HOSỌ OPLỌN TỌN 35
OHÀN 123 Litaina Tito Yẹwhehọluduta Tọn
Alọgọ Na Mẹhe Yin Didesẹ sọn Agun mẹ Lẹ
“Ayajẹ na sù humọ to olọn mẹ do ylandonọ dopo he lẹnvọjọ ji hugan do dodonọ 99 he ma tindo nuhudo lẹnvọjọ tọn lẹ ji.”—LUKU 15:7.
NUHE E BẸHẸN
Nuhewutu e nọ biọ dọ mẹdelẹ ni yin didesẹ sọn agun mẹ gọna lehe mẹho lẹ gán gọalọna omẹ mọnkọ lẹ nado lẹnvọjọ bo gọ̀ nukundagbe Jehovah tọn mọyi do.
1, 2. (a) Nukun tẹwẹ Jehovah nọ yí do pọ́n mẹhe nọ desọn ojlo mẹ nado waylando lẹ? (b) Etẹwẹ Jehovah nọ donukun dọ ylanwatọ lẹ ni wà?
JEHOVAH ma yin Jiwheyẹwhe de he nọ joalọdokọjinamẹ; e ma nọ yialọ na ylando. (Salm. 5:4-6) E biọ dọ mí ni nọ na sisi nujinọtedo dodo tọn etọn he e zedai na mí to Ohó etọn mẹ lẹ. Nado dọ hójọhó, Jehovah ma nọ donukun pipé-yinyin sọn gbẹtọvi mapenọ lẹ dè. (Salm. 130:3, 4) To ojlẹ dopolọ mẹ, e ma nọ kẹalọyi ‘omẹ jijọ-madi-Jiwheyẹwhe tọn he nọ diọ nukundagbe majẹhẹ etọn zun whẹjijọ de nado jo yede na walọ gblezọn tasinsinyẹn tọn’ lẹ. (Juda 4) Abajọ, Biblu do dọ dọ “vasudo omẹ jijọ-madi-Jiwheyẹwhe tọn lẹ tọn” na wá aimẹ to awhàn Jiwheyẹwhe tọn he yin Amagẹdọni whenu.—2 Pita 3:7; Osọ. 16:16.
2 Amọ́, Jehovah ma jlo dọ mẹdepope ni yin vivasudo. Dile mí ko dọhodeji do wayi to hosọ debọdo-dego ehelẹ mẹ, Biblu dohia hezeheze dọ e “jlo dọ mẹlẹpo ni wá lẹnvọjọ kọ̀n.” (2 Pita 3:9) Mẹho agun tọn lẹ nọ hodo apajlẹ Jehovah tọn dile yé yí homẹfa do to tintẹnpọn nado gọalọna ylanwatọ lẹ nado diọ aliho yetọn bo gọ̀ nukundagbe Jehovah tọn mọyi. Amọ́, e ma yin ylanwatọ lẹpo wẹ nọ lẹnvọjọ. (Isa. 6:9) Mẹdelẹ nọ zindonukọn to ylanwiwa mẹ mahopọnna vivẹnudido pludopludo mẹho lẹ tọn nado hẹn yé jẹ lẹnvọjọ kọ̀n. Etẹwẹ dona nọ yin wiwà to ninọmẹ mọnkọ mẹ?
“MÌ DE MẸYLANKAN LỌ SẸ̀”
3. (a) Etẹwẹ Biblu dọ e dona yin wiwà na ylanwatọ he ma lẹnvọjọ lẹ? (b) Naegbọn mí gán dọ to linlẹn de mẹ dọ ylanwatọ lọ ko de nado yin didesẹ sọn agun mẹ?
3 Eyin ylanwatọ de ma lẹnvọjọ, mẹho lẹ ma gán wà nudevo de hú nado hodo anademẹ he to 1 Kọlintinu lẹ 5:13 mẹ he dọmọ: “Mì de mẹylankan lọ sẹ̀ sọn ṣẹnṣẹn mìtọn.” To linlẹn de mẹ, ylanwatọ lọ ko de kọdetọn enẹ; nuhe e a do gbẹ̀n wẹ e te. (Gal. 6:7) Naegbọn mí gán dọ mọ? Na e gbẹ́ nado diọ mahopọnna vivẹnudido pludopludo mẹho lẹ tọn nado hẹn ẹn jẹ lẹnvọjọ kọ̀n wutu. (2 Ahọ. 17:12-15) Nuyiwa etọn lẹ dohia dọ e ko de ma nado nọgbẹ̀ sọgbe hẹ nujinọtedo Jehovah tọn lẹ.—Deut. 30:19, 20.
4. Naegbọn nulila de nọ yin bibasi to whenue ylanwatọ he ma lẹnvọjọ de yin didesẹ sọn agun mẹ?
4 To whenue ylanwatọ he ma lẹnvọjọ de yin didesẹ sọn agun mẹ, nulila de nọ yin bibasi nado hẹn zun yinyọnẹn na agun lọ dọ e masọ yin dopo to Kunnudetọ Jehovah tọn lẹ mẹ ba. Yanwle nulila enẹ tọn ma yin nado dowinyan ylanwatọ lọ. Kakatimọ, e nọ yin bibasi na agun lọ nido hodo gbedide Owe-wiwe tọn “ma nado dogbẹ́” hẹ omẹ mọnkọtọn, bo ma “tlẹ dùnú” hẹ ẹ blo. (1 Kọl. 5:9-11) Whẹwhinwhẹ́n dagbe lẹ wutu wẹ anademẹ enẹ do yin nina. Apọsteli Paulu wlan dọmọ: “Otọ́n pẹvide wẹ nọ hẹn linfin yinyan lọ pete fọ́n.” (1 Kọl. 5:6) Ylanwatọ he ma lẹnvọjọ lẹ gán dekanpona gbemima mẹhe to vivẹnudo nado nọgbẹ̀ sọgbe hẹ nujinọtedo dodo Jehovah tọn lẹ tọn.—Howh. 13:20; 1 Kọl. 15:33.
5. Nukun tẹwẹ mí dona nọ yí do pọ́n mẹhe ko yin didesẹ sọn agun mẹ de, podọ etẹwutu?
5 To whelọnu lo, nukun tẹwẹ mí dona nọ yí do pọ́n yisenọ hatọ de he yin didesẹ sọn agun mẹ? Dile etlẹ yindọ mí ma nọ dogbẹ́ hẹ ẹ, mí dona nọ pọ́n ẹn hlan taidi lẹngbọ he danbú de, e ma yin lẹngbọ he dọ̀n de. Lẹngbọ he danbú sọn apó lọ mẹ de gán gbẹ́ lẹkọwa fẹẹ. Flindọ lẹngbọ he danbú enẹ ko klan ede do wiwe na Jehovah. E blawu dọ e ma to gbẹnọ sọgbe hẹ klandowiwe etọn to alọnu din, enẹ wẹ zọ́n bọ e do tin to owù mẹ. (Ezek. 18:31) Etomọṣo, dile e na dẹnsọ bọ lẹblanu Jehovah tọn na gbẹ́ to ote, todido tin dọ ni lẹkọwa. Nawẹ mẹho lẹ nọ dohia dọ emi do todido mọnkọ etlẹ yin gando ylanwatọ he ko yin didesẹ sọn agun mẹ de go gbọn?
LEHE MẸHO LẸ NỌ GỌALỌNA MẸHE YIN DIDESẸ LẸ DO
6. Afọdide tẹlẹ wẹ mẹho lẹ na ze nado gọalọna mẹhe ko yin didesẹ sọn agun mẹ de?
6 Be yè dona dovọ́na mẹhe yin didesẹ sọn agun mẹ de bo jo e do pete na ewọ lọsu ni lẹkọwa Jehovah dè na ede wẹ ya? Paali! Whenue wedegbẹ́ mẹho lẹ tọn de hẹn zun yinyọnẹn na ylanwatọ he ma lẹnvọjọ de dọ e na yin didesẹ sọn agun mẹ, yé nọ basi zẹẹmẹ afọdide he e gán ze nado lẹkọwa agun mẹ lẹ tọn na ẹn. Amọ́, mẹho lẹ na tlẹ wà humọ. To ninọmẹ susu mẹ, yé na dọna ylanwatọ lọ dọ emi jlo na vọ́ sinai hẹ ẹ to osun kleun delẹ godo nado pọ́n eyin e ko diọ sọn ahun mẹ. Eyin ylanwatọ lọ yigbe nado vọ́ aisin hẹ mẹho lẹ, yé na dotuhomẹna ẹn to aisinsin he bọdego enẹ whenu nado lẹnvọjọ bo lẹkọwa. Eyin e ma tlẹ ko diọ sọn ahun mẹ to whenẹnu, mẹho lẹ na nọ dovivẹnu sọn ojlẹ de mẹ jẹ devo mẹ nado dọho hẹ ẹ.
7. Nawẹ mẹho lẹ nọ do awuvẹmẹ Jehovah tọn nkọ hia whenue yé to nuyiwa hẹ mẹhe ko yin didesẹ sọn agun mẹ de gbọn? (Jelemia 3:12)
7 Mẹho lẹ nọ dovivẹnu nado hodo apajlẹ awuvẹmẹ Jehovah tọn dile yé to nuyiwa hẹ mẹhe ko yin didesẹ sọn agun mẹ de. Di apajlẹ, Jehovah ma nọte dọ omẹ tasinyẹntọ etọn lẹ to akọta Islaeli hohowhenu tọn mẹ ni ze afọdide tintan lọ whẹ́. Kakatimọ, ewọ wẹ wàmọ nado gọalọna yé whẹpo yé tlẹ do dó ohia lẹnvọjọ tọn depope hia. Dile mí mọ do to hosọ awetọ hosọ debọdo-dego ehe tọn mẹ, Jehovah na apajlẹ awuvẹmẹ etọn tọn to whenue e dọna yẹwhegán Hosea nado vọ́ gọjẹ pọ́ hẹ asi etọn he zindonukọn to ylanwiwa mẹ. (Hos. 3:1; Mal. 3:7) Mẹho agun tọn lẹ nọ hodo apajlẹ Jehovah tọn bo nọ jlo nugbonugbo dọ ylanwatọ lọ ni lẹkọwa, podọ yé ma nọ hẹn ẹn vẹawuna ẹn nado wàmọ.—Hia Jelemia 3:12.
8. Nawẹ oló Jesu tọn gando visunnu he danbú lọ go hẹn nukunnumọjẹnumẹ mítọn gando awuvẹmẹ po lẹblanu Jehovah tọn po go siso dogọ gbọn? (Luku 15:7)
8 Flin oló Jesu tọn gando visunnu he danbú lọ go, dile e yin hodọdeji do to hosọ awetọ hosọ debọdo-dego ehe tọn mẹ. Whenue otọ́ lọ mọ bọ visunnu etọn lẹkọja whé, e “họ̀nwezun bo gbò e fán bosọ donùnùgo na ẹn.” (Luku 15:20) Doayi e go dọ otọ́ lọ ma nọte dọ visunnu etọn ni vẹvẹ bo biọ jonamẹ. Kakatimọ, e ze afọdide tintan lọ dile otọ́ owanyinọ depope na ko wà do. Mẹho lẹ nọ dovivẹnu nado wà nudopolọ hẹ mẹhe danbú lẹ. Yé nọ jlo dọ lẹngbọ he danbú ehelẹ ni “lẹkọwa whé.” (Luku 15:22-24, 32) Ayajẹ nọ tin to olọn mẹ podọ to aigba ji whenue ylanwatọ de lẹkọwa!—Hia Luku 15:7.
9. Etẹwẹ Jehovah nọ dotuhomẹna ylanwatọ lẹ nado wà?
9 Po nuhe mí ko gbadopọnna kakajẹ fi po, e họnwun dọ Jehovah ma nọ kẹalọyi dọ yè ni waylando bo ma lẹnvọjọ. Amọ́, e ma nọ gbẹ́ ylanwatọ lẹ dai. E nọ jlo dọ yé ni lẹkọwa. Numọtolanmẹ Jehovah tọn gando ylanwatọ he ma lẹnvọjọ lẹ go yin didohia to Hosea 14:4 mẹ, he dọmọ: “Yẹn na hẹnazọ̀ngbọna nugbonọ-mayin yetọn. Yẹn na yiwanna yé sọn ojlo mẹ wá, na homẹgble ṣie ko lilẹ́.” Apajlẹ he namẹ tuli nankọ die na mẹho lẹ nado nọ doayi ohia lẹnvọjọ tọn depope go. Podọ tulinamẹ nankọ die na mẹhe ko jo Jehovah do lẹ nado lẹkọwa madọngbàn.
10, 11. Nawẹ mẹho lẹ na dovivẹnu bo gọalọna mẹhe ko yin didesẹ sọn agun mẹ wayi lẹ gbọn?
10 Bọ etẹwẹ dogbọn mẹhe ko yin didesẹ sọn agun mẹ wayi, vlavo sọn owhe susu die lẹ dali? Omẹ mọnkọ lẹ gán ko dealọ sọn ylanwiwa he wutu yé do yin didesẹ sọn agun mẹ lọ mẹ. To ninọmẹ delẹ mẹ, yé tlẹ gán nọma flin nuhewutu yé do yin didesẹ sọn agun mẹ. Depope he whẹho lọ yin, mẹho lẹ na dovivẹnu nado yọ́n fie omẹ enẹlẹ te, bo dla yé pọ́n. To dlapọn enẹlẹ whenu, mẹho lẹ na tlẹ biọ nado hodẹ̀ hẹ yé bo na tuli yé nado lẹkọwa agun mẹ. Nugbo wẹ dọ eyin mẹde ko nọla na agun lọ na owhe susu lẹ, ayihaawe ma tin dọ e na vọgán taun to gbigbọ-liho. Enẹwutu, eyin e dohia dọ emi jlo na lẹkọwa agun mẹ, mẹho lẹ gán basi tito na mẹde nido plọn Biblu hẹ ẹ eyin e ma tlẹ ko yin gigọyí. To whẹho lẹpo mẹ, mẹho lẹ wẹ na basi tito na plọnmẹ Biblu mọnkọ.
11 Eyin mẹho lẹ nọ do awuvẹmẹ hia di Jehovah, yé na jlo nado dovivẹnu bo gọalọna mẹsusu dile e yọnbasi do nado yọnẹn dọ ohọ̀n lọ to nùvo na yé nado lẹkọwa. Eyin ylanwatọ de lẹnvọjọ bo dealọ sọn ylanwiwa mẹ, e gán yin gigọyí madọngbàn.—2 Kọl. 2:6-8.
12. (a) Ninọmẹ tẹlẹ mẹ wẹ mẹho lẹ dona nọ aṣeji taun te? (b) Naegbọn mí ma dona do numọtolanmẹ lọ dọ e ma yọnbasi na ylanwatọ delẹ nado mọaleyi sọn lẹblanu Jehovah tọn mẹ? (Sọ pọ́n nudọnamẹ odò tọn.)
12 To ninọmẹ delẹ mẹ, mẹho lẹ dona to aṣeji taun whẹpo do gọ̀ mẹde yí. Di apajlẹ, eyin mẹde hùwhẹ ovivu zinzanhẹ kavi atẹṣiṣi tọn, kavi ko kàn ayiha gigẹdẹ nado sánkanna alọwle, mẹho lẹ na jlo na hẹn ẹn diun whẹ́ dọ e ko lẹnvọjọ nugbonugbo. (Mal. 2:14; 2 Tim. 3:6) Yé dona basi hihọ́na apó lọ. To ojlẹ dopolọ mẹ, mí dona mọnukunnujẹemẹ dọ Jehovah na kẹalọyi ylanwatọ depope he do lẹnvọjọ nujọnu tọn hia bo dealọ sọn ylanwiwa mẹ. Enẹwutu, dile etlẹ yindọ mẹho lẹ nọ nọ̀ aṣeji dile e jẹ do hẹ mẹhe ko yí oklọ do yinuwa hẹ mẹdevo lẹ, yé ma dona yì jẹ obá lọ mẹ dọ ylanwatọ wunmẹ delẹ ma gán mọaleyi sọn lẹblanu Jehovah tọn mẹ pọ́n gbede. b—1 Pita 2:10.
NUHE AGUN LỌ GÁN WÀ
13. Nawẹ lehe mí nọ yinuwa hẹ mẹde he mẹho lẹ wọhẹ nọ gbọnvona lehe mí nọ yinuwa hẹ mẹhe ko yin didesẹ sọn agun mẹ de do gbọn?
13 Dile mí dọhodeji do to hosọ he wayi mẹ, to whedelẹnu nulila de nọ yin bibasi dọ mẹde ko yin wiwọhẹ. To ninọmẹ mọnkọ mẹ, mí gán gbẹ́ zindonukọn nado nọ dogbẹ́ hẹ ẹ to yinyọnẹn mẹ dọ e ko lẹnvọjọ bo dealọ sọn ylanwiwa mẹ. (1 Tim. 5:20) E gbẹ́ yin hagbẹ agun lọ tọn bo do hudo tulinamẹ he nọ wá sọn gbẹdido hẹ yisenọ hatọ lẹ mẹ tọn. (Heb. 10:24, 25) Amọ́, ninọmẹ enẹ gbọnvo taun na mẹhe yin didesẹ sọn agun mẹ de tọn. Mí ma nọ “dogbẹ́ hẹ” mẹlọ bo “ma tlẹ [nọ] dùnú hẹ omẹ mọnkọtọn.”—1 Kọl. 5:11.
14. Nawẹ Klistiani lẹ gán yí ayihadawhẹnamẹnu yetọn he yin pinplọn gbọn Biblu dali zan whenue yé to nuyiwa hẹ mẹhe ko yin didesẹ sọn agun mẹ lẹ gbọn? (Sọ pọ́n yẹdide lọ.)
14 Be nuhe ji mí ko dọhodo lẹ zẹẹmẹdo dọ mí dona dovọ́na mẹhe ko yin didesẹ sọn agun mẹ de mlẹnmlẹn wẹ ya? E ma yin dandan. E họnwun dọ mí ma na dogbẹ́ hẹ ẹ. Amọ́, Klistiani lẹ gán yí ayihadawhẹnamẹnu yetọn he yin pinplọn gbọn Biblu dali zan nado de eyin vlavo yé na basi oylọna mẹdesẹ sọn agun mẹ de—vlavo hẹnnumẹ kavi mẹde he yé vẹ́ hẹ to dai de—nado wá opli agun tọn de. Bọ eyin e wá lo? To ojlẹ de mẹ wayi, mí ma nọ dọnudo omẹ mọnkọ. To ninọmẹ ehe mẹ ga, Klistiani dopodopo dona yí ayihadawhẹnamẹnu etọn he yin pinplọn gbọn Biblu dali zan. Mẹde gán voawu nado dọnudo mẹlọ kavi dokuavọna ẹn wá opli. Amọ́, mí ma na jlo nado dlẹnkanna hodọdopọ lọ kavi dogbẹ́ hẹ mẹlọ.
Klistiani lẹ gán yí ayihadawhẹnamẹnu yetọn he yin pinplọn gbọn Biblu dali zan to whenue yé jlo na de eyin yé na basi oylọna mẹhe yin didesẹ sọn agun mẹ de wá opli kavi dọnudo mẹlọ to kleun mẹ nado dokuavọna ẹn wá opli (Pọ́n hukan 14tọ)
15. Ylanwatọ wunmẹ tẹlẹ ji wẹ 2 Johanu 9-11 dọhodo? (Sọ pọ́n apotin lọ “ Be Ylando Wunmẹ Dopolọ Hodọ Wẹ Johanu po Paulu po te Ya?”)
15 Mẹde gán kanse dọ, ‘Be Biblu ma dọ dọ Klistiani de he dọnudo omẹ mọnkọ yin mimátọ to azọ́n ylankan etọn lẹ mẹ ya?’ (Hia 2 Johanu 9-11.) Lẹdo hodidọ tọn wefọ ehe tọn dohia dọ atẹṣitọ lẹ po mẹhe nọ yí zohunhun do ze walọ gblezọn daga lẹ po go wẹ anademẹ ehe gando. (Osọ. 2:20) Enẹwutu, eyin mẹde nọ yí zohunhun do ze nuplọnmẹ atẹṣitọ lẹ tọn kavi walọyizan he ma sọgbe devo de daga, mẹho lẹ ma na basi tito nado dla ẹ pọ́n. Nugbo wẹ dọ todido tin dọ e na wá gọ̀ biọ ede mẹ. Amọ́, kakajẹ whenẹnu, mí ma na dọnudo omẹ mọnkọ, mọ mí ma na basi oylọna ẹn nado wá opli agun tọn de.
NỌ DO AWUVẸMẸ PO LẸBLANU PO HIA DI JEHOVAH
16, 17. (a) Etẹwẹ Jehovah jlo dọ ylanwatọ lẹ ni wà? (Ezekiẹli 18:32) (b) Nawẹ mẹho lẹ gán dohia dọ yé yin azọ́nwatọ hatọ Jehovah tọn lẹ dile yé to vivẹnudo nado gọalọna ylanwatọ lẹ gbọn?
16 Etẹwẹ mí ko plọn to hosọ debọdo-dego atọ́n ehe mẹ? Jehovah ma jlo dọ mẹdepope ni yin vivasudo! (Hia Ezekiẹli 18:32.) E jlo dọ ylanwatọ lẹ ni gbọwhẹ hẹ ẹ. (2 Kọl. 5:20) Abajọ to whenuho gblamẹ, Jehovah ko na tuli omẹ etọn tasinyẹntọ lẹ pludopludo—kakajẹ tasinyẹntọ dopodopo ji—nado lẹnvọjọ bo lẹkọwa ewọ dè. Lẹblanulọkẹyi de wẹ e nọ yin na mẹho agun tọn lẹ nado yin azọ́nwatọ hatọ Jehovah tọn lẹ dile yé to vivẹnudo nado hẹn ylanwatọ lẹ jẹ lẹnvọjọ kọ̀n.—Lom. 2:4; 1 Kọl. 3:9.
17 Yí nukun homẹ tọn do pọ́n ayajẹ he nọ tin to olọn mẹ whenue ylanwatọ lẹ lẹnvọjọ! Otọ́ olọn mẹ tọn mítọn Jehovah nọ duvivi ayajẹ enẹ tọn whedepopenu he lẹngbọ etọn he danbú de lẹkọwa agun mẹ. Owanyi mítọn na Jehovah nọ siso dogọ dile mí to ayihamẹlẹnpọn do awuvẹmẹ, lẹblanu po nukundagbe majẹhẹ etọn po ji.—Luku 1:78.
OHÀN 111 Nuhe Nọ Hẹn Mí Jaya Lẹ
a To hosọ ehe mẹ, ylanwatọ he go mí donù lọ yin sunnu de. Amọ́ nudọnamẹ he yin hodọdeji lẹ sọ gando yọnnu lẹ go ga.
b Sọgbe hẹ nuhe Biblu dọ, ylando he ma tindo jona ma yin ylando wunmẹ de taun, amọ́ ylando de he yin wiwà po ayilinlẹn tasinsinyẹn tọn po nado diọnukunsọ Jiwheyẹwhe kakadoi. E ma yin mítọn nado dawhẹna mẹde dọ e ko waylando mọnkọ kavi lala.—Malku 3:29; Heb. 10:26, 27.
