Yanwle tangan nuhe tin to Deutelonomi 22: 25-27 mẹ tọn ma yin nado dohia dọ sunnu lọ hùwhẹ gba, na enẹ ko họnwun. Lẹndai osẹ́n ehe tọn wẹ nado dohia dọ yọnnu lọ yin homẹvọnọ. Doayi lẹdo kandai ehe tọn go.

Wefọ he jẹnukọn lẹ dọhodo sunnu de ji he zanhẹ yọnnu de “to tòdaho lọ mẹ,” yèdọ yọnnu de he ko dopà alọwle tọn na sunnu devo. Gbọnmọ dali, sunnu lọ hùwhẹ ayọdide tọn, na yọnnu he ko dopà alọwle tọn de nọ yin pinpọnhlan di mẹhe ko wlealọ. Bọ yọnnu lọ lo? “Yọnnu lọ ma dawhá to tòdaho lọ mẹ.” Eyin ewọ ko wàmọ wẹ, e họnwun dọ mẹdevo lẹ na ko sè awhágbe etọn bo wá gọalọna ẹn. Ṣigba, e ma dawhá. Enẹwutu, ewọ lọsu deayọ ga, bọ yé omẹ awe lẹ nọ yin whẹgbledo.—Deut. 22:23, 24.

Enẹgodo, Osẹ́n lọ dọhodo ninọmẹ he gbọnvo de ji dọmọ: “Ṣigba, eyin glemẹ wẹ sunnu lọ mọ viyọnnu lọ he ko dopà alọwle tọn na mẹde te bọ huhlọn sunnu lọ tọn hugan yọnnu lọ tọn bọ e zanhẹ ẹ, sunnu he zanhẹ ẹ lọ kẹdẹ wẹ dona kú, podọ hiẹ ma dona wà nudepope na viyọnnu lọ. Viyọnnu lọ ma waylando depope he jẹna okú. Whẹho ehe taidi whenue sunnu de fọ́n do sunnu hatọ etọn ji bo hù i. Na glemẹ wẹ sunnu lọ mọ ẹn te, bọ e dawhá, ṣigba mẹde ma sẹpọ finẹ nado whlẹn ẹn.”—Deut. 22:25-27.

To ninọmẹ ehe mẹ, yè sọgan dejido nuhe yọnnu lọ dọ go jẹ obá de mẹ. To linlẹn tẹ mẹ? Yè sọgan lẹndọ “e dawhá, ṣigba mẹde ma sẹpọ finẹ nado whlẹn ẹn.” Enẹwutu, ewọ ma hùwhẹ ayọdide tọn. Ṣigba, sunnu lọ hùwhẹ zanhẹmẹ gánnugánnu po ayọdide po tọn, na “huhlọn sunnu lọ tọn hugan yọnnu lọ tọn bọ e zanhẹ ẹ,” yèdọ hẹ yọnnu de he ko dopà alọwle tọn na sunnu devo.

Nalete, dile etlẹ yindọ lẹndai osẹ́n ehe tọn wẹ nado do homẹvọnọ-yinyin yọnnu lọ tọn hia, kandai lọ sọ dohia po gbesisọ po dọ sunnu lọ hùwhẹ zanhẹmẹ gánnugánnu po ayọdide po tọn. Mí sọgan deji dọ whẹdatọ lẹ na “dindona whẹho lọ kitokito,” bo basi nudide de to kọndopọ mẹ hẹ nujinọtedo he Jiwheyẹwhe ko hẹn họnwun bosọ zinnudeji whlasusu lẹ.—Deut. 13:14; 17:4; Eks. 20:14.