N’yin jiji to 1955, podọ yẹn wẹ yin pẹvi pete to visunnu atọ̀n he mẹjitọ ṣie lẹ ji lẹ mẹ. N’whẹ́n to fie sẹpọ huto hùwaji Finlande tọn, yèdọ lẹdo de he nọ yin yiylọ todin dọ tòdaho Vantaa tọn.

Onọ̀ ṣie yí baptẹm bo lẹzun Kunnudetọ Jehovah tọn owhe kleun delẹ whẹpo n’do yin jiji. Amọ́, otọ́ ṣie jẹagọdo nugbo lọ bo ma nọ dike onọ̀ ṣie ni plọnnu hẹ míwu ovi lẹ kavi plan mí yì opli lẹ. Enẹwutu, e nọ plọn mí nugbo dodonu tọn Biblu tọn lẹ whenue otọ́ ṣie ma to whégbè.

Sọn pẹvi gbọ́n wẹ n’ko de nado nọ adà Jehovah tọn mẹ. Di apajlẹ, whenue n’do owhe ṣinawe, mẹplọntọ ṣie gblehomẹ sinsinyẹn na n’gbẹ́ nado dù verilättyjä wutu, (yèdọ akla Finlande tọn de he yè nọ yí ohùn do basi). E yí alọ etọn dopo do finyọ́n aglànká ṣie nado hùn in, podọ po alọ awetọ po, e tẹnpọn nado yí ṣivi fẹ̀nnọ de do kì akla lọ do nùmẹ na mi. N’tẹnpọn bo gbà ṣivi lọ sọn alọ etọn mẹ.

Whenue n’do owhe 12, baba ṣie kú. Enẹgodo, n’gán nọ yì opli agun tọn lẹ. Mẹmẹsunnu he to agun lọ mẹ lẹ do ojlo nujọnu tọn hia mi, podọ ehe whàn mi nado yinukọn to gbigbọ-liho. N’jẹ Biblu hia ji egbesọegbesọ, bosọ nọ plọn owe mítọn lẹ po sọwhiwhe po. Aṣa gbigbọmẹ tọn dagbe ehelẹ wẹ zọ́n bọ n’yí baptẹm whenue n’do owhe 14, to 8 août 1969.

Ojlẹ kleun whenue n’fó wehọmẹ godo, n’lẹzun gbehosọnalitọ whepoponu tọn. To osẹ kleun  delẹ godo, n’sẹtẹn nado yì sẹ̀n to fie nuhudo sù te to Pielavesi, sẹpọ ṣẹnṣẹn Finlande tọn.

To Pielavesi, n’dukosọna Sirkka, yèdọ awhli de he wá lẹzun asi vivẹ́ ṣie. Onú etọn jẹ ṣie ji taun, na e yin whiwhẹnọ bosọ yiwanna Jehovah sisosiso wutu. E ma nọ dín gigo kavi jlo nado zan gbẹzan fẹẹmẹninọ tọn. Mí omẹ awe lẹ do ojlo sinsinyẹn nado wà nuhe go mí pé lẹpo to sinsẹ̀nzọn Jehovah tọn mẹ, mahopọnna azọ́ndenamẹ depope he mí mọyi. Mí wlealọ to 23 mars 1974. Kakati mí ni yì gbọjẹ vude to alọwle mítọn godo, mí sẹtẹn yì Karttula, fie nuhudo wẹnlatọ Ahọluduta lọ tọn tlẹ sọ sù te hugan.

Sọn gbeegbe mí wlealọ, Jehovah ko dohia mí dọ emi na penukundo nuhudo agbasa tọn mítọn lẹ go, eyin mí ze Ahọluduta emitọn do otẹn tintan mẹ. (Mat. 6:33) Di apajlẹ to Karttula, mí ma do mọto. To bẹjẹeji, kẹkẹ afọ tọn wẹ mí nọ zan. Amọ́ to avivọ whenu, aimẹ nọ fá taun. Nado dọyẹwheho to aigba-denamẹ gblagada agun lọ tọn ji, mí do hudo mọto tọn. Akuẹ etọn ma ka to mí si.

To ajiji mẹ, mẹdaho ṣie sunnu dopo wá dla mí pọ́n. E desọn ojlo mẹ bo na mí mọto etọn. E ko sú akuẹ he yè nọ sú na owùnu jijọ mọto lọ tọn. Amì janwẹ pò bọ mí na nọ jẹ demẹ. Todin, mí mọ mọto he mí do hudo etọn lọ lo.

Jehovah dohia dọ emi ko hẹn azọngban emitọn nado penukundo nuhudo mítọn lẹ go to agbasa-liho di. Nuhe mí na wà poun wẹ nado ze Ahọluduta lọ do otẹn tintan mẹ.

Whenue mí to Wehọmẹ Sinsẹ̀nzọn Gbehosọnalitọ tọn to 1978, Raimo Kuokkanen, a yèdọ dopo to nuplọnmẹtọ lọ lẹ mẹ dotuhomẹna mí nado doalọwemẹ na Wehọmẹ Giliadi Tọn. Enẹwutu, mí jẹ Gblẹnsigbe plọn ji po yanwle lọ po nado yì wehọmẹ lọ. Amọ́ to 1980, whẹpo mí nido sọgan doalọwemẹ, yè ylọ mí wá alahọ Finlande tọn mẹ. To ojlẹ lọ mẹ, mẹhe to Bẹtẹli lẹ ma gán doalọwemẹ nado yì Giliadi. Amọ́, ojlo mítọn wẹ nado sẹ̀n to fie yọ́n hugan to nukun Jehovah tọn mẹ, e ma yin to fie yọ́n na mílẹ hugan. Enẹwutu, mí kẹalọyi oylọ-basinamẹ lọ. Ṣogan, mí zindonukọn nado to Glẹnsigbe plọn, vlavo mí na wá do dotẹnmẹ lọ to gbèdopo nado doalọwemẹ na Giliadi.

 To owhe kleun delẹ godo, Hagbẹ Anademẹtọ lọ dọ dọ mẹhe to sinsẹ̀n to Bẹtẹli lẹ gán doalọwemẹ na Giliadi. Mí wàmọ to afọdopolọji, amọ́ e ma yin na mí ma do ayajẹ to Bẹtẹli wutu. Nado dọ hójọhó, mí do ayajẹ taun! Nulọ poun wẹ yindọ, mí jlo na hẹn míde tin-to-aimẹ nado sẹ̀n to fie nuhudo sù te hugan eyin mí pegan nado wàmọ. Yè kẹalọyi obiọ mítọn nado wá Giliadi, podọ mí yí gbedewema to klasi 79​tọ to septembre 1985. Mí yin azọ́ndena do Colombie.

To Colombie, yè deazọ́nna mí to tintan whenu do alahọ mẹ. N’dovivẹnu bo wà nuhe go n’pé to azọ́ndenamẹ ṣie mẹ, amọ́ to owhe dopo godo, n’mọdọ mí dona diọ azọ́ndenamẹ. Whla tintan podọ dopo gee lọ niyẹn to gbẹzan ṣie mẹ he n’biọ dọ azọ́ndenamẹ ṣie ni yin didiọ. Enẹgodo, mí yin azọ́ndena taidi mẹdehlan lẹ to tòdaho Neiva tọn mẹ to lẹdo Huila tọn mẹ.

Whelẹponu wẹ n’nọ duvivi lizọnyizọn lọ tọn. Taidi gbehosọnalitọ tlẹnnọ de to Finlande, n’nọ dọyẹwheho sọn afọnnu fuu kakajẹ whèjai pete. Taidi asu po asi po he ṣẹṣẹ wlealọ, yẹn po Sirkka po sọ nọ dekunnu na azán lọ blebu. Eyin mí to kunnude to aigba-denamẹ he to olá lẹ ji, mí nọ dọ́ mọto mítọn mẹ to whedelẹnu. Ehe nọ de whenu gbejizọnlin lọ tọn pò na mí, bosọ nọ zọ́n bọ mí nọ yawu gọ̀ bẹ to wunkẹngbe.

Taidi mẹdehlan lẹ, mí sọ vọ́ do zohunhun he mí do na lizọnyizọn lọ wayi nkọ whladopo dogọ. Jideji tin to agun mítọn mẹ, podọ mẹmẹsunnu po mẹmẹyọnnu Colombie tọn lẹ po nọ do sisi hia, yiwanna gbẹtọ bosọ nọ do pinpẹn nutọn hia.

Tòdaho delẹ tin he ma dẹn do fie mí yin azọ́ndena do to Neiva he mẹ Kunnudetọ depope ma te. Lehe wẹndagbe lọ na jẹ lẹdo enẹlẹ mẹ do nọ duahunmẹna mi taun. Amọ́ na hunyanhunyan lẹ wutu, lẹdo ehelẹ yin owùnu na jonọ lẹ. Enẹwutu, n’hodẹ̀ dọ mẹde ni lẹzun Kunnudetọ to tòdaho ehelẹ mẹ. N’lẹndọ Neiva wẹ omẹ mọnkọ dona nọ nọ̀ nado plọn nugbo lọ. Enẹwutu, n’sọ hodẹ̀ dọ to baptẹm mẹlọ tọn godo, e ni yinukọn to gbigbọ-liho bo lẹkọ yì tòdaho etọn mẹ nado yì dọyẹwheho. N’dona ko yọnẹn dọ tito Jehovah tọn sọ pọnte tlala hú nuhe n’lẹn.

Ojlẹ kleun de to enẹgodo, n’jẹ Biblu plọn hẹ dẹpẹ de ji he nọ yin Fernando González. E nọ nọ̀ Algeciras, yèdọ dopo to tòdaho he mẹ Kunnudetọ depope ma te lẹ mẹ. Fernando nọ zingbejizọnlin na kilomẹtlu 50 wá Neiva nado wazọ́n. E nọ wleawu ganji na nupinplọn dopodopo bosọ jẹ opli lẹpo wá ji to afọdopolọji. Bẹsọn osẹ tintan nupinplọn lọ tọn mẹ, Fernando nọ pli mẹlẹ to tòdaho etọn mẹ bo nọ plọn yé nuhe ewọ lọsu ko plọn to nupinplọn etọn whenu lẹ.

Fernando yí baptẹm to janvier 1990, yèdọ osun ṣidopo whenue e ko jẹ nuplọn ji godo. Enẹgodo, e lẹzun gbehosọnalitọ whepoponu tọn. Todin he Kunnudetọ lẹdo lọ tọn dopo to Algeciras, e bọawuna alahọ nado do gbehosọnalitọ titengbe lẹ hlan lẹdo lọ mẹ. To février 1992, agun de yin didoai to lẹdo enẹ mẹ.

Be mẹhe to tòdaho Fernando tọn mẹ lẹ kẹdẹ wẹ e nọ dọyẹwheho na ya? Lala! To alọwle etọn godo, ewọ po asi etọn po sẹtẹn yì San Vicente  del Caguán, yèdọ tòdaho devo he mẹ Kunnudetọ de ma te. To finẹ, yé gọalọ nado do agun de ai. To 2002, Fernando yin pipà taidi nugopọntọ lẹdo tọn, bọ ewọ po asi etọn Olga po zindonukọn to azọ́n lẹdo tọn mẹ kakajẹ egbehe.

Numimọ ehe plọn mi dọ nujọnu wẹ e yin nado nọ hodẹ̀ gando whẹho tangan he gando azọ́ndenamẹ yẹwhehọluduta tọn mítọn go lẹ go. Jehovah nọ wà nuhe mí ma gán wà. To popolẹpo mẹ, etọn wẹ jibẹwawhé lọ, e ma yin mítọn.—Mat. 9:38.

To 1990, mí yin didohlan azọ́n lẹdo tọn mẹ. Lẹdo mítọn tintan tin to tatọ́-tònọ lọ Bogotá. Azọ́ndenamẹ lọ gbàhundona mí. Gbẹtọ paa lẹ wẹ yẹn po asi e po yin bo masọ tindo nugopipe vonọtaun lẹ. Podọ mí ma ko nọ tòdaho he mẹ gbẹtọ sù te lẹ pọ́n. Amọ́, Jehovah hẹn opagbe etọn he tin to Filipinu lẹ 2:13 mẹ di, ehe dọmọ: “Jiwheyẹwhe wẹ yin mẹlọ he nọ dozolanmẹna mì bo nọ hẹn mì tindo ojlo bosọ nọ na mì huhlọn nado yinuwa sọgbe hẹ nuhe nọ hẹn homẹhun in.”

To nukọn mẹ, mí wá yin didohlan lẹdo de mẹ to Medellín, enẹ wẹ tòdaho he go n’donù to bẹjẹeji. Mẹhe to finẹ lẹ ko jẹakọ hẹ danuwiwa aliji tọn sọmọ bọ e masọ nọ dobuna yé ba. Di apajlẹ, to gbèdopo he n’to anadena plọnmẹ Biblu de, mẹlẹ jẹ sò de ji to gbonu owhé he gbè n’te lọ tọn. N’ko dibla mlọn kọmẹ, amọ́ nuplọntọ lọ vò fẹẹ bo zindonukọn nado to hukan lọ hia. Whenue e fó, e biọ gbè mi bo tọ́n. To ojlẹ kleun de godo, e lẹkọwa po ovi pẹvi awe delẹ po, bo yí ogbè dẹẹdẹ do dọna mi dọ, “Mì jaale bo ma gblehomẹ blo, amọ́ n’dona yì plan ovi ṣie lẹ.”

Mí sọ mọ míde to owù sinsinyẹn mẹ to ojlẹ devo lẹ mẹ. To gbèdopo he mí to azọ́n họndekọn jẹ họndekọn tọn mẹ, asi e họ̀nwezun wá dè e po obu po. E dọ dọ mẹde desòdo emi. Obu di mi taun. Amọ́, mí wá mọdọ e ma yin Sirkka wẹ mẹlọ jlo na desòdo; dawe de he gbọn apá etọn wá jei dín wẹ mẹlọ te.

Dile ojlẹ to yìyì, danuwiwa aliji tọn masọ nọ gbàhundona mí sọmọ ba. Linsinsinyẹn Kunnudetọ lẹdo lọ tọn lẹ tọn he ko pehẹ ninọmẹ mọnkọ po dehe ylan humọ lẹ po na mí tuli. Mí wá mọdọ eyin Jehovah to alọgọna yé, be e na wà nudopolọ na mílọsu ga. Mí nọ setonuna ayinamẹ mẹho agun tọn lẹdo lọ tọn lẹ tọn to whepoponu, nọ ze afọdide hihọ́ tọn lẹ, bo nọ jo dehe pò lẹ do alọ Jehovah tọn mẹ.

Na nugbo tọn, ninọmẹ delẹ ma nọ ylan sọ lehe mí lẹn do. To gbèdopo, n’sè nude he taidi jlẹdidọ to yọnnu awe delẹ ṣẹnṣẹn he to yede zun to gbonu owhé he gbè n’yì lọ tọn. E ma jlo mi nado yì pọ́n nudindọn de, amọ́ whétọ lọ basi oylọna mi wá agbàsẹnu etọn. E wá yindọ kísẹ awe wẹ to tintẹnpọn nado vọ́ nuhe kọmẹnu delẹ dọ lẹ dọ poun.

To 1997, n’yin pipà taidi mẹplọntọ to Wehọmẹ Azọ́nplọnmẹ Devizọnwiwa tọn. b Homẹ ṣie nọ hùn to whepoponu nado yì wehọmẹ  yẹwhehọluduta tọn lẹ, amọ́, n’ma ko lẹn pọ́n gbede dọ n’na do lẹblanulọkẹyi jiawu lọ nado plọnmẹ to wehọmẹ mọnkọ de whenu.

To nukọn mẹ, n’sẹ̀n taidi nugopọntọ agbegbe tọn. Whenue tito enẹ yin hùzẹdeji, n’lẹkọyi azọ́n lẹdo tọn mẹ. Enẹwutu, na owhe 30 linlán, n’duvivi sinsẹ̀nzọn ṣie tọn taidi mẹplọntọ podọ taidi nugopọntọ tomẹyitọ. Azọ́ndenamẹ ehelẹ ko hẹn dona susu lẹ wá na mí. Amọ́, e ma yin ojẹ̀ bọ yè kán dù to whelẹponu. Mì gbọ ma basi zẹẹmẹ nuhe dọ n’te tọn.

Gbẹtọ nujikudonọ wẹ n’yin. Ehe ko gọalọna mi nado pehẹ ninọmẹ sinsinyẹn lẹ. Amọ́ to whedelẹnu, zohunhun ṣie nọ zẹ̀pá dile n’to tintẹnpọn nado jla ninọmẹ lẹ do to agun lẹ mẹ. To gbèdopo, n’na tuli mẹdelẹ po nujikudo po nado nọ yí owanyi po lẹnpọn dagbe po do yinuwa hẹ mẹdevo lẹ. Amọ́ e blawu dọ to ojlẹ enẹlẹ dopolọ mẹ, yẹnlọsu ma nọ do jẹhẹnu enẹlẹ hia.—Lom. 7:21-23.

To whedelẹnu, awugbopo ṣie lẹ ko hẹn mi gbọjọ taun. (Lom. 7:24) E wá jẹ fide bọ n’dọna Jehovah to odẹ̀ mẹ dọ e na yọ́n hugan dọ ma jo azọ́n mẹdehlan tọn do bo lẹkọyi Finlande. To whèjai enẹ, n’yì opli agun tọn de. Tulinamẹ he n’mọyi hẹn mi kudeji dọ n’dona gbọṣi azọ́ndenamẹ ṣie mẹ bo zindonukọn nado to azọ́nwa do awugbopo ṣie lẹ ji. Kakajẹ egbé, lehe Jehovah na gblọndo odẹ̀ ṣie tọn do hezeheze yinuwado ji e sisosiso. Humọ, n’yiwanna lehe e yí homẹdagbe do gọalọna mi nado duto awugbopo ṣie lẹ ji do taun.

Yẹn po Sirkka po nọ yọ́n pinpẹn etọn na Jehovah taun dọ mí do lẹblanulọkẹyi lọ nado yí suhugan gbẹzan mítọn tọn zan to sinsẹ̀nzọn whenu-gigọ́ tọn mẹ. N’sọ yọ́n pinpẹn etọn ga dọ Jehovah na mi asi owanyinọ podọ nugbonọ de to owhe ehe lẹpo gblamẹ.

To madẹnmẹ, n’na do owhe 70 bo na jo lẹblanulọkẹyi ṣie taidi mẹplọntọ podọ taidi nugopọntọ tomẹyitọ do. Amọ́, ehe ma nọ dobuna mi. Etẹwutu? Na n’kudeji mlẹnmlẹn dọ nuhe nọ gbògbéna Jehovah hugan wẹ nado sẹ̀n ewọ po whiwhẹ po bosọ nọ yí ahun he gọ́ na owanyi po pinpẹn nutọn po do pà ẹ. (Mika 6:8; Malku 12:32-34) Nado gbògbéna Jehovah, e ma biọ dọ mí ni do azọ́ndenamẹ he to nukunji de.

Eyin n’lẹnnupọndo azọ́ndenamẹ he n’ko duvivi yetọn lẹ ji, n’nọ mọdọ e ma yin na n’pọnte hú mẹdevo lẹ wẹ zọ́n bọ n’mọ yé yí; mọ e ma yindọ n’do nugopipe vonọtaun de wẹ zọ́n bọ n’do lẹblanulọkẹyi ehelẹ. E ma yinmọ paali! Kakatimọ, Jehovah na mi lẹblanulọkẹyi ehelẹ na nukundagbe majẹhẹ etọn wutu. E na mi lẹblanulọkẹyi ehelẹ mahopọnna awugbopo ṣie lẹ. N’yọnẹn dọ eyin alọgọ Jehovah tọn dẹ́n, n’ma gán penugo bo hẹn azọ́ndenamẹ ehelẹ di. Gbọnmọ dali, awugbopo ṣie lẹ ko do huhlọn Jiwheyẹwhe tọn hia.—2 Kọl. 12:9.