HOSỌ OPLỌN TỌN 31
OHÀN 12 Jehovah, Jiwheyẹwhe Huhlọnnọ
Nuhe Jehovah Ko Wà Nado Whlẹn Gbẹtọvi Ylandonọ Lẹ
“Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn.”—JOH. 3:16.
NUHE E BẸHẸN
Lehe Jehovah ko ze afọdide tintan nado gọalọna mí nado hoavùn sọta ylando do gọna lehe e ko hẹn ẹn yọnbasi na mí nado duvivi ogbẹ̀ tọn kakadoi bo vò sọn ylando si do.
1, 2. (a) Etẹwẹ ylando yin, podọ nawẹ mí gán gbawhàn etọn gbọn? (Sọ pọ́n “Zẹẹmẹ Hogbe de Tọn.”) (b) Etẹ ji wẹ mí na dọhodo to hosọ ehe gọna hosọ devo he to zinjẹgbonu Atọ̀họ̀-Nuhihọ́ lọ Tọn ehe mẹ lẹ mẹ? (Sọ pọ́n “Ayidonugo Na Wehiatọ Lẹ” to zinjẹgbonu ehe mẹ.)
BE A jlo na yọ́n obá he mẹ Jehovah Jiwheyẹwhe yiwanna we jẹ ya? Aliho dagbe de die nado yọ́n gblọndo lọ: Nọ plọnnu gando nuhe e ko wà nado whlẹn we sọn ylando po okú po si go. Kẹntọ ylankan de wẹ ylando a yin, ehe a ma gán gbawhàn etọn po huhlọn towe titi po. Mímẹpo wẹ nọ waylando egbesọegbesọ, podọ ylando nọ hẹn okú wá. (Lom. 5:12) Amọ́, wẹndagbe de tin. Po alọgọ Jehovah tọn po, mí gán duto ylando ji. Na nugbo tọn, mí na gbawhàn etọn dandan!
2 Jehovah Jiwheyẹwhe ko to alọgọna gbẹtọ lẹ nado hoavùn sọta ylando sọn nudi owhe 6000 die. Etẹwutu? Na e yiwanna mí wutu. Sọn bẹjẹeji gbọ́n wẹ e ko yiwanna gbẹtọvi lẹ, enẹwutu e ko wà nususu tlala nado gọalọna yé to avùnhiho ehe mẹ. Jiwheyẹwhe yọnẹn dọ ylando wẹ nọ hẹn okú wá, podọ e ma jlo dọ mí ni kú. E jlo dọ mí ni nọgbẹ̀ kakadoi. (Lom. 6:23) Nuhe e jlo na we niyẹn. To hosọ ehe mẹ, mí na dọhodo kanbiọ atọ̀n ji: (1) Nawẹ Jehovah na todido gbẹtọvi ylandonọ lẹ gbọn? (2) Nawẹ gbẹtọvi ylandonọ he nọgbẹ̀ to ojlẹ Biblu tọn mẹ lẹ mọ nukundagbe Jehovah tọn gbọn? (3) Etẹwẹ Jesu wà nado whlẹn gbẹtọvi ylandonọ lẹ gán?
NAWẸ JEHOVAH NA TODIDO GBẸTỌVI YLANDONỌ LẸ GBỌN?
3. Nawẹ mẹjitọ mítọn tintan lẹ wá lẹzun ylandonọ gbọn?
3 To whenue Jehovah dá sunnu po yọnnu po tintan lọ, e jlo dọ yé ni do ayajẹ. E na yé owhé whanpẹnọ de, nunina alọwle tọn gọna azọ́ndenamẹ dagbedagbe de. Yé dona jivi gọ́ aigba lọ ji bo hẹn planẹti lọ pete zun paladisi de taidi jipa Edẹni tọn. Gbedide he bọawu dopo poun wẹ e na yé. Podọ e na yé avase dọ eyin yé tùnafọ gbedide enẹ ji bo desọn ojlo mẹ nado ṣiatẹ sọta emi, ylando yetọn na hẹn okú wá. Mí yọ́n nuhe jọ. Gbigbọ mayinukundomọ de, he ma tindo owanyi depope na Jiwheyẹwhe kavi na yewlẹ biọ whẹho lọ mẹ bo sisẹ́ yé nado waylando. Adam po Evi po joawuna nuyiwadomẹji ylankan enẹ. Na yé gboawupo nado dejido Otọ́ owanyinọ yetọn go wutu, yé waylando. Dile mí yọnẹn do, nuhe Jehovah dọ mọ hẹndi. Bẹsọn azán enẹ gbè sọyi, yé dona jiya kọdetọn lọ lẹ tọn, enẹ wẹ yindọ: yé jẹ yọnhopo ji bo wá kú to godo mẹ.—Jen. 1:28, 29; 2:8, 9, 16-18; 3:1-6, 17-19, 24; 5:5.
4. Naegbọn Jehovah do gbẹwanna ylando bosọ nọ gọalọna mí nado hoavùn sọta ẹ? (Lomunu lẹ 8:20, 21)
4 Jehovah dike bọ otàn awubla tọn enẹ yin kinkandai, na mí nido mọaleyi sọn e mẹ. E nọ gọalọna mí nado mọnukunnujẹ nuhewutu ewọ do gbẹwanna ylando sọmọ mẹ. Ylando nọ klan mí sọn Otọ́ mítọn go bo nọ hẹn okú wá. (Isa. 59:2) Enẹ wẹ zọ́n bọ Satani, yèdọ gbigbọ atẹṣitọ he hẹn nuhahun ehe lẹpo wá do yiwanna ylando bo nọ to kanván nado ze e daga. E gán ko lẹndọ emi gbawhàn mlẹnmlẹn to Edẹni mẹ. Amọ́, e ma mọnukunnujẹ obá he mẹ owanyi Jehovah tọn klo jẹ mẹ. Jiwheyẹwhe ma diọ lẹndai etọn gando ovivi Adam po Evi po tọn lẹ go pọ́n gbede. E yiwanna whẹndo gbẹtọvi tọn, enẹwutu to afọdopolọji, e wleawu todido tọn na mẹlẹpo. (Hia Lomunu lẹ 8:20, 21.) Jehovah yọnẹn dọ delẹ to ovivi ehelẹ mẹ na de nado yiwanna emi bosọ dín alọgọ emitọn nado hoavùn sọta ylando. Podọ taidi Otọ́ po Mẹdatọ yetọn po, ewọ na deali de na yé nado jẹ mẹdekannu sọn ylando si bo dọnsẹpọ ewọ. Etẹwẹ Jehovah na wà nado hẹn ehe lẹpo yọnbasi?
5. Whetẹnu wẹ Jehovah na todido gbẹtọvi ylandonọ lẹ whla tintan? Basi zẹẹmẹ. (Jenẹsisi 3:15)
5 Hia Jenẹsisi 3:15. Jehovah na todido gbẹtọvi lẹ whla tintan to whenue e lá whẹgbledomẹ etọn sọta Satani. Jiwheyẹwhe dọ dọdai dọ “kúnkan” de wẹ na yin asisa todido enẹ tọn. Kúnkan ehe na và Satani sudo to godo mẹ bo vọ́ nuhe e hẹngble to Edẹni mẹ lẹpo jlado. (1 Joh. 3:8) Etomọṣo, kúnkan lọ na jiya whẹpo enẹ nido jọ. Satani na yangbé etọn bo na hù i. Ehe na hẹn awufiẹsa sinsinyẹn wá na Jehovah. Amọ́ awufiẹsa ehe ma na yin to ovọ́ mẹ, na gbẹtọvi madosọha lẹ na yin whinwhlẹngán sọn ylando po okú po si wutu.
NAWẸ GBẸTỌVI YLANDONỌ LẸ MỌ NUKUNDAGBE JEHOVAH TỌN TO OJLẸ BIBLU TỌN MẸ GBỌN?
6. Etẹwẹ sunnu he tindo yise lẹ, taidi Abẹli po Noa po wà nado dọnsẹpọ Jehovah?
6 To owhe kanweko susu he bọdego lẹ gblamẹ, Jehovah hẹn lehe gbẹtọvi ylandonọ lẹ gán dọnsẹpọ ewọ do họnwun vudevude. Abẹli, yèdọ visunnu awetọ Adam po Evi po tọn wẹ gbẹtọvi tintan he do yise hia to Jehovah mẹ to atẹṣiṣi he wá aimẹ to Edẹni mẹ godo. Abẹli yiwanna Jehovah bo jlo na hẹn homẹ Etọn hùn bosọ dọnsẹpọ Ewọ, ehe zọ́n bọ e basi avọ́sinsan de. Lẹngbọyìntọ wẹ Abẹli, enẹwutu e yí delẹ to lẹngbọvu winyanwinyan etọn lẹ mẹ bo hù yé, bosọ yí yé do sanvọ́ na Jehovah. Nawẹ Jehovah yinuwa gbọn? E ‘yí nukundagbe do pọ́n Abẹli po avọ́nunina etọn po.’ (Jen. 4:4) Jehovah yí nukundagbe do pọ́n avọ́sinsan mọnkọ lẹ he mẹhe yiwanna ewọ bo dejidego lẹ taidi Noa basi. (Jen. 8:20, 21) Gbọn alọkikẹyi avọ́sinsan mọnkọ lẹ dali, Jehovah dohia dọ gbẹtọvi ylandonọ lẹ gán mọ nukundagbe emitọn bo dọnsẹpọ emi. b
7. Etẹwẹ mí plọn sọn ojlo he Ablaham tindo nado yí visunnu etọn titi do sanvọ́ mẹ?
7 Jehovah biọ dọ Ablaham, yèdọ dawe de he tindo yise ayidego tọn ni wà nude he vẹawu taun—enẹ wẹ nado yí visunnu etọn titi Isaki do sanvọ́. E họnwun dọ Ablaham na ko mọdọ azọ́ndenamẹ ehe sọgan hẹn awufiẹsa mayọnjlẹ wá na ẹn. Etomọṣo, e wleawufo nado setonu. Amọ́, Jiwheyẹwhe hẹnalọdotena ẹn to ogàn godo tọn mẹ. Ṣogan, apajlẹ ehe plọn nugbo titengbe de mẹhe tindo yise lẹpo, enẹ wẹ yindọ Jehovah na desọn ojlo mẹ bo ze Visunnu yiwanna etọn jo taidi avọ́sinsan de. Jehovah yiwanna gbẹtọvi lẹ taun.—Jen. 22:1-18.
8. Etẹwẹ avọ́sinsan susu he nọ yin bibasi to Osẹ́n lọ glọ lẹ nọtena? (Levitiku 4:27-29; 17:11)
8 To owhe kanweko lẹ godo, Osẹ́n he yin nina akọta Islaeli tọn biọ dọ avọ́sinsan susu ni nọ yin bibasi na ovẹsè ylando omẹ Jiwheyẹwhe tọn lẹ tọn. (Hia Levitiku 4:27-29; 17:11.) Oyẹ̀ avọ́sinsan he klohugan de tọn wẹ avọ́sinsan ehelẹ yin, ehe na whlẹn gbẹtọvi lẹ sọn ylando si mlẹnmlẹn. To gbọdo glọ, yẹwhegán Jiwheyẹwhe tọn lẹ basi zẹẹmẹ dọ kúnkan dopagbe lọ he wá yin Visunnu vonọtaun Jiwheyẹwhe tọn de, dona jiya bo yin hùhù. E na yin hùhù dile lẹngbọ he nọ yin yíyí do sanvọ́ de nọ yin hùhù do. (Isa. 53:1-12) Pọ́n bo: Jehovah na basi tito bọ Visunnu yiwanna etọn na yin yíyí do sanvọ́ nado whlẹn gbẹtọvi lẹ sọn ylando po okú po si, kakajẹ hiẹ lọsu ji!
NAWẸ JESU WHLẸN GBẸTỌVI LẸ GÁN GBỌN?
9. Etẹwẹ Johanu Baptizitọ lọ dọ gando Jesu go? (Heblu lẹ 9:22; 10:1-4, 12)
9 To owhe kanweko tintan W.M., to whenue devizọnwatọ Jiwheyẹwhe tọn Johanu Baptizitọ mọ Jesu Nazalẹti tọn, e dọmọ: “Mì pọ́n, Lẹngbọvu Jiwheyẹwhe tọn lọ he ze ylando aihọn tọn yì!” (Joh. 1:29) Hogbe gbọdo ehelẹ dohia dọ Jesu wẹ kúnkan lọ he dọdai etọn yin didọ sọn ojlẹ dindẹn die. E na ze ede jo taidi avọ́sinsan he opagbe etọn yin dido lọ. Todin hugan gbede pọ́n, todido dolido de tin na gbẹtọvi ylandonọ lẹ dọ yé na gbawhàn ylando tọn mlẹnmlẹn.—Hia Heblu lẹ 9:22; 10:1-4, 12.
10. Nawẹ Jesu dohia dọ emi “wá nado ylọ” ylandonọ lẹ gbọn?
10 Jesu na ayidonugo vonọtaun mẹhe ylando taidi agbàn pinpẹn de to kọ̀ji na lẹ bosọ basi oylọna yé nado lẹzun hodotọ etọn lẹ. E yọnẹn dọ ylando wẹ yin adọ̀ yajiji gbẹtọvi lẹ tọn. Enẹwutu, e gọalọna sunnu po yọnnu po he yin yinyọnẹn taidi ylandonọ lẹ to aliho vonọtaun mẹ. E yí apajlẹ de zan bo dọmọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ.” E yidogọ dọmọ: “Yẹn ma wá nado ylọ dodonọ lẹ gba, adavo ylandonọ lẹ.” (Mat. 9:12, 13) Jesu nọgbẹ̀ sọgbe hẹ nuhe e dọ lẹ. E gbọn homẹdagbe dali jo ylando nawe he yí dasin do súnsún afọ etọn lẹ tọn na ẹn. (Luku 7:37-50) E plọn nugbo titengbe de nawe Samalianu lọ to dotọ̀ tó mahopọnna dọ e yọ́n gbẹzan mawé he e nọ zan. (Joh. 4:7, 17-19, 25, 26) Jiwheyẹwhe tlẹ na huhlọn Jesu nado de kọdetọn ylando lẹpo tọn lọ, yèdọ okú sẹ̀. Gbọnna? Jesu fọ́n gbẹtọ lẹ sọnku, yèdọ sunnu, yọnnu, yọpọ po mẹho po.—Mat. 11:5.
11. Naegbọn ylandonọ lẹ do nọ dọnsẹpọ Jesu?
11 Abajọ mẹhe tlẹ yin ylandonọ akonka lẹ do nọ jlo na dọnsẹpọ Jesu. E nọ do awuvẹmẹ hia yé bosọ nọ hò yetọn pọ́n. Yé nọ voawu nado dọnsẹpọ ẹ. (Luku 15:1, 2) Podọ, Jesu pà omẹ mọnkọ lẹ bosọ suahọ yé na yise he yé dohia to ewọ mẹ wutu. (Luku 19:1-10) E ze apajlẹ pipé, yèdọ apajlẹ jọnun lẹblanu tọn Otọ́ etọn tọn dai. (Joh. 14:9) To ohó po walọ po mẹ, e dohia dọ Otọ́ awuvẹmẹtọ podọ lẹblanunọ emitọn yiwanna gbẹtọ lẹ bosọ jlo na gọalọna dopodopo yetọn nado duto avùnhiho sọta ylando ji. Jesu gọalọna ylandonọ lẹ nado tindo ojlo lọ nado diọ aliho gbẹninọ tọn yetọn bo hodo ewọ.—Luku 5:27, 28.
12. Etẹwẹ Jesu plọnmẹ gando okú etọn go?
12 Jesu yọ́n nuhe na jọ dego to madẹnmẹ. Whlasusu wẹ e dọna hodotọ etọn lẹ dọ emi na yin didehia bo na yin hùhù to yatin de ji. (Mat. 17:22; 20:18, 19) E yọnẹn dọ avọ́sinsan emitọn na ze ylando aihọn tọn yì dile Johanu dọ do bọ yẹwhegán lẹ sọ dọ dọdai etọn do. Jesu sọ plọnmẹ dọ whenue emi na ko ze ogbẹ̀ emitọn jo godo, emi na “dọ̀n gbẹtọ wunmẹ lẹpo” do emide dè. (Joh. 12:32) Gbẹtọvi ylandonọ lẹ gán hẹn homẹ Jehovah tọn hùn eyin yé kẹalọyi Jesu taidi Oklunọ yetọn bo hodo afọdòmẹ etọn lẹ. Gbọnmọ dali, yé na yin “tuntundote sọn ylando mẹ” to godo mẹ. (Lom. 6:14, 18, 22; Joh. 8:32) Enẹwutu, Jesu desọn ojlo mẹ bo yí adọgbigbo do pehẹ okú awufiẹsa tọn etọn.—Joh. 10:17, 18.
13. Nawẹ Jesu kú gbọn, podọ etẹwẹ okú etọn plọn mí gando Jehovah Jiwheyẹwhe go? (Sọ pọ́n yẹdide lọ.)
13 Jesu yin didehia bo yin wiwle, yè zun in, kọnmasin dego, gblewhẹdo e bo tlẹ sayana ẹn. Awhànfuntọ lẹ plan ẹn yì fie e na yin hùhù te bo whè e do yatin de go. Dile e yí nugbonọ-yinyin do to akọndona awufiẹsa sinsinyẹn ehe lẹpo, Mẹdevo de tin he tlẹ sọ sè vivẹ́ hugan. Jehovah Jiwheyẹwhe wẹ. E hẹnalọdotena huhlọn madodogbó etọn bo ma dademẹ. Etẹwutu? Etẹwẹ gán whàn Otọ́ owanyinọ de nado yinuwa to aliho enẹ mẹ? To hogbe dopo mẹ, owanyi wẹ. Jesu dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.”—Joh. 3:16.
Whenue Jehovah dike bọ Visunnu etọn yin hùhù, e jugbọn awufiẹsa mayọnjlẹ de mẹ nado whlẹn mí sọn ylando po okú po si (Pọ́n hukan 13tọ)
14. Etẹwẹ avọ́sinsan Jesu tọn plọn we?
14 Avọ́sinsan Jesu tọn wẹ yin kunnudenu he klohugan he do obá he mẹ Jehovah yiwanna ovivi Adam po Evi po tọn lẹ jẹ hia. E do lehe Jehovah yiwanna we sọ hia. E yì jẹ obá lọ mẹ nado doakọnna awufiẹsa sinsinyẹn he mayọnjlẹ de nado whlẹn we sọn ylando po okú po si. (1 Joh. 4:9, 10) Mọwẹ, e jlo na gọalọna dopodopo mítọn nado hoavùn sọta ylando bo dudeji!
15. Etẹwẹ mí dona wà nado mọaleyi sọn nunina Jiwheyẹwhe tọn, enẹ wẹ avọ́sinsan ofligọ tọn Jesu tọn mẹ?
15 Nunina Jiwheyẹwhe tọn, yèdọ avọ́sinsan ofligọ tọn Visunnu detọ́n dopo akàn etọn tọn hẹn ẹn yọnbasi na mí nado mọ jona ylando mítọn lẹ tọn yí. Amọ́, nado mọaleyi sọn jonamẹ Jiwheyẹwhe tọn mẹ, mí dona wà nude. Etẹwẹ yin nulọ? Johanu Baptizitọ podọ Jesu Klisti lọsu to nukọn mẹ na gblọndo lọ dọmọ: “Mì lẹnvọjọ, na Ahọluduta olọn tọn ko dọnsẹpọ.” (Mat. 3:1, 2; 4:17) Enẹwutu, lẹnvọjọ wẹ yin aṣli lọ eyin mí jlo nugbonugbo nado hoavùn sọta ylando bo dọnsẹpọ Otọ́ owanyinọ mítọn. Amọ́, etẹwẹ e zẹẹmẹdo nado lẹnvọjọ, podọ nawẹ e nọ gọalọna mí nado hoavùn sọta ninọmẹ ylando tọn mítọn gbọn? Hosọ oplọn tọn he bọdego na na gblọndo lọ.
OHÀN 18 Mí Yọ́n Pinpẹn Ofligọ lọ Tọn
a ZẸẸMẸ HOGBE DE TỌN: To Biblu mẹ, hogbe lọ “ylando” gán dlẹnalọdo walọ ylankan lẹ, awugbopo lọ nado nọgbẹ̀ kavi yinuwa sọgbe hẹ nujinọtedo walọ dagbe tọn Jehovah tọn lẹ. Amọ́, hogbe lọ “ylando” gán sọ dlẹnalọdo mape kavi ylandonọ-yinyin, yèdọ ninọmẹ de he mí dugu etọn sọn Adam dè. Ylando he mí dugu etọn lọ wẹ zọ́n bọ mímẹpo nọ kú.
