Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Kunnudenu Owe-wiwe tọn tẹwẹ dohia dọ Jiwheyẹwhe nọ vẹawu mí?

Whenue Islaelivi hohowhenu tọn lẹ to kanlinmọgbenu to Egipti, Jiwheyẹwhe doayi ayimajai yetọn go podọ onú yetọn biọlanmẹna ẹn. (Eks. 3:7; Isa. 63:9) Mí yin didá to apajlẹ Jiwheyẹwhe tọn mẹ bo sọgan nọ vẹawumẹ ga. Ewọ nọ do awuvẹmẹ hia mí etlẹ yin to whenue mí mọdọ mí ma jẹna owanyi etọn.—wp18.3, w. 8-9.

Nawẹ nuplọnmẹ Jesu tọn lẹ gọalọna gbẹtọ lẹ nado gbawhàn nuvẹun tọn gbọn?

To azán Jesu tọn gbè, Ju susu wẹ tindo nuvẹun. Klisti zinnudo nujọnu-yinyin whiwhẹ tọn ji bo gblewhẹdo awagundido gando akọ̀ mẹtọn go. E na tuli hodotọ etọn lẹ nado nọ pọ́n ode awetọ hlan taidi mẹmẹsunnu.—w18.06, w. 9-10.

Etẹwẹ mí plọn sọn whẹwhinwhẹ́n he wutu Jiwheyẹwhe ma do na dotẹnmẹ Mose nado biọ Aigba Pagbe tọn lọ ji mẹ?

Mose tindo haṣinṣan pẹkipẹki de hẹ Jehovah. (Deut. 34:10) Sẹpọ vivọnu owhe 40 he yé yizan to danfafa ji lẹ tọn, akọta lọ wule whla awetọ gando osin he yé ma mọ go. Jiwheyẹwhe dọna Mose nado dọhona osé lọ. Kakati nado wàmọ, Mose linú osé lọ. Jehovah sọgan ko gblehomẹ dọ Mose ma hodo anademẹ Emitọn lẹ kavi dọ Mose ma pagigona Emi na azọ́njiawu lọ. (Sọh. 20:6-12) Ehe plọn mí dọ nujọnu wẹ e yin nado nọ setonuna Jehovah bo nọ pagigona ẹn.—w18.07, w. 13-14.

Nawẹ mí sọgan yawu dawhẹ agọ̀ gbọn eyin mí nọ pọ́n awusọhia gbonu tọn poun do dawhẹ?

Adà atọ̀n delẹ tin he mẹ nuhe nọ sọawuhia to nukunta lẹ nọ saba yinuwado gbẹtọ lẹ ji te: sinmẹ agbasa tọn kavi akọ̀, adọkun po owhe po. Nujọnu wẹ e yin nado dovivẹnu nado nọ pọ́n mẹdevo lẹ hlan matin mẹnukuntahihopọn dile Jiwheyẹwhe nọ wà do! (Owalọ 10:34, 35)—w18.08, w. 8-12.

Etẹwẹ yin delẹ to aliho he mẹ Klistiani mẹhomẹ lẹ sọgan gọalọna mẹdevo lẹ te mẹ?

Jiwheyẹwhe gbẹ́ yọ́n pinpẹn Klistiani mẹhomẹ de he azọ́ndenamẹ etọn diọ tọn, podọ ewọ sọgan gbẹ́ nọ wà nususu nado gọalọna mẹdevo lẹ. E sọgan nọ dovivẹnu nado gọalọna alọwlemẹ mayisenọ Klistiani de tọn po mẹhe gbọjọ lẹ po, deanana plọnmẹ Biblu lẹ podọ nado gbloada na lizọnyizọn etọn.—w18.09, w. 8-11.

Nuyizan tẹlẹ wẹ Azọ́nwanu Mẹpinplọn Tọn Klistiani lẹ tọn bẹhẹn?

Mí tindo kalti jw.org tọn po oylọ-basinamẹwe lẹ po. Alọnuwe pẹvi voovo ṣinatọ̀n he yin awuwlena ganji, gọna linlinwe lọ lẹ Atọ̀họ̀-Nuhihọ́ lọ Tọn po Fọ́n! po. Azọ́nwanu-potin lọ sọ bẹ alọnuwe delẹ, owe oplọn tọn tangan awe, po video he yọ́n-na-yizan ẹnẹ po hẹn, taidi video lọ Naegbọn Mí Dona Plọn Biblu?​—w18.10, w. 16.

Nawẹ Klistiani de sọgan “họ̀ nugbo,” dile Howhinwhẹn lẹ 23:23 na tuli etọn do gbọn?

Mí ma nọ yí akuẹ do họ̀ nugbo. Ṣigba, e nọ biọ dọ mí ni yí whenu zan bosọ dovivẹnu nado mọ ẹn yí.—w18.11, w. 4.

Etẹwẹ aliho he mẹ Hosea yinuwa hẹ asi etọn Gomẹli te plọn mí?

Gomẹli deayọ whlasusu, ṣigba Hosea jona ẹn bo dike alọwle yetọn ni gbọṣi aimẹ. Eyin alọwlemẹ Klistiani de doalọ to fẹnnuwiwa zanhẹmẹ tọn mẹ, alọwlemẹ homẹvọnọ lọ sọgan jona ẹn. Eyin ewọ gọjẹ kọndopọ zanhẹmẹ tọn tindo ji hẹ alọwlemẹ he doafọgbé lọ, enẹ na zẹhudo whẹwhinwhẹ́n he e tindo nado basi gbẹdai he sinai do Owe-wiwe lẹ ji lọ ji.—w18.12, w. 13.