HOSỌ OPLỌN TỌN 52
Mẹjitọ lẹ Emi—Mì Plọn Ovi Mìtọn lẹ Nado Yiwanna Jehovah
“Ogú de wẹ ovi lẹ yin sọn Jehovah dè.”—SALM. 127:3, Odò.
OHÀN 134 Ovi lẹ Yin Ogú de sọn Jiwheyẹwhe Dè
BLADOPỌ *
1. Azọ́n tẹwẹ Jehovah dena mẹjitọ lẹ?
JEHOVAH dá asu po asi po tintan lọ po ojlo lọ po nado jivi. Abajọ Biblu dọmọ: “Ogú de wẹ ovi lẹ yin sọn Jehovah dè.” (Salm. 127:3, Odò.) Etẹwẹ enẹ zẹẹmẹdo? Mí ni dọ dọ họntọn vivẹ́ de biọ to asi we nado hẹn akuẹ he yinukunkẹ de go na emi. Etẹwẹ na yin numọtolanmẹ towe? Ayihaawe ma tin dọ a na mọ ẹn di lẹblanulọkẹyi de dọ ewọ dejido gowe. Ṣigba, a sọgan hanú gando lehe a na basi hihọ́na akuẹ daho mọnkọ do go. Jehovah, yèdọ Họntọn vivẹ́ hugan mítọn ze nude do alọmẹ na mẹjitọ lẹ nado penukundego, ehe akuẹ ma sọgan họ̀. E deazọ́nna yé nado penukundo dagbemẹninọ ovi yetọn lẹ tọn go bosọ hẹn ẹn diun dọ yé tindo ayajẹ.
2. Kanbiọ tẹlẹ ji wẹ mí na dọhodo?
2 Mẹnu wẹ dona de eyin vlavo asu po asi po he wlealọ de na jivi podọ whenue yé na wàmọ do? Podọ etẹwẹ mẹjitọ lẹ sọgan wà nado gọalọna ovi yetọn lẹ nado tindo ayajẹ to gbẹ̀mẹ? Lẹnnupọndo nunọwhinnusẹ́n delẹ poun ji he tin to Ohó Jiwheyẹwhe tọn mẹ, ehe sọgan gọalọna asu po asi po Klistiani lẹ nado basi nudide nuyọnẹn tọn lẹ.
NỌ NA SISI NUDIDE ASU PO ASI PO DE TỌN
3. (a) Mẹnu wẹ dona de eyin asu po asi po de na jivi? (b) Nunọwhinnusẹ́n Biblu tọn tẹwẹ họntọn gọna whẹndo asu po asi po de tọn lẹ dona hẹn do ayiha mẹ?
3 To aṣa delẹ mẹ, mẹlẹ nọ donukun dọ asu po asi po he ṣẹṣẹ wlealọ lẹ ni yawu jẹ viji ji. Whẹndo yetọn po mẹdevo lẹ po tlẹ sọgan nọ gbidikọna yé nado hodo aṣa enẹ. Jethro, mẹmẹsunnu de sọn Asie dọmọ: “To agun lọ mẹ, mẹdelẹ he ko do ovi nọ gbidikọna asu po asi po he ma tindo ovi lẹ nado jivi.” Jeffrey, mẹmẹsunnu devo sọn Asie dọ dọ, “Mẹdelẹ nọ dọna asu po asi po he ma tindo ovi lẹ dọ yé ma na wá mọ mẹdepope he na penukundo yé go whenue yé na poyọnho.” Ṣigba, asu po asi po dopodopo wẹ dona de eyin vlavo yé na jivi kavi lala. Nudide yetọn wẹ; azọngban yetọn wẹ. (Gal. 6:5, Odò.) Nugbo wẹ dọ họntọn po whẹndo lẹ po nọ jlo dọ asu po asi po he ṣẹṣẹ wlealọ de ni tindo ayajẹ. Amọ́ mẹlẹpo dona flindọ nudide alọwlemẹ lọ lẹ tọn wẹ nado jivi kavi lala.—1 Tẹs. 4:11.
4, 5. Whẹho awe tẹlẹ ji wẹ asu po asi po de dona dọhodo, podọ whetẹnu wẹ yin ojlẹ dagbe hugan lọ nado tindo hodọdopọ mọnkọ? Basi zẹẹmẹ.
4 Asu po asi po he de nado jivi na wà dagbe nado dọhodo kanbiọ titengbe awe ehelẹ ji: Tintan, whetẹnu wẹ e na jlo yé nado jẹ viji ji? Awetọ, ovi nẹmu wẹ yé na jlo nado ji? Whetẹnu wẹ yin ojlẹ dagbe hugan lọ na asu po asi po de nado tindo hodọdopọ mọnkọ? Podọ, naegbọn whẹho awe enẹlẹ do yin nujọnu taun?
5 To suhugan ninọmẹ lẹ tọn mẹ, sunnu de po yọnnu de po na wà dagbe nado dọhodo whẹho vijiji tọn ji whẹpo do wlealọ. Etẹwutu? Whẹwhinwhẹ́n titengbe dopo wẹ yindọ, pọndohlan dopolọ tintindo do whẹho ehe ji yin nujọnu taun. Podọ, yé dona lẹnnupọn eyin vlavo yé ko wleawufo nado didá azọngban enẹ. Asu po asi po delẹ ko de nado nọte, e whè gbau na owhe dopo kavi awe to alọwle yetọn godo whẹpo do jivi, na azọngban mẹjitọ tọn nọ biọ whenu po huhlọn susu po wutu. Yé nọ mọdọ teninọ na ojlẹ vude na gọalọna yé nado diọada sọgbe hẹ gbẹzan alọwle tọn, podọ nado vẹ́ po ode awetọ po dogọ.—Efe. 5:33.
6. Nudide tẹwẹ asu po asi po delẹ ko basi na ojlẹ he mẹ mí to gbẹnọ te wutu?
6 Klistiani devo lẹ ko de nado hodo apajlẹ visunnu atọ̀n Noa tọn lẹ po asi yetọn lẹ po tọn. Asu po asi po atọ̀n enẹlẹ ma yawu jivi. (Jen. 6:18; 9:18, 19; 10:1; 2 Pita 2:5) Jesu yí ojlẹ mítọn jlẹdo “azán Noa tọn lẹ” go, podọ ayihaawe ma tin dọ mí to gbẹnọ to “ojlẹ awusinyẹn tọn he vẹawu nado pehẹ lẹ” mẹ. (Mat. 24:37; 2 Tim. 3:1) Po nugbo ehe po to ayiha mẹ, asu po asi po delẹ ko wá tadona kọ̀n dọ yé na sẹ̀ tito vijiji tọn donukọn, na yé nido sọgan wà susu dogọ to lizọnyizọn lọ mẹ.
To whenue asu po asi po he tindo zinzin lẹ to nudide basi eyin vlavo yé na jivi kavi lala, podọ ovi nẹmu he yé na ji, yé nọ “lẹn akuẹ etọn” pọ́n (Pọ́n hukan 7tọ) *
7. Nawẹ nunọwhinnusẹ́n he tin to Luku 14:28, 29 gọna Howhinwhẹn lẹ 21:5 mẹ lẹ sọgan gọalọna asu po asi po de gbọn?
7 To whenue asu po asi po he tindo zinzin lẹ to nudide basi eyin vlavo yé na jivi kavi lala, podọ ovi nẹmu he yé na ji, yé nọ “lẹn akuẹ etọn” pọ́n. (Hia Luku 14:28, 29.) Mẹjitọ numimọnọ lẹ dọ dọ ovi lẹ pinplọn whẹ́n nọ biọ akuẹzinzan susu, gọna whenu po huhlọn po. Enẹwutu, nujọnu wẹ e yin na asu po asi po de nado lẹnnupọndo kanbiọ delẹ ji taidi: ‘Be mí omẹ awe lẹ dona wà agbasazọ́n nado penukundo nuhudo dandan tọn whẹndo lọ tọn lẹ go wẹ ya? Be mí kọngbedopọ do nuhe yin “dandannu” na mí lẹ ji ya? Eyin mí omẹ awe lẹ dona wà agbasazọ́n, mẹnu wẹ na penukundo ovi mítọn lẹ go? Mẹnu wẹ na yinuwado pọndohlan po walọyizan yetọn lẹ po ji?’ Asu po asi po he nọ yí sọwhiwhe do dọhodo kanbiọ enẹlẹ ji lẹ nọ hẹn hogbe he tin to Howhinwhẹn lẹ 21:5 mẹ lẹ do ayiha mẹ.—Hia.
Asu he yiwanna asi etọn nọ wà nuhe go e pé lẹpo nado gọalọna ẹn (Pọ́n hukan 8tọ)
8. Avùnnukundiọsọmẹnu tẹlẹ wẹ asu po asi po Klistiani lẹ dona mọ hlan nukọn, podọ etẹwẹ asu he yiwanna asi etọn dona nọ wà?
8 Ovi de nọ biọ whenu po huhlọn susu po sọn mẹjitọ etọn lẹ dopodopo si, podọ ewọ do hudo onú enẹlẹ tọn. Enẹwutu, eyin asu po asi po de jivi susu to ojlẹ kleun de gblamẹ, yé sọgan mọdọ e vẹawu nado na ovi dopodopo ayidonugo he jẹ. Asu po asi po delẹ he tindo ovi flinflin susu yigbe dọ e nọ húagbọ́ emi. Onọ̀ de sọgan nọ diahi hẹ nuṣikọ to agbasa-liho podọ to numọtolanmẹ-liho. Agbọ́ sọgan nọ pé e sọmọ bọ ewọ ma na nọ tindo huhlọn nado plọnnu, hodẹ̀, bosọ tindo mahẹ to lizọnyizọn lọ mẹ to gbesisọ mẹ. E sọgan sọ nọ vẹawuna ẹn nado nọ dotoai to opli Klistiani tọn lẹ whenu podọ nado mọaleyi sọn yé mẹ. Na nugbo tọn, asu de he yiwanna asi etọn na wà nuhe go e pé nado nọ gọalọna ẹn to whenue ovi yetọn lẹ do hudo ayidonugo tọn to opli lẹ ji podọ to whégbè. Di apajlẹ, e sọgan gọalọna asi etọn nado wà whégbè-zọ́n lẹ. E na dovivẹnu sinsinyẹn nado hẹn ẹn diun dọ mẹlẹpo nọ mọaleyi sọn tito sinsẹ̀n-bibasi whẹndo tọn gbesisọ tọn de mẹ. Podọ otọ́ Klistiani lẹ dona nọ nọgodona whẹndo yetọn to lizọnyizọn lọ mẹ to gbesisọ mẹ.
OVI LẸ PINPLỌN NADO YIWANNA JEHOVAH
9, 10. Onú titengbe tẹwẹ mẹjitọ he jlo na gọalọna ovi yetọn lẹ dona wà?
9 Etẹwẹ yin delẹ to aliho he mẹ mẹjitọ lẹ sọgan gọalọna ovi yetọn lẹ nado yiwanna Jehovah te lẹ mẹ? Nawẹ yé sọgan basi hihọ́na ovi yetọn lẹ sọn owù aihọn ylankan ehe tọn lẹ mẹ gbọn? Lẹnnupọndo afọdide he mẹjitọ lẹ sọgan ze delẹ ji.
10 Mì nọ biọ alọgọ Jehovah tọn to odẹ̀ mẹ. Doayi apajlẹ Manoa po asi etọn po tọn go, yèdọ mẹjitọ Samsọni tọn lẹ. Whenue Manoa mọdọ ewọ po asi etọn po na ji visunnu de, e vẹ̀ Jehovah nado mọ anademẹ gando lehe yé na plọn ovi yetọn whẹ́n do go.
11. Sọgbe hẹ Whẹdatọ lẹ 13:8, nawẹ mẹjitọ lẹ sọgan hodo apajlẹ Manoa tọn gbọn?
11 Nihad po Alma po he nọ nọ̀ Bosnie-Herzégovine plọnnu sọn apajlẹ Manoa tọn mẹ. Yé dọmọ: “Taidi Manoa, mí vẹ̀ Jehovah nado plọn mí lehe mí na yin mẹjitọ dagbe lẹ do. Podọ Jehovah na gblọndo odẹ̀ mítọn lẹ tọn to aliho voovo mẹ—gbọn Owe-wiwe lẹ, owe sinai do Biblu ji lẹ, opli agun tọn lẹ po plidopọ lẹ po gblamẹ.”—Hia Whẹdatọ lẹ 13:8.
12. Apajlẹ tẹwẹ Josẹfu po Malia po zedai na ovi yetọn lẹ?
12 Mì nọ plọnmẹ gbọn apajlẹ dali. Nuhe a nọ dọ yin nujọnu, ṣigba e yọnbasi dọ nuhe a nọ wà wẹ na yinuwado ovi towe ji hugan. Matin ayihaawe, Josẹfu po Malia po ze apajlẹ dagbe de dai na ovi yetọn lẹ, ehe mẹ Jesu tin te ga. Josẹfu wazọ́n sinsinyẹn nado penukundo whẹndo etọn go. Humọ, Josẹfu na tuli hagbẹ whẹndo tọn etọn lẹ nado nọ yọ́n pinpẹn gbigbọnu lẹ tọn. (Deut. 4:9, 10) Mahopọnna dọ Osẹ́n ma biọ dọ Josẹfu ni nọ plan whẹndo etọn yì Jelusalẹm “sọn owhe de mẹ jẹ owhe de mẹ” nado dù hùnwhẹ Juwayi tọn, ewọ nọ wàmọ. (Luku 2:41, 42) To ojlẹ etọn mẹ, otọ́ delẹ sọgan nọ pọ́n gbejizọnlin whẹndo tọn mọnkọ hlan di nuhe vẹawu, nọ dù whenu, bosọ nọ biọ akuẹzinzan susu. Ṣogan, e họnwun dọ Josẹfu yọ́n pinpẹn gbigbọnu lẹ tọn bosọ plọn ovi etọn lẹ nado wà nudopolọ. Podọ, Malia yọ́n Owe-wiwe lẹ ganji. Ayihaawe ma tin dọ e plọn ovi etọn lẹ to ohó po walọ po mẹ nado yiwanna Ohó Jiwheyẹwhe tọn.
13. Nawẹ asu po asi po de hodo apajlẹ Josẹfu po Malia po tọn gbọn?
13 Nihad po Alma po he yin nùdego wayi jlo na hodo apajlẹ Josẹfu po Malia po tọn. Nawẹ enẹ gọalọna yé nado plọn visunnu yetọn whẹ́n nado yiwanna Jiwheyẹwhe bosọ nọ sẹ̀n ẹn gbọn? Yé dọmọ: “Gbọn aliho gbẹninọ tọn mítọn dali, mí tẹnpọn nado dohia visunnu mítọn, lehe e yọ́n do sọ nado nọ nọgbẹ̀ sọgbe hẹ nunọwhinnusẹ́n Jehovah tọn lẹ.” Nihad yidogọ dọmọ: “Yin gbẹtọ wunmẹ he a jlo dọ ovi towe ni yin.”
14. Naegbọn mẹjitọ lẹ dona yọ́n mẹhe ovi yetọn lẹ nọ dogbẹ́ hẹ?
14 Mì nọ gọalọna ovi mìtọn lẹ nado de gbẹdohẹmẹtọ dagbe lẹ. Otọ́ po onọ̀ de po dona yọ́n mẹhe ovi yetọn lẹ nọ dogbẹ́ hẹ podọ nuhe wà yé te lẹ. Ehe dohia dọ mẹjitọ lẹ dona yọ́n mẹhe ovi yetọn nọ dọhodopọ hẹ to nọtẹn Intẹnẹt tọn po alokan po ji lẹ. Gbẹdido mọnkọ lẹ sọgan yinuwado pọndohlan po walọyizan ovi lẹ tọn po ji.—1 Kọl. 15:33.
15. Etẹwẹ mẹjitọ lẹ sọgan plọn sọn apajlẹ Jessie tọn mẹ?
15 Etẹwẹ mẹjitọ lẹ sọgan wà eyin yé ma jẹakọ hẹ ọdinatẹẹ kavi nuyizan lẹtliki tọn lẹ ganji? Jessie, otọ́ de to Philippines dọmọ: “Mí ma yọ́n nususu gando nuyizan lẹtliki tọn lẹ go. Amọ́ enẹ ma glọnalina mí nado gọalọna ovi mítọn lẹ nado yọ́n owù he nuyizan lẹtliki tọn lẹ sọgan bẹhẹn lẹ.” Jessie ma gbẹna ovi etọn lẹ ma nado zan nuyizan mọnkọ lẹ, na ewọ ma jẹakọ hẹ yé wutu poun gba. E dọmọ: “N’na tuli ovi ṣie lẹ nado nọ yí nuyizan lẹtliki tọn yetọn lẹ zan nado plọn ogbè yọyọ de, wleawuna opli lẹ, podọ nado hia Biblu egbesọegbesọ.” Eyin mẹjitọ lẹ wẹ mì yin, be mì ko hia ayinamẹ jlẹkaji tọn he gando wekanhlanmẹ lẹ po fọto lẹ didohlan to Intẹnẹt ji po go hẹ ovi mìtọn lẹ, ehe mì sọgan mọ to jw.org® ji to adà lọ “Jọja Lẹ” glọ, bo ko sọ dọhodopọ deji hẹ yé ya? Be mì ko gbadopọnna video lọ Be Alokan Towe Wẹ to Anadena We Ya? gọna video lọ Nọ Aṣeji Gando Họntọnjiji to Intẹnẹt Ji Go hẹ yé ya? * Nudọnamẹ enẹlẹ sọgan yọ́n-na-yizan taun dile mì to ovi mìtọn lẹ plọn nado nọ yí nuyizan lẹtliki tọn lẹ zan po nuyọnẹn po.—Howh. 13:20.
16. Etẹwẹ mẹjitọ susu ko wà, podọ etẹwẹ yin kọdetọn lọ?
16 Mẹjitọ susu lẹ nọ dovivẹnu nado dín dotẹnmẹ hundote lẹ na ovi yetọn lẹ nido dogbẹ́ hẹ Jiwheyẹwhe sẹ̀ntọ apajlẹ dagbenọ lẹ. Di apajlẹ, N’Déni po Bomine po, yèdọ asu po asi po de to Côte d’Ivoire, nọ saba basi oylọna nugopọntọ lẹdo tọn nado nọ owhé yetọn gbè. N’Déni dọmọ: “Ehe yinuwado visunnu mítọn ji to aliho dagbe mẹ taun. E bẹ gbehosọnalitọ bibasi jẹeji, podọ todin e nọ pọ́n tẹnmẹ na nugopọntọ lẹdo tọn.” Be a sọgan basi tito gbẹdido mọnkọtọn lẹ tọn na ovi towe lẹ ya?
17, 18. Whetẹnu wẹ mẹjitọ lẹ dona bẹ ovi lẹ pinplọn jẹeji?
17 Mì nọ yawu bẹ ovi mìtọn lẹ pinplọn jẹeji dile e yọnbasi do. Lehe mẹjitọ lẹ yawu bẹ ovi yetọn pinplọn jẹeji do, mọ wẹ e nọ pọnte do niyẹn. (Howh. 22:6) Lẹnnupọndo apajlẹ Timoti tọn ji, mẹhe zingbejizọnlin hẹ apọsteli Paulu to ojlẹ de mẹ. Onọ̀ Timoti tọn Euniki po onọ̀-daho etọn Loisi po plọn ẹn “sọn ovu whenu gbọ́n.”—2 Tim. 1:5; 3:15.
18 Jean-Claude po Peace po, yèdọ asu po asi po devo to Côte d’Ivoire penugo nado plọn ovi yetọn ṣidopo lẹpo whẹ́n nado yiwanna Jehovah bosọ nọ sẹ̀n ẹn. Nawẹ e pà yé gbọn? Yé hodo apajlẹ Euniki po Loisi po tọn. Yé dọmọ: “Mí nọ yí sọwhiwhe do plọn Ohó Jiwheyẹwhe tọn ovi mítọn lẹ sọn ovu whenu, ojlẹ vude to whenue yé yin jiji godo.”—Deut. 6:6, 7.
19. Etẹwẹ e zẹẹmẹdo nado nọ yí sọwhiwhe do plọn Ohó Jiwheyẹwhe tọn ovi mìtọn lẹ?
19 Etẹwẹ e zẹẹmẹdo nado nọ “yí sọwhiwhe do plọn” Ohó Jehovah tọn ovi mìtọn lẹ? Nado “yí sọwhiwhe do plọn” zẹẹmẹdo nado “plọnnumẹ bo zinnudeji gbọn dọvọdọ bibasi gbọzangbọzan dali.” Nado wàmọ, mẹjitọ lẹ dona nọ yí whenu zan dopọ hẹ ovi yetọn jọja lẹ to gbesisọ mẹ. To whedelẹnu, e sọgan nọ taidi apọṣimẹnu, eyin yé dona nọ to anademẹ lẹ vọ́ dọ na ovi lẹ. Ṣigba, mẹjitọ lẹ sọgan dovivẹnu nado nọ pọ́n ehe hlan taidi aliho de nado gọalọna ovi yetọn lẹ nado mọnukunnujẹ Ohó Jiwheyẹwhe tọn mẹ bosọ yí i do yizan mẹ.
Mẹjitọ lẹ dona yọ́n lehe yé na nọ plọn ovi yetọn lẹ dopodopo do (Pọ́n hukan 20tọ) *
20. Nawẹ nuhe Salmu lẹ 127:4 dọ sọgan yin yiyijlẹdo ovi lẹ pinplọn go gbọn?
20 Mì nọ yí wuntuntun zan. Salmu lẹ 127 yí ovi lẹ jlẹdo ogá lẹ go. (Hia Salmu lẹ 127:4.) Kẹdẹdile ogá lẹ sọgan yin awuwlena po nuyizan voovo lẹ po, bọ tedidi yetọn sọgan sọ gbọnvo do, mọ wẹ ovi de nọ gbọnvo na devo do niyẹn. Enẹwutu, mẹjitọ lẹ dona yọ́n lehe yé na plọn ovi yetọn lẹ dopodopo do. Asu po asi po de to Israël egbezangbe tọn he penugo nado plọn ovi awe whẹ́n nado sẹ̀n Jehovah, dọ nuhe gọalọna yé dọmọ: “Mí nọ plọn Biblu hẹ ovi dopodopo do voovo.” Na nugbo tọn, tatọ́ whẹndo tọn dopodopo wẹ na de eyin vlavo nupinplọn to aliho enẹ mẹ yin dandan kavi yọnbasi.
JEHOVAH NA GỌALỌNA MÌ
21. Alọgọ tẹwẹ mẹjitọ lẹ sọgan donukun sọn Jehovah dè?
21 To whedelẹnu, mẹjitọ lẹ sọgan nọ mọdọ avùnnukundiọsọmẹnu he emi to pipehẹ lẹ húagbọ́ emi, ṣigba nunina de wẹ ovi lẹ yin sọn Jehovah dè. E nọ to gbesisọ mẹ to whepoponu nado gọalọ. E nọ wleawufo nado dotoaina odẹ̀ mẹjitọ lẹ tọn. Podọ e nọ na gblọndo na odẹ̀ enẹlẹ gbọn Biblu, owe mítọn lẹ gọna apajlẹ po ayinamẹ mẹjitọ devo he whèwhín to agun mẹ lẹ po tọn gblamẹ.
22. Etẹwẹ yin delẹ to onú dagbe hugan he mẹjitọ lẹ sọgan na ovi yetọn lẹ mẹ?
22 Mẹlẹ nọ saba dọ dọ ovi lẹ pinplọn whẹ́n yin azọ́n de he nọ yí owhe 20, ṣigba nado dọ hójọhó, ovi ma nọ whẹ́n na mẹjitọ lẹ gbede. Delẹ to onú dagbe hugan he yé sọgan na ovi yetọn lẹ mẹ wẹ owanyi, whenu po nuplọnmẹ sinai do Biblu ji po. Aliho voovo mẹ wẹ ovi dopodopo nọ yinuwa gando nuplọnmẹ lọ go te. Ṣigba, ovi susu he ko yin pinplọn gbọn mẹjitọ he yiwanna Jehovah lẹ dali wẹ tindo numọtolanmẹ mẹmẹyọnnu Joanna Mae he wá sọn Asie tọn nkọ, e dọmọ: “Eyin n’flin azọ́nplọnmẹ he n’mọyi sọn mẹjitọ ṣie lẹ dè, n’nọ dopẹ́ dọ yé domẹplọnlọ go e bosọ plọn mi nado yiwanna Jehovah. Yé ma ji mi poun, yé gọalọna mi nado tindo gbẹzan he do zẹẹmẹ.” (Howh. 23:24, 25) Klistiani livi susu wẹ nọ do numọtolanmẹ dopolọ.
OHÀN 59 Pà Jah hẹ Mi
^ huk. 5 Be asu po asi po he wlealọ de dona jivi dandan wẹ ya? Eyin mọwẹ, ovi nẹmu wẹ yé dona ji? Podọ nawẹ yé sọgan plọn ovi yetọn lẹ nado yiwanna Jehovah bosọ sẹ̀n ẹn gbọn? Hosọ ehe dọhodo apajlẹ egbezangbe tọn lẹ ji, bosọ dlẹnalọdo nunọwhinnusẹ́n Biblu tọn he sọgan gọalọ nado mọ gblọndo na kanbiọ enẹlẹ.
