“Kunnudetọ lọ lẹ nọ jọmẹ hẹ gbẹtọ lẹ podọ hẹ avún ṣie lẹ ga. To gbèdopo, Elaine he to ote to apá na kẹkẹvi lọ na akla delẹ avún ṣie awe lẹ. Enẹgodo, whedepopenu he mí to zọnlinzin bo sẹpọ kẹkẹvi lọ, avún lọ lẹ nọ jlo na yì Kunnudetọ lọ lẹ dè nado mọ akla yí.

“To osun delẹ godo, avún lọ lẹ yiwanna akla he yé nọ mọyi lẹ, bọ yẹnlọsu sọ yiwanna hodọdopọ hẹ Kunnudetọ Jehovah tọn lẹ. Amọ́, n’ma nọ jlo na dọho susu hẹ yé. N’ko do owhe 70 linlán to ojlẹ lọ mẹ, podọ, n’ma yọ́n nuhe Kunnudetọ lẹ yise lẹ taun. Na sinsẹ̀n Plọtẹstant tọn lẹ ko hẹn mi jẹflumẹ wutu, n’lẹndọ e pọnte na mi hugan dọ yẹnlọsu ni plọn Biblu na dee.

“To ojlẹ lọ mẹ, n’dukosọ hẹ Kunnudetọ devo lẹ he to ote to kẹkẹvi kunnudide tọn yetọn lẹ pá to awà tòpẹvi lọ tọn devo ji. Yelọsu jọmẹ taun. Yé nọ tẹnpọn nado na gblọndo sinai do Biblu ji lẹ na kanbiọ ṣie lẹpo, podọ taidi kọdetọn de, n’nọ dejido yé go dogọ.

“To gbèdopo, Elaine kanse mi dọ, ‘Be a yọnẹn dọ nunina de wẹ kanlin lẹ yin sọn Jiwheyẹwhe dè ya?’ N’gblọn dọ, ‘Gbau!’ Enẹgodo, Elaine hia Isaia 11:6-9 na mi. Nulẹ diọ sọn gbenẹgbe, dile etlẹ yindọ n’gbẹ́ to awuwhle nado kẹalọyi owe lẹ.

“To azán he bọdego lẹ gblamẹ, n’yiwanna hodọdopọ sisosiso he ka to glido he n’do hẹ Elaine po asu etọn Brent po lẹ. Yé na mi ayinamẹ nado hia Owe Matiu tọn jẹ Owe Owalọ lẹ tọn nado sọgan mọnukunnujẹ nuhe e zẹẹmẹdo nado yin Klistiani nugbo de mẹ. Podọ, nuhe n’wà niyẹn. Enẹgodo, e madẹn bọ n’yigbe nado plọn Biblu hẹ Elaine po Brent po. Ehe to jijọ to gblagbla 2016 tọn mẹ.

“N’nọ to jejeji nado basi oplọn ṣie to sẹmẹsẹmẹ podọ nado yì opli lẹ to Plitẹnhọ mẹ. Dona de wẹ e yin na mi dọ n’to nuhe Biblu dọ nugbonugbo lẹ plọn, podọ ehe hẹn homẹ ṣie hùn. To owhe dopo linlán godo, n’yí baptẹm bo lẹzun Kunnudetọ. Todin n’ko do owhe 79, podọ e họnwun na mi dọ ali dagbe lọ ji wẹ n’te. Jehovah ko dona mi, na e ko hẹn mi wá whẹndo sinsẹ̀n-basitọ klandowiwe etọn lẹ tọn mẹ wutu.”