo apajlẹ dawe dodonọ lọ Josẹfu tọn ji whladopo dogọ. E ma dawhẹna mẹdevo lẹ, etlẹ yin to whenue e yin nuyiwa hẹ po kanyinylan po. Nọvisunnu etọn titi lẹ sayana ẹn bo sà ẹ do kanlinmọgbenu, bosọ hẹn otọ́ yetọn kudeji dọ Josẹfu ko kú. To owhe susu lẹ godo, Josẹfu wá gọ̀ jẹ pọ́ po whẹndo etọn po. Todin he Josẹfu to otẹn aṣẹpipa tọn mẹ to otò lọ mẹ, e gán ko dawhẹna  nọvisunnu etọn lẹ to aliho sinsinyẹn mẹ bosọ jlo nado yiahọsu. Nọvisunnu Josẹfu tọn lẹ dibu dọ ewọ na yinuwa to aliho mọnkọ pẹẹ mẹ, etlẹ yin to whenue yé ko lẹnvọjọ mlẹnmlẹn sọn nuṣiwa yetọn mẹ. Amọ́ Josẹfu hẹn yé deji dọmọ: “Mì dibu blo. Be otẹn Jiwheyẹwhe tọn mẹ wẹ n’tin te ya?” (Jen. 37:18-20, 27, 28, 31-35; 50:15-21) Josẹfu gbọn whiwhẹ dali jo whẹdida do alọ Jehovah tọn mẹ.

20, 21. Nawẹ mí gán dapana dodonọ jijlá gbọn?

²⁰ Taidi Josẹfu, mí nọ jo whẹdida do alọ Jehovah tọn mẹ. Di apajlẹ, mí ma nọ lẹndọ mí yọ́n mẹwhinwhàn he wutu mẹmẹsunnu po mẹmẹyọnnu mítọn lẹ po do yinuwa to aliho de kavi devo mẹ. Mí ma gán mọnú jẹ ahun mẹ; “Jehovah [kẹdẹ] wẹ nọ gbeje mẹwhinwhàn lẹ pọ́n.” (Howh. 16:2) E yiwanna gbẹtọ wunmẹ lẹpo, mahopọnna ninọmẹ kavi aṣa he mẹ yé wá sọn. Podọ, Jehovah dotuhomẹna mí nado nọ “hùn ahun [mítọn] lẹ donuvo.” (2 Kọl. 6:13) Mí nọ dovivẹnu nado yiwanna mẹlẹpo to whẹndo gbigbọmẹ tọn mítọn mẹ bo ma nọ dawhẹna yé.

²¹ Ehe sọ zẹẹmẹdo dọ mí ma dona nọ dawhẹna mẹhe ma yin Klistiani lẹ. (1 Tim. 2:3, 4) Be a ko dawhẹna hẹnnumẹ he ma tindo nuyise dopolọ hẹ we de pọ́n bo dọ dọ, “Dawe ehe ma na kẹalọyi nugbo lọ pọ́n gbede” wẹ ya? Lala, sakla wẹ enẹ na yin, yèdọ dodonọ jijlá. Jehovah gbẹ́ to dotẹnmẹ hundote na “gbẹtọ lẹpo to filẹpo” nado lẹnvọjọ. (Owalọ 17:30) Nọ flin to whelẹponu dọ mawadodo wunmẹ de wẹ dodonọ jijlá yin.

22. Naegbọn a magbe nado yiwanna dodowiwa?

²² Na owanyi mítọn na nujinọtedo dodo Jehovah tọn lẹ ni nọ yidogọna ayajẹ mẹdevo lẹ tọn, bo nọ whàn yé nado dọnsẹpọ míwlẹ po Jiwheyẹwhe mítọn po dogọ. Mì gbọ “huvẹ po nugbla dodowiwa tọn po” ni nọ to mí hù zọnmii. (Mat. 5:6) Nọ deji dọ Jehovah nọ doayi vivẹnudido towe lẹ go, podọ homẹ etọn nọ hùn do nukọnyiyi towe go. Dile aihọn ehe na fọ́n bo to titlọ biọ mawadodo mẹ dogọ, ma dibu blo! Nọ flin to whelẹponu dọ “Jehovah yiwanna dodonọ lẹ.”—Salm. 146:8.