HOSỌ OPLỌN TỌN 15
OHÀN 124 Yin Nugbonọ to Whepoponu
Hẹn Jidide Towe to Titobasinanu Jehovah Tọn mẹ Lodo Dogọ
“Mì nọ flin mẹhe to anadenanu to ṣẹnṣẹn mìtọn lẹ, mẹhe ko dọ ohó Jiwheyẹwhe tọn na mì lẹ.”—HEB. 13:7.
NUHE E BẸHẸN
Lehe a gán hẹn jidide towe to titobasinanu Jehovah tọn mẹ lodo dog̣ọ do.
1. Nawẹ omẹ Jehovah tọn lẹ yin tito-basina to owhe kanweko tintan whenu gbọn?
WHEDEPOPENU he Jehovah deazọ́nna omẹ etọn lẹ, e nọ donukun dọ yé ni wà ẹ to aliho he to titoji de mẹ. (1 Kọl. 14:33) Di apajlẹ, ojlo Jiwheyẹwhe tọn wẹ yindọ wẹndagbe lọ ni yin lilá to aigba fininọ lẹpo ji. (Mat. 24:14) Jehovah ko de Jesu nado deanana azọ́n enẹ. Jesu nọ hẹn ẹn diun dọ e yin wiwà to aliho he to titoji de mẹ. To owhe kanweko tintan whenu, dile agun lẹ to yinyin didoai to ofi voovo lẹ, mẹho lẹ yin dide nado na anademẹ bosọ deanana nulẹ. (Owalọ 14:23) To Jelusalẹm, hagbẹ anademẹtọ lọ he bẹ apọsteli lẹ po sunnu mẹho lẹ po hẹn, basi nudide delẹ he agun lẹpo na nọ setonuna. (Owalọ 15:2; 16:4) Na yé setonuna anademẹ he yé mọyi lẹ wutu, “agun lẹ to yinyin hinhẹn lodo zọnmii bo to jijideji to sọha mẹ.”—Owalọ 16:5.
2. Bẹsọn 1919, nawẹ Jehovah ko wleawuna anademẹ po núdùdù gbigbọmẹ tọn po na omẹ etọn lẹ gbọn?
2 Jehovah gbẹ́ to tito-basina omẹ etọn lẹ etlẹ yin to egbehe. Bẹsọn 1919, Jesu nọ yí pipli pẹvi sunnu yiamisisadode lẹ tọn de zan nado basi tito na azọ́n yẹwhehodidọ tọn lọ bosọ na núdùdù hodotọ etọn lẹ to gbigbọ-liho. a (Luku 12:42) E họnwun dọ Jehovah to didona azọ́n he wà pipli enẹ te.—Isa. 60:22; 65:13, 14.
3, 4. (a) Na apajlẹ gando ale he mí nọ mọyi go na mí yin tito-basina ganji wutu. (b) Etẹwẹ mí na gbadopọnna to hosọ ehe mẹ?
3 Eyin mí ma ko yin tito-basina dai wẹ, mí ma na penugo bo wà azọ́n he Jesu dena mí lọ dotana. (Mat. 28:19, 20) Di apajlẹ, mí ni dọ dọ aigba-denamẹ depope ma nọ yin dide namẹ; mẹdepope gán fọ́n poun bo dọyẹwheho to fihe jlo e. Wẹnlatọ voovo lẹ gán nọ wazọ́n to aigba-denamẹ delẹ ji pludopludo, to whenuena aigba-denamẹ devo lẹ gán yin vọdona pete. Be a gán lẹnnupọndo ale devo he mí nọ mọyi lẹ ji na mí yin tito-basina wutu ya?
4 Nuhe Jesu wà to aigba ji yin apajlẹ de na nuhe dù lehe e gbẹ́ nọ basi titona mí do to egbehe. To hosọ ehe mẹ, mí na dọhodo apajlẹ he Jesu zedai gọna lehe titobasinanu mítọn nọ hodo apajlẹ enẹ do ji. Mí nasọ gbadopọnna lehe mí gán dohia dọ mí nọ dejido titobasinanu Jehovah tọn go do.
TITOBASINANU MÍTỌN NỌ HODO APAJLẸ JESU TỌN
5. Aliho tẹ mẹ wẹ mí nọ hodo apajlẹ Jesu tọn te? (Johanu 8:28)
5 Jesu plọn nuhe e na dọ po nuhe e na wà po sọn Otọ́ olọn mẹ tọn etọn dè. Titobasinanu Jehovah tọn nọ hodo apajlẹ Jesu tọn bo nọ ze nuplọnmẹ etọn gando walọ dagbe po anademẹ he e nọ namẹ lẹ po go sinai do Ohó Jiwheyẹwhe tọn ji. (Hia Johanu 8:28; 2 Tim. 3:16, 17) Mí nọ mọ nuflinmẹ lẹ whẹwhẹ nado nọ hia Ohó Jiwheyẹwhe tọn bosọ nọ yí i do yizan mẹ. Nawẹ mí nọ mọaleyi sọn ayinamẹ ehe hihodo mẹ gbọn?
6. Aliho titengbe tẹ mẹ wẹ mí nọ mọaleyi te eyin mí plọn Biblu?
6 Mí nọ mọale susu yí eyin mí yí owe mítọn lẹ zan nado plọn Biblu. Di apajlẹ, mí gán yí nuplọnmẹ Biblu tọn lẹ jlẹdo anademẹ he mí nọ mọyi sọn titobasinanu lọ dè lẹ go. Whenue mí mọdọ anademẹ he mí nọ mọyi lẹ sinai do Owe-wiwe lẹ ji, jidide mítọn to titobasinanu Jehovah tọn mẹ nọ jideji.—Lom. 12:2.
7. Owẹ̀n tẹwẹ Jesu lá, podọ nawẹ titobasinanu Jehovah tọn nọ hodo apajlẹ etọn gbọn?
7 Jesu lá “wẹndagbe Ahọluduta Jiwheyẹwhe tọn.” (Luku 4:43, 44) Humọ, Jesu degbena hodotọ etọn lẹ nado dọyẹwheho gando Ahọluduta lọ go. (Luku 9:1, 2; 10:8, 9) To egbehe, mẹhe to gbẹdo hẹ titobasinanu Jehovah tọn lẹpo wẹ nọ lá owẹ̀n Ahọluduta lọ tọn mahopọnna fie yé nọ nọ̀ kavi lehe azọngban he yé tindo lẹ sù sọ.
8. Lẹblanulọkẹyi tẹwẹ yin nina mí?
8 Lẹblanulọkẹyi de wẹ e yin na mí nado má nugbo he gando Ahọluduta Jiwheyẹwhe tọn go hẹ mẹdevo lẹ! Mẹlẹpo ma do lẹblanulọkẹyi mọnkọ. Di apajlẹ, whenue Jesu to aigba ji, e ma na dotẹnmẹ gbigbọ ylankan lẹ nado dekunnu gando ewọ go. (Luku 4:41) To egbehe, whẹpo mẹde nọ jẹ alọdo to lizọnyizọn lọ mẹ hẹ omẹ Jehovah tọn lẹ ji, e dona pegan na lẹblanulọkẹyi enẹ whẹ́. Mí nọ do obá he mẹ mí yọ́n pinpẹn gbégbò he mí do nado dọyẹwheho tọn jẹ hia, eyin mí dekunnu to fidepope podọ to whedepopenu dile mí penugo do. Taidi Jesu, yanwle mítọn wẹ nado do okún nugbo Ahọluduta lọ tọn do ahun mẹlẹ tọn mẹ bosọ húsinna ẹn.—Mat. 13:3, 23; 1 Kọl. 3:6.
9. Nawẹ titobasinanu lọ nọ hẹn oyín Jiwheyẹwhe tọn zun yinyọnẹn gbọn?
9 Jesu hẹn oyín Jiwheyẹwhe tọn zun yinyọnẹn. To odẹ̀ he Jesu hò hlan Otọ́ olọn mẹ tọn etọn de mẹ, e dọmọ: “N’ko hẹn oyín towe zun yinyọnẹn.” (Joh. 17:26) Titobasinanu Jehovah tọn nọ hodo apajlẹ Jesu tọn bo nọ wà nuhe go e pé lẹpo nado gọalọna mẹdevo lẹ nado wá yọ́n oyín Jiwheyẹwhe tọn. Owe Wiwe lẹ—Lẹdogbedevomẹ Aihọn Yọyọ Tọn ko yí adà titengbe de wà to whẹho ehe mẹ nado gọ̀ oyín Jiwheyẹwhe tọn do otẹn he jẹna ẹn mẹ. Todin, Biblu ehe blebu kavi apadewhe etọn tin to ogbè 270 linlán mẹ. To Nudọnamẹ Dogọ A4 po A5 po mẹ to lẹdogbedevomẹ ehe mẹ, a na mọ nudọnamẹ gigọ́ gando lehe oyín Jiwheyẹwhe tọn yin gigọ̀ do otẹn etọn mẹ to Biblu mẹ do go. Nudọnamẹ Dogọ C to Biblu Oplọn tọn mẹ to Flansegbe mẹ, bẹ kunnudenu susu devo lẹ hẹn he dohia dọ yinkọ Jiwheyẹwhe tọn dona sọawuhia whla 237 to Owe-wiwe Glẹki tọn lẹ mẹ.
10. Etẹwẹ a plọn sọn nuhe nawe de he nọ nọ̀ Birmanie dọ lẹ mẹ?
10 Taidi Jesu, mí nọ jlo na gọalọna mẹsusu dile mí penugo do nado wá yọ́n oyín Jiwheyẹwhe tọn. Whenue nawe de he do owhe 67 bo nọ nọ̀ Birmanie plọn dọ Jiwheyẹwhe tindo yinkọ de, e yinuwa deji sọmọ bọ e kùn dasin bo dọmọ: “Whla tintan die to ogbẹ̀ ṣie mẹ he n’sè dọ yinkọ Jiwheyẹwhe tọn nọ yin Jehovah. . . . Onú titengbe hugan he n’ma ko yọnẹn pọ́n wẹ mì plọn mi.” Dile numimọ ehe dohia do, pinplọn nado yọ́n oyín Jiwheyẹwhe tọn gán yinuwado ahunjijlọnọ lẹ ji to aliho sinsinyẹn mẹ.
ZINDONUKỌN NADO NỌ DEJIDO TITOBASINANU MÍTỌN GO
11. Nawẹ mẹho agun tọn lẹ gán nọ do jidide hia to titobasinanu Jehovah tọn mẹ gbọn? (Sọ pọ́n yẹdide lọ.)
11 Etẹwẹ yin dopo to aliho he mẹ mẹho agun tọn lẹ gán dohia dọ yé nọ dejido titobasinanu Jiwheyẹwhe tọn go te? Whenue yé mọ anademẹ lẹ yí, yé dona nọ yí sọwhiwhe do hia ẹ bo wà nuhe go yé pé lẹpo nado yí i do yizan mẹ. Di apajlẹ, gbọnvona dọ yé mọ anademẹ yí gando lehe yé na nọ ze adà voovo opli tọn lẹ donukọnnamẹ gọna lehe yé na nọ hodẹ̀ do agun lọ tamẹ do go, yé sọ mọ anademẹ lẹ yí gando lehe yé na nọ penukundo lẹngbọ Klisti tọn lẹ go do go. Mẹho agun tọn he nọ hodo anademẹ titobasinanu lọ tọn lẹ nọ gọalọna mẹhe to nukunpedomẹgo yetọn glọ lẹ nado to hihọ́ mẹ bosọ mọdọ yè yiwanna yé.
Mẹho agun tọn lẹ nọ gọalọna mí nado dejido anademẹ he titobasinanu Jehovah tọn nọ na mí lẹ go (Pọ́n hukan 11tọ) b
12. (a) Naegbọn mí dona nọ setonuna mẹhe to anadenanu lẹ? (Heblu lẹ 13:7, 17) (b) Naegbọn mí dona nọ ze ayiha do jẹhẹnu mẹhe to anadenanu lẹ tọn ji?
12 Whenue mí mọ anademẹ lẹ yí sọn mẹho lẹ dè, mí dona nọ desọn ojlo mẹ bo nọ hodo yé. Gbọnmọ dali, mí na hẹn ẹn bọawuna mẹhe to anadenanu lẹ nado wazọ́n yetọn. Biblu dotuhomẹna mí nado nọ setonuna mẹhe to anadenanu lẹ bosọ nọ litaina yé. (Hia Heblu lẹ 13:7, 17.) Enẹ gán vẹawu to whedelẹnu. Etẹwutu? Na mapenọ wẹ sunnu ehelẹ yin wutu. Amọ́, eyin mí nọ na ayidonugo awugbopo yetọn lẹ kakati nido yin jẹhẹnu yetọn lẹ, na taun tọn, alọgọna kẹntọ mítọn lẹ wẹ mí te. Gbọnna? Jidide mítọn to titobasinanu Jiwheyẹwhe tọn mẹ na depò, nuhe nukundiọsọmẹtọ mítọn lẹ ka jlo dọ mí ni wà niyẹn. Etẹwẹ mí gán wà na taun tọn nado doayi lalo kẹntọ mítọn lẹ tọn go bosọ gbẹ́ yé dai?
A DIKE MẸDEVO LẸ DEKANPONA JIDIDE TOWE BLO
13. Nawẹ kẹntọ Jiwheyẹwhe tọn lẹ ko tẹnpọn nado kọnmasin do titobasinanu etọn go gbọn?
13 Mẹhe nọ diọnukunsọ Jiwheyẹwhe lẹ nọ wà nuhe go yé pé lẹpo nado dohia dọ nudagbe he titobasinanu etọn to wiwà lẹ yin nuylankan. Di apajlẹ, mí ko plọn to Owe-wiwe lẹ mẹ dọ Jehovah nọ donukun dọ sinsẹ̀n-basitọ etọn lẹ ni wé to agbasa-liho, to walọyizan-liho podọ to gbigbọ-liho. Ewọ nọ biọ dọ mẹdepope he zindonukọn to gbẹzan mawé de zinzan mẹ bo ma lẹnvọjọ ni yin didesẹ sọn agun mẹ. (1 Kọl. 5:11-13; 6:9, 10) Mí nọ setonuna gbedide Owe-wiwe tọn enẹ. Amọ́, nukundiọsọmẹtọ mítọn lẹ nọ dovivẹnu nado yí ehe zan sọta mí bo nọ sawhẹdokọna mí dọ mí yin hẹngogonọ, nọ mọhodọdomẹgo bo masọ nọ yiwanna gbẹtọ.
14. Mẹnu wẹ yin asisa lalo he nọ yin dido dokọna titobasinanu lọ lẹ tọn?
14 Nọ doayi asisa mẹgbeyinyan lọ lẹ tọn go. Satani Lẹgba wẹ to godona lalo mọnkọ lẹ. Ewọ wẹ “otọ́ lalo tọn.” (Joh. 8:44; Jen. 3:1-5) Enẹwutu, mí dona donukun dọ Satani na yí mẹhe to adà etọn mẹ lẹ zan nado fúnfún lalo he yin dido dokọna titobasinanu Jehovah tọn lẹ pé. Nuhe jọ to owhe kanweko tintan whenu niyẹn.
15. Etẹwẹ nukọntọ sinsẹ̀n tọn lẹ wà na Jesu po hodotọ etọn lẹ po?
15 To owhe kanweko tintan whenu, mẹhe to adà Satani tọn mẹ lẹ dolalo susu gando azọ́njiawu he Visunnu pipé Jiwheyẹwhe tọn wà lẹ go. Di apajlẹ, nukọntọ sinsẹ̀n tọn lẹ dọ dọ “ogán aovi lẹ tọn” wẹ nọ na huhlọn Jesu nado yàn aovi lẹ jẹgbonu. (Malku 3:22) Whenue Jesu to whẹnukọn, nukọntọ sinsẹ̀n tọn lẹ sawhẹdokọna ẹn dọ e zánnu bo gbidikọna gbẹtọgun lẹ nado biọ dọ ewọ ni yin hùhù. (Mat. 27:20) To nukọn mẹ, dile hodotọ Klisti tọn lẹ to wẹndagbe lọ lá, nukundiọsọmẹtọ yetọn lẹ ‘fọnadán bo yinuwado omẹ lọ lẹ ji to aliho agọ̀ mẹ’ nado diọnukunsọ Klistiani enẹlẹ. (Owalọ 14:2, 19) Atọ̀họ̀-Nuhihọ́ lọ Tọn 1er décembre 1998 tọn basi zẹẹmẹ dọmọ: “Gbọnvona dọ Ju nukundiọsọmẹtọ lẹ lọsu gbẹ́ wẹndagbe lọ dai, yé sọ jẹ whẹsadokọnamẹ lẹ hẹn gbayipe ji bo nọ tẹnpọn nado fọ́n nuvẹun Kosi lẹ tọn dote sọta Klistiani lẹ.”
16. Etẹwẹ mí dona nọ flin eyin mí sè otàn lalo lẹ?
16 E ma yin owhe kanweko tintan whenu kẹdẹ wẹ Satani dolalo te gba. To egbehe, e gbẹ́ to “aigba fininọ lẹpo klọ.” (Osọ. 12:9) Eyin a sè hodidọ agọ̀ lẹ gando titobasinanu lọ kavi mẹmẹsunnu he to anadenanu lẹ go, bo flin lehe kẹntọ Jiwheyẹwhe tọn lẹ yinuwa hẹ Jesu po devi owhe kanweko tintan whenu tọn lẹ po do. To egbehe, omẹ Jehovah tọn lẹ nọ pehẹ homẹkẹn bọ mẹlẹ sọ nọ dolalo dokọna yé dile Biblu dọ dọdai etọn do pẹẹ. (Mat. 5:11, 12) Otàn lalo lẹ ma na hẹn mí buali eyin mí nọ doayi asisa yetọn go bosọ nọ yinuwa to afọdopolọji. Afọdide tẹwẹ mí dona ze?
17. Etẹwẹ mí gán wà na otàn lalo lẹ nikaa gbleawuna mí? (2 Timoti 1:13) (Sọ pọ́n apotin lọ “ Lehe Mí Dona Nọ Yinuwa Gando Otàn Lalo lẹ Go Do.”)
17 Nọ gbẹ́ otàn lalo lẹ dai. Apọsteli Paulu na anademẹ he họnwun lẹ gando nuhe mí na wà go eyin mí sè otàn lalo lẹ. E dọna Timoti nado “gbẹ́ na mẹdelẹ ma nado . . . na ayidonugo otàn lalo lẹ” bosọ “nọ gbẹ́ otàn lalo he nọ kọnmasin do onú wiwe go” lẹ dai. (1 Tim. 1:3, 4; 4:7) Dile etlẹ yindọ ovi pẹvi de gán mọ nude to kọmẹ bo zedo nùmẹ to mayọnẹn mẹ, mẹhe ko whẹ́n mẹho nọ mọnukunnujẹ owù lọ mẹ bo ma nọ wà onú mọnkọ gbede. Mí nọ gbẹ́ otàn lalo lẹ dai, na mí mọnukunnujẹ asisa nudọnamẹ lọ tọn mẹ wutu. Mí nọ tẹdo “ohó he sọgbe” nugbo lọ tọn lẹ go.—Hia 2 Timoti 1:13.
18. Nawẹ mí gán dohia gbọn dọ mí nọ dejido titobasinanu Jehovah tọn go?
18 Mí ko gbadopọnna aliho atọ̀n delẹ poun he mẹ titobasinanu Jiwheyẹwhe tọn nọ hodo apajlẹ Jesu tọn te. Dile a to Biblu plọn, doayi aliho devo lẹ he mẹ titobasinanu lọ nọ hodo apajlẹ Jesu tọn te go. Gọalọna mẹdevo lẹ to agun towe mẹ nado hẹn jidide yetọn to titobasinanu lọ mẹ lodo. Podọ, zindonukọn nado nọ do jidide towe hia bo nọ sẹ̀n Jehovah po nugbonọ-yinyin po bosọ tẹdo titobasinanu he e to yiyizan nado wà ojlo etọn lọ go gligli. (Salm. 37:28) Mì gbọ mí ni zindonukọn nado nọ yọ́n pinpẹn lẹblanulọkẹyi he mí do nado nọ kọnawudopọ hẹ mẹhe yiwanna Jehovah bosọ yin nugbonọ na ẹn lẹ tọn.
NAWẸ A NA NA GBLỌNDO GBỌN?
-
Aliho tẹlẹ mẹ wẹ omẹ Jiwheyẹwhe tọn lẹ nọ hodo apajlẹ Jesu tọn te?
-
Nawẹ mí gán zindonukọn nado to jidedo titobasinanu Jehovah tọn go gbọn?
-
Etẹwẹ mí dona wà eyin mí sè otàn lalo lẹ?
OHÀN 103 Lẹngbọhọtọ lẹ—Sunnu lẹ Di Nunina
a Pọ́n apotin lọ “Naegbọn E Do Yin 1919?” to owe lọ Sinsẹ̀n-Bibasi Wiwe-Ṣeke Jehovah Tọn Yin Hinhẹngọwa Lo! mẹ, w. 102, 103.
b ZẸẸMẸ YẸDIDE TỌN: To whenue mẹho agun tọn lẹ ko dọhodo tito he yin bibasi gando kunnudide gbangba tọn go godo, anademẹtọ pipli de tọn wá na anademẹ wẹnlatọ lẹ nado nọ zẹ̀nmẹ adó lẹ to whenue yé to kunnude to kẹkẹvi de kọ̀n na whẹwhinwhẹ́n hihọ́ tọn lẹ wutu.
