HOSỌ OPLỌN TỌN 17
A Họakuẹ to Nukun Jehovah Tọn Mẹ!
“Jehovah nọ hùnhomẹ do omẹ etọn lẹ go.”—SALM. 149:4.
OHÀN 108 Owanyi Nugbo Jiwheyẹwhe Tọn
BLADOPỌ *
Otọ́ olọn mẹ tọn mítọn “nọ hùnhomẹ” do dopodopo mítọn go (Pọ́n hukan 1)
1. Etẹ go wẹ Jehovah nọ doayi gando omẹ etọn lẹ go?
JEHOVAH JIWHEYẸWHE “nọ hùnhomẹ do omẹ etọn lẹ go.” (Salm. 149:4) Linlẹn awuvivi tọn nankọ die! Jehovah nọ doayi jẹhẹnu dagbe mítọn lẹ go; e yọ́n nugopipe mítọn lẹ, bo nọ dọ̀n mí wá ede dè. Eyin mí zindonukọn nado to nugbonọ yin na ẹn, e na yin họntọn vivẹ́ mítọn kakadoi!—Joh. 6:44.
2. Naegbọn e nọ vẹawuna mẹdelẹ nado yise dọ Jehovah yiwanna yé?
2 Mẹdelẹ gán dọ dọ, ‘N’yọnẹn dọ Jehovah yiwanna omẹ etọn lẹ taidi pipli de, amọ́ nawẹ n’gán kudeji gbọn dọ e yiwanna yẹnlọsu?’ Etẹwẹ gán zọ́n bọ mẹde na kàn kanbiọ enẹ sè? Oksana * he jiya susu to vuwhenu etọn dọ dọ: “Homẹ ṣie hùn taun whenue n’yí baptẹm bo bẹ gbehosọnalitọ jẹeji. Amọ́ to owhe 15 godo, n’jẹ onú ylankan he jọ do go e lẹ flin ji. N’wá tadona kọ̀n dọ n’ko hẹn nukundagbe Jehovah tọn bu bo masọ jẹna owanyi etọn.” Yua, mẹmẹyọnnu gbehosọnalitọ de he pehẹ nuhahun susu to vuwhenu ga dọmọ: “N’klan gbẹzan ṣie do wiwe hlan Jehovah na n’jlo na hẹn homẹ etọn hùn wutu. Amọ́ n’kudeji dọ e ma gán yiwanna mi pọ́n gbede.”
3. Etẹ ji wẹ mí na dọhodo to hosọ ehe mẹ?
3 Taidi Klistiani nugbonọ he go mí ṣẹṣẹ donù lẹ, a yiwanna Jehovah sisosiso, amọ́ a gán nọ do ayihaawe eyin ewọ yiwanna we. Naegbọn a dona kudeji dọ e nọ hò towe pọ́n nugbonugbo? Podọ, etẹwẹ gán gọalọna we nado dudeji whenue linlẹn agọ̀ lẹ to tuklado we? Mì gbọ mí ni dín gblọndo kanbiọ enẹlẹ tọn.
AYIHAAWE TINTINDO GANDO OWANYI JEHOVAH TỌN GO YIN OWÙNU
4. Naegbọn e do yin owùnu nado nọ do ayihaawe gando owanyi he Jehovah do na mí go?
4 Owanyi yin jẹhẹnu huhlọnnọ de he nọ whànmẹ nado yinuwa. Eyin mí kudeji dọ Jehovah yiwanna mí bosọ nọ nọgodona mí, mí na yin whinwhàn nado sẹ̀n ẹn po ahun lẹpo po mahopọnna nuhahun gbẹ̀mẹ tọn lẹ. To alọ devo mẹ, eyin mí nọ do ayihaawe gando mẹtọnhopọn Jiwheyẹwhe tọn go, ‘huhlọn mítọn ma na sọtẹ́n.’ (Howh. 24:10) Podọ, eyin mí wá gbọjọ, bo masọ yise dọ Jiwheyẹwhe yiwanna mí ba, mí ma na penugo bo nọavùnte sọta mẹgbeyinyan Satani tọn lẹ.—Efe. 6:16.
5. Nawẹ ayihaawe tintindo gando owanyi Jiwheyẹwhe tọn go ko yinuwado mẹdelẹ ji gbọn?
5 To ojlẹ mítọn mẹ, Klistiani nugbonọ delẹ ko gbọjọ to gbigbọ-liho na yé nọ do ayihaawe wutu. Mẹho agun tọn de he nọ yin James dọ dọ: “Dile etlẹ yindọ n’to sinsẹ̀n to Bẹtẹli bosọ to vivi lizọnyizọn ṣie tọn dù to agun jonọ-gbè tọn de mẹ, n’nọ kanse dee eyin Jehovah nọ kẹalọyi avọ́sinsan ṣie lẹ nugbonugbo. E wá jẹ fide bọ n’tlẹ nọ kanse dee eyin Jehovah nọ dotoaina odẹ̀ ṣie lẹ.” Eva he to sinsẹ̀nzọn whenu-gigọ́ tọn mẹ ga dọ dọ: “N’mọdọ ayihaawe tintindo gando owanyi Jehovah tọn go yin owùnu, na mọwiwà gán bẹpla nue wà a te to sinsẹ̀nzọn etọn mẹ lẹpo. Ehe na yinuwado ojlo towe na onú gbigbọmẹ tọn lẹ ji bo dekanpona ayajẹ towe to sinsẹ̀nzọn Jehovah tọn mẹ.” Michael he yin gbehosọnalitọ whepoponu tọn de podọ mẹho agun tọn dọ dọ: “Eyin a ma yise dọ Jiwheyẹwhe nọ hò towe pọ́n, a na danbú sọn e dè.”
6. Etẹwẹ mí dona wà whenue ayihaawe tintindo gando owanyi Jiwheyẹwhe tọn go fọ́n to ayiha mítọn mẹ?
6 Numimọ ehelẹ do lehe linlẹn agọ̀ lẹ gán yin owùnu to gbigbọ-liho do sọ hia. Amọ́, etẹwẹ mí dona wà eyin ayihaawe tintindo gando owanyi Jiwheyẹwhe tọn go jẹ finfọn ji to ayiha mítọn mẹ? Mí dona gbẹ́ yé dai to afọdopolọji! Biọ Jehovah dọ ni gọalọna we nado yí ‘jijọho etọn he yiaga hugan nukunnumọjẹnumẹ lẹpo bosọ nọ họ́ ahun mẹtọn po nugopipe apọ̀nmẹ tọn mẹtọn lẹ po’ do diọtẹnna “linlẹn ayimajai tọn” enẹlẹ. (Salm. 139:23; Odò.; Flp. 4:6, 7) Podọ, nọ flindọ a ma to dewe ṣo. Mẹmẹsunnu po mẹmẹyọnnu nugbonọ devo lẹ po to ahidi hẹ numọtolanmẹ agọ̀ lẹ. Devizọnwatọ Jehovah tọn delẹ to hohowhenu tlẹ ko diahi hẹ nuhahun mọnkọ lẹ. Lẹnnupọndo nue mí gán plọn sọn apajlẹ apọsteli Paulu tọn mẹ ji.
NUE MÍ PLỌN SỌN APAJLẸ PAULU TỌN MẸ
7. Nuhahun tẹlẹ wẹ Paulu pehẹ?
7 Be a nọ mọ to whedelẹnu dọ azọngban sù do emi, bọ e na vẹawu dọ emi ni penukundo popolẹpo go wẹ a? Eyin mọ wẹ, be a na mọnukunnujẹ numọtolanmẹ Paulu tọn lẹ mẹ. E do magbọjẹ, e ma yin na agun dopo poun amọ́ “na agun lẹpo.” (2 Kọl. 11:23-28) Be nuhahun agbasalilo tọn sinsinyẹn lẹ nọ saba hò ayajẹ towe yí wẹ ya? Paulu do ‘owùn de to agbasalan mẹ,’ ehe sọgan ko yin nuhahun agbasalilo tọn de he nọ to awufiẹsa hẹnwa na ẹn mapote, bọ e na ko jlo nado vò sọn e si. (2 Kọl. 12:7-10) Be awugbopo towe titi lẹ nọ hẹn we gbọjọ wẹ ya? Paulu lọsu do numọtolanmẹ mọnkọ to whedelẹnu. E ylọ ede dọ “gbẹtọ tapònọ,” na e nọ to ahidi mapote sọta awugbopo etọn titi lẹ wutu.—Lom. 7:21-24.
8. Etẹwẹ gọalọna Paulu nado duto nuhahun etọn lẹ ji?
8 Dile etlẹ yindọ Paulu pehẹ whlepọn voovo gọna ninọmẹ he nọ hẹnmẹ gbọjọ lẹ, e zindonukọn nado to Jehovah sẹ̀n. Etẹwẹ na ẹn huhlọn nado wàmọ? Mahopọnna dọ e yọ́n awugbopo etọn lẹ ganji, e tindo yise dolido to ofligọ lọ mẹ. E jẹakọ hẹ opagbe Jesu tọn lọ dọ ‘mẹdepope he do yise hia to Jesu mẹ na tindo ogbẹ̀ madopodo.’ (Joh. 3:16; Lom. 6:23) Matin ayihaawe, Paulu yin dopo to mẹhe do yise hia to ofligọ lọ mẹ lẹ mẹ. E kudeji dọ Jehovah to gbesisọ mẹ nado jona mẹhe tlẹ waylando sinsinyẹn lẹ, eyin yé lẹnvọjọ.—Salm. 86:5.
9. Etẹwẹ mí plọn sọn hogbe Paulu tọn he to Galatianu lẹ 2:20 mẹ lẹ mẹ?
9 Paulu sọ yise dọ Jiwheyẹwhe yiwanna emi sisosiso, na e do Jesu hlan nado wá kú do ota emitọn mẹ wutu. (Hia Galatianu lẹ 2:20.) Doayi nue hogbe tulinamẹ tọn he to vivọnu wefọ lọ tọn lẹ dọ go. Paulu dọmọ: “Visunnu Jiwheyẹwhe tọn . . . yiwanna mi bo ze ede jo do ota ṣie mẹ.” Paulu ma mọdọ emi ko ylan sọmọ bọ Jiwheyẹwhe ma gán yiwanna emi. E ma nọ lẹndọ, ‘N’gán mọnukunnujẹ nuewutu Jehovah do yiwanna mẹmẹsunnu ṣie lẹ mẹ, amọ́ e ma yọnbayi dọ ni yiwanna mi.’ Paulu flinnu Lomunu lẹ dọmọ: “Dile mí gbẹ́ to ylandonọ yin, Klisti kú na mí. (Lom. 5:8) Owanyi Jiwheyẹwhe tọn ma do dogbó!
10. Etẹwẹ mí plọn sọn Lomunu lẹ 8:38, 39 mẹ?
10 Hia Lomunu lẹ 8:38, 39. Paulu kudeji mlẹnmlẹn dọ owanyi Jiwheyẹwhe tọn tindo huhlọn. E wlan dọ nudepope ‘ma na penugo nado klan mí sọn owanyi Jiwheyẹwhe tọn go.’ Paulu yọ́n lehe Jehovah yí homẹfa do yinuwa hẹ akọta Islaeli tọn do. E sọ yọ́n lehe Jehovah do lẹblanu hia ewọ lọsu do. Mí gán bayi bladopọ nue Paulu dọ lẹ tọn dole, ‘To whenuena e yindọ Jehovah do Visunnu etọn titi hlan nado kú do ota ṣie mẹ, be n’sọ do whẹwhinwhẹ́n depope nado do ayihaawe gando owanyi etọn go a?’—Lom. 8:32.
Nue yin nujọnu na Jiwheyẹwhe wẹ nue mí to wiwà todin po nue mí na wà to sọgodo lẹ po, e ma yin nue mí ṣiwà wayi lẹ (Pọ́n hukan 11tọ) *
11. Dile etlẹ yindọ Paulu waylando delẹ taidi dehe yin nùdego to 1 Timoti 1:12-15 mẹ lẹ, naegbọn e do kudeji dọ Jiwheyẹwhe yiwanna emi?
11 Hia 1 Timoti 1:12-15. Na nugbo tọn, nue Paulu ṣiwà wayi lẹ dona ko nọ dotukla ẹ to whedelẹnu. E ylọ ede dọ “tọ́ntlọ́ngbọ́n” to ylandonọ lẹ mẹ, podọ enẹ ma paṣa mí! Whẹpo Paulu do wá plọn nugbo lọ, e nọ to homẹkẹndo Klistiani lẹ mapote sọn tòdaho de mẹ jẹ tòdaho devo mẹ, bo nọ bẹ delẹ do gànpamẹ bosọ nọ blavo nado nọgodona hùhù devo lẹ tọn. (Owalọ 26:10, 11) Be a gán yí nukun homẹ tọn do pọ́n lehe e na ko nọ ṣí na Paulu whenue e dukosọna Klistiani jọja de he e kẹalọyi dọ mẹjitọ etọn lẹ ni yin hùhù ya? Nuṣiwa Paulu tọn lẹ vẹna ẹn, amọ́ e yọnẹn dọ emi ma gán sọ diọ nue ko jọ wayi lẹ. E kẹalọyi dọ Klisti kú do ota emitọn mẹ, podọ e wlan po jidide po dọmọ: “Gbọn nukundagbe majẹhẹ Jiwheyẹwhe tọn dali wẹ yẹn do yin nuhe yẹn yin.” (1 Kọl. 15:3, 10) Etẹwẹ mí plọn sọn e mẹ? Nọ kẹalọyi dọ Klisti kú do ota towe mẹ bo hùnali dote na we nado biọ haṣinṣan nujọnu tọn, podọ mẹdetiti tọn de mẹ hẹ Jehovah. (Owalọ 3:19) Nue yin nujọnu na Jiwheyẹwhe wẹ nue mí to wiwà todin po nue mí na wà to sọgodo po, e ma yin nue mí ṣiwà wayi lẹ, vlavo mí ko yin Kunnudetọ Jehovah tọn de to ojlẹ lọ mẹ kavi lala.—Isa. 1:18.
12. Nawẹ hogbe he tin to 1 Johanu 3:19, 20 mẹ lẹ gán gọalọna mí gbọn eyin mí nọ mọ ovọ́ mẹ na míde kavi nọ mọdọ mí ma jẹna owanyi?
12 Eyin a lẹnnupọndo okú Jesu tọn he suahọ ylando towe lẹ tọn ji, a gán dọna dewe dọ ‘N’ma jẹna gbégbò mọnkọ.’ Naegbọn a gán lẹn mọ? Ahun mapenọ mítọn gán doyẹklọ mí bo hẹn mí lẹndọ mí ma vó nude kavi ma jẹna owanyi. (Hia 1 Johanu 3:19, 20.) To ojlẹ mọnkọ lẹ mẹ, mí dona nọ flindọ “Jiwheyẹwhe klohu ahun mítọn.” Mí dona hẹn míde kudeji dọ Otọ́ olọn mẹ tọn mítọn yiwanna mí sisosiso bosọ nọ jlo nado jona mí. Nado mọnukunnujẹ nukun he Jehovah nọ yí do pọ́n mí mẹ ganji, mí dona nọ plọn Ohó etọn, nọ hodẹ̀ bosọ nọ dogbẹ́ hẹ omẹ nugbonọ etọn lẹ to gbesisọ mẹ. Naegbọn onú ehelẹ wiwà do yin nujọnu sọmọ?
LEHE BIBLU PINPLỌN, DẸ̀HIHO PO HỌNTỌN NUGBONỌ LẸ PO GÁN GỌALỌ DO
13. Nawẹ Ohó Jiwheyẹwhe tọn pinplọn gán gọalọna mí gbọn? (Sọ pọ́n apotin lọ “ Lehe Ohó Jiwheyẹwhe Tọn Gọalọna Yé Do.”)
13 Nọ plọn Ohó Jiwheyẹwhe tọn egbesọegbesọ, podọ jẹhẹnu dagbedagbe Jehovah tọn lẹ nasọ họnwun na we dogọ. A na doayi owanyi sisosiso he e do na we go. Ayihamẹlinlẹnpọn do adà Ohó Jiwheyẹwhe tọn de tọn ji egbesọegbesọ gán gọalọna we nado nọ lẹnnupọn ganji bo ‘hẹn nulẹ sọgbe’ to linlẹn po ahun towe po mẹ. (2 Tim. 3:16) Mẹho agun tọn de he nọ yin Kevin bo diahi hẹ numọtolanmẹ nuvọ́nọ-yinyin tọn dọ dọ: “Salmu lẹ 103tọ hihia po ayihamẹlinlẹnpọn deji po ko gọalọna mi nado jla pọndohlan ṣie do bo mọnukunnujẹ nue Jehovah nọ lẹn gando go e nugbonugbo lẹ mẹ.” Eva he yin nùdego wayi dọ dọ: “N’nọ dotana azán dopodopo po ayihamẹlinlẹnpọn do linlẹn Jehovah tọn lẹ ji po. Mọwiwà nọ na mi jijọho ahun mẹ tọn bosọ nọ hẹn yise ṣie lodo.”
14. Nawẹ odẹ̀ gán gọalọna mí gbọn?
14 Nọ hodẹ̀ whẹwhẹ. (1 Tẹs. 5:17) Họntọnjiji nujọnu tọn hẹ gbẹtọvi hatọ de nọ sinai do hodọdopọ ahundopo tọn gbesisọ tọn de ji. Ehe sọ yin nugbo gando họntọnjiji mítọn hẹ Jehovah go. Whenue mí dọ numọtolanmẹ, linlẹn po ahunmẹdunamẹnu mítọn lẹ po na ẹn to odẹ̀ mẹ, mí nọ dohia dọ mí dejido ewọ go, podọ dọ mí yọnẹn dọ e yiwanna mí. (Salm. 94:17-19; 1 Joh. 5:14, 15) Yua he yin nùdego wayi dọ dọ: “Whenue n’to dẹ̀ho, n’nọ tẹnpọn ma nado nọ donù nue n’wà to azán lọ ji lẹ kẹdẹ go. N’nọ dọ nue to ahun mẹ na mi lẹ na Jehovah bo nọ dike ewọ ni yọ́n numọtolanmẹ ṣie lẹ nugbonugbo. Vudevude n’wá mọ Jehovah, e ma yin taidi ogán azọ́nwhé de tọn, amọ́ taidi Otọ́ he yiwanna ovi etọn lẹ nugbonugbo.”—Pọ́n apotin lọ “ Be A Ko Hia Ẹ Ya?”
15. Nawẹ Jehovah nọ do ojlo nujọnu tọn hia to mí mẹ gbọn?
15 Nọ dogbẹ́ hẹ họntọn nugbonọ lẹ; nunina de wẹ yé yin sọn Jehovah dè. (Jak. 1:17) Otọ́ olọn mẹ tọn mítọn do ojlo nujọnu tọn hia to mí mẹ bo na mí whẹndo gbigbọmẹ tọn he bẹ mẹmẹsunnu po mẹmẹyọnnu po he “nọ yiwannamẹ to whelẹponu” lẹ hẹn. (Howh. 17:17) To wekanhlanmẹ etọn hlan Kolosinu lẹ mẹ, Paulu donù Klistiani he nọgodona ẹn delẹ go bo dọ dọ yé yin “asisa homẹmiọnnamẹ tọn daho de.” (Kol. 4:10, 11) Klisti Jesu lọsu tlẹ yọ́n pinpẹn godonọnamẹ he e mọyi sọn họntọn etọn lẹ dè tọn, yèdọ sọn angẹli po gbẹtọ lẹ po dè.—Luku 22:28, 43.
16. Nawẹ họntọn nugbonọ lẹ gán gọalọna mí nado dọnsẹpọ Jehovah dogọ gbọn?
16 Be a to alemọyi to gigọ́ mẹ sọn nunina Jehovah tọn he yin họntọn nugbonọ lẹ dè ya? Ahunmẹdunamẹnu mítọn lẹ mimá hẹ họntọn he whèwhín de ma yin ohia madogán tọn; kakatimọ e gán bayi hihọ́ na mí. Lẹnnupọndo nue James he go mí donù wayi dọ ji dọmọ: “Họntọnjiji dagbe hẹ Klistiani he whèwhín lẹ ko gọalọna mi taun. Whenue linlẹn agọ̀ lẹ húagbọ́ mi, họntọn vivẹ́ ehelẹ nọ yí homẹfa do dotoaina mi bo nọ flinnu mi dọ yé yiwanna mi. N’nọ mọ owanyi po mẹtọnhopọn Jehovah tọn po to aliho he mẹ yé nọ yinuwa hẹ mi te mẹ.” Lehe e yin nujọnu do sọ dọ mí ni jihọntọn pẹkipẹki hẹ mẹmẹsunnu po mẹmẹyọnnu mítọn lẹ po bosọ hẹn haṣinṣan enẹ go!
GBỌṢI OWANYI JEHOVAH TỌN MẸ
17, 18. Mẹnu wẹ mí dona dotoaina, podọ etẹwutu?
17 Satani jlo dọ mí ni hònúpla to vivẹnudido mítọn nado wà nue sọgbe mẹ. E jlo dọ mí ni yise dọ Jehovah ma yiwanna mí, podọ dọ mí ma jẹna whlẹngán. Amọ́ dile mí ko mọ do, lalo pete wẹ enẹ yin.
18 Jehovah yiwanna we. A họakuẹ taun to nukun etọn mẹ. Eyin a nọ setonuna ẹn, a na “gbọṣi owanyi etọn mẹ” kakadoi dile e yindo na Jesu. (Joh. 15:10) Enẹwutu, ma dotoaina Satani kavi na ahun towe he nọ gblewhẹdo we blo. Kakatimọ, nọ dotoaina Jehovah he nọ mọ dagbe to dopodopo mítọn mẹ. Kudeji dọ ewọ “nọ hùnhomẹ do omẹ etọn lẹ go” kakajẹ hiẹ lọsu ji!
OHÀN 141 Ogbẹ̀ Yin Nunina He Jiawu De
^ huk. 5 E nọ vẹawuna delẹ to mẹmẹsunnu po mẹmẹyọnnu mítọn lẹ po mẹ nado yise dọ Jehovah gán wá yiwanna yé. To hosọ ehe mẹ, mí na dọhodo nuewutu mí gán kudeji dọ Jehovah yiwanna dopodopo mítọn ji. Mí nasọ gbadopọnna lehe mí gán duto ayihaawe depope he mí gán do gando owanyi etọn na mí go ji do.
^ huk. 2 Yinkọ delẹ ko yin didiọ.
^ huk. 67 ZẸẸMẸ YẸDIDE LẸ TỌN: To dai, Paulu dohomẹkẹn Klistiani lẹ bo do susu yetọn hlan gànpamẹ. To whenue e wá kẹalọyi nuhe Jesu wà do ota etọn mẹ, e bayi diọdo lẹ, bo na tuli mẹmẹsunnu etọn lẹ, yèdọ mẹhe delẹ to yé mẹ sọgan ko yin hẹnnumẹ mẹhe e dohomẹkẹn lẹ tọn.
