1. Naegbọn a nọ yiwanna mẹhe nọ do homẹfa hia lẹ?

 MÍMẸPO wẹ nọ yiwanna mẹhe nọ do homẹfa hia lẹ. Naegbọn e do yin mọ? Mí nọ na sisi mẹhe gán to nukundo nude amọ́ bo ma ka nọ gblehomẹ lẹ. Mí nọ yọ́n pinpẹn etọn eyin mẹdevo lẹ fahomẹ hẹ mí whenue mí ṣinuwa. Podọ e sọ nọ vivi na mí dọ mẹhe plọn Biblu hẹ mí fahomẹ hẹ mí dile mí to vivẹnudo nado to nuplọn, kẹalọyi nuhe plọn mí te lẹ kavi yí nuplọnmẹ Biblu tọn de do yizan mẹ. Hú popolẹpo, lehe mí nọ gọ́ na pẹdido do sọ dọ Jehovah Jiwheyẹwhe nọ fahomẹ hẹ mí!—Lom. 2:4.

2. Ninọmẹ tẹlẹ mẹ wẹ e gán nọ vẹawuna mí nado nọ fahomẹ te?

² Dile etlẹ yindọ mí nọ yọ́n pinpẹn homẹfa he mẹdevo lẹ nọ dohia tọn, e gán nọ vẹawuna mílọsu lẹ to whedelẹnu nado nọ fahomẹ. Di apajlẹ, e gán vẹawuna mí nado fahomẹ to sẹkli-masẹ de mẹ titengbe eyin mí to whenu gbọ̀. Mí gán gblehomẹ eyin mẹdevo lẹ doadihomẹna mí. Podọ to whedelẹnu, e gán vẹawuna mí nado nọtepọn aihọn yọyọ he Jehovah dopà etọn lọ. Be e na jlo we nado nọ fahomẹ dogọ ya? To hosọ ehe mẹ, mí na gbadopọnna nuhe e zẹẹmẹdo nado nọ fahomẹ, podọ nuhewutu ehe do yin nujọnu sọmọ. Mí nasọ dọhodo nuhe na gọalọna mí nado wleawuna homẹfa dogọ ji.

3. Nawẹ homẹfatọ de nọ yinuwa gbọn whenue yè hẹn homẹgble e?

³ Mì gbọ mí ni gbadopọnna aliho ẹnẹ he mẹ mí gán nọ fahomẹ te. Tintan, homẹfatọ de nọ whleawu nado gblehomẹ. E nọ tẹnpọn nado duto ede ji bo ma nọ yiahọsu whenue mẹdevo lẹ hẹn homẹgble e kavi doadihomẹna ẹn. Hodidọ lọ, “whleawu nado gblehomẹ” sọawuhia to Biblu mẹ whla tintan whenue  Jehovah yin zẹẹmẹ basina taidi “Jiwheyẹwhe lẹblanunọ podọ awuvẹmẹtọ, mẹhe nọ whleawu nado gblehomẹ bosọ gọ́ na owanyi nugbo po nugbo po.”—Eks. 34:6.

4. Nawẹ homẹfatọ de nọ yinuwa gbọn whenue e biọ dọ ni nọte?

⁴ Awetọ, homẹfatọ de gán yí sọwhiwhe do nọte. E nọ tẹnpọn ma nado biọ bẹwlu mẹ kavi jẹ kandù ji whenue nuhe e to nukundo de to dindẹn hugan lehe e lẹn do. (Mat. 18:26, 27) E nọ biọ dọ mí ni yí sọwhiwhe do nọte to ninọmẹ susu lẹ mẹ. Di apajlẹ, mí dona nọ yí homẹfa do dotoaina mẹde whenue e to hodọ bo ma gbòhódonù na ẹn. (Jobu 36:2) Mí gán sọ do hudo homẹfa tọn, whenue mí to alọgọna nuplọntọ de nado mọnukunnujẹ nuplọnmẹ Biblu tọn de mẹ kavi nado duto aṣa ylankan de ji.

5. Aliho devo tẹ mẹ wẹ mí sọgan nọ do homẹfa hia te?

⁵ Atọ̀ntọ, homẹfatọ de ma nọ yinuwa aplà. Na nugbo tọn, e nọ biọ dọ mí ni nọ yawu yinuwa to ninọmẹ delẹ mẹ. Amọ́, eyin homẹfatọ de jlo na wazọ́n titengbe de dotana, e nọ wà dẹẹdẹ bo masọ nọ nọ̀ plaplaji. Kakatimọ, e nọ de whenu he sọgbe hẹ lẹnpọn dagbe dovo nado basi tito nuhe e jlo na wà lẹ tọn. Enẹgodo, e nọ yí whenu he pé zan nado wazọ́n lọ ganji.

6. Nawẹ homẹfatọ de nọ yinuwa gbọn whenue e to pipehẹ whlepọn kavi ninọmẹ sinsinyẹn lẹ?

⁶ Ẹnẹtọ, homẹfatọ de nọ dovivẹnu nado pannukọn whlepọn lẹ matin nuhlundọ. To linlẹn ehe mẹ, homẹfa do kanṣiṣa pẹkipẹki hẹ akọndonanu. Nugbo wẹ dọ nude ma ylan to e mẹ nado dọ homẹ na họntọn vivẹ́ de bosọ dọ numọtolanmẹ mítọn lẹ na ẹn gando whlepọn de go. Etomọṣo, homẹfa na gọalọna mí nado wà nuhe go mí pé lẹpo nado hẹn pọndohlan dagbe de go dile mí to akọndonanu. (Kol. 1:11) Taidi Klistiani lẹ, mí dona nọ do adà homẹfa tọn ehe lẹpo hia. Etẹwutu? Mì gbọ mí ni gbadopọnna whẹwhinwhẹ́n delẹ.

7. Sọgbe hẹ Jakọbu 5:7, 8, naegbọn homẹfa do yin nujọnu sọmọ? (Sọ pọ́n yẹdide lọ.)

⁷ Homẹfa yin nujọnu na whlẹngán mítọn. Taidi devizọnwatọ nugbonọ hohowhenu tọn lẹ, mí dona yí homẹfa do nọtepọn Jiwheyẹwhe nado hẹn opagbe etọn lẹ di. (Heb. 6:11, 12) Biblu yí ninọmẹ mítọn jlẹdo glesi de tọn go. (Hia Jakọbu 5:7, 8.) Glesi de nọ wazọ́n sinsinyẹn nado do jinukun etọn lẹ podọ nado húsinna yé, amọ́ e ma nọ yọ́n ojlẹ tangan he mẹ yé na whẹ́n te. Enẹwutu glesi lọ nọ yí homẹfa do nọte po jide lọ po dọ emi na wá gbẹ̀n jinukun. Mọdopolọ, mí nọ hẹn alọnu mítọn ján to nuwiwa gbigbọmẹ tọn lẹ mẹ, dile etlẹ yindọ mí “ma yọ́n azán he gbè Oklunọ [mítọn] ja.” (Mat. 24:42) Mí nọ yí homẹfa do nọte po jide lọ po dọ Jehovah na de opà etọn lẹpo to ojlẹ sisọ etọn mẹ. Eyin mí hẹn homẹfa mítọn bu, agbọ́ gán jẹ pipé mí ji nado nọte, bọ mí na jẹ dindanbu ji sọn nugbo lọ mẹ. Mí gán sọ jẹ afọdona nuhe mẹ mí na nọ mọ awuvivi tejiteji tọn te lẹ ji. Amọ́ eyin mí nọ fahomẹ, mí gán doakọnna kakajẹ opodo bo na yin whinwhlẹngán.—Mika 7:7; Mat. 24:13.

8. Nawẹ homẹfa nọ gọalọna mí to nuyiwa mítọn hẹ mẹdevo lẹ mẹ gbọn? (Kolosinu lẹ 3:12, 13)

⁸ Homẹfa nọ gọalọna mí whenue mí to nuyiwa hẹ mẹdevo lẹ. E nọ zọ́n bọ mí nọ dotoaina mẹdevo lẹ po sọwhiwhe po whenue yé to hodọ. (Jak. 1:19) Homẹfa sọ nọ yidogọna jijọho. E nọ basi hihọ́na mí ma nado yinuwa aplà, podọ ma nado yí hogbe he ma jọmẹ lẹ zan whenue mí gblehomẹ. Podọ eyin mí nọ fahomẹ, mí na nọ whleawu nado gblehomẹ whenue mẹde dọho de he gbleawuna mí. Kakati nado yiahọsu, mí na “nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii.”—Hia Kolosinu lẹ 3:12, 13.

9. Nawẹ homẹfa nọ gọalọna mí whenue mí jlo na basi nudide lẹ gbọn? (Howhinwhẹn lẹ 21:5)

⁹ Homẹfa gán sọ gọalọna mí nado basi nudide dagbe lẹ. Kakati nado nọ zọ̀n plaplaji kavi nọ whlẹndo ji, mí na nọ de whenu dovo nado nọ basi dodinnanu lẹ bo nọ gbeje yọnbasi he tin lẹ pọ́n. (Hia Howhinwhẹn lẹ 21:5.) Di apajlẹ, eyin mí to agbasazọ́n de dín, mí gán yawu kẹalọyi tintan he mí mọ lọ, eyin azọ́n lọ na tlẹ bẹpla sinsẹ̀n-bibasi mítọn na Jehovah. Amọ́ eyin mí nọ fahomẹ, mí na yí whenu zan nado lẹnnupọndo nudelẹ ji taidi, fihe azọ́n lọ te, gànhiho nẹmu he azọ́n lọ na nọ yí to mí si gọna nuyiwadomẹji he e gán tindo do whẹndo po gbigbọnọ-yinyin mítọn po ji. Homẹfa na gọalọna mí ma nado basi nudide ylankan.

10. Nawẹ Klistiani de sọgan wleawuna homẹfa bosọ hẹn e go gbọn?

¹⁰ Nọ hodẹ̀ nado wleawuna homẹfa dogọ. Homẹfa yin adà sinsẹ́n gbigbọ tọn de. (Gal. 5:22, 23) Enẹwutu, mí gán biọ gbigbọ wiwe to odẹ̀ mẹ bosọ biọ dọ Jehovah ni gọalọna mí nado wleawuna sinsẹ́n gbigbọ lọ tọn. Eyin mí pehẹ ninọmẹ de he tẹ́n homẹfa mítọn pọ́n, mí nọ “to bibiọ zọnmii” dọ gbigbọ wiwe ni gọalọna mí nado fahomẹ. (Luku 11:9, 13) Mí gán sọ biọ dọ Jehovah ni gọalọna mí nado nọ pọ́n whẹho lẹ hlan dile ewọ nọ wà do. To odẹ̀ lọ godo, mí dona wà nuhe go mí pé nado nọ do homẹfa hia to azán dopodopo ji. Lehe mí to dẹ̀ho nado nọ fahomẹ bosọ to vivẹnudo nado wleawuna homẹfa sọ, mọ wẹ jẹhẹnu ehe na doadọ̀do to ahun mítọn mẹ bo nasọ lẹzun apadewhe gbẹtọ-yinyin mítọn tọn do niyẹn.

11, 12. Nawẹ Jehovah ko do homẹfa hia gbọn?

¹¹ Nọ lẹnayihamẹpọn do apajlẹ Biblu tọn lẹ ji.  Biblu bẹ apajlẹ mẹhe fahomẹ lẹ tọn susu hẹn. Eyin mí nọ lẹnayihamẹpọn do kandai enẹlẹ ji, mí gán plọn aliho voovo he mẹ mí gán nọ do homẹfa hia te lẹ. Whẹpo mí nido gbadopọnna delẹ to apajlẹ enẹlẹ mẹ, mì gbọ mí ni dọhodo mẹhe ze apajlẹ ayidego tọn dai na mí na nuhe dù homẹfa didohia ji, yèdọ Jehovah.

¹² To jipa Edẹni tọn mẹ, Satani kọnmasin do yinkọ Jehovah tọn go bosọ fọ́n ayihaawe dote na Evi dọ Jehovah ma yin Gandutọ dodonọ podọ owanyinọ de. Kakati nado và mẹhẹngbletọ lọ sudo to afọdopolọji, Jehovah fahomẹ bosọ duto ede ji, na e yọnẹn dọ e na yí whenu susu whẹpo mẹlẹ nido yọnẹn dọ gandudu Etọn wẹ yin dagbe hugan lọ. Podọ dile e to homẹfa, e ko doakọnna masin he yin kinkọndo yinkọ etọn go lẹ. Humọ, Jehovah to homẹfa na mẹsusu dogọ nido do dotẹnmẹ nado mọ ogbẹ̀ madopodo yí. (2 Pita 3:9, 15) Taidi kọdetọn de, gbẹtọ livi susu wẹ ko wá yọ́n ewọ. Eyin mí nọ ze ayiha do ale he homẹfa Jehovah tọn nọ hẹnwa lẹ ji, e sọgan bọawuna mí dogọ nado nọtepọn ojlẹ he mẹ ewọ na hẹn opodo lọ wá te.

13. Nawẹ Jesu hodo apajlẹ homẹfa tọn Otọ́ etọn tọn to pipé mẹ gbọn? (Sọ pọ́n yẹdide lọ.)

¹³ Jesu hodo apajlẹ homẹfa Otọ́ etọn tọn to pipé mẹ, podọ e do jẹhẹnu ehe hia whenue e to aigba ji. E ma na ko nọ bọawuna ẹn to whelẹponu nado fahomẹ, titengbe hẹ wekantọ po Falesi yẹnuwatọ lẹ po. (Joh. 8:25-27) Etomọṣo, Jesu whleawu nado gblehomẹ dile Otọ́ etọn wà do. E ma yiahọsu whenue yè zùn in kavi hẹn homẹgble e. (1 Pita 2:23) Jesu yí homẹfa do doakọnna whlepọn lẹ bo masọ hlunnudọ. Abajọ Biblu do dọna mí nado “nọ yí sọwhiwhe do lẹn mẹhe ko doakọnna hodidọ agọjẹdomẹ tọn mọnkọtọn lẹ he wá sọn ylandonọ lẹ dè tọn pọ́n”! (Heb. 12:2, 3) Po alọgọ  Jehovah tọn po, mílọsu gán yí homẹfa do doakọnna whlepọn depope he mí pehẹ.

14. Etẹwẹ mí gán plọn sọn homẹfa Ablaham tọn mẹ? (Heblu lẹ 6:15) (Sọ pọ́n yẹdide lọ.)

¹⁴ Etẹwẹ lo eyin nukundido mítọn lẹ gando opodo lọ go ma ko mọ hẹndi? Vlavo mí ko to nukundo dọ opodo lọ ni wá sọn ojlẹ dindẹn die. Mí gán dibu dọ mí ma na nọgbẹ̀ dẹn nado mọ whenue opodo lọ na wá. Etẹwẹ na gọalọna mí nado yí homẹfa do to tenọ? Lẹnnupọndo apajlẹ Ablaham tọn ji. Whenue Ablaham do owhe 75 bo ma ko ji ovi de, Jehovah dopà na ẹn dọmọ: “Yẹn nasọ yí we do basi akọta daho de.” (Jen. 12:1-4) Be Ablaham mọ hẹndi opagbe enẹ tọn ya? E ma yin to gigọ́ mẹ. To whenue e ko dasá Tọ̀sisa Euflate bo ko sọ nọte na owhe 25 godo, e mọ bọ visunnu etọn Isaki yin jiji to azọ́njiawu-liho, podọ to owhe 60 devo godo, ovivi etọn Esau po Jakọbu po yin jiji. (Hia Heblu lẹ 6:15.) Amọ́ Ablaham ma mọ gbede dọ kúnkan etọn lẹzun akọta daho de bo dugu Aigba Pagbe tọn lọ tọn. Ṣogan, dawe nugbonọ enẹ duvivi haṣinṣan pẹkipẹki de tọn hẹ Mẹdatọ etọn. (Jak. 2:23) Podọ, whenue Ablaham na yin finfọnsọnku, lehe e na vivi na ẹn do sọ nado yọnẹn dọ yise po homẹfa etọn po hẹn dona lẹ wá na akọta lẹpo! (Jen. 22:18) Etẹwẹ yin nuplọnmẹ lọ? Mílọsu lẹ gán nọma mọ hẹndi opagbe Jehovah tọn lẹpo tọn to afọdopolọji. Amọ́ eyin mí fahomẹ taidi Ablaham, mí gán kudeji dọ Jehovah na suahọ mí todin, podọ etlẹ yin humọ to aihọn yọyọ he e dopà Etọn lọ mẹ.—Malku 10:29, 30.

15. Etẹlẹ wẹ mí gán gbadopọnna to oplọn mẹdetiti tọn mítọn whenu?

¹⁵ Biblu bẹ apajlẹ mẹsusu devo lẹ tọn hẹn he do homẹfa hia. (Jak. 5:10) Naegbọn  a ma na yí i do basi yanwle nado plọnnu gando apajlẹ yetọn lẹ go? b Di dohia, dile etlẹ yindọ Davidi yin yiyiamisisadode to jọja whenu nado yin ahọlu Islaeli tọn to sọgodo, e dona nọte na owhe susu whẹpo do hẹ gánzinpo ji. Simeoni po Anna po sẹ̀n Jehovah po nugbonọ-yinyin po dile yé to tenọpọn Mẹsia dopagbe lọ. (Luku 2:25, 36-38) Dile a to dogbapọnna kandai mọnkọ lẹ, dín gblọndo na kanbiọ he bọdego ehelẹ: Etẹwẹ sọgan ko gọalọna ẹn nado do homẹfa hia? Nawẹ homẹfa etọn hẹn ale wá na ẹn gbọn? Nawẹ n’gán hodo apajlẹ etọn gbọn? Nupinplọn gando apajlẹ mẹhe ma do homẹfa hia lẹ tọn go gán sọ hẹn ale wá na we ga. (1 Sam. 13:8-14) A gán kanse dọ: ‘Naegbọn yé do gboawupo nado do homẹfa hia? Kọdetọn tẹlẹ wẹ enẹ hẹnwa yé ji?’

16. Etẹwẹ yin delẹ to ale he homẹfa nọ hẹnwa lẹ mẹ?

¹⁶ Lẹnnupọndo ale he homẹfa nọ hẹnwa lẹ ji. Eyin mí fahomẹ, mí nọ gọ́ na ayajẹ, podọ ayiha mítọn nọ jai. Gbọnmọ dali, homẹfa nọ yidogọna dagbemẹninọ mítọn to apọ̀nmẹ podọ to agbasa-liho. Eyin mí fahomẹ hẹ mẹdevo lẹ, mí nọ duvivi haṣinṣan pẹkipẹki de tọn hẹ yé. Agun mítọn nọ tin to pọninọ mẹ dogọ. Eyin mẹde do adán nukun na mí, awuwhiwhle mítọn ma nado yawu gblehomẹ gán zọ́n bọ ninọmẹ lọ ma na vantan dogọ. (Salm. 37:8, Odò.; Howh. 14:29) Amọ́ hú popolẹpo, whenue mí fahomẹ, mí nọ hodo apajlẹ Otọ́ olọn mẹ tọn mítọn tọn bo tlẹ sọ nọ dọnsẹpọ ewọ dogọ.

17. Etẹwẹ mí dona magbe nado wà?

¹⁷ Jẹhẹnu he dọnmẹdogo bosọ nọ hẹn ale wá nankọ die homẹfa yin! Dile etlẹ yindọ e gán nọma bọawuna mí to whelẹponu nado nọ fahomẹ, Jehovah gán gọalọna mí nado to awuwlena jẹhẹnu ehe zọnmii. Podọ dile mí yí homẹfa do to tenọpọn aihọn yọyọ lọ, mí gán kudeji dọ “nukun Jehovah tọn tin to mẹhe nọ dibusi i lẹ ji, yèdọ mẹhe nọ nọtepọn owanyi nugbo etọn lẹ.” (Salm. 33:18) Mì gbọ mímẹpo ni magbe nado to homẹfa yí dogo zọnmii.