Otọ́ ṣie yin nukọntọ sinsẹ̀n tọn de to Église Unie Canada tọn mẹ, enẹwutu to osẹ lẹpo mẹ, e nọ do yẹn po nọviyọnnu ṣie po hlan wehọmẹ sẹgbe tọn he tin na yọpọvu lẹ to ṣọṣi lọ mẹ, enẹgodo, mí nọ wá kọnawudopọ hẹ ẹ to ogàn 11 mẹ afọnnu. Eyin e jẹ whèmẹ, mí nọ hodo Mama yì Plitẹnhọ Ahọluduta tọn mẹ. E ma vẹawuna mí nado doayi vogbingbọn he to sinsẹ̀n awe lọ lẹ ṣẹnṣẹn go.

Mama nọ má nuhe plọn e te lẹ hẹ họntọn etọn hoho delẹ, yèdọ Bob po Marion Hutcheson po, podọ yelọsu wá kẹalọyi nugbo lọ. To 1958, mẹmẹsunnu po mẹmẹyọnnu Hutcheson po plan yẹn po visunnu yetọn atọ̀n lẹ po yì Plidopọ Akọjọpli tọn azán ṣinatọ̀n tọn he hosọ etọn yin Ojlo sọn Olọn mẹ Wá to New York City. Todin, n’wá mọdọ e ma na ko bọawuna yé nado plan mi hẹn, amọ́ n’ma gán wọn plidopọ enẹ gbede to gbẹzan ṣie mẹ.

Whenue n’to aflanmẹ, ogle mítọn mẹ wẹ mí nọ nọ̀, bọ n’yiwanna nado nọ penukundo kanlin lẹ go. Nuhe nọ jlo mi taun wẹ nado lẹzun doto kanlin lẹ tọn. Onọ̀ ṣie dọ ehe na mẹho agun tọn de. Mẹho lọ yí homẹdagbe do flinnu mi dọ mí to gbẹnọ to “azán godo tọn lẹ” mẹ, podọ e sọ kanse mi lehe wehọmẹ alavọ tọn yìyì na owhe susu gán yinuwado haṣinṣan ṣie hẹ Jehovah ji do. (2 Tim. 3:1) Enẹwutu,  n’gbọ bo basi dide ma nado yì wehọmẹ alavọ tọn ba.

N’gbẹ́ nọ kanse dee nuhe n’na wà eyin n’fó wehọmẹ daho. Dile etlẹ yindọ n’nọ tọ́n na lizọnyizọn lọ to sẹfifo lẹpo, n’ma nọ mọ awuvivi to e mẹ, podọ n’nọ mọdọ n’ma gán yin gbehosọnalitọ. To ojlẹ dopolọ mẹ, otọ́ ṣie he ma yin Kunnudetọ po tavẹ ṣie po to tulina mi nado yì wazọ́n na whenu-gigọ́ to azọ́nwhé owù-nujijọ tọn nukundeji de to Toronto. Na tavẹ ṣie to otẹn daho de mẹ to finẹ wutu, n’kẹalọyi azọ́n lọ.

To Toronto, na n’nọ saba wà gàngodo-zọ́n bosọ nọ dogbẹ́ hẹ mayisenọ lẹ wutu, n’masọ nọ do mahẹ to nuwiwa gbigbọmẹ tọn lẹ mẹ to gbesisọ mẹ ba. To bẹjẹeji, baba-daho ṣie he ma yin Kunnudetọ de dè wẹ n’nọ nọ̀, amọ́ whenue e kú, n’do hudo fidevo he n’na nọ tọn.

Hutcheson lẹ he plan mi yì Plidopọ to 1958 taidi mẹjitọ lẹ na mi. Yé biọ to asi e nado wá nọ owhé yetọn gbè, podọ yé gọalọna mi nado lodo to gbigbọ-liho. To 1960, yẹn po visunnu yetọn John po yí baptẹm. John bẹ gbehosọnalitọ bibasi jẹeji, ehe na mi tuli nado wà susu dogọ to lizọnyizọn lọ mẹ. Mẹmẹsunnu he to agun lọ mẹ lẹ doayi nukọnyiyi ṣie go, podọ to godo mẹ, n’yin dide taidi nugopọntọ Wehọmẹ Lizọnyizọn Yẹwhehọluduta tọn. a

To 1966, n’wlealọ hẹ Randi Berge, yèdọ gbehosọnalitọ zohunhunnọ de he do ojlo taun nado sẹ̀n to fie nuhudo sù te. Nugopọntọ lẹdo tọn mítọn do ojlo hia to mímẹ bo na mí tuli nado yì gọalọ to agun Orillia tọn mẹ to Ontario. Enẹwutu, mí sẹtẹn yì dọ́n.

Tlolo he mí jẹ Orillia, n’kọnawudopọ hẹ Randi taidi gbehosọnalitọ whepoponu tọn. Zohunhun etọn wẹ yinuwado ji e! Whenue n’ze dee jo petepete na azọ́n gbehosọnalitọ tọn, n’duvivi ayajẹ he Biblu yiyizan nado gọalọna mẹdevo lẹ nado mọnukunnujẹ nugbo lọ mẹ nọ hẹnwa namẹ tọn. Dona nankọ die nado gọalọna asu po asi po de to Orillia nado basi diọdo lẹ bo lẹzun devizọnwatọ Jehovah tọn lẹ.

To ojlẹ he mẹ mí disa yì Toronto, n’dukosọna Arnold MacNamara he yin dopo to mẹmẹsunnu he to anadenanu to Bẹtẹli lẹ mẹ. E kanse eyin e na jlo mí nado lẹzun gbehosọnalitọ titengbe lẹ. N’gblọn to afọdopolọji dọmọ: “Gbau! Mí gán yin didohlan fidepope adavo Québec!” Pọndohlan agọ̀ he Canada-nu he nọ do Glẹnsigbe lẹ tindo gando ayimatẹn Québec tọn go fie yè nọ do Flansegbe te ko yinuwado ji e. To ojlẹ lọ mẹ, mẹdelẹ fọngu bo to dindin dọ ayimatẹn Québec tọn ni klan sọn adà Canada tọn he pò lẹ go.

Arnold gblọn dọ, “Québec kẹdẹ wẹ alahọ to gbehosọnalitọ titengbe lẹ dohlan to alọnu din.” N’yigbe to afọdopolọji nado yì. N’ko yọnẹn dọ Randi uwọ jlo nado yì sẹ̀n to finẹ. To godo mẹ, n’mọdọ dopo to nudide dagbe hugan he mí basi to gbẹzan mítọn mẹ lẹ mẹ niyẹn!

To whenue mí yì klasi Flansegbe pinplọn tọn na osẹ atọ́n godo, yẹn po Randi po gọna asu po asi po devo yì Rimouski, he to nudi kilomẹtlu 540 do agewaji-whèzẹtẹn Montréal tọn. To whenue n’hia nulila delẹ to opli agun tọn de ji godo, e họnwun dọ nususu gbẹ́ pò bọ mí dona plọn. To nulila lọ mẹ, n’dọ dọ to Plidopọ daho mítọn he ja lọ whenu, mí na do “afọzedaitọ ogongo” susu kakati ma dọ dọ “afọzedaitọ Autriche-nu” susu, na hogbe awe lọ lẹ sẹpọ yede to Flansegbe mẹ wutu.

To Rimouski, mẹmẹyọnnu zohunhunnọ ẹnẹ delẹ he yin tlẹnnọ wá gọna míwlẹ, Huberdeau lẹ po viyọnnu yetọn awe lẹ po. Huberdeau lẹ haya owhé gbehosọnalitọ lẹ tọn de he do abò ṣinawe, bọ mí sù-yín na owhé lọ dọ Owhé Wéwé, na yè sá osẹ̀n wéwé do e bọ dòtin agbàsẹnu tọn etọn lẹ sọ yin wéwé wutu. To paa mẹ, nudi gbẹtọ 12 jẹ 14 wẹ nọ nọ̀ finẹ. Taidi gbehosọnalitọ titengbe lẹ, na yẹn po Randi po nọ dekunnu to afọnnu, to whèmẹ podọ to whèjai lẹ wutu, e nọ vivi na mí dọ mẹde nọ tin-to-aimẹ janwẹ nado hodo mí yì lizọnyizọn lọ mẹ, etlẹ yin to whèjai he aimẹ fá taun te lẹ.

Mí wá vẹ́ po gbehosọnalitọ nugbonọ enẹlẹ po sọmọ bọ e taidi dọ whẹndo dopolọ mẹ wẹ mí wá sọn nkọ. To whedelẹnu, mí nọ sinai lẹdo nake miyọ́n he to jiji de, kavi mí nọ de azán de dovo nado nọpọ́ bo wleawuna núdùdù voovo lẹ. Dopo to mẹmẹsunnu lọ lẹ mẹ yin nuhotọ, enẹwutu to sibigbe zánmẹ lẹ, mí nọ saba jihàn bosọ nọ dúwe.

Aigba-denamẹ Rimouski tọn de sinsẹ́n tọ́n! To owhe atọ́n gblamẹ, homẹ mítọn hùn nado mọdọ nuplọntọ susu wẹ yinukọn jẹ baptẹm kọ̀n. Sọha wẹnlatọ lẹ tọn to agun lọ mẹ jideji bo yì nudi 35.

To Québec, mí mọ azọ́nplọnmẹ dagbe yí taidi wẹndagbe-jlatọ lẹ. Mí mọ lehe Jehovah gọalọna mí to lizọnyizọn lọ mẹ bosọ penukundo nuhudo agbasa tọn mítọn lẹ go do. Humọ, mí plọn nado yiwanna mẹhe nọ do Flansegbe lẹ, ogbè yetọn, aṣa yetọn, ehe zọ́n bọ mí sọ wá yiwanna aṣa devo lẹ ga.—2 Kọl. 6:13.

To ajiji mẹ, alahọ biọ to mí si nado yì topẹvi Tracadie tọn mẹ he to huto whèzẹtẹn-waji Nouveau-Brunswick tọn. Ehe bẹ avùnnukundiọsọmẹnu de hẹn na mí, na mí ṣẹṣẹ doalọwemẹ nado haya ohọ̀ de, podọ n’sọ yin mẹplọntọ whenu gli tọn de to wehọ de mẹ. Gbọnvona enẹ, delẹ to Biblu plọntọ mítọn lẹ mẹ ṣẹṣẹ lẹzun wẹnlatọ lẹ wẹ, podọ mí sọ to Plitẹnhọ Ahọluduta tọn de gbá to ojlẹ lọ mẹ.

Mí hodẹ̀ to sẹfifó lọ blebu gando tẹnsisẹ lọ go, podọ mí yì dla Tracadie pọ́n, yèdọ fie gbọnvo  taun na Rimouski. Amọ́ mí magbe nado yì, na Jehovah wẹ jlo dọ mí ni yì finẹ wutu. Mí tẹ́n Jehovah pọ́n bosọ mọ bọ ewọ de avùnnukundiọsọmẹnu mítọn lẹ dopodopo sẹ̀. (Mal. 3:10) Dile e nọ saba yì do, gbigbọnọ-yinyin Randi tọn, gbigbọ mẹde-yido-sanvọ́ tọn etọn po aslan he e nọ yìn po zọ́n bọ tẹnsisẹ mítọn ma dán mí sọmọ.

Mẹho agun tọn dopo gee he to agun yọyọ mítọn mẹ wẹ Robert Ross. Gbehosọnalitọ lẹ wẹ ewọ po asi etọn Linda po yin to agun lọ mẹ dai, podọ yé de nado gbọṣi agun lọ mẹ whenue yé ji visunnu yetọn tintan lọ godo. Dile etlẹ yindọ yé to nukunpedo visunnu pẹvi de go, yé na tuli yẹn po Randi po taun gbọn alọtútlú, gbemima po zohunhun yetọn to lizọnyizọn lọ mẹ po dali.

To whenue mí ko sẹ̀n to Tracadie taidi gbehosọnalitọ na owhe awe godo, mí sọ mọ lẹblanulọkẹyi madonukun devo yí, mí yin oylọ-basina do azọ́n lẹdo tọn mẹ. Mí dla lẹdo Glẹnsigbe tọn lẹ pọ́n na owhe ṣinawe, enẹgodo mí vọ́ yin azọ́ndena do lẹdo Flansegbe tọn mẹ to Québec. Léonce Crépeault he yin nugopọntọ agbegbe tọn mítọn to Québec nọ pà mi na hodidọ ṣie lẹ. Enẹgodo, e nọ kanse mi dọ, “Nawẹ a gán hẹn yọ́n-na-yizan hodidọ towe lẹ tọn họnwun dogọ gbọn?” b Ayidonugo sọwhiwhe tọn enẹ zọ́n bọ n’ma nọ lẹ̀ hógle to hodidọ ṣie lẹ mẹ bosọ nọ hẹn yé bọawu dogọ.

Dopo to azọ́ndenamẹ he n’ma na wọn pọ́n gbede lẹ mẹ wẹ dehe wá aimẹ to 1978 to Plidopọ Akọjọpli tọn “Yise Awhàngbigba Tọn” ji to Montréal. N’wazọ́n to Núdùdù-Họsa. Mí to nukundo gbẹtọ 80000, podọ tito yọyọ devo yin didoai nado na núdùdù mẹlẹ. Nulẹpo wẹ diọ: azọ́nwanu lẹ, núdùdù lẹ gọna aliho he mẹ núdùdù lẹ na yin awuwlena te. Agbànbẹhun daho nudi 20 he do zomọ nuhẹnfa tọn lẹ wẹ mí do, podọ yé ma nọ wazọ́n ganji to whelẹponu. To azán he jẹnukọnna azán tintan plidopọ lọ tọn, mí ma tlẹ gán biọ bọlu-hotẹn lọ kakajẹ ogàn 12 mẹ zánmẹ, na aihundida lanmẹyiya tọn he ko yin tito-basina jẹnukọn de to yìyì to finẹ wutu. Podọ mí dona tá zomọ he mẹ yè nọ dà blẹdi te lẹ whẹpo ai nido họ́n, na mí nido penugo bo wleawuna núdùdù afọnnu tọn! Agbọ́ pé mí, amọ́ n’plọn nususu sọn azọ́n sinsinyẹn wiwà, whínwhiwhè po aslan mẹdezejotọ hatọ lẹ tọn po mẹ. Mí wleawuna họntọnjiji dagbe he gbọṣi aimẹ kakajẹ egbehe lẹ. Ayajẹ nankọ die nado duvivi plidopọ ayidego tọn ehe tọn to Québec, yèdọ to ayimatẹn  dopolọ he mẹ nukundiọsọmẹ sinsinyẹn wá aimẹ te to gblagbla owhe 1940 po 1950 po tọn lẹ mẹ!

N’plọn nususu sọn nugopọntọ hatọ ṣie lẹ dè to plidopọ daho mítọn he yin bibasi to Montréal lẹ whenu. To owhe de mẹ, David Splane he to sinsẹ̀n todin taidi dopo to Hagbẹ Anademẹtọ lọ mẹ wẹ yin azinponọ plidopọ lọ tọn. To plidopọ daho devo whenu he n’yin dide nado penukundo azọ́ndenamẹ enẹ go, David nọgodona mi mlẹnmlẹn.

To 2011, whenue mí ko duvivi azọ́n lẹdo tọn na owhe 36 godo, n’yin azọ́ndena taidi mẹplọntọ de to Wehọmẹ Mẹho Agun Tọn lẹ tọn. To owhe awe gblamẹ, yẹn po Randi po dọ́ akánma voovo 75 ji, amọ́ avọ́sinsan ehelẹ ma yin to ovọ́ mẹ. To vivọnu osẹ dopodopo tọn, mẹho lẹ nọ gọ́ na pinpẹn-nutọn-yinyọnẹn na yé mọ obá he mẹ Hagbẹ Anademẹtọ lọ nọ penukundo gbigbọnọ-yinyin yetọn go jẹ.

To nukọn mẹ, n’sọ plọnmẹ to Wehọmẹ Wẹndagbe-Jlatọ Ahọluduta lọ tọn lẹ tọn. Agbọ́ nọ saba pé wehọmẹvi lọ lẹ na alọnu yetọn nọ saba ján taun wutu: yé nọ nọ̀ aisinsin to klasi lọ na nudi gànhiho ṣinawe to gbèdopo, podọ yé dona yí gànhiho atọ̀n zan to whèjai lẹpo nado wleawuna azọ́ndenamẹ whégbè tọn lẹ, bosọ dona penukundo nuzedonukọnnamẹ ẹnẹ kavi atọ́n go to sẹmẹsẹmẹ. Yẹn po nuplọnmẹtọ awetọ lọ po dohia yé dọ yé ma gán wà onú ehe lẹpo matin alọgọ Jehovah tọn. N’nọ saba flin lehe e nọ jiawu na wehọmẹvi lẹ do nado mọdọ Jehovah go ginganjẹ nọ gọalọna yé nado wà nuhe yé ma lẹn lẹ dotana.

Ojlo he onọ̀ ṣie dohia mẹdevo lẹ gọalọna plọnmẹ Biblu etọn lẹ nado yinukọn, podọ e sọ gọalọna otọ́ ṣie nado jla pọndohlan etọn do gando nugbo lọ go. Azán atọ̀n to okú onọ̀ ṣie tọn godo, e paṣa mí nado mọ bọ otọ́ ṣie wá Plitẹnhọ Ahọluduta tọn mẹ nado dotoaina hodidọ na mẹlẹpo de, podọ e zindonukọn nado to opli lẹ yì na owhe 26 he bọdego lẹ. Dile etlẹ yindọ Papa ma yí baptẹm pọ́n gbede, mẹho lẹ dọna mi dọ ewọ whẹ́whẹ́ wẹ nọ wá opli lẹ to osẹ lẹpo mẹ.

Apajlẹ onọ̀ ṣie tọn sọ yinuwado míwu ovi etọn lẹ ji na ojlẹ dindẹn. Nọviyọnnu ṣie atọ̀n lẹpo po asu yetọn lẹ po to Jehovah sẹ̀n po nugbonọ-yinyin po. Awe to yé mẹ to sinsẹ̀n to alahọ mẹ, mẹdopo to Portugal bọ mẹdevo to Haïti.

Yẹn po Randi po to sinsẹ̀n to alọnu taidi gbehosọnalitọ titengbe lẹ to Hamilton to Ontario. Whenue mí to azọ́n lẹdo tọn mẹ, e nọ vivi na mí nado plan mẹdevo lẹ yì gọyìpọn po plọnmẹ Biblu lẹ po. Amọ́ todin, homẹ mítọn nọ hùn nado mọdọ nuplọntọ mítọn titi lẹ to nukọnyi to gbigbọ-liho. Podọ dile mí to họntọnji hẹ mẹmẹsunnu po mẹmẹyọnnu lẹ po to agun mítọn yọyọ lọ mẹ, mí nọ yin tulina nado mọ lehe Jehovah nọ nọgodona yé to ojlẹ dagbe po ylankan lẹ po mẹ do.

Eyin mí pọ́n godo hlan, mí nọ gọ́ na pinpẹn-nutọn-yinyọnẹn na ojlo he mẹsusu lẹ ko dohia mí. Podọ, mílọsu ko do “mẹtọnhopọn ahundopo tọn” hia mẹdevo lẹ, bo nọ na yé tuli nado sẹ̀n Jehovah po nugopipe yetọn lẹpo po. (2 Kọl. 7:6, 7) Di apajlẹ to whẹndo de mẹ, asi lọ, visunnu lọ, po viyọnnu lọ po wẹ to sinsẹ̀nzọn whenu-gigọ́ tọn mẹ. N’kanse asu lọ eyin e ko lẹnnupọndo gbehosọnalitọ bibasi ji pọ́n. E dọna mi dọ gbehosọnalitọ atọ̀n wẹ emi nọ gọalọna. Enẹwutu, n’kanse e dọ, “Be a gán gọalọna yé hugan Jehovah wẹ ya?” N’na ẹn tuli nado duvivi dona he yé to vivi etọn dù lẹ tọn. To osun ṣidopo gblamẹ, ewọ lọsu lẹzun gbehosọnalitọ.

Yẹn po Randi po na zindonukọn nado to ‘hodọna whẹndo he bọdego’ gando “azọ́njiawu” Jehovah tọn lẹ go po todido lọ po dọ yelọsu lẹ na duvivi sinsẹ̀nzọn Jehovah tọn to gigọ́ mẹ dile mílọsu lẹ wà do.—Salm. 71:17, 18.