1, 2. Apajlẹ tẹwẹ gọalọna mí nado mọnukunnujẹ nue yin didọ to 1 Pita 2:21 mẹ lẹ mẹ?

MÍ NI dọ dọ a to pipli de mẹ he to zọnlinzin gbọn aliho ogbọ̀nnọ he dídí de ji. Anademẹtọ numimọnọ de wẹ to nukọnna mì. Dile e to zọnlinzin, afọhù kavi afọdòmẹ etọn lẹ nọ tọ́n to ogbọ̀n lọ mẹ. E wá jẹ fide bọ a masọ mọ anademẹtọ lọ ba! Amọ́, ahun towe ma gbàdo. Kakatimọ, hiẹ po mẹhe to pipli lọ mẹ lẹ po hodo afọdòmẹ anademẹtọ lọ tọn lẹ pẹkipẹki dile mì penugo do!

² Taidi Klistiani nugbo lẹ, to linlẹn de mẹ, mí to zọnlinzin gbọn ali ogbọ̀nnọ he dídí de ji, enẹ wẹ aihọn ylankan ehe. Mí dopẹ́ dọ Jehovah ko wleawu Anademẹtọ pipé de tọn na mí, yèdọ Visunnu etọn Jesu Klisti he sin afọdòmẹ mí gán hodo pẹkipẹki. (1 Pita 2:21) Sọgbe hẹ owe alọdlẹndonu tọn Biblu tọn de, tofi Pita yí Jesu jlẹdo anademẹtọ de go. Kẹdẹdile anademẹtọ de nọ jo afọhù lẹ do whenue e to zọnlinzin do, Jesu ko jo afọdòmẹ etọn lẹ do ehe mí sọgan hodo. Mì gbọ mí ni gbadopọnna kanbiọ atọ̀n delẹ gando afọdòmẹ Jesu tọn lẹ hihodo go—etẹwẹ e zẹẹmẹdo nado hodo afọdòmẹ Jesu tọn lẹ? Naegbọn mí dona wàmọ? Podọ, nawẹ mí gán wàmọ gbọn?

3. Etẹwẹ e zẹẹmẹdo nado hodo afọdòmẹ mẹde tọn lẹ?

³ Etẹwẹ e zẹẹmẹdo nado hodo afọdòmẹ mẹde tọn lẹ? To whedelẹnu to Biblu mẹ, hogbe lọ lẹ “zinzọnlin” gọna “afọ” nọ dlẹnalọdo gbẹzan he mẹde zan. (Jen. 6:9; Howh. 4:26) Apajlẹ he mẹde zedai gán yin yiyijlẹdo afọhù kavi afọdòmẹ mẹde tọn lẹ go ehe nọ sọawuhia dile e to zọnlinzin. Enẹwutu, nado hodo  afọdòmẹ mẹde tọn lẹ zẹẹmẹdo nado hodo apajlẹ mẹlọ tọn.

4. Etẹwẹ e zẹẹmẹdo nado hodo afọdòmẹ Jesu tọn lẹ?

⁴ Todin, etẹwẹ e zẹẹmẹdo nado hodo afọdòmẹ Jesu tọn lẹ? Do glido, e zẹẹmẹdo nado hodo apajlẹ etọn. Na taun tọn, to wefọ he ji hosọ mítọn sinai do mẹ, apajlẹ dagbe he Jesu zedai bo doakọnna yajiji ji wẹ apọsteli Pita to hodọ do; amọ́ aliho susu devo lẹ tin he mẹ mí gán hodo apajlẹ Jesu tọn te. (1 Pita 2:18-25) Na nugbo tọn, gbẹzan Jesu tọn blebu, enẹ wẹ nue e dọ po nue e wà lẹpo po wẹ yin apajlẹ de na mí bọ mí na hodo.

5. Be gbẹtọvi mapenọ lẹ gán hodo apajlẹ pipé Jesu tọn nugbonugbo a? Bayi zẹẹmẹ.

⁵ Taidi gbẹtọvi mapenọ lẹ, be mí gán hodo apajlẹ Jesu tọn nugbonugbo a? Gbau. Flindọ Pita dotuhomẹna mí nado nọ “hodo afọdòmẹ [Jesu tọn] lẹ pẹkipẹki,” e ma yin to aliho pipé mẹ. Eyin mí nọ hodo afọdòmẹ etọn lẹ po sọwhiwhe po bo nọ wà nue go mí pé lẹpo taidi gbẹtọvi mapenọ lẹ, be mí to tonusena nue apọsteli Johanu dọ lẹ niyẹn. E dọmọ: “To zọnlinzin zọnmii kẹdẹdile omẹ enẹ [Jesu] zinzọnlin do.”—1 Joh. 2:6.

6, 7. Naegbọn mí gán dọ dọ afọdòmẹ Jesu tọn lẹ hihodo na dọ̀n mí sẹpọ Jehovah dogọ?

⁶ Afọdòmẹ Jesu tọn lẹ hihodo na dọ̀n mí sẹpọ Jehovah dogọ. Naegbọn mí gán dọ mọ? Tintan, Jesu ze apajlẹ ayidego tọn de dai na nue dù gbẹninọ to aliho he nọ hẹn homẹ Jiwheyẹwhe tọn hùn mẹ. (Joh. 8:29) Enẹwutu, eyin mí nọ hodo afọdòmẹ Jesu tọn lẹ, mí na hẹn homẹ Jehovah tọn hùn. Podọ, mí gán kudeji dọ Otọ́ olọn mẹ tọn mítọn na dọnsẹpọ mẹhe nọ dovivẹnu vẹkuvẹku nado yin họntọn etọn lẹ.—Jak. 4:8.

⁷ Awetọ, Jesu hodo apajlẹ Otọ́ etọn tọn to aliho pipé mẹ. Abajọ Jesu gán dọ dọ:  “Mẹdepope he mọ mi ko mọ Otọ́ ga.” (Joh. 14:9) Mílọsu gán do jẹhẹnu Jesu tọn nkọ lẹ hia bo nọ yinuwa hẹ mẹdevo lẹ dile ewọ nọ wà do. Di apajlẹ, e do lẹblanu hia pòtọnọ de, bo vẹawu nawe de he to awutu sinsinyẹn jẹ, bosọ hò mẹhe to aluẹmẹ lẹ tọn pọ́n. Eyin mí hodo apajlẹ Jesu tọn, be mí to apajlẹ Jehovah lọsu tọn hodo niyẹn. (Malku 1:40, 41; 5:25-34; Joh. 11:33-35) Lehe mí to apajlẹ Jehovah tọn hodo sọ, mọ wẹ mí na dọnsẹpọ ẹ dogọ do niyẹn.

8. Naegbọn afọdòmẹ Jesu tọn lẹ hihodo na gọalọna mí nado “gbawhàn” aihọn tọn?

⁸ Afọdòmẹ Jesu tọn lẹ hihodo nọ gọalọna mí ma nado yin ayihafẹsẹna gbọn aihọn ylankan ehe dali. To ozán godo tọn he Jesu yizan to aigba ji mẹ, e gán dọ dọ: “N’ko gbawhàn aihọn tọn.” (Joh. 16:33) Nue dọ e te wẹ yindọ, emi gbẹ́ nado na dotẹnmẹ nulẹnpọn, yanwle po nuyiwa aihọn ehe tọn lẹ po nado yinuwado emi ji. Jesu ma wọnji nuhewutu e do yin didohlan aigba ji go pọ́n gbede, enẹ wẹ nado klan yinkọ Jehovah tọn do wiwe. Bọ mílẹ lo? To aihọn ehe mẹ, nususu wẹ gán fẹayihasẹna mí. Amọ́, taidi Jesu eyin mí nọ ze ayiha do ojlo Jehovah tọn wiwà ji, mílọsu na “gbawhàn” aihọn tọn ga.—1 Joh. 5:5.

9. Etẹwẹ mí dona wà nado gbọṣi ali ogbẹ̀ madopodo tọn lọ ji?

⁹ Afọdòmẹ Jesu tọn lẹ hihodo nọ dekọtọn do ogbẹ̀ madopodo mẹ. Whenue dẹpẹ adọkunnọ de kàn nue e dona wà nado mọ ogbẹ̀ madopodo sè, Jesu gblọn dọ: “Wá bo lẹzun hodotọ ṣie.” (Mat. 19:16-21) Jesu dọna Ju delẹ he ma yise dọ ewọ wẹ Klisti lọ dọmọ: “Lẹngbọ ṣie lẹ . . . nọ hodo mi. Yẹn na na yé ogbẹ̀ madopodo.” (Joh. 10:24-29) Jesu dọna Nikodẹmi he yin hagbẹ Sanhedlin tọn de he wá do ojlo hia to nuplọnmẹ etọn lẹ mẹ dọ mẹhe ‘do yise hia to emi mẹ’ lẹ na “tindo ogbẹ̀ madopodo.” (Joh. 3:16) Mí nọ do yise hia to Jesu mẹ eyin mí yinuwa sọgbe hẹ nue e plọnmẹ to ohó po apajlẹ etọn po mẹ lẹ. Eyin mí wàmọ, mí na gbọṣi ali ogbẹ̀ madopodo tọn lọ ji.—Mat. 7:14.

10. Etẹwẹ e zẹẹmẹdo nado “wá yọ́n” Jesu dogọ? (Joh. 17:3)

¹⁰ Whẹpo mí nido penugo bo hodo afọdòmẹ Jesu tọn lẹ pẹkipẹki, mí dona wá yọ́n ewọ whẹ́. (Hia Johanu 17:3.) Nado “wá yọ́n” Jesu yin nuyiwa de he ma nọ doalọte. Mí dona fọ́n bo to akọ̀ jẹ hẹ ẹ dogọ, enẹ wẹ nado plọnnu gando jẹhẹnu etọn lẹ, linlẹn etọn lẹ po nujinọtedo he e hodo lẹ po go. Mahopọnna lehe e ko dẹnsọ bọ mí to nugbo lọ mẹ, mí dona zindonukọn bo to vivẹnudo nado wá yọ́n Jehovah po Visunnu etọn po.

11. Etẹwẹ owe Wẹndagbe tọn ẹnẹ lẹ bẹhẹn?

¹¹ Nado gọalọna mí na mí nido wá yọ́n Visunnu etọn, Jehovah gbọn owanyi dali dike bọ owe Wẹndagbe tọn ẹnẹ lẹ yin kinkando  Ohó etọn mẹ. Owe Wẹndagbe tọn lẹ bẹ kandai whenuho tọn hẹn gando gbẹzan po lizọnyizọn Jesu tọn po go. Kandai enẹ donù nue Jesu dọ, nue e wà po numọtolanmẹ etọn lẹ po go. Owe ẹnẹ ehelẹ gọalọna mí nado yí ‘sọwhiwhe do lẹnnupọndo’ apajlẹ Jesu tọn ji. (Heb. 12:3) Na nugbo tọn, yé bẹ afọdòmẹ he Jesu jodo lẹ hẹn. Enẹwutu, eyin mí nọ gbadopọnna owe Wẹndagbe tọn lẹ, mí gán fọ́n bo to Jesu yọnẹn dogọ. Taidi kọdetọn de, mí gán hodo afọdòmẹ etọn lẹ pẹkipẹki.

12. Nawẹ mí gán mọaleyi to gigọ́ mẹ sọn owe Wẹndagbe tọn lẹ mẹ gbọn?

¹² Nado mọaleyi sọn owe Wẹndagbe tọn lọ lẹ mẹ to gigọ́ mẹ, e ma ko pé nado nọ hia yé poun. Mí dona nọ yí whenu zan nado plọn yé po sọwhiwhe po bo nọ lẹnayihamẹpọn do yé ji sisosiso. (Yijlẹdo Jọṣua 1:8 go, Odò.) Mì gbọ mí ni dọhodo ayinamẹ awe delẹ ji he gán gọalọna mí nado nọ lẹnayihamẹpọn do owe Wẹndagbe tọn lẹ ji bosọ nọ yí nue mí plọn sọn yé mẹ lẹ do yizan mẹ.

13. Nawẹ a gán hẹn kandai Wẹndagbe tọn lẹ tin togbẹ̀ gbọn?

¹³ Tintan, hẹn kandai Wẹndagbe tọn lọ tin togbẹ̀. Yí nukun homẹ tọn do mọ bo sè nue to jijọ lẹ bosọ ze dewe do otẹn lọ mẹ. Na e nido pà we, bayi dodinnanu delẹ to azọ́nwanu nupinplọn tọn he titobasinanu Jehovah tọn wleawuna lẹ mẹ. Gbadopọnna lẹdo hodidọ lọ tọn, enẹ wẹ nujijọ he jẹnukọn kavi dehe bọdo adà he plọn a te lọ go lẹ. Dín nudọnamẹ he bayi zẹẹmẹ do mẹhe po nọtẹn he go kandai lọ donù lẹ po ji. Yí kandai he plọn a te lọ jlẹdo kandai he dọhodo nujijọ dopolọ ji to owe Wẹndagbe tọn devo mẹ go. To whedelẹnu, Wẹndagbe-kantọ de nọ yí nudọnamẹ họakuẹ de dogọ to kandai etọn mẹ ehe Wẹndagbe-kantọ devo jodo.

14, 15. Nawẹ mí gán yí nue kandai Wẹndagbe tọn lẹ dọ do yizan mẹ to gbẹzan mítọn mẹ gbọn?

¹⁴ Awetọ, nọ yí kandai Wẹndagbe tọn lẹ do yizan mẹ to gbẹzan towe mẹ. (Joh. 13:17) Whenue a ko yí sọwhiwhe do plọn kandai  Wẹndagbe tọn de godo, nọ kanse dewe dọ: ‘Be nuplọnmẹ de to kandai ehe mẹ he n’gán yizan to gbẹzan ṣie mẹ ya? Nawẹ n’gán yí kandai ehe zan nado gọalọna mẹdevo gbọn?’ Tẹnpọn bo lẹnnupọndo omẹ tangan de ji, podọ to ojlẹ sisọ mẹ yí owanyi po zinzin po do má nuhe a plọn lọ hẹ ẹ.

¹⁵ Mì gbọ mí ni gbadopọnna apajlẹ de he do lehe mí gán yí ayinamẹ awe ehelẹ do yizan mẹ do hia. Mí na dọhodo kandai asuṣiọsi wamọnọ he go Jesu doayi to tẹmpli mẹ lọ tọn ji.

16. Bayi zẹẹmẹ nujijọ he yin kinkandai to Malku 12:41 mẹ tọn.

¹⁶ Hẹn kandai lọ tin togbẹ̀. (Hia Malku 12:41.) Yí nukun homẹ tọn do mọ nujijọ lọ. Nisan 11tọ owhe 33 W.M. wẹ, yèdọ azán kleun delẹ jẹnukọnna okú Jesu tọn. Jesu ko yí whenu susu zan to azán lọ gblamẹ nado plọnmẹ to tẹmpli mẹ. Sinsẹ̀nnọ agọjẹdomẹtọ lẹ ma hẹn nulẹ bọawu na ẹn. Jẹnukọnna enẹ, delẹ to yé mẹ ko mọhodọdo aṣẹpipa etọn go. Mẹdevo lẹ ko tẹnpọn nado kàn kanbiọ gigẹdẹ lẹ sè e. (Malku 11:27-33; 12:13-34) Todin, Jesu sẹtẹn yì awà tẹmpli lọ tọn devo ji. To finẹ, yèdọ fie gán ko nọ yin yiylọdọ Awánu Yọnnu lẹ tọn, e gán mọ adọkun potin lẹ he yin tito do adó awánu lọ tọn lẹ go. E sinai bo jẹ mẹlẹ pọ́n ji dile yé to nunina bayi do adọkun potin lẹ mẹ. E mọ bọ adọkunnọ lẹ to abọgan-kuẹ susu dlan do yé mẹ. Vlavo, e sẹpọ adọkun potin lọ lẹ sọmọ bo gán sè nudidọ abọgan-kuẹ lọ lẹ tọn dile yé to fiflẹ jẹ apotin lọ lẹ mẹ.

17. Etẹwẹ asuṣiọsi wamọnọ he yin nùdego to Malku 12:42 mẹ lọ wà?

¹⁷ Hia Malku 12:42. To ojlẹ de godo, nawe de dọ̀n ayidonugo Jesu tọn. Hẹntọnọ de wẹ, yèdọ “asuṣiọsi wamọnọ” de. (Luku 21:2) Gbẹninọ ma bọawu na ẹn paali; e gán ko nọ jẹtukla susu nado mọ dandannu gbẹ̀mẹ tọn lẹ. Amọ́, e yì dopo to apotin lọ lẹ mẹ kọ̀n bo dlan abọgan-kuẹ flinflin awe do e mẹ, yèdọ nue sọgan ko nọma dọnú to whenue yé flẹ jẹ apotin lọ mẹ. Jesu yọ́n nunina he e bayi. E na lẹpta awe, yèdọ akuẹ he whè hugan to ojlẹ lọ mẹ sin awe. Akuẹ enẹ ma tlẹ pé nado họ̀ oblẹnọ dopo tata, yèdọ dopo to ohẹ̀ he pọ̀kuẹ hugan bo nọ yin dùdù lẹ mẹ.

18. Sọgbe hẹ Malku 12:43, 44, etẹwẹ Jesu dọ gando nunina asuṣiọsi lọ tọn go?

¹⁸ Hia Malku 12:43, 44. Asuṣiọsi ehe yinuwado Jesu ji sisosiso. Enẹwutu, e ylọ devi etọn lẹ bo dọ̀n ayidonugo yetọn wá asuṣiọsi lọ ji, bo dọmọ: ‘Asuṣiọsi wamọnọ ehe dlan do e mẹ hú mẹhe pò lẹpo.’ Enẹgodo, e dọmọ: “Yemẹpo [titengbe adọkunnọ lẹ] wẹ dlan do e mẹ sọn lánkan yetọn lẹ mẹ, ṣigba ewọ, sọn matindo etọn mẹ, dlan nuhe e tindo lẹpo, yèdọ nutindo gbẹ̀mẹ tọn etọn lẹpo do e mẹ.” Whenue asuṣiọsi nugbonọ enẹ ze akuẹ godo tọn he pò to e si jo to gbenẹgbe, e deji dọ Jehovah na penukundo emi go.—Salm. 26:3.

19. Onú titengbe tẹwẹ mí gán plọn sọn nue Jesu dọ gando asuṣiọsi wamọnọ lọ go lẹ mẹ?

¹⁹ Yí kandai lọ do yizan mẹ to gbẹzan towe mẹ. Kanse dewe dọ, ‘Etẹwẹ n’gán plọn sọn nue Jesu dọ gando asuṣiọsi wamọnọ lọ go lẹ mẹ?’ Lẹnnupọndo asuṣiọsi enẹ ji. Ayihaawe ma tin dọ e na ko jlo nado nanú Jehovah humọ. Amọ́, e wà nue go e pé; e na Jehovah dagbe hugan etọn. Podọ, Jesu yọnẹn dọ nunina etọn họakuẹ to nukun Otọ́ emitọn tọn mẹ. Enẹwutu, nuplọnmẹ titengbe de die na mí: Homẹ Jehovah tọn nọ hùn eyin mí na ẹn dagbe hugan mítọn, yèdọ sinsẹ̀nzọn he mí yí ahun po alindọn mítọn lẹpo po do wà. (Mat. 22:37; Kol. 3:23) Homẹ Jehovah tọn nọ hùn eyin e mọ bọ mí to nue go mí pé lẹpo wà! Nunọwhinnusẹ́n ehe gando whenu po huhlọn he mí gán yizan na sinsẹ̀n-bibasi mítọn po go, ehe bẹ lizọnyizọn lọ po opli lẹ po hẹn.

20. Nawẹ a gán yí nue mí plọn sọn kandai he gando asuṣiọsi wamọnọ lọ go mẹ do gọalọna mẹdevo lẹ gbọn? Na apajlẹ.

 ²⁰ Nawẹ a gán yí nue a plọn sọn kandai he gando asuṣiọsi wamọnọ lọ go mẹ do gọalọna mẹdevo lẹ gbọn? Dovivẹnu bo lẹnnupọndo omẹ tangan delẹ ji he sọgan mọ tuli yí eyin yè vọ́ jide na yé dọ vivẹnudido yetọn lẹ nọ hẹn homẹ Jehovah tọn hùn. Di apajlẹ, be a yọ́n mẹmẹyọnnu mẹhomẹ de he gán nọ do numọtolanmẹ whẹhuhu tọn kavi nọ mọ ovọ́ mẹ na ede na e masọ do agbasalilo dagbe kavi huhlọn nado wà susu to lizọnyizọn lọ mẹ dile e ko nọ wà do wayi ya? Kavi a gán lẹnnupọndo mẹmẹsunnu de he to azọ̀n sinsinyẹn jẹ ji bo gbọjọ na e ma gán sọ nọ yì opli lẹpo to Plitẹnhọ mẹ wutu? Nọ gọalọna omẹ mọnkọ lẹ gbọn nuhe “yọ́n na mẹjlọdote” lẹ didọna yé dali. (Efe. 4:29) Má nuplọnmẹ tulinamẹ tọn he mí plọn sọn kandai asuṣiọsi wamọnọ lọ tọn mẹ lẹ hẹ yé. Hogbe tulinamẹ tọn towe lẹ gán vọ́ jide na yé dọ homẹ Jehovah tọn nọ hùn eyin mí na ẹn dagbe hugan mítọn. (Howh. 15:23; 1 Tẹs. 5:11) Eyin a nọ pà mẹdevo lẹ na dagbe hugan yetọn he yé na Jehovah mahopọnna lehe e gán taidi nue whè sọ, be afọdòmẹ Jesu tọn lẹ hodo wẹ a te pẹkipẹki niyẹn.

21. Etẹwẹ a magbe nado wà?

²¹ Lehe mí dopẹ́ do sọ dọ kandai Wẹndagbe tọn lẹ bẹ nudọnamẹ susu hẹn gando gbẹzan Jesu tọn go, ehe nọ gọalọna mí nado hodo apajlẹ etọn bo hodo afọdòmẹ etọn lẹ pẹkipẹki! Naegbọn mí ma na bayi tito oplọn mẹdetiti tọn kavi Sinsẹ̀n-Bibasi Whẹndo tọn he sinai do owe Wẹndagbe tọn lẹ ji de tọn? Mì gbọ mí ni flindọ, nado mọaleyi to gigọ́ mẹ sọn nupinplọn mọnkọ de mẹ, mí dona hẹn kandai lọ lẹ tin togbẹ̀ bosọ yí nue mí plọn to yé mẹ lẹ do yizan mẹ to gbẹzan mítọn mẹ. Gbọnvona apajlẹ nue Jesu wà lẹ tọn hihodo, mí sọ dona nọ dotoaina nuhe e dọ lẹ. To hosọ he bọdego mẹ, mí na gbadopọnna nue mí gán plọn sọn hogbe godo tọn he Jesu dọ whẹpo do kú lẹ mẹ.