DIANA tindo owhe 80 linlán. Asu etọn jiya apọ̀nmẹ-zọ̀n sinsinyẹn he nọ yin Alzheimer tọn, bo nọ owhé mẹgopinpọ́n tọn gbè na owhe delẹ whẹpo do kú. E sọ dona pehẹ okú visunnu etọn awe lẹ tọn bosọ doakọnna kansẹẹ-zọ̀n anọ́ tọn. Ṣogan, eyin hagbẹ agun tọn Diana tọn lẹ mọ ẹn to Plitẹnhọ mẹ kavi to lizọnyizọn lọ mẹ, yé nọ doayi e go dọ e nọ to ayajẹ mẹ to whelẹponu.

John yin nugopọntọ tomẹyitọ na owhe 43 linlán. E yiwanna sinsẹ̀nzọn wunmẹ ehe taun—apadewhe gbẹzan etọn tọn wẹ! Ṣigba, e doalọtena azọ́n tomẹyiyi tọn nado penukundo hẹnnumẹ he to azọ̀njẹ de go, podọ todin e to sinsẹ̀n to agun lẹdo etọn tọn de mẹ. Eyin mẹhe ko yọ́n John dai lẹ wá dukosọna ẹn to plidopọ de ji, e nọ taidi dọ nude ma tlẹ jọ dego wẹ nkọ. E gbẹ́ tindo ayajẹ.

Nawẹ e yọnbasi dọ Diana po John po ni tindo ayajẹ gbọn? Nawẹ mẹhe to yaji to numọtolanmẹ-liho podọ to agbasa-liho de sọgan yin ayajẹnọ gbọn? Podọ nawẹ mẹhe masọ tindo lẹblanulọkẹyi he e yiwanna de gbẹ́ sọgan yin ayajẹnọ gbọn? Biblu na mí gblọndo lọ dọmọ: “Dodonọ na nọ jaya to Jehovah mẹ bo na nọ dín fibẹtado to ewọ mẹ.” (Salm. 64:10) Mí sọgan mọnukunnujẹ nugbo titengbe ehe mẹ to gigọ́ mẹ dogọ, eyin mí yọ́n nuhe nọ hẹn jijọho ahun mẹ tọn wá podọ nuhe ma nọ wàmọ.

Ayihaawe ma tin dọ a yọnẹn dọ nudelẹ nọ hẹn ayajẹ wá diblayin to whepoponu. Lẹnnupọndo sunnu po yọnnu po he yiwanna yede bo jlo na wlealọ de ji. Kavi etẹwẹ lo eyin mẹde lẹzun mẹjitọ kavi mọ lẹblanulọkẹyi yẹwhehọluduta tọn de yí? Onú mọnkọ lẹ nọ hẹn ayajẹ wá podọ e sọgbe dọ ni yinmọ, na Jehovah wẹ yin dowatọ adà gbẹzan tọn ehelẹ tọn. Ewọ wẹ ze alọwle dai, hẹn ovi jiji yọnbasi, bosọ nọ de azọngban lẹ namẹ gbọn agun Klistiani tọn gblamẹ.—Jen. 2:18, 22; Salm. 127:3; 1 Tim. 3:1.

Ṣigba, nuhe nọ hẹn ayajẹ wá delẹ sọgan yin ojlẹ gli tọn. E blawu dọ alọwlemẹ de sọgan nọma wá yin nugbonọ kavi kú. (Ezek. 24:18; Hos. 3:1) Ovi delẹ ma nọ setonuna mẹjitọ yetọn lẹ podọ na Jiwheyẹwhe, bo tlẹ nọ yin didesẹ sọn agun mẹ. Visunnu Samuẹli tọn lẹ ma sẹ̀n Jehovah to aliho he mẹ ewọ kẹalọyi te, podọ nuyiwa Davidi tọn  hẹn nugbajẹmẹji wá ewọ ji sọn owhé etọn titi gbè. (1 Sam. 8:1-3; 2 Sam. 12:11) Nujijọ mọnkọ lẹ nọ hẹn awubla po ayimajai po wá. E họnwun dọ yé ma nọ hẹn ayajẹ wá na mí.

Mọdopolọ, lẹblanulọkẹyi sinsẹ̀nzọn tọn to omẹ Jiwheyẹwhe tọn lẹ ṣẹnṣẹn sọgan doalọte, vlavo na agbasamalo, azọngban whẹndo tọn lẹ kavi diọdo yẹwhehọluduta tọn lẹ wutu. Susu mẹhe jugbọn diọdo mọnkọ lẹ mẹ lẹ tọn wẹ yigbe dọ emi jẹdò pekọ he onú enẹlẹ nọ hẹnwa na emi tọn.

Mí sọgan mọ po awubibọ po dọ, jẹ obá de mẹ, asisa ayajẹ tọn mọnkọ lẹ sọgan tindo dogbó kavi yin ojlẹ gli tọn. Enẹwutu, be ayajẹ wunmẹ devo tin he gbẹ́ nọ pò to aimẹ etlẹ yin to whenue ninọmẹ lẹ diọ do ylankan ji ya? E dona tin, na Samuẹli, Davidi po mẹdevo lẹ po gbẹ́ hẹn ayajẹ go jẹ obá de mẹ to whlepọn lẹ glọ.

Jesu yọ́n nuhe ayajẹ yin nugbonugbo. Whẹpo ewọ do tlọ́n olọn mẹ bo wá aigba ji, to whenue nulẹ to yìyì ganji, e “nọ jaya to nukọn [Jehovah tọn] to whepoponu.” (Howh. 8:30) Ṣigba, to aigba ji, ewọ pehẹ nuhahun sinsinyẹn lẹ to whedelẹnu. Ṣogan, Jesu mọ awuvivi to ojlo Otọ́ etọn tọn wiwà mẹ. (Joh. 4:34) Etẹwẹ dogbọn awufiẹsa he e mọ to gànhiho godo tọn lẹ mẹ dali? Mí hia dọmọ: “Na ayajẹ he yin zizedonukọnna ẹn wutu, e doakọnna yatin de.” (Heb. 12:2) Gbọnmọ dali, mí tindo whẹwhinwhẹ́n dagbe nado gbadopọnna hodidọ Jesu tọn awe gando ayajẹ nujọnu tọn go.

To gbèdopo, devi 70 lẹkọwa Jesu dè to azọ́ndenamẹ yẹwhehodidọ tọn de hinhẹndi godo. Yé gọ́ na ayajẹ na yé ko wazọ́n huhlọnnọ lẹ, bo tlẹ yàn aovi lẹ jẹgbonu. To whenẹnu, Jesu dọna yé dọmọ: “Mì jaya dọ gbigbọ lẹ litaina mì blo, ṣigba mì jaya, na oyín mìtọn ko yin kinkandai to olọn mẹ wutu.” (Luku 10:1-9, 17, 20) Mọwẹ, nukundagbe Jehovah tọn tintindo sọ yin nujọnu hú vivi lẹblanulọkẹyi vonọtaun de tọn dùdù. Ewọ na flin devi nugbonọ lọ lẹ bo do nukundagbe hia yé, yèdọ nude he nọ hẹn ayajẹ daho hugan wá.

To ninọmẹ devo mẹ, Jesu dọhona gbẹtọgun de. Nawe Juvi de dọ numọtolanmẹ etọn dọ onọ̀ Jesu, yèdọ mẹplọntọ ayidego tọn ehe tọn dona yin ayajẹnọ taun. Ṣigba, Jesu gbẹnuna ẹn dọmọ: “Lala, kakatimọ, ayajẹnọ wẹ mẹhe to ohó Jiwheyẹwhe tọn sè bo to yíyí i hẹn lẹ!” (Luku 11:27, 28)  Nado yin mẹjitọ kọdetọn dagbenọ de sọgan yin awuvivinu taun; amọ́ haṣinṣan dagbe de tintindo hẹ Jehovah gbọn tonusisena ẹn dali sọ yin whẹwhinwhẹ́n daho hugan nado jaya.

Na nugbo tọn, numọtolanmẹ lọ dọ yè tindo nukundagbe Jehovah tọn yin onú titengbe de nado do ayajẹ ahun mẹ tọn. Nugbo enẹ ma nọ diọ, dile etlẹ yindọ whlepọn lẹ na yede ma nọ yin ayajẹnu. To vogbingbọn mẹ, akọndidona yé po tenọgligo-hinhẹn po yin awhàngbigba de he nọ hẹnmẹ tindo ninọmẹ ahun mẹ tọn dagbe de. (Lom. 5:3-5) Humọ, Jehovah nọ na gbigbọ etọn mẹhe nọ dejidego lẹ, podọ ayajẹ yin adà sinsẹ́n gbigbọ ehe tọn de. (Gal. 5:22) Enẹ gọalọna mí nado yọ́n nuhewutu Salmu lẹ 64:10 do dọ dọ, “Dodonọ na nọ jaya to Jehovah mẹ.”

Ehe do nuhewutu Diana po John po he yin nùdego to bẹjẹeji sọgan hẹn ayajẹ he nọ dẹn-to-aimẹ go to whenue yé pehẹ ninọmẹ sinsinyẹn gbẹ̀mẹ tọn lẹ hia. Diana dọmọ: “N’dín fibẹtado to Jehovah mẹ kẹdẹdile ovi de na wà do to mẹjitọ de dè.” Nawẹ e mọ nukundagbe Jiwheyẹwhe tọn gbọn? “N’mọdọ ewọ ko dona mi bo hẹn mi penugo nado zindonukọn nado nọ dọyẹwheho to gbesisọ mẹ po ayajẹ po.” John he gbẹ́ yin zohunhunnọ to lizọnyizọn lọ mẹ to whenue azọ́n tomẹyiyi tọn he e yiwanna lọ doalọte godo, basi zẹẹmẹ nuhe gọalọna ẹn taun tọn dọmọ: “Sọn 1998 whenue n’yin azọ́ndena nado plọnnumẹ to Wehọmẹ Azọ́nplọnmẹ Devizọnwiwa tọn, n’ko basi oplọn mẹdetiti tọn susu hugan gbede pọ́n.” E dọ gando ede po asi ẹ po go dọmọ: “Pọndohlan he mí nọ tindo to paa mẹ gando Jehovah sinsẹ̀n to owhe lẹ gblamẹ po nugopipe mítọn lẹpo po go hẹn diọdo ehe bibasi bọawu jẹ obá de mẹ. E ma vẹna mí gbede dọ mí wàmọ.”

Mẹsusu devo lẹ ko mọ nugbo-yinyin Salmu lẹ 64:10 tọn. Di apajlẹ, lẹnnupọndo asu po asi po de ji he sẹ̀n na owhe 30 linlán to Bẹtẹli États-Unis tọn. Enẹgodo, yé yin azọ́ndena do aigba-denamẹ ji taidi gbehosọnalitọ titengbe lẹ. Nado dọ hójọhó, yé yigbe dọmọ: “Awubla nọ wá to jọwamọ-liho to whenue a hẹn nue a yiwanna de bu, a ma ka gán blawu kakadoi.” Yé yawu jẹ awukọndopọ hẹ agun lọ ji to lizọnyizọn lọ mẹ. Asu po asi po lọ sọ dọmọ: “Mí hodẹ̀ gando onú titengbe delẹ go. Enẹgodo, to whenue mí mọdọ odẹ̀ mítọn lẹ mọ gblọndo, ehe na mí tuli bo hẹn ayajẹ wá na mí. Ojlẹ vude to whenue mí wá, mẹdevo lẹ to agun lọ mẹ jẹ gbehosọnalitọ bayi ji, podọ mí yin didona po plọnmẹ Biblu awe he to nukọnyi po.”

Na nugbo tọn, e ma nọ bọawu to whelẹponu nado yin ayajẹnọ, podọ ojlẹ ayajẹ po awubla tọn po nọ wá tin. Ṣigba, Jehovah hẹn ohó jidevọnamẹ tọn he to Salmu lẹ 64:10 mẹ lẹ tin-to-aimẹ na mí. Etlẹ yin to whenue mí gbọjọ, mí sọgan deji dọ mẹhe hẹn nugbonọ-yinyin go mahopọnna dọ ninọmẹ yetọn lẹ diọ bo gbọnmọ dali do yede hia di “dodonọ” lẹ “na nọ jaya to Jehovah mẹ.” Humọ, mí sọgan to nukọnpọnhlan hẹndi opagbe Jehovah tọn lọ he gando “olọn yọyọ lẹ po aigba yọyọ de po” go. To whenẹnu, mape na yin didesẹ mlẹnmlẹn. Omẹ Jiwheyẹwhe tọn lẹpo na “to aglinjẹ bosọ to ayajẹ kakadoi” to nuhe ewọ na dá bosọ wleawuna lẹ mẹ.—Isa. 65:17, 18.

Yí nukun homẹ tọn do pọ́n nuhe ehe na zẹẹmẹdo: mí na tindo agbasalilo pipé bo na nọ gọ́ na huhlọn to azán dopodopo ji. Mahopọnna lehe awufiẹsa he mí tindo to numọtolanmẹ-liho wayi lẹ na ko sinyẹn sọ, oflin ylankan yetọn lẹ ma na gbọṣi aimẹ. Mí yin jide na dọ “onú hoho tọn lẹ ma nasọ yin finflin ba, mọ yé ma na gọwá ahun mẹ ba.” Azọ́njiawu fọnsọnku tọn na vọ́ mẹyiwanna lẹ kọndopọ whladopo dogọ. Gbẹtọ livi madosọha lẹ wẹ na tindo numọtolanmẹ he nkọ mẹjitọ viyọnnu owhe 12 mẹvi he Jesu hẹngọwa ogbẹ̀ lọ tọn lẹ tindo, Biblu dọmọ: “Yé sọ gọ́ na aglinjijẹ daho de.” (Malku 5:42) To godo mẹ, mẹlẹpo to aigba ji na yin “dodonọ” mlẹnmlẹn, podọ yé na “nọ jaya to Jehovah mẹ” kakadoi.